—Tꞌin‑ni i̱,

kꞌoa̱ ya̱ tꞌin ya̱ ꞌnde Judea,

jmé‑ni nga kꞌoa̱ti̱ jè chjo̱ta̱ xi kòtꞌayàtꞌa‑lì kàtabe‑ni jè kjoa̱xkón xi nꞌiaìn.

4 Nga̱ ni̱ꞌya‑jìn xi me‑le̱ nga bakósòtsen yao‑le̱ xi to̱ ꞌma kꞌoa̱sꞌín jme xi sꞌín.

Tsà kꞌoa̱nꞌiaìn kjoa̱ jè,

ta̱kòsòtsen‑lai̱ yao‑li̱ ngatsꞌi chjo̱ta̱.

5 Nga̱ ni̱ jè‑jìn ndsꞌe̱ Jesús makjaín‑le̱ tꞌatsꞌe̱.

6 Kꞌia̱ Jesús kitsò‑le̱:

—Kje bichó‑jìn ni̱chrjin‑na̱,

to̱nga jòn ti̱xꞌa̱ꞌnde‑no ngantsjaì ni̱chrjin.

7 Jè chjo̱ta̱ soꞌnde lìkoi koa̱n koa̱n‑chꞌaoke‑no jòn;

to̱nga an machꞌaokeè‑na,

nga̱ aàn tsjoa én xi tꞌatsꞌe̱ nga chꞌao tjió kjoa̱ xi sꞌín.

8 Tangímio jòn sꞌoí;

an kje sa ndꞌai̱‑jìn kjoí‑jiàn sꞌoí jè,

nga̱ kje sa ni̱chrjin‑na̱‑jìn.

9 Kꞌoa̱ kꞌia̱ nga je kꞌoa̱kitsò‑le̱ én jè,

ya̱ tsakꞌèjna ya̱ ꞌnde Galilea.

10 To̱nga koanskan‑ni nga je kimi ndsꞌe̱ Jesús,

kꞌoa̱ati̱ kimi jé ya̱ sꞌoí,

lìkoi tsen tsakꞌamjen basen,

jo xi to̱ tsakꞌamjen ꞌmà.

11 Kꞌoa̱ jè chjo̱ta̱ judío tjióbásjai ya̱ jin sꞌoí,

kꞌoa̱ i̱ tjiótsò:

«Jñá tíjna jè chjo̱ta̱ xo̱kji».

12 Kꞌoa̱ chjo̱ta̱‑nkjìn nꞌión tsakjaóyaché‑ni Jesús;

nga̱ tjín kꞌa xi kitsò:

«Ndaà chjo̱ta̱»;

to̱nga tjín kꞌa xi kitsò:

«Majaìn,

to̱saà chjo̱ta̱ bꞌana̱cha̱‑le̱».

13 To̱nga ni̱ꞌya‑jìn xi kinchja̱sòtsen xi tꞌatsꞌe̱,

nga̱ jé chjo̱ta̱ jchínga‑le̱ chjo̱ta̱ judío kitsokjòn‑le̱.

14 To̱nga kꞌia̱ nga je tje̱n basen jè sꞌoí,

kimi Jesús ya̱ nditsin‑le̱ yo̱ngo̱ kꞌoa̱ tsakꞌétsꞌia̱kao̱ nga tsakakóya.

15 Kꞌoa̱ to̱kꞌoa̱a koan‑le̱ chjo̱ta̱ jchínga‑le̱ chjo̱ta̱ judío,

kitsò:

«Jña fìkjaꞌá‑nile̱ nga nꞌión nda be kjoa̱téxoma‑le̱ Niná,

nga̱ tsì kꞌoa̱sꞌìn kiskòtꞌaya josꞌìn kichòtꞌayà ñá».

16 Kinchja̱ Jesús kꞌoa̱ i̱ kitsò:

—Jè én xi an bakoyà alì tsà tsꞌa̱n‑jiàn,

tsꞌe̱‑ní jè xi kisikasén‑na.

