Jè barrè nchrꞌoé‑le̱ jta̱‑le̱ jè xi síkoìnda̱
10
»Ñaki kìxi̱i xi xin‑no:
Jè xi tsì ya̱ faꞌasꞌen‑ni ya̱ xo̱ntjoa̱ nchꞌoá‑le̱ barrè,
to̱saà xìn mijon‑ni nga faꞌasꞌen nchꞌoá,
jè‑ní xi chjo̱ta̱ché kꞌoa̱ xi to̱ fìkao̱ché barrè.
2 To̱nga jè xi ya̱ xo̱ntjoa̱‑le̱ nchꞌoá faꞌasꞌen‑ni,
jè‑ní xi koꞌnda barrè.
3 Jè xi síkoìnda̱ xo̱ntjoa̱‑le̱ nchꞌoá,
jé kjoꞌaì‑le̱ jè xi síkoìnda̱ barrè kꞌoa̱ jè barrè nchrꞌoé‑le̱ jta̱‑le̱ jè xi síkoìnda̱;
kꞌoa̱ nchja̱ jaꞌaín‑le̱ nga jngó jngó barrè‑le̱ kꞌoa̱ mꞌaosje.
4 Kꞌoa̱ kꞌia̱ nga je mꞌaosje ngatsꞌi barrè xi tsꞌe̱,
jè fì títjòn‑le̱ barrè;
kꞌoa̱ jè barrè fìtje̱n‑ngi‑le̱,
nga̱ nchrꞌoé jta̱‑le̱.
5 To̱nga jè xi kja̱ꞌaí chjo̱ta̱ lìkoi koai̱tje̱n‑ngi‑le̱,
to̱sa̱a banga‑le̱ nga̱ tsì be jta̱‑le̱ xi kja̱ꞌaí chjo̱ta̱ kꞌia̱ nga nchja̱‑le̱.
6 Jé choa̱ jè xi mangósòn‑kao̱ jngo kjoa̱ xi Jesús kinchja̱‑kao̱ chjo̱ta̱ fariseo;
to̱nga lìkoi koanjin‑le̱ jó kitsò‑nile̱.
Jesús, jè xi nda koꞌnda barrè
7 Jesús ngìndia kꞌoa̱ti̱ kitsò ngá‑nile̱:
«Ñaki kìxi̱i xi xin‑no,
an‑nià jè xo̱ntjoa̱ jña faꞌasꞌen‑ni barrè.
8 Ngatsꞌi xi jaꞌai títjòn‑na,
to̱ chjo̱ta̱ché‑ní kꞌoa̱ jè‑ní xi to̱ fìkao̱ché barrè;
to̱nga koiì kjoa̱ nga jè barrè lìkoi kitje̱ngi‑nile̱.
9 An‑nià jè xo̱ntjoa̱;
kꞌoa̱ jè xi kjoa̱ꞌasꞌen xo̱ntjoa̱ jè,
koi̱tjontjaì‑ní;
kꞌoa̱ kjoa̱ꞌasꞌen kꞌoa̱ koi̱tjo,
kꞌoa̱ so̱kò‑le̱ xi koa̱kje̱n.
10 Jè chjo̱ta̱ché to̱koiì xá faꞌai‑ni nga faꞌaisíché,
nga faꞌaisíkꞌen kꞌoa̱ nga faꞌaisíkixòya;
to̱nga an koiì xá jàꞌai̱‑nia jmé‑ni nga kàtasꞌe‑ninò kjoa̱bijnachon,
kꞌoa̱ jmé‑ni nga tse sa kjoa̱bijnachon kàtasꞌe‑no.
11 »An‑nià xi nda koꞌnda barrè;a
jè xi nda koꞌnda barrè,
tsjoá kjoa̱bijnachon‑le̱ xi to̱ tꞌatsꞌe̱ barrè.
12 To̱nga jè xi to̱ machjí‑le̱ nga koꞌnda barrè,
kꞌoa̱ xi tsì tsà jè nai‑le̱ barrè,
kꞌia̱ nga be nga nchroá tse̱en,
tsjion‑kon barrè kꞌoa̱ banga‑le̱,
kꞌoa̱ jè tse̱en síkìꞌaon kꞌoa̱ fìkao̱ché barrè kꞌoa̱ bꞌétsaoba xikꞌa.
13 Koiì kjoa̱ nga jè xi to̱ machjí‑le̱ nga koꞌnda barrè to̱ bangaà‑le̱,
nga̱ to̱ machjí‑le̱,
kꞌoa̱ lìkoi makjájon‑le̱ tꞌatsꞌe̱ barrè.
