—A tsí kꞌoai̱ tsè‑naí nandá xi skꞌoia̱.

9 Kꞌia̱ jè chjo̱on xo̱kji kitsò‑le̱ Jesús:

—Án‑ni nga an nìjé-ninaí nandá xi sꞌoi̱,

nga̱ chjo̱ta̱ judío‑ní ji,

kꞌoa̱ an Samaria tsꞌa̱n.

(Nga̱ jè chjo̱ta̱ judío kao̱ chjo̱ta̱ xi ꞌnde Samaria tsꞌe̱ tikeè xínkjín).^b

10 Kꞌia̱ kinchja̱ Jesús kꞌoa̱ i̱ kitsò‑le̱:

—Tsà to̱ ꞌya‑làni tsàkai jè kjoa̱tjaò‑le̱ Niná,

kꞌoa̱ ꞌyá‑ni jè xi títsò‑lì:

“Tꞌaì‑naí nandá xi skꞌoia̱,”

jiì si̱jé‑lai̱,

kꞌoa̱ jè tsjoá‑lì nandá xi tsjoá kjoa̱bijnachon.

11 Kꞌia̱ jè chjo̱on kitsò‑le̱:

—Nai,

tsìn‑lì jme xi chꞌa̱sje‑ni,

kꞌoa̱ chrjaó nandá xo̱kji na̱nga̱a ti̱xꞌa̱.

Jñá‑ni tíjna‑lìni jè nandá xi tsjoá kjoa̱bijnachon.

12 A ngìsa̱a títjòn tijnai ji ti̱kꞌoa̱‑ni jè chjo̱ta̱ jchínga‑na̱ji̱n xi Jacob tsakꞌìn,

jé kitsjoa‑naji̱n jè chrjaó nandá xo̱kji,

i̱i tsakꞌasje nandá xi tsakꞌi jè kao̱ xti‑le̱ kꞌoa̱ kao̱ cho̱ ntjè‑le̱.

13 Kinchja̱ Jesús kꞌoa̱ i̱ kitsò‑le̱:

—To̱ꞌya‑ni xi ꞌbi jè nandá xi i̱ títjo,

koa̱n‑fatì ngìndia‑le̱;

14 to̱nga jè xi ꞌbi nandá xi an tsjoa‑le̱,

ni̱kꞌia‑jìn ti̱ koa̱nfatì‑nile̱;

to̱saà jè nandá xi an tsjoa‑le̱ koi̱tjoxondo ya̱ jin ni̱ma̱‑le̱ kꞌoa̱ tsjoá‑le̱ kjoa̱bijnachon xi tsìkꞌia fetꞌa.

15 Jè chjo̱on kitsò‑le̱:

—Nai,

tꞌai̱‑naí jè nandá xi ꞌmì‑lai̱,

jmé‑ni nga tsì ti̱ koa̱nfatì‑nina,

kꞌoa̱ jmé‑ni nga ni̱ i̱ jìn ti̱ kjoàꞌai̱ kꞌasjè‑nia nandá.

16 Jesús kitsò‑le̱:

—Tꞌin‑ki̱nókjoa̱‑lai̱ xꞌi̱n‑li̱,

kꞌoa̱ kꞌia̱ nchroàngìndia‑ni.

17 Kinchja̱ jè chjo̱on kꞌoa̱ kitsò:

—Alì tsà xꞌi̱n‑jìn tjín‑na.

Jesús kitsò‑le̱:

—Ndaà sꞌìn kànòkjoai̱ nga kàsi:

“Alì tsà xꞌi̱n‑jìn tjín‑na”;

18 nga̱ jeè kjoan aòn xꞌi̱n bijnakoai̱,

kꞌoa̱ jè xi tìjnakoai̱ ndꞌai̱,

lìtsà xꞌi̱n‑li̱ jìn‑ma;

kìxi̱i kànokjoai̱.

19 Kꞌoa̱ jè chjo̱on kitsò‑le̱:

—Nai,

meè‑la̱ tsà ji‑jìn jngo chjo̱ta̱ xi Niná nchja̱ya ngajao‑le̱.