17 Jè xi me‑le̱ nga kꞌoa̱sꞌi̱in josꞌìn me‑le̱ Niná,

skoe̱‑ní tsà tsꞌe̱ Niná nchroá‑ni jè én xi bakoyà,

axo̱ to̱ aàn xi kꞌoa̱sꞌìn me‑na nchjà.

18 Jè xi to̱ tsꞌe̱ én nchja̱,

to̱ tsꞌe̱e kjoa̱jeya básjai;

to̱nga jè xi koi básjai jè kjoa̱jeya‑le̱ xi kisikasén,

jé‑ní xi ñaki kìxi̱ kꞌoa̱ tsìn‑le̱ kjoa̱chꞌàna̱cha̱.

19 A tsí jè Moisés kitsjoa‑no jè kjoa̱téxoma‑le̱ Niná,

kꞌoa̱ ni̱jngo‑jìn jòn xi nìkitjosòn kjoa̱téxoma‑le̱ Niná.

Án‑ni nga koi fasjai‑sínio nga si̱kꞌen‑naó.

20 Kinchja̱ chjo̱ta̱‑nkjìn kitsò:

—Sén ni̱chrjin xi tsꞌe̱ nai̱i tíjnajin‑lì;

ꞌyá‑ni xi koi tjióbásjai nga ji si̱ikꞌen‑lì.

21 Kinchja̱ Jesús kꞌoa̱ i̱ kitsò‑le̱:

—Jngo kjoa̱ xkón kisꞌian,

kꞌoa̱ to̱kꞌoa̱a ma‑no ngatsꞌio.

22 Kꞌoa̱‑là xín‑no,

Moisés kꞌoa̱asꞌìn tsakꞌénè jè kjoa̱ nga titji‑le̱ xti xꞌi̱n^a (alì tsà koi‑jìn nga tsꞌe̱ Moisés,

to̱saà tsꞌe̱ jè chjo̱ta̱ jchínga‑ná:

Abraham,

Isaac kao̱ Jacob);^b

kꞌoa̱ nga xotò,

ni̱chrjin nga ꞌyaxkón Niná,

bichàtji‑lao̱o xti xꞌi̱n.

23 Tsà kꞌia̱ nga xotò,

ni̱chrjin nga ꞌyaxkón Niná,

bichàtji‑lao̱o xti xꞌi̱n,

jmé‑ni nga tsì koi̱tjátontjaì‑nilao̱o kjoa̱téxoma‑le̱ Niná xi kiski Moisés,

a majti‑no kao̱ an kꞌia̱ nga jngo chjo̱ta̱ xi ñaki kisindayà ngayije yao‑le̱ kꞌia̱ nga xotò,

ni̱chrjin nga ꞌyaxkón Niná.

24 Alì to̱xkia̱ nòkjoa̱‑jiòn xi to̱ kjoa̱sòngꞌa matsen,

to̱saà kꞌoa̱sꞌìn ti̱nòkjoa̱o josꞌìn tjín xi ñaki kjoa̱kìxi̱.

25 Kꞌoa̱ kꞌia̱ tjiótsò kꞌa chjo̱ta̱ xi ya̱ Jerusalén tsꞌe̱:

«A tsí tsà jè xo̱kji xi koi xá tjióbásjai‑ni chjo̱ta̱ jchínga‑ná nga si̱ikꞌen.

26 Koe̱ekji,

ya̱a tíjna nga tífákao̱sòtsen chjo̱ta̱ kꞌoa̱ ni̱jojìn ꞌmì‑le̱.

Axo̱ jeè tsabe tsòkꞌoa̱ jè chjo̱ta̱xá‑ná nga Jè Xi Niná Kisikasén.

27 To̱nga jè xo̱kji ꞌya‑niá jña‑ni tsꞌe̱;

to̱nga kꞌia̱ nga kjoa̱ꞌaí Jè Xi Niná Si̱ikasén,

lìꞌya xi skoe̱ jñá‑ni tsꞌe̱».

