—Jñá‑ni koi̱ndá nio̱xtìla̱ xi koa̱kje̱n chjo̱ta̱ xo̱chon.

6 To̱nga to̱ kiskòtꞌayàkao̱o nga kꞌoa̱kitsò‑le̱,

nga̱ Jesús jeè be jme‑ni xi sꞌi̱in.

7 Felipe kitsò‑le̱:

—Tsà jaò ciento̱ chjí ni̱chrjin‑le̱ cho̱ꞌnda tjín‑ni nio̱xtìla̱ xi koi̱ndá‑leè,

lìkoi koa̱sòn‑ni ni̱nga to̱ choa choa skoé nga jngó jngó.

8 Kꞌia̱ jngo chjo̱ta̱ xi ya̱ kòtꞌayàtꞌa‑le̱ Jesús,

xi Andrés ꞌmì,

ndsꞌe̱ Simón Pedro,

kitsò‑le̱:

9 —Tíjnaà i̱ jngo ti xi aòn nio̱xtìla̱ xi chao skoa̱n‑le̱ cebada koanda‑ni kꞌoa̱ jaò jti̱ tjió‑le̱;

to̱nga jótjín koa̱n‑nile̱ xo̱ na̱tjín chjo̱ta̱ xo̱ síchon.

10 Kꞌia̱ Jesús kitsò:

—Ti̱katió ngatsꞌi chjo̱ta̱.

Kꞌoa̱ ya̱ ꞌnde jè nꞌión li̱ji̱ tjín;

kꞌoa̱ ya̱ tsakatiò chjo̱ta̱,

aòn‑la̱ jmi ma‑ni xi to̱ chjo̱ta̱ xꞌi̱n.

11 Kꞌoa̱ kiskoé Jesús nio̱xtìla̱,

kꞌia̱ nga je kitsjoa‑le̱ kjoa̱nda Niná,

kisikꞌabí‑le̱ chjo̱ta̱ xi ya̱ kòtꞌayàtꞌa‑le̱,

kꞌoa̱ jè chjo̱ta̱ xi ya̱ kòtꞌayàtꞌa‑le̱ kisikꞌabíjin‑le̱ jè chjo̱ta̱‑nkjìn xi ya̱ tjió;

kꞌoa̱ti̱sꞌìn kitsjoa‑le̱ jti̱ jotjín koanme‑le̱ nga jngó jngó.

12 Kꞌoa̱ kꞌia̱ nga je koanski chjo̱ta̱‑nkjìn,

Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Tꞌèxkó xkoa̱ xi kàbꞌangi,

jmé‑ni nga tsì tsà jme xi kàtabitsón‑ni.

13 Tsakꞌéxkó‑ni jè xi kinjèn‑ngi,

kꞌoa̱ tejaò ni̱si̱nyá koan jè xkoa̱ xi tsꞌangi‑le̱ nio̱xtìla̱ xi aòn,

kꞌia̱ nga je koan tsakjèn ngatsꞌi chjo̱ta̱.

14 Ngatsꞌi chjo̱ta̱‑nkjìn kꞌia̱ nga tsabe jè choa̱ xi kisꞌin Jesús,

kitsò:

—Jè chjo̱ta̱ xo̱kji ñaki kjoa̱kìxi̱i nga jè chjo̱ta̱ xi Niná nchja̱ya ngajao‑le̱,

jè xi tjín‑ni nga kjoa̱ꞌaí i̱ soꞌnde.

15 To̱nga kꞌia̱ koanjin‑le̱ Jesús nga chjo̱ta̱‑nkjìn me‑le̱ nga kjoa̱nꞌión kjoa̱ꞌaíkꞌá,

nga chjo̱ta̱xá ngajko̱‑le̱ si̱ikao̱,

Jesús tsakasènxìn ngìndia,

kimi to̱jè ya̱ nindo kꞌoa̱ ya̱ tsakꞌèjna.

16 Kꞌia̱ nga je kjimaꞌña̱,

chjo̱ta̱ xi ya̱ kòtꞌayàtꞌa‑le̱ Jesús kijen ya̱ jña kijna ndáchikon,

17 kꞌoa̱ jaꞌasꞌen jngo chitso,

kꞌia̱ nga tjiófaꞌatojin ndáchikon nga tjiófì ya̱ na̱xi̱nandá‑nꞌión Capernaum,

jeè koan‑njiòn,

kꞌoa̱ Jesús lìkoi ya̱ tje̱n‑kao̱.

