—Ji xi bakòyai,

ꞌya‑nìji̱n nga tꞌatsꞌe̱ Niná jaꞌai̱‑ni joni jngo xi bakóya;

nga̱ ni̱ꞌya‑jìn xi ma‑le̱ kꞌoa̱sꞌín jè choa̱ xi nꞌiaìn tsà tsì Niná tíjnakao̱.

3 Kinchja̱ Jesús kꞌoa̱ i̱ kitsò‑le̱:

—Ñaki kìxi̱i xi xin‑lè,

nga jè xi tsì jtsín ngìndia,

lìkoi koa̱n skoe̱ jña batéxoma Niná.

4 Nicodemo kitsò‑le̱:

—Jókoa̱n‑ni nga jtsín ngìndia jngo chjo̱ta̱ xi je koanjchá.

A koa̱an kjoa̱ꞌasꞌen ngìndia ya̱ tsꞌoa̱ na̱‑le̱,

kꞌoa̱ jtsín ngìndia.

5 Jesús kitsò‑le̱:

—Ñaki kìxi̱i xi xin‑lè,

nga jè xi tsì kao̱ nandá kꞌoa̱ kao̱ Sén Ni̱chrjin jtsín‑ni,

lìkoi koa̱n kjoa̱ꞌasꞌen ya̱ jña batéxoma Niná.

6 Jè xi yao tsin‑ni,

yao‑ní;

kꞌoa̱ jè xi kao̱ nganꞌión‑le̱ Sén Ni̱chrjin tsin‑ni,

sén ni̱chrjin‑ní.

7 Alì to̱kꞌoa̱‑jìn ma‑lì nga i̱ kàxin‑lè:

“Nꞌión machjén nga jtsín ngìndia‑jiòn”.

8 Jè ntjao̱ fì to̱jña‑ni me‑le̱,

kꞌoa̱ nòꞌyà‑lai̱ nga fane;

to̱nga lìkoi ꞌyai jñá kànchroá‑ni,

kꞌoa̱ jñá tífì;

kꞌoa̱ati̱ sꞌìn‑ni ngatsꞌi chjo̱ta̱ xi Sén Ni̱chrjin tsin‑ni.

9 Kinchja̱ Nicodemo kitsò‑le̱:

—Jósꞌìn koa̱n‑ni nga kꞌoa̱koa̱n kjoa̱ jè‑bi̱.

10 Kinchja̱ Jesús kꞌoa̱ i̱ kitsò‑le̱:

—Jiì bakòya‑lai̱ chjo̱ta̱ Israel,

kꞌoa̱ a tsí ꞌyai kjoa̱ jè.

11 Ñaki kìxi̱i xi xin‑lè,

jè xi ꞌyai‑ji̱n nòkjoa̱‑níji̱n,

kꞌoa̱ jme xi je tsaꞌyai‑ji̱n koiì tꞌatsꞌe̱ bꞌaì‑ji̱n én‑na̱ji̱n;

to̱nga jòn lìkoi chjoétjaò jè én‑na̱ji̱n.

12 Tsà kjoa̱ xi i̱ tsꞌe̱ tꞌa nangi tìxinya‑no kꞌoa̱ tsì makjaín‑no,

jósꞌìn koa̱n‑kjaín‑nino tsà jè kjoa̱ xi tsꞌe̱ ngꞌajmi xínya‑no.

13 Ni̱ ꞌya‑jìn xi kimi ngꞌajmi,

to̱jè‑ní xi ya̱ jaꞌai‑ni ngꞌajmi;

jè ꞌNdí‑le̱ Chjo̱ta̱,

xi tíjna ya̱ ngꞌajmi.

14 »Kꞌoa̱ josꞌìn Moisés kiskòmingꞌa jngo ye̱ xi ki̱cha̱,

ya̱ ꞌnde kixì,^a

kꞌoa̱asꞌìn machjén nga jè ꞌNdí‑le̱ Chjo̱ta̱ tjómingꞌa,

15 jmé‑ni nga ngatsꞌi xi makjaín‑le̱ tꞌatsꞌe̱,

lìkoi jcha̱,

to̱saà sꞌe̱‑le̱ kjoa̱bijnachon xi tsìkꞌia fetꞌa.

