Choa̱ xi mangósòn‑kao̱ jngo chjo̱ta̱ xi kjojndì na̱xi̱n
13
Kꞌia̱ nga ti̱koi‑ni ni̱chrjin,
Jesús kitjo‑ni ya̱ ndꞌia,
kꞌoa̱ tsakꞌèjna ya̱ ndai ndáchikon.
2 Kꞌoa̱ nꞌión nkjìn chjo̱ta̱ koanxkótꞌa‑le̱;
kꞌoa̱ Jesús jaꞌasꞌen ya̱ jngo chitso,
tsakꞌèjna,
kꞌoa̱ ngatsꞌi chjo̱ta̱ tjió ya̱ ndai ndáchikon.
3 Kꞌoa̱ nkjìn kjoa̱ xi kao̱ choa̱ xi mangósòn‑kao̱ jngo kjoa̱ tsakakóya‑le̱,
kitsò‑le̱:
«Koe̱e‑ni,
jè chjo̱ta̱ xi bꞌéntjè tsojmì ntjè,
ki kjojndì na̱xi̱n.
4 Kꞌoa̱ kꞌia̱ nga tíkjojndì na̱xi̱n,
tjín kꞌa na̱xi̱n xi ya̱ ndia̱a kitsaondai;
kꞌoa̱ jaꞌai ni̱se kꞌoa̱ kiskine.
5 Tjín kꞌa na̱xi̱n xi ya̱ jin la̱jao̱ kitsao,
jña nga choa niꞌnde tjín;
kꞌoa̱ ndi̱to̱on chisò,
nga̱ tsì na̱nga̱ kijna nangi jña kitsaojin;
6 to̱nga kꞌia̱ nga kitjo tsꞌoí tsakaká,
kꞌoa̱ koiì kixì‑ni nga tsìn‑le̱ ja̱ma̱.
7 Kꞌoa̱ tjín kꞌa na̱xi̱n xi naꞌyá kitsaojin;
kꞌoa̱ jè naꞌyá koan‑ngꞌa kꞌoa̱ kisikꞌen‑ngi.
8 To̱nga tjín kꞌa na̱xi̱n xi nda chon nangi kitsaojin,
kꞌoa̱ tsaka‑le̱ to,
tjín xi jngo ciento̱,
tjín xi jàn‑kan,
kꞌoa̱ tjín xi kan‑tè to tsaka‑le̱ nga jngó jngó.
9 Jè xi tjín chrjoa̱ño xi nchrꞌoé‑ni,
nda kàtabasén‑ño».
Án‑ni nga Jesús kao̱ nkjìn choa̱ xi mangósòn‑kao̱ jngo kjoa̱ tsakjákao̱‑ni chjo̱ta̱
10 Kꞌia̱ jè chjo̱ta̱ xi ya̱ kòtꞌayàtꞌa‑le̱ tsakinchabꞌàkjátꞌa‑le̱ Jesús,
kitsò‑le̱:
—Án‑ni nga kao̱ choa̱ xi mangósòn‑kao̱ jngo kjoa̱ chjàkao̱‑ni chjo̱ta̱.
11 Jesús kinchja̱,
kitsò‑le̱:
—Nga̱ jòn tíbꞌaí‑no nga kàtamacho̱ya‑no ngayije kjoa̱ꞌma‑le̱ jña batéxoma jè xi tíjna ya̱ ngꞌajmi;
to̱nga jè xi ngìkꞌa lìkoi tsakꞌaì‑le̱ nga koa̱n‑cho̱ya‑le̱.
12 Nga̱ to̱ꞌya‑ni xi tjín‑le̱,
kꞌoa̱i‑le̱,
kꞌoa̱ tseè sa sꞌe̱‑le̱;
to̱nga jè xi tsìn‑le̱,
saꞌnda jme‑ni xi tjín‑le̱ to̱saà tjóꞌa‑le̱.
