Jè chjo̱ta̱ xi yo̱ma̱ kji xi Betesda tíjna
5
Xi koanskan‑nile̱ kjoa̱ jè,
kitjo jngo sꞌoí xi bꞌéjna chjo̱ta̱ judío,
kꞌoa̱ Jesús kimi ya̱ Jerusalén.
2 Kꞌoa̱ ya̱ Jerusalén ya̱ chrian‑le̱ xo̱ntjoa̱ jña faꞌasꞌen‑ni barrè,
jngo chrjaó nandá tíjna xi Betesda ꞌmì kꞌia̱ nga én hebreo,
xi aòn kꞌa tje̱n‑ngi ngꞌián.
3 Kꞌoa̱ ya̱,
nꞌión nkjìn chjo̱ta̱ tjióngi xi yo̱ma̱ kjoan,
xi xka̱,
xi chi̱ꞌngé kao̱ xi kjioyá yao‑le̱,
xi tjiókoya‑le̱ nga si̱ikjan nandá.
4 Nga̱ jngo cho̱ꞌnda ngꞌajmi‑le̱ Niná xi to̱ tse to̱ tse faꞌai síkjan‑nile̱ nandá;
kꞌoa̱ jè xi títjòn bichó ya̱ jin nandá nga je síkjan,
mandayaà to̱jme chꞌin xi tjín‑le̱.
5 Kꞌoa̱ ya̱ tíjna jngo chjo̱ta̱ xi kjoan kan‑nchrjaꞌaòn‑jàn nó nga yo̱ma̱ kji.
6 Kꞌia̱ nga Jesús tsabe nga tíkijna,
kꞌoa̱ kisꞌejin‑le̱ nga je nꞌión kjoatse nga kꞌoa̱kji,
kꞌia̱ kitsò‑le̱:
—A meè‑lì nga koa̱n‑ndayaì.
7 Jè chjo̱ta̱ xo̱kji kitsò‑le̱:
—Nai,
tsìn‑na ꞌya‑ni xi kanísꞌenjin‑na ya̱ chrjaó nandá kꞌia̱ nga síkjan nandá;
kꞌoa̱ ti̱sꞌa̱a tìfi‑nia nga to̱sa kꞌiá kja̱ꞌaí xi fì títjòn‑na.
8 Jesús kitsò‑le̱:
—Tìso̱tjai̱n,
chjoaí na̱chanyá‑li̱,
kꞌoa̱ ti̱tómjain.
9 Kꞌoa̱ ti̱ꞌa kꞌia̱a koan‑ndaya‑ni jè chjo̱ta̱ xo̱kji,
kꞌoa̱ kiskoé na̱chanyá‑le̱,
kꞌoa̱ koan tsakꞌamjen.
Kꞌoa̱ nga koi ni̱chrjin,
xotò‑ní,
ni̱chrjin nga bexkón Niná chjo̱ta̱ judío.
10 Kꞌia̱ jè chjo̱ta̱ jchínga‑le̱ chjo̱ta̱ judío tsakꞌétsꞌia̱kao̱ nga kitsò‑le̱ jè chjo̱ta̱ xi koan‑ndaya:
—Xotò‑ní ndꞌai̱,
ni̱chrjin nga ꞌyaxkoán Niná;
kꞌoa̱ lìkoi tiꞌndè‑lì nga na̱chanyá‑li̱ chꞌai̱.a
11 Jè chjo̱ta̱ xi koan‑ndaya kitsò‑le̱:
—Jè xi kàsíndaya‑na,
jè soaà xi i̱ kàtsò‑na:
“Chjoaí na̱chanyá‑li̱,
kꞌoa̱ ti̱tómjain”.
12 Kꞌia̱ jè chjo̱ta̱ jchínga‑le̱ chjo̱ta̱ judío kiskònangi‑le̱,
kitsò‑le̱:
—ꞌYá‑ni xi i̱ katsò‑lì:
“Chjoaí na̱chanyá‑li̱,
kꞌoa̱ ti̱tómjain”.
13 Kꞌoa̱ jè xi koan‑ndaya lìkoi be ꞌyá‑ni xi kisindaya,
nga̱ Jesús to̱ jeè tsakasènxìn‑le̱ chjo̱ta̱ xi ya̱ tjió ya̱ ꞌnde jè.
