3 Kꞌia̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo jaꞌaikao̱ jngo‑le̱ chjo̱on xi tsaꞌyatꞌain‑le̱ nga tísíchajngi;

kꞌoa̱ kisikasénjna basen,

4 kitsò‑le̱ Jesús:

—Ji xi bakòyai,

jè chjo̱on xo̱kji tísíchajngiì nga kàꞌyatꞌain‑le̱.

5 Kꞌoa̱ ya̱ kjoa̱téxoma‑le̱ Niná xi kiski Moisés,

kꞌoa̱asꞌìn tsakꞌénè‑naji̱n nga la̱jao̱ si̱kꞌen‑niji̱n jè yánchjín xi kꞌoa̱sꞌín.^a

Kꞌoa̱ ji,

jósi-ni.

6 To̱nga koiì kꞌoa̱kitsò‑nile̱ nga me‑le̱ si̱ikajngijé,

jmé‑ni nga koa̱n koa̱angi‑ni.

To̱nga Jesús tsakꞌèjnajten‑tꞌa nangi,

kꞌoa̱ kao̱ na̱jmá‑ntsja kiskitꞌa‑ni nangi.

7 Kꞌoa̱ nga nꞌión si tjiókjònangi‑le̱,

tsakasèn kìxi̱ Jesús kꞌoa̱ i̱ kitsò‑le̱:

—ꞌYa‑ni jòn xi tsìn‑le̱ jé,

jè títjòn kàtabasén‑le̱ la̱jao̱ jè chjo̱on.

8 Kꞌoa̱ tsakꞌèjnajten ngìjngokꞌà ngá‑ni Jesús,

nga kiski‑sa ya̱ tꞌa nangi.

9 To̱nga kꞌia̱ nga kinchrꞌoé chjo̱ta̱ xo̱kjoan én xi kinchja̱ Jesús,

tsabeè‑le̱ kon nga tjióbajngijé,

kꞌia̱ jngó jngó kitjo,

tsakꞌétsꞌia̱kao̱‑ni xi jchínga saꞌnda xi ngìsa̱ xti;

kꞌoa̱ to̱jè sa Jesús tsakꞌèjna kao̱ jè chjo̱on,

xi ya̱ sénjna basen.

10 Kꞌia̱ tsakasèn kìxi̱ Jesús,

kꞌoa̱ tsabe nga ni̱ꞌya‑jìn xi ti̱ya̱ tjió‑ni,

nga to̱jè sa chjo̱on xi ya̱ tíjna,

kitsò‑le̱:

—Chjo̱on,

jñá tjió chjo̱ta̱ xi tjióbángi‑lì.

A ni̱jngo‑jìn xi kàtsjoá‑lì kjoa̱ñꞌain.

11 Jè chjo̱on kitsò:

—Nai,

ni̱ꞌya‑jìn.

Kꞌia̱ Jesús kitsò‑le̱ jè chjo̱on:

—Ni̱ an‑jìn tsjoa‑lè kjoa̱ñꞌain;

tꞌin,

kꞌoa̱ alì ti̱ bijnchijéjìn‑ni.

12 Jesús ngìjngokꞌà tsakjákao̱ chjo̱ta̱,

kitsò‑le̱:

—An‑nià jè lꞌí xi sí-isen‑le̱ chjo̱ta̱ soꞌnde;

jè xi an nchroátje̱n‑ngi‑na,

lìkoi kjoa̱njiòn kꞌoámjejin,

to̱saà sꞌe̱‑le̱ jè lꞌí xi tsꞌe̱ kjoa̱bijnachon.

13 Kꞌia̱ jè chjo̱ta̱ fariseo kitsò‑le̱:

—Ti̱jiì bꞌaì‑ni jè én xi tꞌatsi̱;

jè én xi tibꞌaì lìkoi tsà kjoa̱kìxi̱‑jìn.

