—Ji xi bakòyai,

ꞌyá xi tsakajngijé nga xka̱ kji‑ni nga kitsin chjo̱ta̱ xo̱kji,

a jé tsakajngijé axo̱ jé xijchá‑le̱.

3 Jesús kitsò:

—Lìtsà koi‑jìn nga jè chjo̱ta̱ xo̱kji tsakajngijé,

ni̱ jè‑jìn xijchá‑le̱,

to̱saà koi nga kàtaꞌya‑le̱ nganꞌión‑le̱ Niná ya̱ jin yao‑le̱ chjo̱ta̱ xo̱kji.

4 Machjén nga sikitjosoàn xá‑le̱ jè xi kisikasén‑na,

ti̱ꞌa‑ni nga ni̱chrjin sa;

nga̱ jeè nchroá manjiòn kꞌia̱ nga ni̱ꞌyà‑jìn xi ti̱ ma síxá‑ni.

5 Kꞌia̱ nga i̱ tìjna̱ i̱ soꞌnde,

an‑nià jè lꞌí xi sí-isen‑le̱ jè chjo̱ta̱.

6 Kꞌia̱ nga je kꞌoa̱kitsò,

tsakꞌéchrátꞌa nangi,

kꞌoa̱ ndási kisindá kao̱ ndá na̱chrá‑le̱,

kꞌoa̱ koi kisikajon ya̱ xko̱n chjo̱ta̱ xka̱,

7 kꞌoa̱ kitsò‑le̱:

—Tꞌin chónkjai̱n ya̱ chrjaó nandá Siloé (én xi tsò‑ni:

“Jè Xi Kinìkasén”).

Kꞌia̱ ki,

kꞌoa̱ kiskò‑nkja̱n,

kꞌoa̱ nga kinchroa‑ni jeè matsen‑nile̱.

8 Kꞌia̱ jè chjo̱ta̱ ndai ndꞌia‑le̱,

kao̱ xi tsabe ngasꞌa̱ nga xka̱ kji,

i̱ tsakꞌèmatsò:

«A tsí tsà jè chjo̱ta̱ xo̱kji xi jyó‑ná bꞌèjna kꞌoa̱ tao̱n‑ná síjé».

9 Tjín kꞌa chjo̱ta̱ xi kitsò:

«Jé‑ní xi xka̱‑ná kji tsàkai».

Kꞌoa̱ chjo̱ta̱ xikꞌa kitsò:

«Meè kꞌoa̱kji».

To̱nga jè chjo̱ta̱ xi xka̱ tsàkai kitsò:

«An‑nià».

10 Kꞌoa̱ jè chjo̱ta̱ kitsò‑le̱:

—Jó kàma‑ni nga kàmatsen‑nilì.

11 Kinchja̱ jè chjo̱ta̱ xi xka̱ kji tsàkai kꞌoa̱ i̱ kitsò:

—Jé chjo̱ta̱ xi Jesús ꞌmì kàsínda ndási,

kàsíkajon xkoan,

kꞌoa̱ xi je kàma kàtsò‑na:

“Tꞌin ya̱ chrjaó nandá Siloé,

kꞌoa̱ ya̱ chónkjai̱n”;

kꞌoa̱ an kàfia,

kꞌoa̱ kàkònkja̱n,

kꞌoa̱ kꞌia̱a kàmatsen‑na.

12 Kꞌia̱ jè chjo̱ta̱ kitsò‑le̱:

—Jñá tíjna jè.

Jè kitsò:

—Lìkoi ꞌbe.

13 Jè chjo̱ta̱ kikao̱tꞌa‑le̱ chjo̱ta̱ fariseo jè xi xka̱ kji tsàkai.

14 Kꞌoa̱ xotò nga kꞌia̱,

ni̱chrjin nga bexkón Niná chjo̱ta̱ judío,

kꞌia̱ nga kisinda ndási Jesús kꞌoa̱ nga kisindaya chjo̱ta̱ xi xka̱ kji tsàkai.

15 Jè chjo̱ta̱ fariseo kꞌoa̱ti̱ kiskònangi‑le̱ jókoan‑ni nga koan‑tsen‑le̱.

Jè kitsò‑le̱:

—Ndásiì kàsíkajon xkoan,

kꞌoa̱ kàkonkja̱an‑jiàn,

kꞌoa̱ matseèn‑na ndꞌai̱.

16 Kꞌia̱ kitsò kꞌa chjo̱ta̱ fariseo:

«Jè chjo̱ta̱ xi títsò‑le̱ lìkoi tsà Niná kisikasén,

nga̱ tsì bexkón ni̱chrjin xotò,

ni̱chrjin nga ꞌyaxkoán Niná».