13 Koiì nga kao̱ choa̱ xi mangósòn‑kao̱ jngo kjoa̱ fàkao̱‑nia:
nga̱ ni̱nga tjiókòtsen lìkoi be,
kꞌoa̱ ni̱nga tjióbincháñon lìkoi nchrꞌoé,
kꞌoa̱ ni̱ macho̱ya‑jìnle̱.
14 Koiì choa̱ jè xi bakó nga kao̱ chjo̱ta̱ xo̱kjoan tíbitjosòn jme xi kitsò Isaías,
chjo̱ta̱ xi kinchja̱ya ngajao‑le̱ Niná,
kꞌia̱ nga kitsò:
“Kao̱o chrjoa̱ño koi̱nóꞌyà‑nio,
kꞌoa̱ lìkoi koa̱n‑cho̱ya‑no;
Kꞌoa̱ kao̱o xkon chótsen‑nio,
to̱nga lìkoi koa̱n‑tsen‑no.
15 Nga̱ jè ni̱ma̱‑le̱ chjo̱ta̱ xo̱kjoan jeè koan‑tàja,
Kꞌoa̱ kao̱ chrjoa̱ño lìkoi ti̱ nda nchrꞌoé‑ni.
Kꞌoa̱ jè xko̱n jeè tsakꞌéchjoàngi;
Jmé‑ni nga tsì koa̱n‑tsen‑ni‑le̱ kao̱ xko̱n;
Kꞌoa̱ nga tsì koi̱nchrꞌoé‑ni kao̱ chrjoa̱ño,
Kꞌoa̱ nga ni̱ kao̱ ni̱ma̱‑le̱ koa̱n‑cho̱ya‑nile̱,
Kꞌoa̱ nga tsì si̱ikꞌófayatꞌa‑nina,
kꞌoa̱ jmé‑ni nga tsì an sindayà‑nia”.a
16 »To̱nga jó to̱nda‑le̱ ya̱ ngixko̱n Niná jè xkoòn,
nga̱ matseèn‑le̱;
kꞌoa̱ jè chrjoa̱ño nga̱ nchrꞌoé.
17 Nga̱ ñaki kìxi̱i xi xin‑no,
nga nkjìn chjo̱ta̱ xi kinchja̱ya ngajao‑le̱ Niná kꞌoa̱ nkjìn chjo̱ta̱ kìxi̱ xi koanme‑le̱ nga tsabe jme xi tiꞌyao,
to̱nga lìkoi tsabe;
kꞌoa̱ nga koanme‑le̱ kinchrꞌoé jme xi tinoꞌyaò,
to̱nga lìkoi kinchrꞌoé.
Jesús kitsòya jótsò‑nile̱ choa̱ xi mangósòn‑kao̱ chjo̱ta̱ xi kjojndì na̱xi̱n
18 »Nda ti̱nchaño,
jótsò‑nile̱ jè choa̱ xi mangósòn‑kao̱ jè chjo̱ta̱ xi kjojndì na̱xi̱n:
19 Kꞌia̱ nga ꞌya xi nchrꞌoé én‑le̱ jè xi batéxoma ya̱ ngꞌajmi kꞌoa̱ lìkoi macho̱ya‑le̱,
faꞌai jè nai̱i,
kꞌoa̱ faꞌáxìn én xi kisꞌentjè ya̱ jin ni̱ma̱‑le̱ chjo̱ta̱.
Jé jè na̱xi̱n xi ya̱ ndai ndia̱a kitjojndì.
20 Kꞌoa̱ jè na̱xi̱n xi ya̱ kitjojndìjin la̱jao̱,
jè‑ní chjo̱ta̱ xi nchrꞌoé jè én‑le̱ xi batéxoma ya̱ ngꞌajmi,
nga to̱kꞌia̱ nchrꞌoé kao̱o kjoa̱tsjoa kjoétjaò;
21 to̱nga tsìn‑le̱ ja̱ma̱ xi na̱nga̱ kjio,
to̱ choatse ma‑le̱,
kꞌia̱ nga faꞌai kjoa̱ñꞌain,
axo̱ kꞌia̱ nga tjín xi fìtje̱n‑ngike‑le̱ xi to̱ tꞌatsꞌe̱ én‑le̱ Niná,
ti̱ꞌa binchaxìn‑nile̱ én‑le̱ Niná.