14 Kinchja̱ Jesús kꞌoa̱ i̱ kitsò‑le̱:

—Ni̱nga ti̱ an tsjoa‑nia én xi tꞌatsꞌa̱n,

jè én‑na̱ kjoa̱kìxi̱‑ní,

nga̱ ꞌbe‑nià jña jàꞌai̱‑nia,

kꞌoa̱ jña‑ni tìfia;

to̱nga jòn lìkoi ꞌyao jña‑ni jàꞌai̱‑nia,

kꞌoa̱ jña‑ni tìfia.

15 Jòn kꞌoa̱asꞌìn nìjé‑naò kjoa̱ñꞌain chjo̱ta̱ josꞌìn be‑ni ngatsꞌi chjo̱ta̱;

an,

ni̱ꞌya‑jìn xi kjoa̱ñꞌain tsjoanè.

16 Kꞌoa̱ tsà an xi kjoa̱ñꞌain tsjoanè chjo̱ta̱,

josꞌìn tsjoanè kjoa̱ñꞌain kìxi̱‑ní;

nga̱ tsì tsà to̱ an‑jiàn xi kꞌoa̱sꞌian,

kao̱o jè xi kisikasén‑na,

jè Nꞌai.

17 Kꞌoa̱ ya̱ kjoa̱téxoma‑le̱ Niná xi kitsjoa‑no Moisés kꞌoa̱asꞌìn tjítꞌa nga jè én xi tsjoá jaò chjo̱ta̱ xi tꞌatsꞌe̱ jngo kjoa̱,

kìxi̱‑ní.

18 An‑nià xi tsjoa én xi tꞌatsꞌa̱n,

kꞌoa̱ jè Nꞌai xi kisikasén‑na kꞌoa̱ati̱ tsjoá én‑le̱ xi tꞌatsꞌa̱n.

19 Kꞌia̱ chjo̱ta̱ fariseo kitsò‑le̱:

—Jñá‑ni tíjna Nꞌai‑li̱.

Kꞌia̱ kitsò Jesús:

—Ni̱ an‑jìn ꞌyaxkon‑naó kꞌoa̱ ni̱ jè‑jìn Nꞌai‑na̱ ꞌyaxkon tsà ꞌyaxkon‑naó,

kꞌoa̱jìn ti̱ ꞌyaxkon jè Nꞌai‑na̱.

20 Jè én xo̱ tsò ya̱a kinchja̱ Jesús ya̱ ꞌnde jña kijna kàxa̱ xi satióyà tao̱n xi bꞌaìtꞌa‑le̱ Niná,

nga tíbakóya ya̱ nditsin‑le̱ yo̱ngo̱;

kꞌoa̱ ni̱ꞌya‑jìn xi kitsoa,

nga̱ kje sa bichó‑jìn ni̱chrjin‑le̱.

21 Ngìjngokꞌà kinchja̱ Jesús kitsò‑le̱:

—An tìfi‑nià,

kꞌoa̱ koi̱jnchísjai‑naò,

to̱nga jòn ya̱a jé‑no koi̱yájion;

ya̱ jña tìfia,

lìkoi koa̱n koangión jòn.

22 Kꞌia̱ kitsò jè chjo̱ta̱ jchínga‑le̱ chjo̱ta̱ judío:

—A ti̱jè si̱ikꞌen‑ni yao‑le̱,

án‑ni nga tsò‑ni:

“Ya̱ jña tìfia,

lìkoi koa̱n koangión jòn”.

23 Kꞌoa̱ Jesús kitsò‑le̱:

—Jòn i̱i tꞌa nangi tsao̱on,

kꞌoa̱ an ya̱a ngꞌajmi tsꞌa̱n,

jòn i̱i soꞌnde tsao̱on,

kꞌoa̱ an lìtsà i̱ jìn soꞌnde tsꞌa̱n.

24 Koiì kꞌoa̱kàxin‑nino nga ya̱ koi̱yájion jé‑no;

nga̱ tsà tsì makjaín‑no nga An‑nià,

xi kjoa̱kìxi̱ ya̱a jé‑no koi̱yájion.