Tjín kꞌa sa xi kitsò:

«Jó koa̱n‑nile̱ nga jngo chjo̱ta̱jé kꞌoa̱sꞌi̱in choa̱ jè».

Kꞌoa̱ xi to̱ tꞌatsꞌe̱ kjoa̱ jè koanxkoa̱ya chjo̱ta̱ fariseo.

17 Kꞌia̱ ti̱ kiskònangingá‑nile̱ jè chjo̱ta̱ xi xka̱ kji tsàkai:

—Jósi ji tꞌatsꞌe̱ jè chjo̱ta̱ xi kàsíndaya‑lì.

Kꞌoa̱ jè chjo̱ta̱ xo̱kji kitsò:

—Jngoò chjo̱ta̱ xi nchja̱ya ngajao‑le̱ Niná.

18 To̱nga jè chjo̱ta̱ jchínga‑le̱ chjo̱ta̱ judío lìkoi koan‑kjaín‑le̱ tsà chjo̱ta̱ xo̱kji xka̱ kji tsàkai,

ni̱ koi‑jìn nga koan‑ndaya,

jo saꞌnda nga kinòkjoa̱‑le̱ xijchá‑le̱ chjo̱ta̱ xi xka̱ kji tsàkai.

19 Kꞌoa̱ jè chjo̱ta̱ jchínga‑le̱ chjo̱ta̱ judío kiskònangi‑le̱ kitsò‑le̱:

—A jé ti‑noò xo̱kji xi bixón nga xka̱ kji saꞌnda nga kitsin.

Jó koan-nile̱ nga je matsen-nile̱ ndꞌai̱.

20 Kinchja̱ xijchá‑le̱ kꞌoa̱ i̱ kitsò:

—ꞌya‑nìji̱n nga jè ti‑na̱ji̱n xo̱kji,

kꞌoa̱ nga xka̱ kji saꞌnda nga kitsin;

21 to̱nga lìkoi ꞌyai‑ji̱n jóma‑ni nga matsen‑le̱ ndꞌai̱ axo̱ ꞌyá‑ni xi kàsíndaya,

kꞌoa̱ati̱ tsì ꞌyai‑ji̱n;

jeè tjín‑le̱ nó,

to̱sa jè chjónangi‑lao̱o;

kꞌoa̱ jè soaà kꞌoa̱koi̱tso̱‑no.

22 Koiì kꞌoa̱kitsò‑ni jè xijchá‑le̱ nga̱ jé chjo̱ta̱ jchínga‑le̱ chjo̱ta̱ judío kitsokjòn‑le̱,

nga̱ jeè kꞌoa̱sꞌìn tsakjaóya‑ni,

tsà ꞌya‑ni xi kꞌoa̱koi̱tso̱ nga Jesús Jè Xi Niná Kisikasén,

koi̱chon‑sjejìn ya̱ ndꞌia jña maxkia̱ xo̱n‑le̱ Niná.

23 Koiì nga kitsò‑ni xijchá‑le̱:

«Jeè tjín‑le̱ nó,

jè soa chjónangi‑lao̱o».

24 Kꞌia̱ chjo̱ta̱ jchínga‑le̱ chjo̱ta̱ judío kinchja̱ngá‑nile̱ xi xka̱ kji tsàkai,

kꞌoa̱ i̱ kitsò‑le̱:

—Ti̱nókjoai̱ én kìxi̱ ngixko̱n Niná;

ji̱n‑ji̱n ꞌya‑nìji̱n nga chjo̱ta̱ xo̱kji chjo̱ta̱jé‑ní.

25 Kꞌia̱ jè kinchja̱ kꞌoa̱ kitsò:

—Tsà chjo̱ta̱jé‑ní,

lìkoi ꞌbe;

to̱jngoò kjoa̱ xi ꞌbe an,

nga xka̱‑jiàn tsàkai,

kꞌoa̱ nga je matsen‑na ndꞌai̱.

26 Jè chjo̱ta̱ jchínga‑le̱ chjo̱ta̱ judío ngìndia kiskònangingá‑nile̱:

—Jmé xi kàsikao̱‑lì.

Jósꞌìn kàsíndaya xkoin.

27 Jè chjo̱ta̱ xo̱kji kitsò:

—Jeè kꞌoa̱kàxin‑no,

kꞌoa̱ kaì‑no nga binchaño;

án‑ni nga ngìndia me‑nino nga koi̱nóꞌyaò.

