—Nai,

koe̱e‑ni,

jè xi nꞌión tsjoachai tímꞌen‑ní.

4 Kꞌia̱ nga kinchrꞌoé Jesús,

kitsò:

—Jè chꞌin jè lìtsà koi koi̱yá‑ni Lázaro,

to̱sa̱a koi nga jè Niná koi̱tjojeya,

jme‑ni nga jè ꞌNdí‑le̱ Niná koi̱tjojeya‑ni xi to̱ tꞌatsꞌe̱ chꞌin jè.

5 Kꞌoa̱ nꞌión tsjoake Jesús jè Marta kao̱ ndichja kꞌoa̱ kao̱ Lázaro.

6 Kꞌia̱ nga kinchrꞌoé nga tímꞌen Lázaro,

ngìjaò ni̱chrjin tsakꞌèjna sa ya̱ ꞌnde jña‑ni tíjna.

7 Xi je koan,

kꞌia̱ nga je jaꞌato xi jaò ni̱chrjin,

kitsò‑le̱ chjo̱ta̱ xi ya̱ kòtꞌayàtꞌa‑le̱:

—Tjian ngìndiaà ya̱ ꞌnde Judea.

8 Chjo̱ta̱ xi ya̱ kòtꞌayàtꞌa‑le̱ kitsò‑le̱:

—Ji xi bakòyai,

ndaà ꞌyai nga jè chjo̱ta̱ jchínga‑le̱ chjo̱ta̱ judío tjióbásjai‑lì nga la̱jao̱‑ná me‑le̱ si̱ikꞌen‑nilì,

a ngìndia ti̱ya̱ tiꞌmingá‑ni.

9 Jesús kitsò:

—A tsí tsà tejaò choa̱ tjín‑le̱ nga jngo ni̱chrjin.

Jè xi kꞌia̱ bꞌamjen nga ni̱chrjin,

lìkoi saténgi,

nga̱ beè jè lꞌí xi sí-isen i̱ soꞌnde;

10 to̱nga jè xi kꞌia̱ bꞌamjen nga njiòn,

saténgi‑ní,

nga̱ ya̱ jin kjoa̱bijnachon‑le̱ tsìn‑le̱ lꞌí xi sí-isen‑le̱.

11 Kꞌia̱ nga je kꞌoa̱kitsò,

kitsò‑le̱ chjo̱ta̱ xi ya̱ kòtꞌayàtꞌa‑le̱:

—Jè mìyo̱‑ná Lázaro kijnafè‑ní;

to̱nga aàn tìfisikjaꞌá‑le̱.

12 Kꞌia̱ kitsò chjo̱ta̱ xi ya̱ kòtꞌayàtꞌa‑le̱:

—Nai,

tsà to̱ kijnafè,

koa̱n‑ndaya‑jìn‑ni.

13 To̱nga Jesús koiì xi kitsò‑ni tꞌatsꞌe̱ kjoa̱biya‑le̱ Lázaro;

kꞌoa̱ jè chjo̱ta̱ xi ya̱ kòtꞌayàtꞌa‑le̱ kꞌoa̱asꞌìn kisikꞌaitsjen nga koi xi títsò Jesús nga kijnafè Lázaro nga to̱ tísíkjáya.

14 Kꞌia̱ Jesús tsakjákao̱ kìxi̱ kitsò‑le̱:

—Jeè kàmꞌen Lázaro;

15 kꞌoa̱ matsjoaà‑na xi tꞌatsao̱on,

nga tsì tsà ya̱ tìjnakoa̱,

jmé‑ni nga kàtamakjaín‑nino xi tꞌatsꞌa̱n;

to̱nga tjian‑chón‑le̱e.

16 Kꞌia̱ Tomás,

jè xi Dídimo ꞌmì‑le̱,

kitsò‑le̱ xikꞌa chjo̱ta̱ xi ya̱ kòtꞌayàtꞌa‑le̱ Jesús:

—Kꞌoa̱ti̱ tjián tsànda‑ñá,

jmé‑ni nga ya̱ koi̱yákao̱‑niá Jesús.