25 Kꞌia̱ jè chjo̱ta̱ jchínga‑le̱ chjo̱ta̱ judío kitsò‑le̱:

—ꞌYá‑ni ji.

Kꞌia̱ Jesús kitsò‑le̱:

—Jè xi je kꞌoa̱kixin‑no jo saꞌnda nga títjòn.

26 Nꞌión nkjìn kjoa̱ tjín‑na xi xián xi tꞌatsao̱on kꞌoa̱ xi tsjoanè‑nino kjoa̱ñꞌain;

to̱nga jè xi kisikasén‑na ñaki kjoa̱kìxi̱‑ní;

kꞌoa̱ jè én xi kinchrꞌoe‑le̱ jè,

koiì xi fakoa̱ jè chjo̱ta̱ soꞌnde.

27 To̱nga jè chjo̱ta̱ jnchínga‑le̱ chjo̱ta̱ judío lìkoi koanjin‑le̱ tsà tꞌatsꞌe̱ Nꞌai xi kitsò Jesús.

28 Kꞌia̱ Jesús kitsò‑le̱:

—Kꞌia̱ nga je chjómingꞌao jè ꞌNdí‑le̱ Chjo̱ta̱,

kꞌia̱a jcha̱o nga An‑nià,

kꞌoa̱ nga ni̱jme‑jìn xi to̱ an kꞌoa̱sꞌian,

to̱saà kꞌoa̱sꞌìn nchjà josꞌìn tsakakóya‑na Nꞌai.

29 Nga̱ jè xi kisikasén‑na i̱i tíjnakao̱‑na;

jè Nꞌai alì koi to̱ an síkꞌéjna‑na,

nga̱ an kꞌoa̱asꞌìn sꞌian ngantsjaì josꞌìn nga jè nda sꞌe‑le̱.

30 Kꞌia̱ nga tínchja̱ Jesús jè én xo̱ tsò,

nꞌión nkjìn chjo̱ta̱ xi koan‑kjaín‑le̱ tꞌatsꞌe̱.

31 Kꞌia̱ Jesús kitsò‑le̱ jè chjo̱ta̱ judío xi koan‑kjaín‑le̱ tꞌatsꞌe̱:

—Tsà jòn xi si̱kitjosòn ntsjaì‑jiòn én‑na̱,

ñaki kjoa̱kìxi̱‑ní nga chjo̱ta̱ xi an kòtꞌayàtꞌa‑na koao̱on;

32 kꞌoa̱ jcha̱xkon‑niò jè én xi ñaki kìxi̱,

kꞌoa̱ jè én xi ñaki kìxi̱ si̱ikatióndaí‑no.

33 Kꞌia̱ jè chjo̱ta̱ judío kitsò:

—Ntje̱‑le̱ Abraham tje̱n‑niji̱n,

kꞌoa̱ ni̱saꞌyajìn‑là xi síkꞌéjnanꞌión‑naji̱n nga cho̱ꞌnda síkao̱‑naji̱n.

Án‑ni nga si‑ni ji:

“Sꞌe̱e‑no kjoa̱ndaí”.

34 Jesús kitsò‑le̱:

—Ñaki kìxi̱i xi xin‑no,

to̱ꞌya‑ni xi bajngijé,

jè jé tíjnanꞌión‑le̱ nga cho̱ꞌnda‑le̱ ma.

35 Kꞌoa̱ jè cho̱ꞌnda xi tao̱n tsakinda‑ni lìtsà ya̱a ndꞌia‑le̱ nai‑le̱ kꞌoéjna ntsjaì;

to̱nga jè ꞌndí jè‑ní xi ya̱ kꞌoéjna‑ntsjaì.

36 Kꞌoa̱ koiì kjoa̱,

tsà jè ꞌNdí si̱ikatióndaí‑no,

ñaki kjoa̱kìxi̱i nga koi̱yondaó.

37 ꞌbe‑nià nga ntje̱‑le̱ Abraham tje̱n‑nio;

to̱nga tìbijnchisjaì‑niò josꞌìn koa̱n si̱kꞌen‑naó,

nga̱ jè én‑na̱ lìkoi faꞌasꞌenjin ni̱ma̱‑no.