Axo̱ kꞌoa̱ati̱ me‑no nga chjo̱ta̱ xi ya̱ kòtꞌayàtꞌa‑le̱ koa̱on nda tsà jòn.

28 Kꞌoa̱ jè chjo̱ta̱ jchínga‑le̱ chjo̱ta̱ judío kinchja̱ꞌaon‑le̱ kꞌoa̱ kitsò‑le̱:

—Ji‑ní xi ya̱ chòtꞌayàtꞌa‑lai̱,

to̱nga ji̱n‑ji̱n jè kjoa̱téxoma‑le̱ Niná xi kiski Moisés chòtꞌayaì‑ji̱n.

29 ꞌYa‑nìji̱n nga Niná tsakjákao̱ jè Moisés;

to̱nga xi jè chjo̱ta̱ xo̱kji lìkoi ꞌyai‑ji̱n jñá jaꞌai‑ni.

30 Kinchja̱ jè chjo̱ta̱ xi xka̱ kji tsàkai kꞌoa̱ i̱ kitsò‑le̱:

—Koiì jè xi to̱ kꞌoa̱ma‑na,

nga jòn lìkoi ꞌyao jñá jaꞌai‑ni,

to̱nga xi an kàsíndayaà xkoan.

31 Kꞌoa̱ ꞌya‑niá nga Niná lìkoi nchrꞌoé‑le̱ jè xi chjo̱ta̱jé,

to̱nga tsà ꞌya‑ni xi tsokjón‑ke Niná kꞌoa̱ síkitjosòn josꞌìn nga jè me‑le̱,

jè‑ní xi nchrꞌoé‑le̱.

32 Saꞌnda ngasꞌa̱ kje sa nòꞌyà‑le̱ nga jngo chjo̱ta̱ xi ma‑le̱ síndaya jngo xi xka̱ kji nga kitsin.

33 Tsà tsì Niná kisikasén jè chjo̱ta̱ xo̱kji,

ni̱jme‑jìn xi koa̱n‑le̱ sꞌin.

34 Kinchja̱ chjo̱ta̱ jchínga‑le̱ chjo̱ta̱ judío kꞌoa̱ i̱ kitsò‑le̱:

—Ji xi ñaki jé kitsin‑jin.

Kꞌoa̱,

a jiì bakòya‑naíji̱n.

Kꞌia̱ tsakꞌaonsjejin ya̱ ndꞌia jña maxkia̱ xo̱n‑le̱ Niná.

35 Kisꞌejiìn‑le̱ Jesús nga tsakichonsjejin jè chjo̱ta̱ xo̱kji ya̱ ndꞌia jña maxkia̱ xo̱n‑le̱ Niná;

kꞌia̱ nga koansjai‑le̱ kitsò‑le̱:

—A makjaín‑lì ji tꞌatsꞌe̱ ꞌNdí‑le̱ Niná.

36 Kinchja̱ jè chjo̱ta̱ xo̱kji kꞌoa̱ kitsò:

—ꞌYá‑ni jè Nai,

jmé‑ni nga koa̱n‑kjaín‑nina tꞌatsꞌe̱.

37 Jesús kitsò‑le̱:

—Jeè tiꞌyai,

kꞌoa̱ jè‑ní xi tífàkao̱‑lì.

38 Kꞌoa̱ jè chjo̱ta̱ xo̱kji kitsò:

—Makjaín‑na Nai.

Kꞌoa̱ tsabexkón.

39 Kꞌia̱ Jesús kitsò:

—An,

koiì xá jàꞌai̱‑nia i̱ soꞌnde nga kꞌoendajian josꞌìn bakìn‑le̱ chjo̱ta̱,

jmé‑ni nga jè xi tsì matsen‑le̱ koa̱n‑tsen‑nile̱,

kꞌoa̱ jè xi matsen‑le̱,

kàtamaxka̱.

40 Kꞌia̱ nga kinchrꞌoé én xo̱ tsò,

kꞌa chjo̱ta̱ fariseo xi ya̱ tjiókao̱ Jesús,

kitsò:

—A si‑ní nga kꞌoa̱ti̱ xka̱ kjoain‑ji̱n tsànda‑ji̱n.

41 Jesús kitsò‑le̱:

—Tsà xka̱‑làni kjoaon,

lìkoi ya̱ koi̱yo‑jion jé‑no;

to̱nga ndꞌai̱,

nga bixón:

“Matseèn‑naji̱n,”

to̱ jo ya̱a koi̱yojion jé‑no.