22 Jè na̱xi̱n xi ya̱ jin naꞌyá kitjojndìjin,
jè‑ní chjo̱ta̱ xi nchrꞌoé én‑le̱ xi batéxoma ya̱ ngꞌajmi,
to̱nga jè kjoa̱nìkjaójin xi tjín i̱ soꞌnde kꞌoa̱ jè kjoa̱chꞌàna̱cha̱‑le̱ kjoa̱nchi̱ná síkꞌen‑ngi jè én,
kꞌoa̱ lìkoi ba‑le̱ to.
23 To̱nga jè na̱xi̱n xi ya̱ kitjojndìjin jña nda chon nangi,
jè‑ní chjo̱ta̱ xi nchrꞌoé én‑le̱ xi batéxoma ya̱ ngꞌajmi kꞌoa̱ macho̱ya‑le̱,
kꞌoa̱ ba‑le̱ to;
tjín xi jngo ciento̱,
tjín xi jàn‑kan,
kꞌoa̱ tjín xi kan‑tè ba‑le̱ nga jngó jngó».
Choa̱ xi mangósòn‑kao̱ xka̱ jñá xi jo trigo kjoan xi kisꞌentjèjin trigo
24 Ngìjngo choa̱ xi mangósòn‑kao̱ jngo kjoa̱,
tsakakóya‑le̱,
kitsò:
«Jña batéxoma xi tíjna ngꞌajmi ya̱a mangósòn‑kao̱ jngo chjo̱ta̱ xi nda na̱xi̱n tsakꞌéjndí ya̱ jin nangi‑le̱;
25 to̱nga kꞌia̱ nga kjiofè ngatsꞌi,
jaꞌai jè xi tsì nda fìkao̱ kꞌoa̱ tsakꞌéjndìjin ya̱ trigo na̱xi̱n‑le̱ jñá xi jo trigo kjoan,
kꞌoa̱ ki.
26 Kꞌoa̱ kꞌia̱ nga koan‑ngꞌa jè trigo kꞌoa̱ tsaka‑le̱ to,
kꞌoa̱ati̱ kꞌia̱ koan‑tsen jè jñá xi jo trigo kjoan.
27 Kꞌoa̱ kꞌia̱ jè cho̱ꞌnda jaꞌaikòn‑le̱ nai‑le̱,
kitsò‑le̱:
“Nai,
a tsí na̱xi̱n nda‑ná xi tsakꞌéjndì ya̱ jin nangi‑li̱,
jñá jaꞌai‑ni jè jñá xi jo trigo kjoan”.
28 Jè nai‑le̱ kitsò:
“Jngo‑jìn xi chꞌaosꞌìn fìkao̱‑na xo̱ kisꞌin”.
Kꞌoa̱ jè cho̱ꞌnda kitsò‑le̱:
“A meè‑lìni nga koan‑ngín chjònaì‑ji̱n jñá xo̱kjoan”.
29 Jè nai‑le̱ kitsò:
“Mai,
tsà mai kꞌia̱ nga tichjonaò jè jñá xi jo trigo kjoan,
kꞌoa̱ti̱ ya̱ tjónèkao̱‑no jè trigo.
30 To̱saà to̱ kàtamangꞌa‑là nga jngó jngó,
saꞌnda nga sꞌe̱xkó;
kꞌoa̱ kꞌia̱ ni̱chrjin nga sꞌe̱xkó aàn i̱ xín‑le̱ jè cho̱ꞌnda xi kꞌoe̱exkó:
‹Koi títjòn tꞌèxkó jè jñá xi jo trigo kjoan,
kꞌoa̱ xki̱ jté tjanꞌión,
jmé‑ni nga kàtatì‑ni;
to̱nga jè trigo ya̱a ti̱nchatjaò ya̱ ningꞌa‑na̱›”».