18 Kꞌoa̱ ya̱ sòn ndáchikon jngo ntjao̱-nꞌión jaꞌai,

kꞌoa̱ jè nandá nꞌión kisikjan.

19 Kꞌia̱ jè chjo̱ta̱ xi ya̱ kòtꞌayàtꞌa‑le̱ je‑la̱ aòn jmi kꞌoa̱ tsà jaon jmi metro kichòkao̱ chitso nga tjiókjen‑ndá‑le̱ ya̱ sòn ndáchikon,

tsabe nga Jesús ya̱ tsòꞌbasòn ndáchikon,

nga tínchroánchrꞌoè chitso;

kꞌoa̱ nꞌión kitsokjòn chjo̱ta̱ xi ya̱ kòtꞌayàtꞌa‑le̱ Jesús.

20 To̱nga Jesús kitsò‑le̱:

—An‑nià;

alì bijkon‑jiòn.

21 Kꞌia̱ jè chjo̱ta̱ xi ya̱ kòtꞌayàtꞌa‑le̱ kao̱ kjoa̱tsjoa kisikꞌasꞌen ya̱ chitso,

kꞌoa̱ kjoan kichò chitso ya̱ ꞌnde jña tjiófì.

22 Xi koan‑nchaon‑ni,

jè chjo̱ta̱‑nkjìn xi tjió ya̱ xingoa‑nile̱ ndáchikon tsabe nga tsìn sa chitso xi kja̱ꞌaí,

nga to̱ jngo ma‑ni xi ya̱ tíjna,

to̱koi xi kiya chjo̱ta̱ xi ya̱ kòtꞌayàtꞌa‑le̱ Jesús,

to̱nga Jesús lìtsà ya̱ jaꞌasꞌen‑kao̱,

to̱ jé chjo̱ta̱ xi ya̱ kòtꞌayàtꞌa‑le̱ ki.

23 To̱nga jaꞌai kꞌa chitso xi ya̱ na̱xi̱nandá‑nꞌión Tiberias jaꞌai‑ni,

ya̱ jaꞌaichrian jña‑ni tsakjèn nio̱xtìla̱ chjo̱ta̱‑nkjìn kꞌia̱ nga Jesús je kitsjoa‑le̱ kjoa̱nda Niná.

24 Kꞌia̱ nga je tsabe chjo̱ta̱‑nkjìn nga Jesús lìtsà ya̱ tíjna kꞌoa̱ ni̱ jè‑jìn chjo̱ta̱ xi ya̱ kòtꞌayàtꞌa‑le̱ ya̱ tjió,

jè chjo̱ta̱ xo̱kjoan jaꞌasꞌen chitso kꞌoa̱ ki ya̱ na̱xi̱nandá‑nꞌión Capernaum,

nga tjióbásjai Jesús.

25 Kꞌoa̱ kꞌia̱ nga jè chjo̱ta̱‑nkjìn je koansjai‑le̱ Jesús nga ya̱ tíjna ya̱ xingoa‑le̱ ndáchikon,

kitsò‑le̱:

—Ji xi bakòyai,

kꞌiá jàꞌai̱ i̱.

26 Kinchja̱ Jesús kꞌoa̱ i̱ kitsò‑le̱:

—Ñaki kìxi̱i xi xin‑no,

nga lìtsà koi tifasjai‑ninaó nga nkjìn choa̱ tsaꞌyao,

to̱sa̱a koi nga tsakichio nio̱xtìla̱ kꞌoa̱ koanskio.

27 Ti̱xaó,

to̱nga lìtsà koi nìxá‑nio tꞌatsꞌe̱ jè tsojmì xi ma chine,

xi bitsón,

to̱saà ti̱xaó tꞌatsꞌe̱ tsojmì xi ma chine,

xi tsì bitsón,

xi tsjoá kjoa̱bijnachon xi tsìkꞌia fetꞌa,

nga̱ koiì jè xi tsjoá‑no jè ꞌNdí‑le̱ Chjo̱ta̱;

nga̱ jè Niná jè Nꞌai koiì xá kiskoéjin‑ni.

28 Kꞌia̱ jè chjo̱ta̱ kitsò‑le̱:

—Jmé xi machjén nga sꞌia̱in‑ji̱n,

nga si̱kitjosoìn‑ji̱n jè xá‑le̱ Niná.

29 Kinchja̱ Jesús kꞌoa̱ i̱ kitsò‑le̱:

—Koiì jè xá xi tsꞌe̱ Niná,

nga kàtamakjaín‑no tꞌatsꞌe̱ xi jè kisikasén.

