Kꞌia̱ nga Jesús kinojòn sìti̱ chjí xi na̱ská na̱nje̱n ya̱ Betania
12
Jaon ni̱chrjin ti̱ngini‑le̱ nga koi̱tjo sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,
Jesús jaꞌai ya̱ na̱xi̱nandá‑ꞌndí Betania,
jña tíjna Lázaro,
jè xi kꞌen tsàkai,
kꞌoa̱ xi Jesús kisikjaꞌáyajin‑nile̱ kꞌen.
2 Kꞌoa̱ ya̱ kisꞌenda‑le̱ Jesús tsojmì xi bichi‑ni;
jè Marta kisisin‑le̱,
kꞌoa̱ Lázaro ya̱ tíjnajin‑le̱ jè xi tjiótꞌakao̱ yámìxa̱ Jesús.
3 Kꞌia̱ jè María kiskoé jngo chrjoa̱ lamìta̱ xi tjiá‑le̱ sìti̱ chjí xi na̱ská na̱nje̱n xi ñaki naxó-le̱ nardo kisꞌenda-ni,
kꞌoa̱ kitsjòjon ndso̱ko̱ Jesús,
kꞌoa̱ kao̱ ntsja̱jko̱ kisixìjon‑ni,
kꞌoa̱ ya̱ ya ndꞌia ñaki to̱koiì jta̱‑le̱ kisꞌejnaya.
4 Kꞌoa̱ jngo chjo̱ta̱ xi ya̱ kòtꞌayàtꞌa‑le̱ Jesús,
jè Judas Iscariote,
jè xi ti‑le̱ Simón,
xi kitsjoatꞌa Jesús nga koanskan‑ni,
kitsò:
5 —Án‑ni nga tsì tsà jàn ciento̱ chjí ni̱chrjin‑le̱ cho̱ꞌnda kàsaténa‑ni jè sìti̱ chjí xi na̱ská na̱nje̱n,
kꞌoa̱ tsà jè chjo̱ta̱ xi yo̱ma̱ sꞌìn tjió kàbꞌaì‑le̱ jè tao̱n‑le̱.
6 To̱nga kꞌia̱ nga kꞌoa̱kitsò,
lìtsà koi‑jìn nga me‑le̱ nga kàtamakoìnda̱ jè chjo̱ta̱ xi yo̱ma̱ sꞌìn tjió,
to̱koi‑ní nga ché,
kꞌoa̱ nga jè tíjna‑le̱ jè xijtsa xi xinchá tao̱n,
kꞌoa̱ síché jè tao̱n xi ya̱ satióyà.
7 Kꞌia̱ Jesús kitsò‑le̱:
—Alì kꞌoa̱‑jìn ꞌmì‑lai̱;
nga̱ koiì xá tsakꞌéjnatjaò‑ni nga koi si̱ichjén kꞌia̱ nga sꞌe̱jnaya yao‑na̱ ya̱ ngijao jña sꞌeyoyà kꞌen.
8 Nga̱ jè chjo̱ta̱ xi yo̱ma̱ sꞌìn tjió i̱i koa̱tiòkao̱ ntsjaì‑no,a
to̱nga an,
lìtsà i̱‑jìn koàte̱jnakao̱ ntsjaì‑no.
Kꞌia̱ nga jè na̱ꞌmi xi tjió títjòn‑le̱ na̱ꞌmi tsakjaóya‑ni nga si̱ikꞌen Lázaro
9 Nꞌión nkjìn chjo̱ta̱ judío xi kisꞌejin‑le̱ nga ya̱ na̱xi̱nandá‑ꞌndí Betania tíjna Jesús,
kꞌoa̱ lìtsà to̱ tꞌatsꞌe̱‑jìn Jesús nga jaꞌai,
kꞌoa̱ati̱ koi nga me‑le̱ skoe̱ jè Lázaro xi Jesús kisikjaꞌáyajin‑nile̱ kꞌen.
10 To̱nga jè na̱ꞌmi xi tjió títjòn‑le̱ na̱ꞌmi tsakjaóya‑ni nga kꞌoa̱ti̱ si̱ikꞌen jè Lázaro,
11 nga̱ to̱ tꞌatsꞌe̱e Lázaro nga nꞌión nkjìn chjo̱ta̱ judío xi tjióbinchaxìn kꞌoa̱ nga kjimakjaín‑le̱ tꞌatsꞌe̱ Jesús.