Choa̱ xi mangósòn‑kao̱ na̱xi̱n‑le̱ mostaza
31 Jesús ngìjngo choa̱ xi mangósòn‑kao̱ jngo kjoa̱,
kitsòya‑le̱,
kitsò:
«Jña batéxoma xi tíjna ngꞌajmi ya̱a mangósòn jè na̱xi̱n‑le̱ mostaza,
xi kiskoé jngo chjo̱ta̱ kꞌoa̱ tsakꞌéntjèjin ya̱ jin nangi‑le̱;
32 xi ñaki kìxi̱ jè‑ní na̱xi̱n xi ngìsa̱ sa ꞌndí kji ti̱kꞌoa̱‑ni ngayije na̱xi̱n;
to̱nga kꞌia̱ nga je mangꞌa,
jé xi ngìsa̱ sa ngꞌa ma ti̱kꞌoa̱‑ni ngayije xka̱ntjè xi xá sꞌentjè‑ni,
kꞌoa̱ yá ngꞌa ma,
saꞌnda faꞌaiì ni̱se kꞌoa̱ ya̱a yántsja bꞌéndaꞌà tjé‑le̱».
Jesús kitsòya tꞌatsꞌe̱ choa̱ xi mangósòn‑kao̱ na̱ꞌyo̱san
33 Jesús ngìjngo choa̱ xi mangósòn‑kao̱ jngo kjoa̱ tsakakóya‑le̱,
kitsò‑le̱:
«Jña batéxoma xi tíjna ngꞌajmi ya̱a mangósòn‑kao̱ jè na̱ꞌyo̱san xi kiskoé jngo chjo̱on,
kꞌoa̱ ya̱ kisikꞌéjnajin jàn niso skoa̱n nio̱xtìla̱ jo saꞌnda nga tsakintjao̱ ngayije».
Josꞌìn Jesús síchjén jè choa̱ xi mangósòn‑kao̱ jngo kjoa̱
34 Ngayije én jè kao̱o choa̱ xi mangósòn‑kao̱ jngo kjoa̱ tsakakóya‑le̱ Jesús jè chjo̱ta̱,
kꞌoa̱ tsà tsì kao̱ choa̱ xi mangósòn‑kao̱ jngo kjoa̱ lìkoi tsakakóya‑le̱;
35 jmé‑ni nga kitjosòn‑ni én xi kiski jè chjo̱ta̱ xi kinchja̱ya ngajao‑le̱ Niná,
kꞌia̱ nga kꞌoa̱sꞌìn kitsò:
«Kao̱o nkjìn choa̱ xi mangósòn‑kao̱ kjoa̱ koi̱nchja̱ jè ndso̱ꞌba;
Koinchjà sòn‑tsen‑nià kjoa̱ xi tjióꞌmà saꞌnda nga kisꞌenda soꞌnde».b
Jesús kitsòya jótsò‑nile̱ choa̱ xi mangósòn‑kao̱ jñá xi jo trigo kjoan
36 Kꞌia̱ nga Jesús je kisixan‑tꞌa chjo̱ta̱‑nkjìn,
jaꞌasꞌen ya̱ ndꞌia jña tsakꞌèjna‑ni;
kꞌoa̱ jè chjo̱ta̱ xi ya̱ kòtꞌayàtꞌa‑le̱ jaꞌainchrꞌoè,
kitsò‑le̱:
—Tꞌìnya‑naíji̱n jmé xi tsòya‑ni jè choa̱ xi mangósòn‑kao̱ jñá xi jo trigo kjoan xi kisꞌentjè ya̱ jin nangi.
37 Kinchja̱ Jesús,
kitsò‑le̱:
—Jè xi nda na̱xi̱n bꞌéntjè,
jé ꞌNdí‑le̱ Chjo̱ta̱.
38 Jè nangi jña sꞌentjè,
jè soꞌnde;
jè na̱xi̱n xi nda,
jé chjo̱ta̱ xi tsꞌe̱ jña batéxoma xi tíjna ngꞌajmi,
jè jñá xi jo trigo kjoan,
jé xti‑le̱ nai̱i.