30 Kꞌia̱ jè chjo̱ta̱ kitsò‑le̱:

—Jmé choa̱ xi ma‑lì nꞌiaìn jmé‑ni nga jcha̱‑niji̱n kꞌoa̱ koa̱n‑kjaín‑ninaji̱n tꞌatsi̱.

Jmé kjoa̱xkón xi bakoiì.

31 Jè chjo̱ta̱ jchínga‑ná tsakjèn ya̱ ꞌnde kixì jè nio̱xtìla̱ xi ngꞌajmi tsakꞌaì‑nile̱,^a

josꞌìn tjítꞌa xo̱n‑le̱ Niná:

“Niná kisikjèn nio̱xtìla̱ xi ngꞌajmi jaꞌai‑ni”.^b

32 Kꞌoa̱ Jesús kitsò‑le̱:

—Ñaki kìxi̱i xi xin‑no:

Alì tsà jè‑jìn Moisés xi kitsjoa‑no jè nio̱xtìla̱ xi ngꞌajmi jaꞌai‑ni,

to̱nga jé Nꞌai‑na̱ tsjoá‑no xi ñaki kjoa̱kìxi̱ nga nio̱xtìla̱ xi ngꞌajmi nchroá‑ni.

33 Nga̱ jè nio̱xtìla̱ xi tsꞌe̱ Niná,

jé‑ní xi ya̱ ngꞌajmi jaꞌaijèn‑ni kꞌoa̱ tsjoá‑le̱ kjoa̱bijnachon chjo̱ta̱.

34 Jè chjo̱ta̱ kitsò‑le̱:

—Nai,

Tꞌai̱‑naíji̱n ngantsjaì jè nio̱xtìla̱ xi ꞌmì‑lai̱.

35 Jesús kitsò‑le̱:

—An‑nià jè nio̱xtìla̱ xi tsjoá kjoa̱bijnachon;

jè xi an nchroánchrꞌoè‑na,

lìkꞌia koa̱nbao‑le̱;

kꞌoa̱ jè xi makjaín‑le̱ tꞌatsꞌa̱n,

lìkꞌia koa̱n‑fatì‑le̱.

36 To̱nga jeè sa kꞌoa̱kixin‑no,

nga tsànda je tsaꞌya‑naò,

lìkoi makjaín‑no.

37 Ngayije xi jè Nꞌai tsjoá‑na koi̱nchroa‑nchrꞌoè‑na;

kꞌoa̱ jè xi an nchroánchrꞌoè‑na lìkoi bꞌasjèngi‑jiàn.

38 Lìtsà koi‑jìn xá kinchroa‑nia ya̱ ngꞌajmi nga kꞌoa̱sꞌian josꞌìn nga an me‑na,

koiì nga koi koa̱sꞌian josꞌìn me‑le̱ jè xi kisikasén‑na.

39 Kꞌoa̱ koiì jè xi me‑le̱ jè Nꞌai,

jè xi kisikasén‑na:

Nga̱ ngatsꞌi xi kitsjoa‑na nga ni̱jngo‑jìn xi sichà,

to̱saà koi nga sikjaꞌáya‑le̱ kꞌia̱ nga koi̱chò ni̱chrjin xi fetꞌa‑ni.

40 Kꞌoa̱ koiì jè xi me‑le̱ jè xi kisikasén‑na:

Nga to̱ꞌya‑ni xi be ꞌNdí,

kꞌoa̱ makjaín‑le̱ tꞌatsꞌe̱,

kàtasꞌe‑le̱ kjoa̱bijnachon xi tsìkꞌia fetꞌa;

kꞌoa̱ aàn sikjaꞌáya‑le̱ nga koi̱chò ni̱chrjin xi fetꞌa‑ni.

41 Kꞌia̱ tsakꞌétsꞌia̱kao̱ jè chjo̱ta̱ jchínga‑le̱ chjo̱ta̱ judío nga tsakjaóché xi tꞌatsꞌe̱ nga Jesús kitsò:

«An‑nià jè nio̱xtìla̱ xi ngꞌajmi jaꞌaijèn‑ni».

42 Kꞌoa̱ kitsò chjo̱ta̱ xo̱kjoan:

—Chjo̱ta̱ xo̱kji,

a tsí tsà jè Jesús ti‑le̱ José,

xi ꞌyaxkoaàn nꞌai‑le̱ kao̱ na̱‑le̱.

Án‑ni nga i̱ tsò‑síni xo̱kji:

“Ya̱a ngꞌajmi jàꞌai̱‑nia”.