14 »An‑nià xi nda koꞌnda barrè;
kꞌoa̱ ꞌbexkon‑nià jè barrè‑na̱,
kꞌoa̱ jè barrè‑na̱ kꞌoa̱ati̱ bexkon‑na,
15 josꞌìn nga jè Nꞌai ꞌbexkon‑na,
kꞌoa̱ an ꞌbexkon‑jiàn jè Nꞌai;
kꞌoa̱ tsjoa‑niá kjoa̱bijnachon‑na̱ xi to̱ tꞌatsꞌe̱ barrè.
16 Kꞌoa̱ati̱ tjín sa‑na barrè xi kja̱ꞌaí xi tsì tsà i̱ tjióꞌyà jè nchꞌoá xo̱kji,
jè barrè xo̱kjoan kꞌoa̱ati̱ machjén‑na nga kjoàꞌai̱koa̱,
kꞌoa̱ koi̱nchrꞌoé jta̱‑na̱;
kꞌoa̱ to̱ jngo jtín koa̱n barrè kꞌoa̱ to̱ jngoò koa̱n xi skóꞌnda.
17 Koiì nga tsjoake‑nina jè Nꞌai,
nga̱ an tsjoantjaì‑jiàn jè kjoa̱bijnachon‑na̱,
jmé‑ni nga skoè ngìndia‑ña.
18 Ni̱ꞌya‑jìn xi fáꞌa‑na kjoa̱bijnachon‑na̱,
an soaà xi kꞌoa̱sꞌìn me‑na nga tsjoantjaì‑jiàn.
Tjín‑na nganꞌión nga tsjoa‑jiàn kjoa̱bijnachon‑na̱ kꞌoa̱ tjín‑na nganꞌión nga skoè ngìndia‑nia.
Koiì jè xá xi tsakꞌénè‑na Nꞌai‑na̱».
19 Ngìndia koanxkoa̱ya chjo̱ta̱ judío xi to̱ tꞌatsꞌe̱ én xo̱ tsò.
20 Nkjìn xi kitsò:
«Jngo sén ni̱chrjin xi tsꞌe̱ nai̱i tíjnajin‑le̱,
kꞌoa̱ ská‑le̱;
án‑ni nga kꞌoa̱kji chjo̱ta̱ binchañon‑nilao̱o».
21 Xi kꞌa kitsò:
«Jè én xo̱ tsò nchja̱,
alì tsà tsꞌe̱ chjo̱ta̱ xi jngo sén ni̱chrjin xi tsꞌe̱ nai̱i tíjnajin‑le̱.
A koa̱an‑le̱ jngo sén ni̱chrjin xi tsꞌe̱ nai̱i nga si̱indaya xko̱n xi xka̱ kjoan».
Jè chjo̱ta̱ jchínga‑le̱ chjo̱ta̱ judío tsakꞌasjengi Jesús
22 Kꞌia̱ tíbìtjo ya̱ Jerusalén jè sꞌoí xi tsꞌe̱ nga síkꞌaitsjenyà jè chjo̱ta̱ judío kꞌia̱ nga koan‑ntsja Niná jè yo̱ngo̱.
Kꞌia̱ nga cha̱n‑nchꞌán,
23 kꞌoa̱ Jesús ya̱a tsòꞌba ya̱ nditsin‑le̱ yo̱ngo̱,
ya̱ jña tje̱n‑ngi ngꞌián xi tsꞌe̱ Salomón ꞌmì.
24 Kꞌoa̱ ya̱ tsakinchandai‑le̱ Jesús jè chjo̱ta̱ jnchínga‑le̱ chjo̱ta̱ judío,
kꞌoa̱ i̱ kitsò‑le̱:
—Kꞌiá saꞌnda nga jaò kꞌoaí tokoìn‑ji̱n.
Tsà ji‑ní Jè Xi Niná Kisikasén tꞌìnya kìxi̱‑naíji̱n.
25 Kꞌia̱ Jesús kitsò‑le̱:
—Jeè kꞌoa̱kixin‑no,
kꞌoa̱ lìkoi makjaín‑no;
jè kjoa̱xkón xi sꞌian kao̱o nganꞌión‑le̱ Nꞌai‑na̱ koiì xi tsjoá én xi tꞌatsꞌa̱n;
26 to̱nga jòn lìkoi makjaín‑no,
nga̱ tsì tsà barrè‑na̱ jìn mao,
josꞌìn nga jè kixin‑no.