20 Jè chjo̱ta̱ jchínga‑na̱ji̱n i̱i tsabexkón Niná i̱ nindo xo̱kji,

kꞌoa̱ jòn chjo̱ta̱ judío,

bixón‑nió nga ya̱ Jerusalén tíjna ꞌnde jña nga tjínè‑ná nga jcha̱xkoán Niná.

21 Jesús kitsò‑le̱:

—Ji chjo̱on,

kàtamakjaín‑lì jme xi tìxin‑lè,

nga kjoa̱ꞌaí ni̱chrjin kꞌia̱ nga ni̱ i̱ jìn nindo xo̱kji kꞌoa̱ ni̱ ya̱ jìn Jerusalén nga jcha̱xkón jè Nꞌai.

22 Jòn xi ꞌnde Samaria tsao̱on lìkoi ꞌyao ꞌyá xi ꞌyaxkón;

to̱nga ji̱n‑ji̱n,

chjo̱ta̱ judío,

ꞌya‑nìji̱n ꞌya xi ꞌyaxkoín‑ji̱n;

nga̱ jè kjoa̱bitjontjaì ya̱a tꞌatsꞌe̱ chjo̱ta̱ judío nchroá‑ni.

23 To̱nga kjoa̱ꞌaí ni̱chrjin,

kꞌoa̱ ndꞌai̱i ndꞌai̱,

kꞌia̱ nga jè xi ñaki kꞌoa̱tjín ni̱ma̱‑le̱ nga bexkón,

skoe̱xkón jè Nꞌai josꞌìn me‑le̱ Sén Ni̱chrjin Tsje kꞌoa̱ nga kao̱ kjoa̱kìxi̱;

nga̱ jè Nꞌai kꞌoa̱ati̱ básjai chjo̱ta̱ xi ma‑le̱ kꞌoa̱sꞌìn bexkón,

nga kàtabexkón.

24 Niná Sén Ni̱chrjin‑ní;

kꞌoa̱ jè xi bexkón,

machjén nga kꞌoa̱sꞌìn skoe̱xkón josꞌìn me‑le̱ Sén Ni̱chrjin Tsje kꞌoa̱ nga kao̱ kjoa̱kìxi̱.

25 Kꞌia̱ kitsò jè chjo̱on:

—ꞌbe‑nià nga kjoa̱ꞌaí jè Mesías,

Jè Xi Niná Si̱ikasén ꞌmì;

kꞌia̱ nga kjoa̱ꞌaí jè,

kꞌia̱a koi̱tso̱ya kìxi̱‑naji̱n ngayije kjoa̱.

26 Jesús kitsò‑le̱:

—An‑nià xi tìfakao̱‑lé,

Jè Xi Niná Kisikasén.

27 Nanda‑jàn kꞌia̱ jaꞌai jè chjo̱ta̱ xi ya̱ kòtꞌayàtꞌa‑le̱ Jesús,

kꞌoa̱ to̱kꞌoa̱a koan‑le̱ nga jè chjo̱on xo̱kji tífàkao̱;

to̱nga ni̱ꞌya‑jìn xi koanꞌión‑kon nga kitsò‑le̱:

«Jmé‑ni xi tichjònangi‑lai̱» axo̱ «jmé xá xi tinòkjoa̱kao̱‑ni jè chjo̱on».

28 Kꞌia̱ jè chjo̱on kisikꞌéjna nisa nandá‑le̱,

kꞌoa̱ ki ya̱ jin na̱xi̱nandá‑nꞌión,

kꞌoa̱ i̱ kitsò‑le̱ jè chjo̱ta̱:

29 —Nchroaó,

chótsen‑lao̱o jngo chjo̱ta̱ xi kꞌoa̱kàtsò‑na ngayije jme xi tìsꞌian.

A tsí tsà Jè Xi Niná Kisikasén tsòkꞌoa̱.

30 Kꞌia̱ ngatsꞌi chjo̱ta̱ kitjo‑ni ya̱ na̱xi̱nandá‑nꞌión,

kꞌoa̱ jaꞌaikòn‑le̱ Jesús.

31 Kꞌoa̱ kꞌia̱ nga kꞌoa̱kjima,

jè chjo̱ta̱ xi ya̱ kòtꞌayàtꞌa‑le̱ Jesús tjióbꞌétsꞌoa‑le̱ nga tjiótsò‑le̱:

—Ji xi bakòyai,

ti̱chi.