14 Nga koanskan‑ni Jesús kisatejin chjo̱ta̱ xo̱kji ya̱ nditsin‑le̱ yo̱ngo̱,
kitsò‑le̱:
—Koe̱e‑ni,
jeè koan‑ndayaì,
alì ti̱ bijnchijéjìn‑ni,
jmé‑ni nga tsì ngìsa̱ ñꞌain tjín kjoa̱ xi kjoa̱ꞌaínè‑nilì.
15 Jè chjo̱ta̱ xo̱kji ki,
kꞌoa̱ kitsòya‑le̱ chjo̱ta̱ jchínga‑le̱ chjo̱ta̱ judío,
nga jè‑ni Jesús xi kisindaya.
16 Kꞌoa̱ koiì kjoa̱ nga jè chjo̱ta̱ jchínga‑le̱ chjo̱ta̱ judío tsakꞌétsꞌia̱kao̱ nga kitje̱n‑ngike‑le̱ Jesús,
kꞌoa̱ tsakásjai‑le̱ josꞌìn nga si̱ikꞌen,
nga̱ kꞌia̱a kꞌoa̱sꞌín Jesús kjoa̱ jè nga xotò,
ni̱chrjin nga bexkón Niná chjo̱ta̱ judío.
17 Kꞌoa̱ Jesús kitsò‑le̱:
—Jè Nꞌai‑na̱ síxá saꞌnda ndꞌai̱,
kꞌoa̱ an kꞌoa̱ati̱ sixá.
18 Kꞌoa̱ to̱ tꞌatsꞌe̱e én xi kinchja̱,
nga jè chjo̱ta̱ jchínga‑le̱ chjo̱ta̱ judío ngìsa̱ nꞌión tsakásjai‑le̱ josꞌìn nga si̱ikꞌen,
nga̱ lìtsà to̱jè‑jìn ni̱chrjin xotò nga bexkón Niná chjo̱ta̱ judío,
xi tífaꞌatontjaì‑le̱,
kao̱o koi nga tsò nga Niná jè soaà xi Nꞌai‑le̱ ma,
xi kitsò‑nile̱ nga jè soaà Niná.
Jè kjoa̱téxoma xi tjín‑le̱ ꞌNdí‑le̱ Niná
19 Kꞌia̱ kinchja̱ Jesús,
kꞌoa̱ i̱ kitsò‑le̱:
«Ñaki kìxi̱i xi xin‑no:
Lìjme xi sꞌín jè ꞌNdí tsà to̱jè yꞌa yao‑le̱,
to̱saà koi kꞌoa̱sꞌín jmè xi kòtsen‑le̱ nga sꞌín jè Nꞌai;
nga̱ ngayije jmè xi sꞌín jè Nꞌai,
kꞌoa̱kjoà ti̱koi xi sꞌín jè ꞌNdí.
20 Nga̱ jè Nꞌai tsjoakeè jè ꞌNdí,
kꞌoa̱ bakó‑le̱ ngayije kjoa̱ xi sꞌín jè;
kꞌoa̱ ngìsa̱a tse sa kjoa̱ xi koa̱kò‑le̱ ti̱kꞌoa̱‑ni jè,
jmé‑ni nga to̱ kꞌoa̱ kàtama‑nino.
21 Nga̱ josꞌìn jè Nꞌai síkjaꞌáya‑le̱ kꞌen kꞌoa̱ tsjoá‑le̱ kjoa̱bijnachon,
jè ꞌNdí kꞌoa̱ati̱ sꞌìn tsjoá‑le̱ kjoa̱bijnachon,
ꞌya‑ni xi jè me‑le̱.
22 Nga̱ jè Nꞌai ni̱ꞌya‑jìn xi kjoa̱ñꞌain tsjoánè,
to̱saà jè ꞌNdí kisintsja ngayije nganꞌión nga tsjoánè kjoa̱ñꞌain chjo̱ta̱,
23 jmé‑ni nga ngatsꞌi chjo̱ta̱ kàtabexkón‑ni jè ꞌNdí josꞌìn ꞌyaxkón jè Nꞌai.
