3 Nga̱ jé Herodes Antipas tsakꞌénè nga kindoa Juan,

kꞌoa̱ nga nꞌó ki̱cha̱ tàja kisꞌetꞌanꞌión‑ni kꞌoa̱ nga ndo̱yá kinìkꞌéjnaꞌya,

xi to̱ tꞌatsꞌe̱ jme xi kisꞌin Herodes Antipas kao̱ Herodías,

chjo̱on‑le̱ Felipe xi ndsꞌe̱ ma Herodes Antipas;

4 nga̱ Juan kitsò‑le̱ Herodes Antipas:

«Lìkoi tiꞌndè‑lì nga ji koi̱xan‑koai̱ chjo̱on‑le̱ ndsꞌai».

5 Kꞌoa̱ Herodes Antipas koanmeè‑le̱ nga kisikꞌen Juan,

to̱nga jè chjo̱ta̱ kitsokjòn‑le̱;

nga̱ jè chjo̱ta̱ koan‑kjaín‑le̱ nga Juan jngoò chjo̱ta̱ xi kinchja̱ya ngajao‑le̱ Niná.

6 To̱nga kꞌia̱ nga kisꞌejna sꞌoí,

kꞌia̱ nga je‑le̱ nó Herodes Antipas,

jè tsòti‑le̱ Herodías kitè ya̱ jin ngabasen‑le̱ chjo̱ta̱,

kꞌoa̱ Herodes nꞌión nda kisasen‑le̱,

7 kꞌoa̱ Niná tsakasèn‑nꞌión‑ni nga kitsjoa‑le̱ én‑le̱,

nga kitsò nga tsjoá‑le̱ ngayije xi si̱ijé‑le̱.

8 To̱nga jè na̱‑le̱ tsòti,

títjòn tsakincháꞌa kꞌoa̱ kꞌia̱ kitsò jè tsòti:

«Tꞌai̱ kjoà‑naí ndꞌai̱ jè jko̱ Juan xi Kanísꞌen‑ngindá,

jngo chroa̱ ti̱kꞌéjnaya‑naí».

9 Kꞌia̱ jè Herodes Antipas koanba‑le̱;

to̱nga to̱ tꞌatsꞌe̱ nga Niná tsakasèn‑nꞌión‑ni nga kitsjoa én‑le̱,

kꞌoa̱ nga chjo̱ta̱ tjiótꞌakao̱ yámìxa̱,

tsakꞌénè nga kàtabꞌaì‑le̱ tsòti jko̱ Juan,

10 kꞌoa̱ tsakꞌénè nga kàtabichàsin Juan ya̱ ya ndo̱yá.

11 Kꞌoa̱ jaꞌai‑le̱ jko̱ Juan,

tíjnaya jngo chroa̱,

kꞌoa̱ tsakꞌaì‑le̱ jè tsòti;

kꞌoa̱ jè tsòti kitsjoa‑le̱ na̱‑le̱.

12 Kꞌia̱ jaꞌai jè chjo̱ta̱ xi ya̱ kiskòtꞌayàtꞌa‑le̱ Juan,

kꞌoa̱ kiskoé yao‑le̱ kꞌoa̱ tsakꞌéñe;

ki,

kꞌoa̱ kitsòya‑le̱ Jesús jè kjoa̱ xi koan.

13 Kꞌia̱ nga je tsakꞌìnya‑le̱ Jesús nga je kinìkꞌen Juan xi Kanísꞌen-ngindá,

tsakasènxìn‑ni ya̱;

kiya jngo chitso ya̱ jngo ꞌnde tꞌaxìn‑tꞌa kꞌoa̱ jña kjin‑tꞌa;

kꞌoa̱ kꞌia̱ nga kisꞌejin‑le̱ chjo̱ta̱ kitje̱n‑ngi‑le̱,

ki‑ni ndso̱ko̱ nga kinchroa‑ni ngakijndà na̱xi̱nandá‑nꞌión.