32 Jesús kitsò‑le̱:

—An tjín‑na xi bàkje̱n,

xi tsì ꞌyaxkon jòn.

33 Kꞌia̱ jè chjo̱ta̱ xi ya̱ kòtꞌayàtꞌa‑le̱ tjiótsò‑le̱ xínkjín:

—A tjín xi je kàfaꞌaikao̱‑le̱ tsòkꞌoa̱ xi kàkjèn.

34 Jesús kitsò‑le̱:

—Jè xi bàkje̱n,

koi‑ní nga sikitjosoàn josꞌìn me‑le̱ jè xi kisikasén‑na kꞌoa̱ nga sikjètꞌa xá‑le̱.

35 A tsí tsà bixón jòn:

“Ngì ñoò sá cha sa‑le̱ nga koi̱chò jè ni̱chrjin nga sꞌe̱xkó jè tsojmì xi majchá”.

Koe̱e‑ni,

kꞌoa̱axin‑no an:

Chjómingꞌao xkon,

chótsen‑lao̱o ya̱ ꞌnde tsojmìntjè,

nga̱ jeè koanjchá kꞌoa̱ jeè koa̱n sꞌe̱xkó.

36 Kꞌoa̱ jè xi bꞌéxkó jme tsojmì xi majchá,

machjí‑le̱,

kꞌoa̱ jè tsojmì xi bꞌéxkó tsꞌe̱e kjoa̱bijnachon xi tsìkꞌia fetꞌa,

jmé‑ni nga jè xi bꞌéntjè kꞌoa̱sꞌìn kàtasítsjoa‑ni kao̱ jè xi bꞌéxkó tsojmì xi kjimajchá.

37 Kꞌoa̱ kꞌoa̱sꞌìn bitjosòn jè én xi tsò:

“Jngoò xi bꞌéntjè kꞌoa̱ kja̱ꞌaí xi bꞌéxkó”.

38 Kꞌoa̱ an tìsikasén‑no nga kꞌoéxkó jè xi tsì tsà jòn kinìxá‑lao̱o;

kja̱ꞌaí xi kisixá,

kꞌoa̱ jòn tìbitjasꞌe̱n‑jion xá‑le̱.

39 Kꞌoa̱ nꞌión nkjìn chjo̱ta̱ xi ya̱ na̱xi̱nandá‑nꞌión Sicar tsꞌe̱ xi ꞌnde Samaria nchja̱‑ni,

koan‑kjaín‑le̱ tꞌatsꞌe̱ Jesús xi to̱ tꞌatsꞌe̱ én xi kinchja̱ jè chjo̱on,

nga kitsjoa én‑le̱ nga kitsò:

«Ñaki kꞌoa̱a kàtsò‑na ngayije jme xi tìsꞌian».

40 Kꞌia̱ nkjìn chjo̱ta̱ xi ya̱ ꞌnde Samaria tsꞌe̱ jaꞌaikòn‑le̱ Jesús,

kꞌoa̱ tsakꞌétsꞌoa‑le̱ nga ya̱ kàtabꞌèjnakao̱;

kꞌoa̱ Jesús jaò ni̱chrjin tsakꞌèjna ya̱.

41 Kꞌoa̱ nkjìn sa chjo̱ta̱ koan‑kjaín‑le̱ xi to̱ tꞌatsꞌe̱ én xi jè kinchja̱,

42 kꞌoa̱ jè chjo̱ta̱ kitsò‑le̱ jè chjo̱on:

—Lìtsà to̱ tꞌatsꞌe̱ jìn én‑li̱ nga makjaín‑ninaji̱n ndꞌai̱,

nga̱ ji̱n soa soaà kànòꞌyà‑lai̱ji̱n,

kꞌoa̱ ꞌya‑nìji̱n nga ñaki kjoa̱kìxi̱ nga Jé Xi Bꞌasjentjaì chjo̱ta̱ soꞌnde,

Jè Xi Niná Kisikasén.

43 Jaò ni̱chrjin koanskan‑ni kjoa̱ jè,

Jesús kitjo‑ni ya̱ ꞌnde Samaria,

kꞌoa̱ ki ya̱ ꞌnde Galilea.