39 Jè xi chꞌao sꞌìn fìkao̱ xi kiskojndì na̱xi̱n,
jé nai̱i;
kꞌia̱ nga sꞌe̱xkó trigo kꞌia̱a nga je me kjoe̱tꞌa soꞌnde;
kꞌoa̱ jè chjo̱ta̱ xi bꞌéxkó trigo,
jé cho̱ꞌnda ngꞌajmi.
40 Josꞌìn nga tjonè jè jñá xi jo trigo kjoan,
kꞌoa̱ ya̱ jin lꞌí tì,
kꞌoa̱ati̱ sꞌìn koa̱n kꞌia̱ nga je me kjoe̱tꞌa jè soꞌnde.
41 Jè ꞌNdí‑le̱ Chjo̱ta̱ si̱ikasén jè cho̱ꞌnda ngꞌajmi‑le̱,
kꞌoa̱ kjoa̱ꞌàxìn ya̱ jña batéxoma xi tíjna ya̱ ngꞌajmi,
ngatsꞌi xi síkajngijé xikꞌa kao̱ xi chꞌao tjiósꞌín,
42 kꞌoa̱ ya̱a nga̱já lꞌí xi tsìkꞌia bitsꞌao si̱kꞌatsaojin;
ya̱ skíꞌndiá kꞌoa̱ ya̱ jtsao̱kjao ni̱ꞌño̱.
43 Kꞌia̱ jè chjo̱ta̱ kìxi̱,
koa̱nfate joni tsà tsꞌoí,
ya̱ jña batéxoma jè Nꞌai‑le̱.
Jè xi tjín chrjoa̱‑ño xi nchrꞌoé‑ni,
nda kàtabasén‑ño.
Choa̱ xi mangósòn‑kao̱ tao̱n xi tíjnaꞌma ya̱ jin nangi
44 »Kꞌoa̱ xi ngìjngo‑ni,
jña batéxoma xi tíjna ngꞌajmi ya̱a mangósòn‑kao̱ tao̱n xi tíjnaꞌma ya̱ jngo nangi tsojmìntjè,
xi jngo chjo̱ta̱ masjai‑le̱,
kꞌoa̱ síkꞌéjnaꞌma ngìjngokꞌà;
kꞌoa̱ nꞌión matsjoa‑le̱ xi tꞌatsꞌe̱ tao̱n xi kisoko‑le̱ kꞌoa̱ fìkaténa ngayije jme xi tjín‑le̱,
kꞌoa̱ batse nangi tsojmìntjè xo̱kji.
Lao̱ fate xi na̱ská na̱kjoan xi nꞌión chjí
45 »Kꞌoa̱ati̱ sꞌìn jña batéxoma xi tíjna ngꞌajmi ya̱a mangósòn‑kao̱ jngo chjo̱ta̱ xi tsojmì baténasòn xi básjai lao̱ fate xi na̱ská na̱kjoan,
46 kꞌia̱ nga je koansjai jngo‑le̱ lao̱ fate xi na̱ská na̱kji,
ki kꞌoa̱ tsakaténa ngayije jme xi tjín‑le̱,
kꞌoa̱ tsakatse.
Choa̱ xi mangósòn‑kao̱ na̱ꞌya xi tjoé‑ni jti̱
47 »Kꞌoa̱ti̱ sꞌìn‑ni,
jña batéxoma jè xi tíjna ya̱ ngꞌajmi ya̱a mangósòn‑kao̱ jngo na̱ꞌya xi tjoé‑ni jti̱,
xi nìkꞌatje̱njin ya̱ ndáchikon,
xi tjoeè‑le̱ to̱jotjín jko̱ya‑ni jti̱;
48 kꞌoa̱ kꞌia̱ nga je tse na̱ꞌya,
jè chjo̱ta̱ fìkao̱ ya̱ ndai ndáchikon;
kꞌoa̱ ya̱ batiò nga faꞌájin jti̱,
jè xi nda kjoan binchá ya̱ ni̱si̱nyá kꞌoa̱ jè xi chꞌao kjoan síkꞌatsao.