38 An koiì nchjà jme xi tsaꞌbe ya̱ chrian‑le̱ Nꞌai‑na̱;

kꞌoa̱ jòn koiì kꞌoa̱nꞌiaòn jme xi kinoꞌyàchrian‑lao̱o nꞌai‑no.

39 Kinchja̱ chjo̱ta̱ judío kꞌoa̱ i̱ kitsò:

—Jè Abraham xi nꞌai‑na̱ji̱n ma.

Jesús kitsò‑le̱:

—Tsà kjoa̱kìxi̱‑làni nga xti‑le̱ Abraham ma‑jiòn,

jè‑jìn xá xi kisꞌin Abraham sꞌiao̱on.

40 To̱nga ndꞌai̱ tifasjai‑niò josꞌìn koa̱n si̱kꞌen‑naó,

kꞌoa̱ jè Abraham lìtsà kꞌoa̱a kisꞌin,

an xi én xi ñaki kìxi̱ fakao̱‑no,

jè én xi Niná kinchrꞌoe‑le̱.

41 Jòn koiì kꞌoa̱nꞌiaòn jme xá xi sꞌìn nꞌai‑no.

Kꞌia̱ jè chjo̱ta̱ judío kitsò‑le̱:

—Ji̱n‑ji̱n alì kjoa̱chajngi‑jìn kitsinjin‑ji̱n.

To̱jngoò nꞌai tjín‑naji̱n,

jè Niná.

42 Kꞌia̱ Jesús kitsò‑le̱:

—Tsà jè‑la̱ Niná xi nꞌai‑no ma,

ñaki kjoa̱kìxi̱‑jìn nga koa̱n-tsjoacha‑naó;

nga̱ tꞌatsꞌe̱ Niná kinchroa‑nia,

kꞌoa̱ tꞌatsꞌe̱ Niná nga jàꞌai̱‑jiàn;

nga̱ lìtsà to̱ an yꞌa yao‑na̱ nga jàꞌai̱‑jiàn,

to̱saà jè kisikasén‑na.

43 Án‑ni nga tsì majin‑sínino jè én xi nchjà.

Koiì nga tsì chókjoa̱kao̱‑no jè én‑na.

44 Jòn tsꞌe̱ nai̱i‑nió,

jé xi nꞌai‑no ma,

kꞌoa̱ koiì me‑no kꞌoa̱sꞌia̱on jme xi jè nꞌai‑no me‑le̱.

Jè saꞌnda ngasꞌa̱ síkꞌen‑ní,

kꞌoa̱ jè ni̱sakꞌia‑jìn síkitjosòn én xi ñaki kìxi̱,

nga̱ jè tsìn‑le̱ én xi ñaki kìxi̱.

Kꞌia̱ nga nchja̱ én ndiso,

tsꞌe̱e én xi nchja̱;

nga̱ jè ndiso‑ní,

kꞌoa̱ jè‑ní xi nꞌai‑le̱ kjoa̱ndiso.

45 Kꞌoa̱ lìkoi makjaín‑no jòn én xi xian,

nga ñaki kìxi̱i én xi nchjà.

46 ꞌYá‑ni jòn xi koa̱n kꞌoa̱kꞌoín‑naò tsà jme jé xi tjín‑na.

Nga̱ tsà ñaki kìxi̱ én xi nchjà,

án‑ni nga tsì makjaín‑nino jòn én xi xian.

47 Jè chjo̱ta̱ xi tsꞌe̱ Niná,

én‑le̱ Niná bincháño;

kꞌoa̱ koiì kjoa̱ nga tsì binchañon‑nilao̱o jòn,

nga lìtsà tsꞌe̱ Niná‑jiòn.

48 Kꞌia̱ kinchja̱ chjo̱ta̱ judío kitsò‑le̱ Jesús:

—A tsí nda bixoín‑ji̱n nga ya̱ ꞌnde Samaria tsi̱,

kꞌoa̱ nga jngo sén ni̱chrjin xi tsꞌe̱ nai̱i tíjnajin‑lì.