Jókoan nga jaꞌasꞌen Jesús ya̱ Jerusalén
12 Xi koanchaon‑nile̱ nga je tsakjèn sꞌoí Jesús,
jè chjo̱ta̱‑nkjìn xi jaꞌaikoya‑le̱ sꞌoí,
kꞌia̱ nga kinchrꞌoé nga Jesús tínchroá ya̱ Jerusalén,
13 kiskoé xka̱jén,
kꞌoa̱ kikꞌáyandia̱a,
kꞌoa̱ nꞌión kinchja̱ nga kitsò:
—¡Kàtasꞌe‑le̱ kjoa̱jeya Niná!b
¡Jó to̱nda‑le̱ ngixko̱n Niná jè xi kao̱ nganꞌión‑le̱ Niná nchroá‑ni,c
jè Chjo̱ta̱xá Ngajko̱‑le̱ chjo̱ta̱ Israel!
14 Kꞌoa̱ Jesús kisoko jngo‑le̱ bórró ꞌndí kꞌoa̱ tsakꞌèjnasòn‑le̱,
josꞌìn tjítꞌa Xo̱n‑le̱ Niná:
15 «Jòn na̱xi̱nandá xi Sion tsao̱on alì bijkon‑jiòn;
Koe̱e‑ni jè chjo̱ta̱xá ngajko̱‑no nchroákon‑no,
Tíjnasòn jngo‑le̱ bórró ꞌndí,
xi ꞌndí‑le̱ bórró chjo̱on».d
16 Jè én xo̱ tsò lìkoi koanjin‑le̱ nga ti̱kꞌia̱‑ni jè chjo̱ta̱ xi ya̱ kòtꞌayàtꞌa‑le̱ Jesús;
to̱nga kꞌia̱a saꞌnda koanjin‑le̱ nga je kitjojeya Jesús,
nga kꞌoa̱sꞌìn tjítꞌa én‑le̱ Niná xi tꞌatsꞌe̱,
kꞌoa̱ nga kꞌoa̱sꞌìn koan‑tꞌain Jesús.
17 Kꞌoa̱ jè chjo̱ta̱ xi ya̱ tjiókao̱ Jesús kitsjoa én josꞌìn nga kinchja̱‑le̱ Lázaro nga kijnaya ngijao kꞌoa̱ kisikjaꞌáyajin‑nile̱ kꞌen.
18 Koiì kjoa̱ nga kꞌoa̱sꞌìn koanxkó‑ni chjo̱ta̱ nga kikꞌáyandia̱a,
nga̱ kisꞌejiìn‑le̱ nga Jesús kꞌoa̱kisꞌin jè choa̱ xo̱kji.
19 To̱nga jè chjo̱ta̱ fariseo i̱ kitsò‑le̱ xínkjín:
«Koe̱e‑ni nga ni̱jme‑jìn xi bitjosòn‑ná.
Chótsaon,
ngatsꞌi chjo̱ta̱ to̱saà ya̱ fìtje̱n‑ngi‑le̱».
Tjín kꞌa chjo̱ta̱ xi tsì tsà judío‑jìn xi koanme‑le̱ nga tsakjákao̱ Jesús
20 Ya̱ tje̱njin kꞌa‑le̱ chjo̱ta̱ xi tsì tsà judío‑jìn jè chjo̱ta̱ judío xi kimi ya̱ Jerusalén nga ki sꞌoí,
nga kikexkón Niná.
21 Jè chjo̱ta̱ xo̱kjoan,
tsakinchatꞌachrian‑le̱ Felipe,
jè xi ya̱ na̱xi̱nandá‑nꞌión Betsaida tsꞌe̱,
xi ya̱ ꞌnde Galilea nchja̱‑ni,
kisijé‑le̱ kjoa̱nda kitsò‑le̱:
—Jngo kjoa̱nda nìjé‑laìji̱n,
meè‑naji̱n tsàkai nga koi̱nókjoa̱koai̱‑ji̱n Jesús.
22 Ki Felipe,
kꞌoa̱ kitsòya‑le̱ Andrés;
kꞌia̱ Andrés kao̱ Felipe kitsòya‑le̱ Jesús.
23 Kꞌia̱ Jesús kinchja̱ kꞌoa̱ i̱ kitsò:
—Jeè jaꞌai ni̱chrjin nga jè ꞌNdí‑le̱ Chjo̱ta̱ koi̱tjojeya.
24 Ñaki kìxi̱i xi xin‑no:
Tsà jè na̱xi̱n lìkoi sꞌe̱ntjèjin nangi jmé‑ni nga koi̱so̱‑ni,
kꞌoéjna to̱jè;
to̱nga tsà sꞌe̱ntjèjin nangi,
nꞌión nkjìn to koa̱‑le̱.
25 Jè xi tsjoake kjoa̱bijnachon‑le̱ to̱saà si̱icha,
kꞌoa̱ ꞌya‑ni xi machꞌaoke kjoa̱bijnachon‑le̱ i̱ soꞌnde,
tꞌatsꞌe̱e kjoa̱bijnachon xi tsìkꞌia fetꞌa tíbꞌéjnatjaó.