14 Kꞌia̱ nga kitjojen‑ni chitso Jesús,

tsabe chjo̱ta̱‑nkjìn,

kꞌoa̱ koanma̱ke,

kꞌoa̱ kisindaya jokjoan xi chꞌin tjín‑le̱.

15 Kꞌia̱ nga je kjimanjiòn,

jè chjo̱ta̱ xi ya̱ kòtꞌayàtꞌa‑le̱ Jesús tsakinchabꞌàkjátꞌa‑le̱,

kitsò‑le̱:

—I̱‑bi̱ to̱ ꞌnde kjitia‑ní kꞌoa̱ jeè kjimaꞌña̱,

ti̱xan‑tꞌai jè chjo̱ta̱‑nkjìn jmé‑ni nga kàtafì‑ni ya̱ jña tjín na̱xi̱nandá-ꞌndí,

kꞌoa̱ kàtabatse‑le̱ yao‑le̱ jme xi koa̱kje̱n.

16 Jesús kitsò‑le̱:

—Lìkoi tjínè‑le̱ nga ya̱ koai̱;

jòn tꞌai̱‑lao̱o xi koa̱kje̱n.

17 Kꞌoa̱ jè chjo̱ta̱ xi ya̱ kòtꞌayàtꞌa‑le̱ kitsò:

—Lìjme xi tjín‑naji̱n i̱‑bi̱,

to̱ aòn ma nio̱xtìla̱‑na̱ji̱n kꞌoa̱ to̱ jaò ma jti̱ xi tjió‑naji̱n.

18 Jesús kitsò‑le̱:

—Nchroákao̱‑naó i̱‑bi̱.

19 Kꞌia̱ tsakꞌénè‑le̱ chjo̱ta̱‑nkjìn nga kàtabatiònè jñá;

kꞌoa̱ kiskoé jè nio̱xtìla̱ xi aòn kao̱ jè jti̱ xi jaò,

kꞌoa̱ kiskòtsen ngꞌà,

kitsjoa‑le̱ kjoa̱nda Niná,

kꞌoa̱ kisixkoa̱ nio̱xtìla̱ kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱,

kꞌoa̱ jè chjo̱ta̱ xi ya̱ kòtꞌayàtꞌa‑le̱ kisikꞌabí‑le̱ chjo̱ta̱‑nkjìn.

20 Kꞌoa̱ tsakjèn ngatsꞌi chjo̱ta̱,

kꞌoa̱ koan‑ski;

kꞌoa̱ jè chjo̱ta̱ xi kòtꞌayàtꞌa‑le̱ Jesús tsakꞌéxkó jè xkoa̱ xi kinjèn‑ngi,

kꞌoa̱ tejaò ni̱si̱nyá koan.

21 Kꞌoa̱ jè chjo̱ta̱ xi tsakjèn aòn‑la̱ jmi ma‑ni xi to̱ chjo̱ta̱ xꞌi̱n,

kꞌoa̱ lìkoi koan‑xki̱kao̱ jè yánchjín kao̱ xti.

22 Xi je koan,

Jesús tsakꞌénè‑le̱ chjo̱ta̱ xi ya̱ kòtꞌayàtꞌa‑le̱ nga kàtafaꞌasꞌen ya̱ chitso jmé‑ni nga tje̱n kàtafìtítjòn‑nile̱ saꞌnda ya̱ xingoa‑nile̱ ndai ndáchikon,

kꞌoa̱ Jesús ya̱a‑là tísíxan‑tꞌa chjo̱ta̱‑nkjìn.

23 Kꞌia̱ nga je koan kisixan‑tꞌa chjo̱ta̱‑nkjìn,

kimi ya̱ sòn nindo,

to̱jè kikjákao̱ Niná;

kꞌoa̱ kꞌia̱ nga je koan‑njiòn to̱ jé tíjna ya̱ sòn nindo.