Jè xi tsì bexkón jè ꞌNdí,
lìkoi bexkón jè Nꞌai,
jè xi kisikasén.
24 »Ñaki kìxi̱i xi xin‑no:
Jè xi nchrꞌoé én‑na̱,
kꞌoa̱ makjaín‑le̱ tꞌatsꞌe̱ jè xi kisikasén‑na,
tjín‑le̱ kjoa̱bijnachon xi tsìkꞌia fetꞌa;
kꞌoa̱ lìkoi tsà kjoa̱ñꞌain kijnanè‑le̱,
to̱saà je kitjokajin kjoa̱biya,
kꞌoa̱ jeè ya̱ kichò jña tjín kjoa̱bijnachon.
25 »Ñaki kìxi̱i xi xin‑no:
Jeè nchroá ni̱chrjin,
kꞌoa̱ ndꞌai̱i ndꞌai̱ kꞌia̱ nga jè xi tjiókꞌen koi̱nchàño‑le̱ jta̱‑le̱ ꞌNdí‑le̱ Niná;
kꞌoa̱ jè xi koi̱nchàño‑le̱ sꞌe̱e‑le̱ kjoa̱bijnachon.
26 Nga̱ josꞌìn nga jè Nꞌai ti̱jè‑ni xi kjoa̱bijnachon,
kꞌoa̱ati̱ sꞌìn kitsjoa‑le̱ jè ꞌNdí nga ti̱jè‑ni xi kjoa̱bijnachon;
27 kꞌoa̱ kꞌoa̱ti̱ kitsjoa‑le̱ kjoa̱téxoma nga jè tsjoánè kjoa̱ñꞌain chjo̱ta̱,
nga̱ jè‑ní ꞌNdí‑le̱ Chjo̱ta̱.
28 Alì koi‑jìn to̱ kꞌoa̱ma‑nino jè xi kàxin‑no;
nga̱ kjoa̱ꞌaí ni̱chrjin kꞌia̱ nga ngatsꞌi xi je kꞌen koi̱nchrꞌoé jta̱‑le̱ ꞌNdí‑le̱ Niná;
29 kꞌoa̱ jè xi nda kisꞌin kjoa̱ꞌáya‑le̱ nga sꞌe̱‑le̱ kjoa̱bijnachon,
to̱nga jè xi chꞌao kisꞌin kjoa̱ꞌáya‑nile̱,
nga kjoa̱ñꞌain kꞌoai̱‑le̱.b
Jè xi kitsjoa én xi tꞌatsꞌe̱ Jè Xi Niná Kisikasén
30 »Lìjme xi koa̱n sꞌian tsà to̱ an yꞌa yao‑na̱;
josꞌìn nchrꞌoe‑le̱ jè Nꞌai kꞌoa̱asꞌìn tsjoánè kjoa̱ñꞌain chjo̱ta̱,
kꞌoa̱ kìxi̱i josꞌìn tsjoánè kjoa̱ñꞌain chjo̱ta̱,
nga̱ lìtsà koi basjaì‑jiàn jme xi an me‑na,
to̱saà koi basjaì‑jiàn jme xi me‑le̱ jè xi kisikasén‑na,
jè Nꞌai.
31 »Tsà ti̱ an tsjoa‑nia én xi tꞌatsꞌa̱n,
jè én‑na̱ xi tsjoa lìkoi‑jìn tsà kìxi̱.
32 Kja̱ꞌaí‑ní xi tsjoá én xi tꞌatsꞌa̱n,
kꞌoa̱ ꞌbe‑nià nga jè én xi tsjoá xi tꞌatsꞌa̱n,
ñaki kꞌoa̱a tjín jotsò.
33 »Jòn kinìkasaón chjo̱ta̱ nga kiskònangi‑le̱ Juan xi kiskanìsꞌen‑ngindá,
kꞌoa̱ jè kitsjoa én‑le̱ xi tꞌatsꞌe̱ xi kjoa̱kìxi̱.
34 To̱nga an lìkoi machjén‑na nga chjo̱ta̱ tsjoá én xi tꞌatsꞌa̱n;
to̱nga koiì kꞌoa̱xin‑nino jmé‑ni nga kàtabìtjo̱ntjaì‑sínio.