26 Tsà ꞌya‑ni xi an síxá‑na,
kàtanchroátje̱n‑ngi‑na;
kꞌoa̱ ya̱ jña koàte̱jna an kꞌoa̱ati̱ ya̱ kꞌoéjna jè xi an síxá‑na.
Tsà ꞌya‑ni xi an síxá‑na,
jè Nꞌai‑na̱ tsjoá‑le̱ kjoa̱nda.
Kꞌia̱ nga Jesús kitsòya xi tꞌatsꞌe̱ kjoa̱biya‑le̱
27 »Ndꞌai̱ nꞌión tíbatéjé ni̱ma̱‑na̱;
kꞌoa̱ jmé xi xián‑ni;
a xín‑niá:
“Nꞌai,
chꞌa̱sjentjaì‑naí xi tꞌatsꞌe̱ jè kjoa̱ñꞌain jè”.
To̱nga koiì xá jàꞌai̱‑nia i̱ soꞌnde nga kjoa̱ꞌa kjoa̱ñꞌain ni̱chrjin jè.
28 Nꞌai,
chꞌa̱sjejeyai yao‑li̱.
Kꞌia̱ jaꞌai‑ni ya̱ ngꞌajmi jngo jta̱ xi kitsò:
«Jeè sa tsꞌasjèjeya,
kꞌoa̱ kꞌoasjèjeyaà ngìndia».
29 Kꞌoa̱ jè chjo̱ta̱‑nkjìn xi ya̱ tjió,
kꞌoa̱ kinchrꞌoé‑le̱ jè jta̱,
kꞌoa̱kitsò nga jngo chꞌao̱n xo̱ koan.
Kꞌoa̱ tjín kꞌa xi kitsò:
—Jngoò cho̱ꞌnda ngꞌajmi xi kàfákao̱.
30 Kinchja̱ Jesús kꞌoa̱ kitsò:
—Jè jta̱ jè,
lìtsà to̱ tꞌatsꞌa̱n‑jìn nga kàfaꞌai,
to̱sa̱a to̱ tꞌatsao̱on.
31 Ndꞌai̱i nga Niná tsjoánè kjoa̱ñꞌain jè chjo̱ta̱;
kꞌoa̱ jè nganꞌión‑le̱ nai̱i,
xi batéxoma i̱ soꞌnde,
si̱ikixòyaà.
32 Kꞌoa̱ kꞌia̱ nga tjómingꞌa‑jiàn i̱ tꞌa nangi,
kꞌoa̱asꞌian nga ngatsꞌi chjo̱ta̱ an koi̱nchroatꞌa‑na.
—ꞌYa‑nìji̱n jè kjoa̱téxoma‑le̱ Niná nga kꞌoa̱tsò nga Jè Xi Niná Si̱ikasén kꞌoéjnantsjaì.e
Jóma‑ni nga kꞌoa̱si‑síni ji nga machjén nga jè ꞌNdí‑le̱ Chjo̱ta̱ tjómingꞌa.
ꞌYá‑ni jè xi ꞌNdí‑le̱ Chjo̱ta̱ ꞌmì‑lai̱.
35 Kꞌia̱ Jesús kitsò‑le̱:
—To̱ ngì choatseè sa nga i̱ kꞌoéjnajin‑no jè lꞌí;
ti̱maò ti̱ꞌa‑ni nga isen‑sa‑no,
jmé‑ni nga tsì jè kjoa̱njiòn kjoa̱ꞌaìnè‑nino;
nga̱ jè xi kjoa̱njiòn bꞌamjenjin,
lìkoi be jña tífì.
36 Ti̱ꞌa‑ni nga i̱ tíjnakao̱‑no jè lꞌí,
kàtamakjaín‑no xi tꞌatsꞌe̱ jè lꞌí,
jmé‑ni nga xti‑le̱ lꞌí koa̱n‑sínio.
Koiì kjoa̱ jè xi kinchja̱ Jesús,
kꞌoa̱ ki,
kꞌoa̱ ya̱ kikꞌèjna jña nga tsì koansjai‑le̱ chjo̱ta̱.
Kꞌia̱ nga tsì koan‑kjaín‑le̱ chjo̱ta̱ judío
37 To̱nga nda tsà nkjìn choa̱ xi kisꞌin ngixko̱n chjo̱ta̱,
to̱jo lìkoi koan‑kjaín‑le̱ tꞌatsꞌe̱,
38 jmé‑ni nga kꞌoa̱sꞌìn koi̱tjosòn‑síni jè én xi kiski Isaías,
jè chjo̱ta̱ xi kinchja̱ya ngajao‑le̱ Niná,
nga kitsò:
«Nai,
ꞌyá‑ni xi je koan‑kjaín‑le̱ én xi nòkjoa̱yai‑ji̱n.