24 Kꞌoa̱ jè chitso xi tjióyà jè chjo̱ta̱ xi ya̱ kòtꞌayàtꞌa‑le̱ Jesús,

jeè ya̱ tje̱nsòn ngabasen‑le̱ ndáchikon,

kꞌoa̱ jè nganꞌión‑le̱ ndáchikon títsjòn‑tsjá,

nga̱ jè ntjao̱-nꞌión ya̱ tínchroánè‑le̱.

25 To̱nga kꞌia̱ nga sꞌa̱ njiònya sa,

Jesús tsòꞌbasòn ya̱ ndáchikon nga jaꞌaitje̱n‑ngi‑le̱ chjo̱ta̱ xi ya̱ kòtꞌayatꞌa‑le̱.

26 Kꞌoa̱ kꞌia̱ nga tsabe nga Jesús tsòꞌbasòn ndáchikon,

ñaki chixòjen kjoa̱faꞌaitsjen‑le̱,

kitsò:

—Jngo se̱n tíjna ján.

Kꞌoa̱ nꞌión tsakꞌéjta ngatsꞌi nga kitsokjòn.

27 To̱nga Jesús ti̱ꞌa kinchja̱‑kao̱o‑ni,

kitsò‑le̱:

—¡Nꞌión tꞌia̱on tokòn;

an‑nià,

alì bijkon‑jiòn!

28 Kꞌia̱ Pedro kinchja̱,

kitsò‑le̱:

—Nai,

tsà ji‑nì,

kꞌoa̱si nga koa̱n kjoísoàn ndáchikon saꞌnda jña tijnai.

29 Kꞌoa̱ Jesús kitsò‑le̱:

—Nchroaí.

Kꞌoa̱ Pedro kitjojen ya̱ chitso,

tsakꞌamjesòn ndáchikon jmé‑ni nga koai̱chrꞌoè‑ni Jesús.

30 To̱nga kꞌia̱ nga tsabe nga nꞌión tífaꞌa jè ntjao̱,

kitsokjòn;

kꞌoa̱ tsakꞌétsꞌia̱ nga kiskasꞌen‑ngindá,

kiskiꞌndiáxá,

kitsò:

—¡Nai,

ti̱se̱n‑kao̱‑naí!

31 Kjitꞌa nangi tsakjén ntsja Jesús,

kitsoanꞌión Pedro,

kꞌoa̱ kitsò‑le̱:

—¡Chjo̱ta̱ xi to̱ choa makjaín‑lì!

Án‑ni nga jaò kàbꞌè‑síni tokoìn.

32 Kꞌoa̱ kꞌia̱ nga jaꞌasꞌen ya̱ chitso Jesús kao̱ Pedro,

koan‑xa̱n‑ni jè ntjao̱.

33 Kꞌoa̱ jè xi tjióyà ya̱ chitso,

jaꞌai kꞌoa̱ tsabexkón Jesús,

kitsò:

—Xi ñaki kìxi̱ ji‑nì ꞌNdí‑le̱ Niná.

34 Kꞌoa̱ kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ je jaꞌatojin ndáchikon,

jaꞌai ya̱ ꞌnde xi tíjnachrian ya̱ na̱xi̱nandá‑ꞌndí Genesaret.

35 Kꞌia̱ nga jè chjo̱ta̱ xi ya̱ ꞌnde‑le̱ tsabexkon Jesús,

kisikasén én ngakijndà jngotjondai‑le̱ ꞌnde xo̱kji,

kꞌoa̱ jaꞌaichanìtꞌa‑le̱ ngatsꞌi xi chꞌin tjín‑le̱;

36 kꞌoa̱ bꞌétsꞌoa‑le̱ nga kàtatsjoáꞌnde‑le̱ nga si̱ikao̱ ni̱nga to̱ tjòn‑le̱ najño xi bꞌèjnajté;

kꞌoa̱ ngatsꞌi chjo̱ta̱ xi kisikao̱ najño‑le̱ Jesús,

koan‑ndaya.