43 Kꞌia̱ kinchja̱ Jesús kꞌoa̱ i̱ kitsò‑le̱:

—Alì kꞌoa̱jìn‑sꞌìn an chobàyaché‑ninaò.

44 Ni̱ꞌya‑jìn xi koa̱n koi̱nchroa‑nchrꞌoè‑na,

tsà tsì jè Nꞌai xi kisikasén‑na kjoa̱ꞌaíkao̱tꞌa‑na;

kꞌoa̱ an sikjaꞌáya‑nile̱ nga koi̱chò ni̱chrjin xi fetꞌa‑ni.

45 Kꞌoa̱asꞌìn tjítꞌa ya̱ xo̱n‑le̱ Niná,

xi kiski jè chjo̱ta̱ xi kinchja̱ya ngajao‑le̱ Niná:

“Kꞌoa̱ jé Niná koa̱kòya‑le̱ ngatsꞌi”.^c

Koiì kjoa̱ nga to̱ꞌya‑ni xi kinchrꞌoé‑le̱ Nꞌai kꞌoa̱ koan‑le̱ jme xi Nꞌai kitsòya‑le̱,

aàn nchroánchrꞌoè‑na.

46 Lìtsà koi‑jìn nga tjín kꞌa xi je tsabe Nꞌai,

to̱saà jè xi Niná kinchroa‑ni,

jè‑ní xi je tsabe jè Nꞌai.

47 Ñaki kìxi̱i xi xin‑no:

Jè xi makjaín‑le̱ tꞌatsꞌa̱n,

tjín‑le̱ kjoa̱bijnachon xi tsìkꞌia fetꞌa.

48 An‑nià jè nio̱xtìla̱ xi kjoa̱bijnachon.

49 Jè chjo̱ta̱ jchínga‑ná tsakjèn ya̱ ꞌnde kixì jè nio̱xtìla̱ xi ngꞌajmi tsakꞌaì‑nile̱,

kꞌoa̱ to̱ jo kꞌen‑ní.

50 Koiì jè nio̱xtìla̱ xi ngꞌajmi nchroájen‑ni,

jmé‑ni nga ꞌya‑ni xi koi koa̱kje̱n lìkoi koi̱yá.

51 An‑nià jè nio̱xtìla̱ xi tíjnakon,

xi kinchroajen‑ni ngꞌajmi;

tsà ꞌya‑ni xi koi koa̱kje̱n nio̱xtìla̱ xo̱kji,

kꞌoéjnakoòn to̱kꞌia ꞌnda‑ni;

kꞌoa̱ jè nio̱xtìla̱ xi an tsjoa jè‑ní yao‑na̱,

xi tsjoa‑jiàn xi to̱ tꞌatsꞌe̱ kjoa̱bijnachon‑le̱ chjo̱ta̱.

52 Kꞌia̱ jè chjo̱ta̱ judío ti̱jè tsakjaótiya‑ni kitsò:

—Jó si̱ikao̱‑nile̱ chjo̱ta̱ xo̱kji nga yao‑le̱ si̱ikjine‑ná.

53 Jesús kitsò‑le̱:

—Ñaki kìxi̱i xi xin‑no:

Tsà tsì chi̱nao̱o yao‑le̱ ꞌNdí‑le̱ Chjo̱ta̱ kꞌoa̱ tsà tsì sꞌio̱o njín‑le̱,

lìkoi sꞌe̱‑no kjoa̱bijnachon.

54 Jè xi kjine yao‑na̱ kꞌoa̱ xi ꞌbi njín‑na̱,

tjín‑le̱ kjoa̱bijnachon xi tsìkꞌia fetꞌa;

kꞌoa̱ aàn sikjaꞌáya‑le̱ nga koi̱chò ni̱chrjin xi fetꞌa‑ni.

55 Nga̱ jè yao‑na̱ koiì xi kjoa̱kìxi̱ nga ma chine kꞌoa̱ jè njín‑na̱ koiì xi kjoa̱kìxi̱ nga ma ꞌyò.

56 Jè xi kjine yao‑na̱ kꞌoa̱ xi ꞌbi njín‑na̱,

ya̱a tíjnakao̱ ntsjaì‑na,

kꞌoa̱ an ya̱a koa̱te̱jnakao̱ ntsjaì‑jiàn.

57 Josꞌìn kisikasén‑na jè Nꞌai xi tíjnakon,

kꞌoa̱ an tìjnakoan xi to̱ tꞌatsꞌe̱ Nꞌai,

kꞌoa̱ati̱ sꞌìn‑ni ꞌya xi kjine yao‑na̱,

jè kꞌoa̱ti̱ sꞌìn kꞌoéjnakon xi to̱ tꞌatsꞌa̱n.