Kꞌoa̱ ꞌyá‑ni xi je Nai tsakakósòn‑tsen‑le̱ nganꞌión‑le̱».f
39 Koiì kjoa̱ nga tsì koan‑kjaín‑nile̱,
nga̱ Isaías kꞌoa̱ati̱ kitsò:
40 «Tsakꞌéchjoàngiì xko̱n chjo̱ta̱ xo̱kjoan,
Kꞌoa̱ kisitajaà jè ni̱ma̱‑le̱;
Jmé‑ni nga tsì koa̱n‑tsen‑nile̱ kao̱ xko̱n,
Kꞌoa̱ nga tsì kao̱ ni̱ma̱‑le̱ koa̱n‑cho̱ya‑sínile̱,
Kꞌoa̱ nga tsì si̱ikꞌófayatꞌa‑na,
Kꞌoa̱ nga an sindayà».g
41 Isaías kꞌia̱ kꞌoa̱kitsò kꞌia̱ nga tsabe kjoa̱jeya‑le̱ Jesús,
kꞌoa̱ kinchja̱a xi tꞌatsꞌe̱.
42 Ni̱nga kisꞌe xi tsì koan‑kjaín‑le̱,
to̱nga nꞌión nkjìn chjo̱ta̱xá‑le̱ chjo̱ta̱ judío koan‑kjaín‑le̱ xi tꞌatsꞌe̱ Jesús;
to̱nga to̱ tꞌatsꞌe̱e chjo̱ta̱ fariseo nga lìkoi én kinchja̱ ni̱nga koan‑kjaín‑le̱,
jmé‑ni nga tsì koi̱chonsjejin‑síni ya̱ ndꞌia jña maxkia̱ xo̱n‑le̱ Niná.
43 Nga̱ ngìsa̱a nꞌión koan‑tsjoake kjoa̱jeya xi tsjoá chjo̱ta̱ ti̱kꞌoa̱‑ni jè kjoa̱jeya‑le̱ Niná.
Jé én‑le̱ Jesús xi tsjoánè kjoa̱ñꞌain chjo̱ta̱
44 Jesús nꞌión kinchja̱ kꞌoa̱ kitsò:
«Jè xi makjaín‑le̱ tꞌatsꞌa̱n,
lìtsà to̱ tꞌatsꞌa̱n‑jìn nga makjaín‑le̱,
to̱sa̱a kꞌoa̱ti̱ tꞌatsꞌe̱ jè xi kisikasén‑na makjaín‑le̱;
45 kꞌoa̱ jè xi be‑na,
tíbeè jè xi kisikasén‑na.
46 An,
xi lꞌí‑jiàn,
jàꞌai̱‑jiàn i̱ soꞌnde,
jmé‑ni nga to̱ꞌya‑ni xi makjaín‑le̱ tꞌatsꞌa̱n,
lìkoi tsà ti̱ kjoa̱njiòn kꞌoéjnajin‑ni.
47 Jè xi nchrꞌoé én‑na̱,
kꞌoa̱ lìkoi síkitjosòn,
lìkoi tsà an tsjoanè kjoa̱ñꞌain;
nga̱ lìtsà koi xá jàꞌai̱‑nia nga kjoa̱ñꞌain tsjoanè chjo̱ta̱,
to̱saà koi xá jàꞌai̱‑nia nga an kꞌoasjentjaì‑jiàn chjo̱ta̱.
48 Jé xi bꞌasjengi‑na,
kꞌoa̱ xi tsì kjoétjaò én‑na̱,
tíjnaà ꞌya‑ni xi tsjoánè kjoa̱ñꞌain;
jè én xi nchjà,
koiì xi tsjoánè kjoa̱ñꞌain chjo̱ta̱ kꞌia̱ nga koi̱chò ni̱chrjin xi fetꞌa‑ni.
49 Nga̱ tsì tsà to̱ an‑jìn bꞌa yao‑na̱ nga nchjà;
jè Nꞌai xi kisikasén‑na,
jè‑ní xi tsakꞌénè‑na jña‑nile̱ xi xián kꞌoa̱ jña‑nile̱ xi koinchjà.
50 Kꞌoa̱ ꞌbe‑nià nga jme‑ni xi jè bꞌénè koiì xi kjoa̱bijnachon xi tsìkꞌia fetꞌa.
Kꞌoa̱ama‑ni nga jè én xi nchjà,
kꞌoa̱asꞌìn nchjà josꞌìn nga kitsò‑na jè Nꞌai».