49 Kꞌoa̱asꞌìn koa̱n kꞌia̱ nga je me kjoe̱tꞌa soꞌnde;
kjoa̱ꞌaí jè cho̱ꞌnda ngꞌajmi,
kꞌoa̱ kjoa̱ꞌàxìn jè chjo̱ta̱ chꞌaokjoan ya̱ jin‑le̱ chjo̱ta̱ xi kìxi̱,
50 kꞌoa̱ jè chjo̱ta̱ xi chꞌaokjoan ya̱a si̱ikꞌatsaojin ya̱ nga̱já lꞌí xi tsìkꞌia bitsꞌao;
ya̱a skíꞌndiá kꞌoa̱ ya̱a jtsao̱kjao ni̱ꞌño̱.
Kjoa̱nchi̱ná xi nchatjaò xi chjo̱tse̱ kao̱ xi jchá
51 Jesús kitsò‑le̱ chjo̱ta̱ xi ya kòtꞌayàtꞌa‑le̱:
—A jeè kàmacho̱ya‑no ngayije kjoa̱ jè‑bi̱.
Ngatsꞌi kitsò:
—Jaon,
Nai.
52 Jesús kitsò‑le̱:
—Koiì nga ngatsꞌi chjo̱ta̱ xi kji kjoa̱téxoma‑le̱ Niná xi kiski Moisés,
xi kòtꞌayà tꞌatsꞌe̱ jña batéxoma xi tíjna ya̱ ngꞌajmi,
ya̱a mangósòn‑kao̱ jngo chjo̱ta̱ xi nai‑le̱ ndꞌia ma,
xi bꞌasje kjoa̱nchi̱ná xi nchatjaò‑le̱ xi chjo̱tse̱ kao̱ xi jchá kꞌoa̱ síkꞌabí.
Kꞌia̱ nga jè chjo̱ta̱ xi Nazaret tsꞌe̱ lìkoi koan‑kjaín‑le̱
53 Kꞌoa̱koan kꞌia̱ nga Jesús je tsakakóya ngayije choa̱ xo̱kjoan xi mangósòn‑kao̱ jngo kjoa̱,
ki‑ni ya̱.
54 Kꞌia̱ nga kichò ya̱ ꞌnde‑le̱,
tsakakóya ya̱ ndꞌia jña maxkia̱ xo̱n‑le̱ Niná xi tsꞌe̱ chjo̱ta̱ judío xi ya̱ tsꞌe̱,
ñaki to̱kꞌoa̱a koan‑le̱ chjo̱ta̱,
kꞌoa̱ kitsò:
—Jñá kikjaꞌá‑ni xo̱kji jè kjoa̱‑isen‑tokòn xi tjín‑le̱ kao̱ jè kjoa̱xkón xi ma‑le̱ sꞌín.
55 A tsí tsà jè xo̱kji ti‑le̱ chji̱ne̱yá,
a tsí tsà María ꞌmì na̱‑le̱.
Kꞌoa̱ a tsí tsà ndsꞌe̱ ma Jacobo,
José,
Simón,
kao̱ Judas.
56 A tsí tsà i̱ tjiókao̱‑ná ngatsꞌi yánchjín ndichja,
jñá fìkjaꞌá‑nile̱ ngayije kjoa̱ jè‑bi̱.
57 Kꞌoa̱ nꞌión koanjti‑le̱ chjo̱ta̱ xi tꞌatsꞌe̱.
To̱nga Jesús kitsò‑le̱:
—Tsìn jngo chjo̱ta̱ xi nchja̱ya ngajao‑le̱ Niná xi tsì ꞌyaxkón ngakijndà ꞌnde,
to̱saà ya̱ na̱xi̱nandá‑le̱ kao̱ ya̱ ndꞌia‑le̱ nga ni̱ꞌya‑jìn xi bexkón.
58 Kꞌoa̱ lìkoi nkjìn kjoa̱xkón kisꞌin ya̱,
xi to̱ tꞌatsꞌe̱ nga̱ tsì koan‑kjaín‑le̱ chjo̱ta̱ xi ya̱ tsꞌe̱.