17 Jaꞌaì‑ni Jesús,

kꞌoa̱ kisꞌejin‑le̱ nga je ño ni̱chrjin tjín‑le̱ nga kisꞌejnaya yao‑le̱ Lázaro ya̱ ngijao jña sꞌeyoyà kꞌen.

18 Kꞌoa̱ na̱xi̱nandá‑ꞌndí Betania jàn‑la̱ jmi metro kjin‑le̱ Jerusalén;

19 kꞌoa̱ nꞌión nkjìn chjo̱ta̱ judío jaꞌaikòn‑le̱ Marta kao̱ María nga kisijekon nga ndsꞌe̱ kꞌen.

20 Kꞌia̱ nga kinchrꞌoé Marta nga je jaꞌaichrian Jesús,

kikꞌáyandia̱a;

to̱nga jè María ya̱a tsakꞌèjnaꞌya ndꞌia.

21 Kꞌoa̱ Marta kitsò‑le̱ Jesús:

—Nai,

tsà i̱‑làni tijnai tsàkai,

lìkoi‑jìn kꞌen jè ndsꞌe.

22 To̱nga kꞌoa̱ati̱ ꞌbe‑jiàn ndꞌai̱,

nga to̱jme‑ni xi si̱jé‑lai̱ Niná,

Niná tsjoá‑lì.

23 Jesús kitsò‑le̱:

—Kjoa̱ꞌáya‑nile̱ jè ndsꞌai.

24 Marta kitsò‑le̱:

—ꞌbe‑nià nga kjoa̱ꞌáya‑nile̱ kꞌia̱ nga sꞌe̱ kjoa̱faꞌáya,

kꞌia̱ nga koi̱chòkjetꞌa ni̱chrjin.

25 Jesús kitsò‑le̱:

—An‑nià jè kjoa̱faꞌáya kao̱ kjoa̱bijnachon;

jè xi makjaín‑le̱ tꞌatsꞌa̱n,

nda tsà je kꞌen,

kꞌoéjnakon‑ní.

26 Kꞌoa̱ to̱ꞌya‑ni xi tíjnakon kꞌoa̱ makjaín‑le̱ tꞌatsꞌa̱n,

lìkoi tsà ndiaà koi̱yá.

A makjaín‑lì én jè.

27 Marta kitsò:

—Jaon,

Nai;

jeè makjaín‑na nga ji‑jìn Jè Xi Niná Kisikasén,

jè ꞌNdí‑le̱ Niná,

xi jaꞌai i̱ soꞌnde.

28 Kꞌia̱ nga je kꞌoa̱kitsò Marta,

ki kꞌoa̱ kinchja̱‑le̱ María jè ndichja,

kinchja̱tꞌaxìn‑le̱ kitsò‑le̱:

—Jè xi bakóya jeè i̱ tíjna kꞌoa̱ tínchja̱‑lì.

29 Kꞌia̱ nga kinchrꞌoé María,

ndi̱to̱n kitjo ndꞌia kinchroa‑nchrꞌoè Jesús.

30 Kje‑sa bichó Jesús ya̱ na̱xi̱nandá‑ꞌndí,

to̱jo ya̱a tíjna ya̱ ꞌnde jña nga kisatekjao Marta.

31 Kꞌia̱ jè chjo̱ta̱ judío xi ya̱ tjiókao̱ María ya̱ ndꞌia‑le̱,

xi tjiósíjekon,

kꞌia̱ nga tsabe nga María ndi̱to̱n kitjo ndꞌia kꞌoa̱ ki,

kitje̱n‑ngi‑le̱ kꞌoa̱ kitsò:

«Ya̱‑jìn tífì kjiꞌndiá‑tꞌa ya̱ ngijao jña kijnaya yao‑le̱ Lázaro».

32 Kꞌia̱ nga kichò María ya̱ jña tíjna Jesús,

tsakajnajten‑tꞌa nangi ya ngi ndso̱ko̱ kꞌia̱ nga tsabe,

kitsò‑le̱:

—Nai,

tsà i̱‑làni tijnai tsàkai,

lìkoi‑jìn kꞌen jè ndsꞌe.