16 »Nga̱ kꞌoa̱akji tse koan‑tsjoake Niná chjo̱ta̱ soꞌnde,

nga saꞌnda kitsjoa ꞌNdí to̱jngo‑le̱,

jmé‑ni nga ngatsꞌi xi makjaín‑le̱ tꞌatsꞌe̱,

lìkoi jcha̱,

to̱saà sꞌe̱‑le̱ kjoa̱bijnachon xi tsìkꞌia fetꞌa.

17 Nga̱ Niná lìtsà koi xá kisikasén‑ni ꞌNdí‑le̱ i̱ soꞌnde,

nga ya̱ jin lꞌí xi tsìkꞌia bitsꞌao si̱ikasén chjo̱ta̱,

to̱saà koi nga to̱ tꞌatsꞌe̱ ꞌNdí‑le̱ kàtabitjontjaì‑ni chjo̱ta̱.

18 Jè xi makjaín‑le̱ tꞌatsꞌe̱ ꞌNdí‑le̱,

lìtsà kjoa̱ñꞌain tíjnanè‑le̱,

to̱nga jè xi tsì makjaín‑le̱,

jeè tíjnanè‑le̱ kjoa̱ñꞌain,

koi nga tsì makjaín‑le̱ tꞌatsꞌe̱ ꞌNdí to̱jngo‑le̱ Niná.

19 Kꞌoa̱ koiì jè‑bi̱ kjoa̱ñꞌain xi tíjnanè‑le̱ chjo̱ta̱:

Nga jè lꞌí jaꞌai i̱ soꞌnde,

kꞌoa̱ jè chjo̱ta̱ ngìsa̱a nꞌión koan‑tsjoake kjoa̱‑njiòn ti̱kꞌoa̱‑ni je lꞌí,

koiì nga chꞌao tjió kjoa̱ xi sꞌín.

20 Nga̱ ngatsꞌi xi chꞌao tjió kjoa̱ xi sꞌín,

machꞌaokeè jè lꞌí,

kꞌoa̱ lìkoi nchroánchrꞌoè lꞌí,

jmé‑ni nga tsì satiósòtsen‑ni jè kjoa̱ xi sꞌín.

21 To̱nga jè xi kꞌoa̱tísꞌín jotsò én xi ñaki kìxi̱,

nchroánchrꞌoè jé lꞌí,

jmé‑ni nga kàtaꞌyasòn‑tsen‑sínile̱,

nga jè kjoa̱ xi sꞌín,

tꞌatsꞌe̱ Niná nchroá‑ni.

22 Xi koan‑skan‑ni kjoa̱ jè,

Jesús kao̱ chjo̱ta̱ xi ya̱ kòtꞌayàtꞌa‑le̱ jaꞌai ya̱ ngìjngo na̱xi̱nandá jña kꞌoa̱ti̱ ꞌnde Judea nchja̱‑ni,

kꞌoa̱ ya̱ tsakꞌèjna‑ni Jesús kao̱ chjo̱ta̱ xi ya̱ kòtꞌayàtꞌa‑le̱ kꞌoa̱ ya̱ kiskanìsꞌen‑ngindá chjo̱ta̱.

23 Juan kꞌoa̱ti̱ tíkanìsꞌen‑ngindá chjo̱ta̱ ya̱ na̱xi̱nandá Enón,

chrian‑le̱ na̱xi̱nandá Salim,

nga̱ nꞌión tse nandá tjín ya̱;

kꞌoa̱ faꞌai chjo̱ta̱ kꞌoa̱ ya̱ cha̱nìsꞌen‑ngindá.

24 Nga̱ kje sa ndo̱yá nìkꞌéjnaꞌya Juan nga kꞌia̱.

25 Kꞌia̱ kisꞌe‑le̱ jngo kjoa̱chobàti chjo̱ta̱ xi ya̱ kòtꞌayàtꞌa‑le̱ Juan kao̱ chjo̱ta̱ judío,

xi tꞌatsꞌe̱ josꞌìn bꞌénè kjoa̱téxoma‑le̱ Niná xi kiski Moisés nga sítsje yao‑le̱ ngixko̱n Niná.