44 Nga̱ jè soaà Jesús xi kꞌoa̱sꞌìn kitsjoa én xi kꞌoa̱tsò nga jè chjo̱ta̱ xi Niná nchja̱ya ngajao‑le̱ lìkoi ꞌyaxkón ya̱ jña‑ni tsꞌe̱.

45 Kꞌia̱ nga jaꞌai ya̱ ꞌnde Galilea,

jè chjo̱ta̱ xi ya̱ tsꞌe̱ kiskoétjaò,

nga̱ tsabe ngayije kjoa̱ xi kisꞌin Jesús ya̱ Jerusalén kꞌia̱ nga kitjo sꞌoí;

nga̱ jè chjo̱ta̱ xi ya̱ tsꞌe̱ ꞌnde Galilea kꞌoa̱ati̱ kichò sꞌoí.

46 Jaꞌai ngìndia‑ni Jesús ya̱ na̱xi̱nandá Caná xi ꞌnde Galilea nchja̱‑ni,

ya̱ jña‑ni nga ndá totseè kisikꞌónya jè nandá.

Kꞌoa̱ ya̱ na̱xi̱nandá‑nꞌión Capernaum tíjna jngo chjo̱ta̱xá‑le̱ Herodes Antipas,

xi ti‑le̱ tímꞌen.

47 Jè chjo̱ta̱xá xo̱kji,

kꞌia̱ nga kinchrꞌoé nga Jesús kinchroa‑ni ya̱ ꞌnde Judea,

nga jaꞌai ya̱ ꞌnde Galilea,

jaꞌaikòn‑le̱ kꞌoa̱ tsakꞌétsꞌoa‑le̱ nga kàtafìjen‑kao̱ ndꞌia‑le̱,

kꞌoa̱ kàtafìsíndaya jè ti‑le̱,

nga̱ jeè meè mꞌen.

48 Kꞌia̱ Jesús kitsò‑le̱:

—Tsà tsì jchao̱o choa̱ kao̱ kjoa̱xkón,

lìkoi koa̱n‑kjaín‑no.

49 Kꞌia̱ jè chjo̱ta̱xá‑le̱ Herodes Antipas kitsò‑le̱:

—Nai,

tꞌinjai̱n ndꞌia‑na̱ ti̱ꞌa‑ni nga kje mꞌen‑jìn ꞌndí ti‑na̱.

50 Jesús kitsò‑le̱:

—Tꞌin‑ni ya̱ ndꞌia‑li̱,

jè ꞌndí ti‑li̱ jeè nda tíjna‑ni.

Kꞌoa̱ jè chjo̱ta̱xá xo̱kji koan‑kjaín‑le̱ én xi kitsò‑le̱ Jesús,

kꞌoa̱ ki‑ni ndꞌia‑le̱.

51 Kꞌia̱ nga je tífìjen chjo̱ta̱xá xo̱kji,

jè cho̱ꞌnda‑le̱ kitjonchrꞌoè kꞌoa̱ kitsòya‑le̱ jme xi koan,

kitsò‑le̱:

—Jeè nda tíjna‑ni ti‑li̱.

52 Kꞌia̱ jè chjo̱ta̱xá xo̱kji,

kiskònangi‑le̱ cho̱ꞌnda‑le̱ jóchon tsakꞌétsꞌia̱kao̱ nga kitjoxìn‑le̱ chꞌin‑le̱.

Kꞌoa̱ jè cho̱ꞌnda‑le̱ kitsò‑le̱:

—Jeè tsꞌato nchisen ngojña̱ kꞌia̱ nga kitjoxìn‑le̱ chꞌin ndꞌai̱‑le̱.

53 Kꞌia̱ jè nꞌai‑le̱ ti,

koan‑cho̱ya‑le̱ nga kꞌoa̱chon kꞌia̱ nga Jesús kitsò‑le̱:

«Jè ꞌndí ti‑li̱ jeè nda tíjna‑ni»;

kꞌoa̱ jè koan‑kjaín‑le̱ kao̱ ngatsꞌi xi tjió ya̱ ndꞌia‑le̱.

54 Koiì choa̱ jè xi koan‑ni jaò xi tsakakó Jesús,

kꞌia̱a kꞌoa̱kisꞌin nga ki‑ni ꞌnde Judea kꞌoa̱ kichò ya̱ ꞌnde Galilea.