33 Kꞌia̱ nga Jesús tsabe nga tíkjiꞌndiá María kꞌoa̱ nga kꞌoa̱ti̱ tjiókjiꞌndiá jè chjo̱ta̱ judío xi tje̱n‑kao̱,

kꞌia̱ koanba‑le̱ jin ni̱ma̱‑le̱ kꞌoa̱ ꞌaon koan‑le̱;

34 kꞌoa̱ kitsò:

—Jñá kijna‑no yao‑le̱.

Kꞌia̱ tsakꞌìn‑le̱:

—Nai,

nchroaí kꞌoa̱ chótsain.

35 Kinchroajen ndáxko̱n Jesús,

kiskiꞌndiá.

36 Kꞌia̱ kitsò chjo̱ta̱ judío:

—Chótsen‑lao̱o,

koe̱e síkji tsjoake koan Lázaro.

37 Kꞌoa̱ati̱ tjín kꞌa chjo̱ta̱ xo̱kjoan xi kitsò:

—Jè chjo̱ta̱ xo̱kji,

koaàn‑le̱ kisindayà chjo̱ta̱ xi xka̱,

a tsí koan‑le tsà tsì kitsjoaꞌndè nga kꞌen Lázaro.

38 Jesús,

ngìndia nꞌión ꞌaon koan‑le̱,

jaꞌai jña kisꞌejna yao‑le̱ Lázaro,

jngo ngijao jña ti̱xꞌa̱ngi,

jña nga jngo la̱jao̱‑te sénjnajchro.

39 Kꞌoa̱ Jesús kitsò:

—Chja̱ꞌàxiòn jè la̱jao̱ xi sénjnajchro.

Marta,

jè ndichja xi kꞌen,

kitsò‑le̱:

—Nai,

jeè nje̱n sen,

nga̱ jeè ño ni̱chrjin nga kꞌen.

40 Jesús kitsò‑le̱:

—A tsí je‑ná kꞌoa̱xin‑lè,

tsà makjaín‑lì,

jcha̱‑ní kjoa̱jeya‑le̱ Niná.

41 Kꞌia̱ jè chjo̱ta̱ tsakjaꞌáxìn jè la̱jao̱ xi sénjnajchro jña nga kisꞌejnaya jè kꞌen.

Kꞌoa̱ Jesús kiskòtsen ya̱ ngꞌajmi kitsò:

—Nꞌai,

tsjoaà‑lè kjoa̱nda nga kànòꞌyà‑naí.

42 An,

to̱ jeè ꞌbe‑jiàn nga nòꞌyà‑naí ngantsjaì;

to̱nga to̱ tꞌatsꞌe̱e chjo̱ta̱‑nkjìn xi i̱ tjióndai‑na nga kꞌoa̱kàxian,

jmé‑ni nga kàtamakjaín‑nile̱ nga ji kinìkasén‑naí.

43 Kꞌia̱ nga Jesús je kꞌoa̱kitsò jè én xo̱ tsò,

nꞌión kinchja̱ kitsò:

—Lázaro,

nchroaí i̱ nditsin.

44 Kꞌoa̱ jè xi je kꞌen tsàkai,

kitjo,

kao̱ najño kjinꞌión‑ni ntsja kao̱ ndso̱ko̱,

kꞌoa̱ jè nkjaín jngo najño tíjtéjin.

Jesús kitsò‑le̱ jè chjo̱ta̱ xi ya̱ tjió:

—Chjójndájtaó,

kꞌoa̱ tꞌai̱ꞌnde‑lao̱o nga kàtafì.

45 Kꞌia̱ nkjìn chjo̱ta̱ judío xi jaꞌaisíjekon María,

kꞌoa̱ tsabe jme xi kisꞌin Jesús,

koan‑kjaín‑le̱ tꞌatsꞌe̱ Jesús.

46 To̱nga tjín kꞌa xi ya̱ kikon‑le̱ chjo̱ta̱ fariseo,

kꞌoa̱ kitsòya‑le̱ jme‑ni xi kisꞌin Jesús.