28 Kꞌia̱ nga Jesús tíbakóya ya̱ nditsin‑le̱ yo̱ngo̱,

nꞌión kinchja̱ kꞌoa̱ i̱ kitsò:

—An ꞌyaxkoòn‑naò,

kꞌoa̱ ꞌya‑niò jña‑ni tsꞌa̱n;

kꞌoa̱ alì tsà to̱ tꞌatsꞌa̱an nga jèꞌe̱,

to̱nga jè xi kisikasén‑na jè‑ní xi ñaki kìxi̱,

jè xi tsì ꞌyaxkon jòn.

29 To̱nga an ꞌbexkon‑ñà,

nga̱ ya̱a kinchroa‑nia,

kꞌoa̱ jé kisikasén‑na.

30 Kꞌoa̱ jè chjo̱ta̱ jchínga‑le̱ chjo̱ta̱ judío tjióbásjai nga jtsoa̱ Jesús;

to̱nga ni̱ꞌya‑jìn xi kitsoa,

nga̱ kje bichó‑jìn choa̱‑le̱.

31 Kꞌoa̱ nkjìn xi ya̱ tje̱njin‑le̱ chjo̱ta̱‑nkjìn koan‑kjaín‑le̱ tꞌatsꞌe̱,

kꞌoa̱ tjiótsò:

—Kꞌia̱ nga kjoa̱ꞌaí Jè Xi Niná Si̱ikasén,

a ngìsa̱a nkjìn choa̱ xi sꞌi̱in ti̱kꞌoa̱‑ni jokji choa̱ xi sꞌín jè.

32 Jè chjo̱ta̱ fariseo kinchrꞌoé nga jè chjo̱ta̱ tjiófaóyaché-ni kjoa̱ xi tꞌatsꞌe̱ Jesús;

kꞌoa̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo kisikasén chjo̱ta̱ xi síkoìnda̱ yo̱ngo̱ jmé‑ni nga kàtafìtsoa‑ni Jesús.

33 Kꞌia̱ Jesús kitsò:

—To̱ choatseè sa nga i̱ koàte̱jnakao̱‑no,

kꞌoa̱ kjoíkon ngìndia‑nile̱ jè xi kisikasén‑na.

34 Koi̱njchísjai‑naó kꞌoa̱ lìkoi ti̱ koa̱nsjai‑ninaó;

kꞌoa̱ jña nga an koate̱jna,

lìkoi koa̱n koi̱nchroaò jòn.

35 Kꞌia̱ jè chjo̱ta̱ jchínga‑le̱ chjo̱ta̱ judío kitsò‑le̱ xínkjín:

—Jñá‑ni koai̱ chjo̱ta̱ xo̱kji,

nga tsì tsà koa̱nsjai‑síniná.

A ya̱a koai̱kon‑le̱ jè chjo̱ta̱‑ná xi xìn ꞌnde tjiósíjchá yao‑le̱,

kꞌoa̱ a ya̱a koa̱kòya‑le̱ chjo̱ta̱ xi tsì tsà judío‑jìn.

36 Jósꞌìn tsòya‑nile̱ nga i̱ kàtsò:

“Koi̱jnchísjai‑naò,

kꞌoa̱ lìkoi ti̱ koa̱nsjai‑ninaó;

kꞌoa̱ jña nga an koate̱jna lìkoi koa̱n koi̱nchroaò jòn”.

37 Jè ni̱chrjin xi fetꞌa‑ni kꞌia̱ nga ngìsa̱ sa nꞌión ma sꞌoí,^c

Jesús tsakasèn‑ndo kꞌoa̱ nꞌión kinchja̱ kitsò:

—Tsà ꞌya‑ni xi fatì‑le̱,

kàtanchroá‑nchrꞌoè‑na kꞌoa̱ kàtaꞌbi nandá xi an tsjoa‑le̱.

38 Jè xi makjaín‑le̱ tꞌatsꞌa̱n jotsò Xo̱n Én‑le̱ Niná,

sꞌe̱e ya̱ jin ni̱ma̱‑le̱ xo̱ngá nandá xi tsjoá kjoa̱bijnachon.^d

39 Koiì xi kitsò‑ni tꞌatsꞌe̱ jè Sén Ni̱chrjin Tsje,

xi kꞌoai̱‑le̱ jè xi koan‑kjaín‑le̱ tꞌatsꞌe̱ Jesús;

nga̱ kje sa faꞌai‑jìn jè Sén Ni̱chrjin Tsje,

nga̱ kje bitjojeya‑jìn Jesús.