49 Jesús kitsò:

—An,

ni̱jngo‑jìn sén ni̱chrjin xi tsꞌe̱ nai̱i tíjnajin‑na,

to̱saà jè Nꞌai‑na̱ ꞌbexkoán;

kꞌoa̱ jòn to̱saà nòkjoa̱ꞌaon‑naó.

50 To̱nga an,

lìtsà kjoa̱jeya‑na̱jìn basjaì‑jiàn;

tíjnaà jngo xi koi básjai kꞌoa̱ jè xi kꞌoa̱koi̱tso̱ nga kìxi̱ tìsꞌian.

51 Ñaki kìxi̱i xi xin‑no:

Jè xi síkitjosòn én‑na̱,

lìkꞌia skoe̱ kjoa̱biya.

52 Kꞌia̱ chjo̱ta̱ judío kitsò‑le̱:

—Ndꞌai̱ ꞌya‑nìji̱n nga jngo sén ni̱chrjin xi tsꞌe̱ nai̱i tíjnajin‑lì.

Jè Abraham kꞌen‑ní kao̱ jè chjo̱ta̱ xi kinchja̱ya ngajao‑le̱ Niná kꞌoa̱ati̱ kꞌen;

kꞌoa̱ ji si‑ní:

“Jè xi síkitjosòn én‑na̱,

lìkꞌia skoe̱ kjoa̱biya”.

53 Axo̱ ngìsa̱a títjòn tijnai ji ti̱kꞌoa̱‑ni jè nꞌai‑ná Abraham,

jè kꞌen‑ní.

¡Kꞌoa̱ ngatsꞌi chjo̱ta̱ xi kinchja̱ya ngajao‑le̱ Niná kꞌoa̱ati̱ kꞌen!

Jósꞌìn chꞌàsjai yao‑li̱ nga kꞌoa̱si‑síni.

54 Kitsò Jesús:

—Tsà ti̱ an bꞌasjèjeya‑nia yao‑na̱,

jè kjoa̱je̱ya‑na ni̱jme‑jìn chjí‑le̱;

jé Nꞌai‑na̱ xi bꞌasjejeya‑na,

jè xi bixón jòn nga Niná‑no ma.

55 To̱nga jòn lìkoi ꞌyaxkon‑jiòn;

to̱nga an ꞌbexkon‑nià,

kꞌoa̱ tsà xián nga tsì ꞌbexkoan,

kꞌoa̱ati̱ sꞌìn ndiso koa̱n an joni tsà jòn;

to̱nga ꞌbexkon‑nià,

kꞌoa̱ sikitjosòn ntsjaì‑le̱ én‑le̱.

56 Abraham jè chjo̱ta̱ jchínga‑ná,

nꞌión koan‑tsjoa‑le̱ nga kiskoyà‑le̱ nga skoe̱ nga kjoàꞌai̱‑jiàn i̱ soꞌnde;

kꞌoa̱ tsabe‑ní kꞌoa̱ nꞌión koan‑tsjoa‑le̱.

57 Kꞌia̱ chjo̱ta̱ judío kitsò‑le̱:

—Kjeè ñachàn‑te jìn nó‑li̱.

Kꞌoa̱ kꞌiá‑ni tsaꞌyai Abraham.

58 Jesús kitsò‑le̱:

—Ñaki kìxi̱i xi xin‑no:

Ti̱ꞌa‑ni nga kje sa tsin‑jìn Abraham,

An‑nià.

59 Kꞌia̱ chjo̱ta̱ judío kiskoé la̱jao̱ nga koa̱sèn‑le̱;

to̱nga Jesús tsakꞌèjnaꞌma kꞌoa̱ tsitjo‑ni ya̱ nditsin‑le̱ yo̱ngo̱;

kꞌoa̱ ya̱ jaꞌa‑jin basen‑le̱ chjo̱ta̱ xo̱kjoan,

nga ki Jesús.