58 Koiì jè nio̱xtìla̱ xi jaꞌaijèn‑ni ya̱ ngꞌajmi,

lìtsà kꞌoa̱‑jìn sꞌìn josꞌìn jè chjo̱ta̱ jchínga‑ná tsakjèn nio̱xtìla̱ xi ngꞌajmi tsakꞌaì‑nile̱ ya̱ ꞌnde kixì kꞌoa̱ kꞌen‑ní;

jè xi kjèn nio̱xtìla̱ xi ñaki kjoa̱kìxi̱,

sꞌe̱e‑le̱ kjoa̱bijnachon xi tsìkꞌia fetꞌa.

59 Jè kjoa̱ jè ya̱a kꞌoa̱kitsò ya̱ ndꞌia jña maxkia̱ xo̱n‑le̱ Niná,

kꞌia̱ nga tsakakóya ya̱ na̱xi̱nandá‑nꞌión Capernaum.

60 Kꞌia̱ nga je kinchrꞌoé,

nꞌión nkjìn chjo̱ta̱ xi ya̱ kòtꞌayàtꞌa‑le̱ Jesús xi kitsò:

«Nꞌión ꞌaí kji jè én jè;

ꞌyá‑ni xi koa̱n koa̱sèn‑ño‑le̱».

61 Tsabe Jesús nga chjo̱ta̱ xi ya̱ kòtꞌayàtꞌa‑le̱ tjiófaóché xi tꞌatsꞌe̱ én jè,

kitsò‑le̱:

—A síkìꞌaon‑no én xo̱ tsò.

62 Jó koa̱n‑no tsà jchao̱o jè ꞌNdí‑le̱ Chjo̱ta̱ nga koai̱mi jña nga tíjna nga títjòn.

63 Jè Sén Ni̱chrjin Tsje jé xi tsjoá kjoa̱bijnachon kꞌoa̱ jè yao tsìn‑le̱ nganꞌión;

jè én xi fakao̱‑no koiì xi sén ni̱chrjin kꞌoa̱ koiì xi kjoa̱bijnachon.

64 To̱nga tjín kꞌa‑jiòn xi tsì makjaín‑no.

Nga̱ Jesús saꞌnda nga títjòn beè ꞌyá‑ni xi tsì makjaín‑le̱ kꞌoa̱ ꞌyá‑ni xi tsjoátꞌa.

65 Kꞌoa̱ kitsò Jesús:

—Koiì kꞌoa̱xin‑nino,

nga ni̱jngo‑jìn xi koa̱n koi̱nchroa‑nchrꞌoè‑na,

tsà tsì jè Nꞌai xi kꞌoa̱sꞌìn tsjoá‑le̱.

66 Saꞌnda nga koi ni̱chrjin nkjìn chjo̱ta̱ xi ya̱ kòtꞌayàtꞌa‑le̱ xi yátsꞌi̱n ki‑ni,

kꞌoa̱ lìkoi ti̱ ya̱ tsꞌakꞌèmakao̱‑ni Jesús.

67 Kꞌia̱ Jesús kitsò‑le̱ chjo̱ta̱‑le̱ xi tejaò xi xá kiskoéjin‑ni:

—A kꞌoa̱ati̱ me‑no nga koangión nda tsà jòn.

68 Kꞌia̱ kitsò jè Simón Pedro:

—Nai,

ꞌyá‑ni xi koangín‑nchrꞌoaì‑ji̱n,

nga̱ to̱ ji‑ní xi tjín‑lì én xi tsjoá kjoa̱bijnachon xi tsìkꞌia fetꞌa.

69 Kꞌoa̱ ji̱n‑ji̱n jeè koan‑kjaín‑naji̱n,

kꞌoa̱ ꞌya‑nìji̱n nga ji‑jìn Jè Xi Niná Kisikasén,

jè ꞌNdí‑le̱ Niná xi tíjnakon.

70 Jesús kitsò‑le̱:

—A tsí tsà an xi xá kiskoéjin‑nino jòn xi tejaò‑jiòn,

kꞌoa̱ jngoò jòn xi nai̱i.

71 Tꞌatsꞌe̱e Judas Iscariote,

xi ti‑le̱ Simón,

xi ya̱ maxki̱kao̱ chjo̱ta̱ xi tejaò xi xá kiskoéjin‑ni Jesús,

kinchja̱‑ni nga kꞌoa̱kitsò;

nga̱ jé xi tsjoátꞌa Jesús nga koi̱chò ni̱chrjin.