40 Kꞌia̱ kꞌa chjo̱ta̱ xi ya̱ tjiójin‑le̱ chjo̱ta̱‑nkjìn,

xi kꞌia̱ nga kinchroé én xo̱ tsò,

kitsò:

«Ñaki kjoa̱kìxi̱‑ní nga jè chjo̱ta̱ xo̱kji xi nchja̱ya ngajao‑le̱ Niná».

41 Tjín kꞌa chjo̱ta̱ xi kitsò sa:

«Jè‑ní Jè Xi Niná Kisikasén».

To̱nga xi ngìkꞌa kitsò:

«A ya̱a ꞌnde Galilea kjoa̱ꞌaí‑ni Jè Xi Niná Si̱ikasén.

42 A tsí kꞌoa̱tsò Xo̱n Én‑le̱ Niná nga ntje̱‑le̱ David kꞌoa̱ nga ya̱ na̱xi̱nandá Belén,^e

jña‑ni tsꞌe̱ David,

ya̱ kjoa̱ꞌaí‑ni Jè Xi Niná Si̱ikasén».

43 Kꞌoa̱a koan‑ni nga koanjaòya chjo̱ta̱ xi to̱ tꞌatsꞌe̱ Jesús.

44 Kꞌoa̱ tjín kꞌa xi koanme‑le̱ nga jtsoa̱,

to̱nga ni̱ꞌya‑jìn xi koan‑nꞌión kon nga kitsoa.

45 Jè chjo̱ta̱ xi síkoìnda̱ yo̱ngo̱ jaꞌaikòn‑le̱ na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo;

kꞌoa̱ jè kiskònangi‑le̱,

kitsò‑le̱:

—Án‑ni nga tsì kànchroákao̱‑sínio.

46 Jè chjo̱ta̱ xi síkoìnda̱ yo̱ngo̱ kitsò:

—¡Ni̱sajngo‑jìn chjo̱ta̱ xi koa̱tsò én nchja̱ jotsò én nchja̱ jè chjo̱ta̱ xo̱kji!

47 Kꞌia̱ jè chjo̱ta̱ fariseo kitsò‑le̱:

—A kꞌoa̱ati̱ je kàbꞌana̱cha̱‑no nda tsà jòn.

48 Axo̱ tjín kꞌa chjo̱ta̱ títjòn axo̱ jè chjo̱ta̱ fariseo xi je kjimakjaín kꞌa‑le̱ tꞌatsꞌe̱.

49 To̱nga chjo̱ta̱ xo̱kjoan xi tsì be jè kjoa̱téxoma‑le̱ Niná xi kiski Moisés,

kjoa̱ñꞌaìn tíjnanè‑le̱.

50 Kꞌia̱ Nicodemo xi kꞌoa̱ti̱ fariseo,

xi koan‑njiòn jaꞌaikòn‑le̱ Jesús,

i̱ kitsò:

51 —Jè kjoa̱téxoma‑ná,

a tsjoánè kjoa̱ñꞌain jngo chjo̱ta̱ xi kjoa̱ tífìnè,

tsà tsì títjòn koa̱njtsòꞌa kꞌoa̱ tsà tsì ꞌya‑le̱ jme xi kàsꞌìn.

52 Kꞌia̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo kinchja̱ kꞌoa̱ kitsò‑le̱ Nicodemo:

—A kꞌoa̱ati̱ ꞌnde Galilea tsi̱.

Chótꞌayàjin,

kꞌoa̱ kàtaꞌyai nga ya̱ ꞌnde Galilea ni̱sakꞌia‑jìn bitjokajin jngo‑ni chjo̱ta̱ xi nchja̱ya ngajao‑le̱ Niná.

53 Nga jngó jngó chjo̱ta̱ ki‑ni ꞌndia‑le̱.