26 Kꞌoa̱ kinchroakon‑le̱ Juan,

kꞌoa̱ i̱ kitsò‑le̱:

—Ji xi bakòyai,

a ꞌya‑nì jme‑ni,

jè xi ya̱ná tíjnakao̱‑lì ya̱ xingoa‑le̱ xo̱ngá nandá Jordán,

jè tꞌatsꞌe̱ xi tsakꞌaì én‑li̱,

kꞌoa̱ati̱ kanìsꞌen‑ngindá kꞌoa̱ ya̱a tjiófaꞌaikòn‑le̱ ngatsꞌi chjo̱ta̱.

27 Kinchja̱ Juan kꞌoa̱ kitsò:

—Ni̱jme‑jìn xi sꞌe̱‑le̱ chjo̱ta̱ tsà tsì ján ngꞌajmi ján kꞌoai̱‑nile̱.

28 Jòn soaà koa̱n kꞌoa̱o én xi tꞌatsꞌe̱ kꞌia̱ nga i̱ kixian:

“Alì tsà an‑jiàn Jè Xi Niná Kisikasén,

to̱sa̱a an xi kinìkasén títjòn‑na ti̱ngini‑le̱ Jè Xi Niná Kisikasén”.

29 Ya̱ jña tjín jngo kjoa̱bixan,

jè xi ya̱ tíjnatꞌa‑le̱ chjo̱on xi tíbixan jé xi xꞌi̱n‑le̱ ma;

to̱nga jè mìyo̱‑le̱ xꞌi̱n xi tíbixan,

xi ya tíjnatꞌachrian‑le̱ kꞌoa̱ nchrꞌoé‑le̱,

nꞌión matsjoa‑le̱ nga nchrꞌoé jta̱‑le̱ xꞌi̱n xi tíbixan;

kꞌoa̱ati̱ sꞌìn majngo‑ni kjoa̱tsjoa‑na̱ an ndꞌai̱.

30 Nꞌión machjén nga jè kàtamingꞌa,

kꞌoa̱ an kàtanchroàje̱n.

31 »Jè xi ngꞌá nchroá‑ni,

jé xi nꞌión ngꞌa tíjna‑le̱ ngatsꞌi;

jè xi i̱ tsꞌe̱ soꞌnde,

chjo̱ta̱ soꞌnde‑ní,

kꞌoa̱ koiì kjoa̱ xi tsꞌe̱ soꞌnde nchja̱;

jè xi ngꞌajmi nchroá‑ni,

jé xi nꞌión ngꞌa tíjna‑le̱ ngatsꞌi.

32 Kꞌoa̱ jme xi tsabe kꞌoa̱ kinchrꞌoé,

koiì én xi tsjoá;

to̱nga ni̱ꞌya‑jìn xi kjoétjaò én‑le̱.

33 Jè xi kjoétjaò én‑le̱,

jè‑ní xi tsjoá én‑le̱ nga én kìxi̱ xi nchja̱ Niná.

34 Nga̱ jè xi Niná kisikasén,

én‑le̱ Niná nchja̱;

nga̱ Niná lìtsà to̱ tsjoáchoa̱‑jìn Sén Ni̱chrjin‑le̱.

35 Jè Nꞌai tsjoakeè Jè ꞌNdí,

kꞌoa̱ jé kisintsja ngayije jme xi tjín.

36 Jè xi makjaín‑le̱ tꞌatsꞌe̱ ꞌNdí,

tjín‑le̱ kjoa̱bijnachon xi tsìkꞌia fetꞌa;

to̱nga jè xi tsì makjaín‑le̱ tꞌatsꞌe̱ ꞌNdí,

lìkoi sꞌe̱‑le̱ kjoa̱bijnachon,

to̱ jeè tíjnanè‑le̱ kjoa̱jti‑le̱ Niná.