47 Kꞌia̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo kinchja̱maña‑le̱ jtín xi kjinèntsja kjoa̱téxoma‑le̱ chjo̱ta̱ judío,

kꞌoa̱ kitsò:

—Jó bixón,

jmé xi sꞌia̱an,

nga̱ jè chjo̱ta̱ xo̱kji nꞌión nkjìn kjoa̱xkón xi tísꞌín.

48 Tsà to̱ kꞌoai̱ꞌnde‑le̱e,

ngatsꞌi chjo̱ta̱ koa̱n‑kjaín‑jìn‑le̱ tꞌatsꞌe̱;

kꞌoa̱ kjoa̱ꞌaínè‑ná jè chjo̱ta̱ kjoa̱jchán xi Roma tsꞌe̱,

kꞌoa̱ kjoa̱ꞌaí síkixòya yo̱ngo̱‑ná kao̱ na̱xi̱nandá‑ná.

49 Kꞌia̱ jè Caifás jngo xi ya̱ tíjnajin‑le̱,

jè xi na̱ꞌmi títjòn nga koi nó,

kitsò‑le̱:

—Jòn ni̱jme‑jìn xi macho̱ya‑no;

50 kꞌoa̱ ni̱ nìkꞌaitsjen‑jiòn nga ngìsa̱ kjen‑ndia̱a‑ná nga to̱ jngo chjo̱ta̱ kàtamꞌentjaí na̱xi̱nandá‑ná,

ti̱kꞌoa̱‑ni nga ngayije na̱xi̱nandá‑ná jcha̱.

51 Jè én xo̱ kitsò‑le̱ Caifás lìtsà to̱ tsꞌe̱‑jìn kjoa̱faꞌaìtsjen kisichjén nga kꞌoa̱kitsò,

to̱nga koiì kꞌoa̱kitsò‑ni nga xá‑le̱ na̱ꞌmi títjòn tjín‑le̱ nga koi nó,

nga kinchja̱ya ngajao‑le̱ Niná,

nga machjén nga Jesús koi̱yántjaí na̱xi̱nandá;

52 kꞌoa̱ lìtsà to̱jè‑jìn xi judío xi koi̱yántjaì,

kꞌoa̱ati̱ koi nga to̱ jngo na̱xi̱nandá si̱ikao̱ nga kꞌoe̱exkó ngatsꞌi xti‑le̱ Niná xi tjiótsaoba.

53 Koiì kjoa̱ nga saꞌnda nga koi ni̱chrjin tsakjaóya‑ni nga si̱ikꞌen.

54 Kꞌoa̱koan‑ni nga Jesús lìkoi ti̱ tsakꞌamjen basen‑ni ya̱ jin‑le̱ chjo̱ta̱ judío,

to̱saà ki‑ni ya̱,

ya̱ ki jngo ꞌnde xi ya̱ chrian‑le̱ ꞌnde tꞌaxìn‑tꞌa,

ya̱ jngo na̱xi̱nandá‑nꞌión jña Efraín ꞌmì;

kꞌoa̱ ya̱ tsakꞌèjnakao̱ chjo̱ta̱ xi ya̱ kòtꞌayàtꞌa‑le̱.

55 Kꞌoa̱ jeè machrian‑le̱ sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío;

kꞌoa̱ nkjìn chjo̱ta̱ xi kitjo‑ni ya̱ ꞌnde Judea,

kimi ya̱ Jerusalén nga to̱ngi‑nile̱ sꞌoí,

jmé‑ni nga si̱itsje‑ni yao‑le̱ ngixko̱n Niná.

56 Kꞌoa̱ jè chjo̱ta̱ tjiómakásjai Jesús,

kꞌoa̱ tjiókjònangi ngañá‑le̱ xínkjín nga tjió ya̱ nditsin‑le̱ yo̱ngo̱,

tjiótsò:

«Jó bixón,

a tsí kjoa̱ꞌaí tsòkꞌoa̱ sꞌoí chjo̱ta̱ xo̱kji».

57 Kꞌoa̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo kꞌoa̱asꞌìn tsakꞌénè,

tsà ꞌya‑ni xi sꞌe̱jin‑le̱ jña tíjna,

nga kàtatsòya jmé‑ni nga koi̱ndoa̱‑síni.