35 Juan,
kꞌoa̱asꞌìn jaꞌai joni tsà lꞌí xi kitì kꞌoa̱ xi kisi‑isen;
kꞌoa̱ jòn koanme‑no nga kinìtsjoa choatse‑jiòn xi tꞌatsꞌe̱ josꞌìn kisi‑isen.
36 »To̱nga an kꞌoa̱ati̱ sꞌian kjoa̱ xi ngìsa̱ sa nꞌión nchja̱ ti̱kꞌoa̱‑ni jè én xi kinchja̱ Juan;
nga̱ jè kjoa̱xkón xi jè Nꞌai kitsjoa‑na nga sꞌian,
ti̱koi‑ni kjoa̱xkón xi sꞌian xi tsjoá én tꞌatsꞌa̱n nga jè Nꞌai kisikasén‑na.
37 Kꞌoa̱ti̱ jè Nꞌai xi kisikasén‑na tsjoá én xi tꞌatsꞌa̱n.
Ni̱sakꞌia‑jìn nòꞌyaò jta̱‑le̱ kꞌoa̱ ni̱ sa ñandia‑jìn ꞌyao jókji jè,
38 kꞌoa̱ ni̱ ya̱‑jìn jin ni̱ma̱‑no kichjoétjaò jè én‑le̱;
nga̱ jòn lìkoi makjaín‑no tꞌatsꞌe̱ xi jè kisikasén.
39 Jòn ndaà chòtꞌayasòn Xo̱n Én‑le̱ Niná;
nga̱ jòn kꞌoa̱asꞌìn nìkjaꞌaitsjaon nga kꞌoa̱sꞌìn sꞌe̱‑no kjoa̱bijnachon xi tsìkꞌia fetꞌa;
kꞌoa̱ jè Xo̱n Én‑le̱ Niná koiì xi tsjoá én xi tꞌatsꞌa̱n;
40 kꞌoa̱ jòn kaì‑no nchroánchrꞌoè‑naó jmé‑ni nga sꞌe̱‑nino kjoa̱bijnachon.
41 »Lìkoi machjén‑na nga jè chjo̱ta̱ nda koi̱tso̱ xi tꞌatsꞌa̱n.
42 To̱nga an ndaà ꞌbexkon‑no nga tsì tsjoachao Niná ya̱ jin ni̱ma̱‑no.
43 An,
tꞌatsꞌe̱e Nꞌai‑na̱ nga jàꞌai̱‑nia,
kꞌoa̱ lìkoi chjoétjaò‑naó;
tsà kjoa̱ꞌaí jngo xi to̱ tsꞌe̱ xá kjoa̱ꞌaí‑ni,
to̱saà jè chjoétjaò.
44 Jósꞌín koa̱n‑kjaín‑no jòn xi tꞌatsꞌa̱n,
nga̱ jòn to̱koiì fasjao jè kjoa̱jeya xi ti̱jòn bꞌaìngañá‑nilao̱o xìngio̱o,
kꞌoa̱ lìkoi fasjao jè kjoa̱jeya xi nchroá‑ni tꞌatsꞌe̱ Niná xi to̱ jngo ma‑ni.
45 Alì kꞌoa̱‑jìn sꞌìn nìkꞌaitsjaon nga an koangì‑no ya̱ ngixko̱n Nꞌai‑na̱;
tíjnaà xi kꞌoa̱sꞌìn bángi‑no,
jé kjoa̱téxoma‑le̱ Niná xi kiski Moisés,
jè xi nìnꞌiótꞌao jòn.
46 Nga̱ tsà kjoa̱kìxi̱ nga makjaín‑no tꞌatsꞌe̱ én‑le̱ Niná xi kiski Moisés,
kꞌoa̱ajìn ti̱ koa̱n‑kjaín‑no tꞌatsꞌa̱n,
nga̱ jè kjoa̱téxoma‑le̱ Niná xi kiski Moisés tꞌatsꞌa̱an nchja̱‑ni.
47 To̱nga tsà tsì makjaín‑no jotsò én‑le̱ Niná xi kiski Moisés,
jósꞌìn koa̱n‑kjaín‑no én xi xin‑no».