27 Jè barrè‑na̱ nchrꞌoé jta̱‑na̱,
kꞌoa̱ an ꞌbexkon‑nià,
kꞌoa̱ jè bꞌèmatje̱n‑ngi‑na,
28 kꞌoa̱ aàn tsjoa‑le̱ kjoa̱bijnachon xi tsìkꞌia fetꞌa;
kꞌoa̱ ni̱kꞌia‑jìn jcha̱,
kꞌoa̱ ni̱ꞌya‑jìn xi kjoa̱ꞌaíkꞌáxìn i̱ ya ndsa̱.
29 Jè Nꞌai‑na̱ xi kitsjoa‑na,
jè xi ngìsa̱ sa tse nganꞌión tjín‑le̱,
kꞌoa̱ ni̱ꞌya‑jìn xi koa̱n‑le̱ kjoa̱ꞌàxìn ya̱ ya ntsja Nꞌai‑na̱.
30 An kao̱ jè Nꞌai to̱ jngoò ma‑niji̱n.
31 Kꞌia̱ chjo̱ta̱ jchínga‑le̱ chjo̱ta̱ judío kiskoé ngìjngokꞌà la̱jao̱ nga me‑le̱ la̱jao̱ si̱ikꞌen‑ni Jesús.
32 Jesús kitsò‑le̱:
—Nꞌión nkjìn kjoa̱ xi nda tjín tìbako‑no xi tsꞌe̱ Nꞌai‑na̱;
jñá tꞌatsꞌe̱‑ni̱le̱ xi la̱jao̱ si̱kꞌen‑ninaó.
33 Kꞌia̱ kinchja̱ chjo̱ta̱ jchínga‑le̱ chjo̱ta̱ judío,
kitsò:
—Lìtsà tꞌatsꞌe̱‑jìn kjoa̱ xi nda tjín nga la̱jao̱ si̱kꞌen‑nilaì‑ji̱n,
to̱sa̱a koi nga Niná nòkjoa̱ꞌaon‑lai̱;b
nga̱ ji chjo̱ta̱‑ní,
kꞌoa̱ Niná tiꞌmì‑lai̱ yao‑li̱.
34 Jesús kitsò‑le̱:
—A tsí i̱ tsò én xi tjítꞌa ya̱ Xo̱n Én‑le̱ Niná:
“An xi i̱ kixian,
niná‑nió jòn”.c
35 Tsà Niná,
niná kitsò‑le̱ jè chjo̱ta̱ xi kisintsja én‑le̱ (kꞌoa̱ jè Xo̱n Én‑le̱ Niná lìkoi koa̱n koi̱tjátontjaì‑le̱e),
36 jè xi jè Nꞌai kiskoétꞌaxìn kꞌoa̱ kisikasén i̱ soꞌnde,
a kꞌoa̱a ꞌmì‑lao̱o nga Niná tínchja̱ꞌaon‑le̱,
to̱koi‑ni nga̱ kàxian nga ꞌNdí‑le̱ Niná‑jiàn.
37 Tsà tsì tsà jè xá‑le̱ Nꞌai‑na̱ tìsꞌian,
alì makjaínjìn‑no én‑na̱.
38 To̱nga tsà koi kꞌoa̱tìsꞌian,
ni̱nga tsì kàtamakjaín‑no én xi an tìxian,
kàtamakjaín‑no xi to̱ tꞌatsꞌe̱ kjoa̱xkón xi sꞌian,
jmé‑ni nga jcha̱‑nio kꞌoa̱ koa̱n‑kjaín‑nino nga jè Nꞌai kao̱ an,
to̱jngo ma‑niji̱n.
39 Tsakásjai ngìndia chjo̱ta̱ jchínga‑le̱ chjo̱ta̱ judío nga jtsoa̱ Jesús,
to̱nga lìkoi koan kitsoa.
40 Kꞌoa̱ Jesús ki ngìndia ya̱ xingoa‑le̱ xo̱ngá nandá Jordán,
ya̱ jña nga títjòn kiskanìsꞌen‑ngindá chjo̱ta̱ jè Juan;
kꞌoa̱ ya̱ tsakꞌèjna.
41 Kꞌoa̱ nkjìn chjo̱ta̱ jaꞌaikòn‑le̱,
kꞌoa̱ kitsò:
«Xi kjoa̱kìxi̱,
Juan ni̱jme‑jìn choa̱ xi kisꞌin;
to̱nga ngayije én xi kinchja̱ Juan xi tꞌatsꞌe̱ jè chjo̱ta̱ xo̱kji ñaki kꞌoa̱atjín».
42 Kꞌoa̱ nꞌión nkjìn chjo̱ta̱ xi ya̱ koan‑kjaín‑le̱ tꞌatsꞌe̱ Jesús.