—Zaqueo,

kjitꞌanangi títjo̱jai̱n,

nga̱ ndꞌai̱ machjén nga ya̱ sikjáya‑nia ndꞌia‑li̱.

6 Kꞌia̱ kjitꞌanangi kitjojen,

kꞌoa̱ kao̱ kjoa̱tsjoa kiskoé tjaò ya̱ ndꞌia‑le̱.

7 Ngatsꞌi chjo̱ta̱ kꞌia̱ nga tsabe kjoa̱ jè,

tsakjaóyaché‑ni Jesús,

kitsò nga ndꞌia‑le̱ chjo̱ta̱jé jaꞌa síkjáya.

8 Kꞌia̱ Zaqueo tsakasèn‑ndo,

kitsò‑le̱ Nai‑ná:

—Koe̱e‑ni Nai,

baseèn tsojmì xi tjín‑na tsjoa‑le̱ jè chjo̱ta̱ xi yo̱ma̱ sꞌìn tjió;

kꞌoa̱ tsà ꞌya‑ni xi kisiché‑le̱,

ñoò‑ya tsjoa ngajao‑nile̱.

9 Jesús kitsò‑le̱:

—Ndꞌai̱ jeè kàfaꞌai kjoa̱bitjontjaì i̱ ndꞌia xo̱kji;

nga̱ jè chjo̱ta̱ xo̱kji kꞌoa̱ati̱ ntje̱‑le̱ Abraham tje̱n‑ni.

10 Nga̱ jè ꞌNdí‑le̱ Chjo̱ta̱ koiì xá jaꞌai‑ni nga jaꞌaikásjai kꞌoa̱ nga kꞌoa̱sjentjaì chjo̱ta̱ xi kjin tjió‑le̱ Niná.

11 Kꞌia̱nga tjiónchrꞌoé chjo̱ta̱ kjoa̱ jè,

kinchja̱‑sa Jesús kꞌoa̱kitsò jngo‑le̱ choa̱ xi mangósòn‑kao̱ jngo kjoa̱,

nga̱ jeè tjióchrian‑le̱ ya̱ Jerusalén,

kꞌoa̱ jè chjo̱ta̱ kꞌoa̱asꞌìn tjiósíkꞌaitsjen nga je jcha̱sòn‑tsen ndi̱to̱n‑le̱ jña batéxoma Niná.

12 Kꞌoa̱ kitsò:

«Jngo chjo̱ta̱ títjòn ki ya̱ jngo na̱xi̱nandá‑je jña nꞌión kjin,

jmé‑ni nga koa̱ntsja-ni xá,

nga jè koa̱tèxoma kꞌoa̱ nga kjoa̱ꞌaí ngìjngokꞌà‑ni.

13 Kꞌoa̱ te cho̱ꞌnda‑le̱ kinchja̱‑le̱,

kꞌoa̱tjín tao̱n kitsjoa‑le̱ nga jngó jngó,

jotjín machjí‑le̱ cho̱ꞌnda nga jngo ciento̱ ni̱chrjin síxá,

kꞌoa̱ kitsò‑le̱:

“Ti̱xákao̱‑laò tao̱n xi tìsintsja‑no jo saꞌnda nga kjoàꞌai̱ ngìndia‑nia”.

14 To̱nga jè chjo̱ta̱ xi ya̱ to̱jngo na̱xi̱nandá‑le̱ xi jè koa̱tèxoma‑le̱,

tikeè,

kꞌoa̱ kisikasén‑tje̱n‑ngi‑le̱ chjo̱ta̱ xi ki ngajao‑le̱ na̱xi̱nandá nga kikjákao̱ jè chjo̱ta̱xá ngajko̱,

kitsò‑le̱:

“Lìkoi me‑naji̱n nga jè chjo̱ta̱ títjòn xo̱kji koa̱tèxoma‑naji̱n”.

15 »Kꞌoa̱koan kꞌia̱nga jaꞌai‑ni chjo̱ta̱ títjòn,

nga je tsakꞌaì‑le̱ xá nga koa̱tèxoma‑le̱ na̱xi̱nandá‑le̱,

tsakꞌéxá nga kinòkjoa̱‑le̱ jè cho̱ꞌnda xi tao̱n kisintsja,

jmé‑ni nga skoe̱‑ni jotjín xi kinjènsòn‑le̱ nga jngó jngó.

16 Jè cho̱ꞌnda xi títjòn jaꞌai,

kitsò:

“Nai,

jè tao̱n‑li̱ xi kinìntsja‑naí,

teèya kꞌoa̱kji kisikinjen‑sòn sa”.

17 Jè nai‑le̱ kitsò‑le̱:

“Nda tjín‑ni,

ji‑ní cho̱ꞌnda xi nda ma‑lì nìxaí;

kꞌia̱ nga koa̱an kisinꞌiótꞌa‑lè nga nda kinìxákoai̱ xi to̱ choa tjín‑ni,

te na̱xi̱nandá‑nꞌión koa̱tèxoma‑lai̱”.

18 Jaꞌai ngìjngo cho̱ꞌnda xi kitsò:

“Nai,

jè tao̱n‑li̱ aòn ya kꞌoa̱kji kisikinjen‑sòn sa”.

19 Kꞌoa̱ti̱ jè kitsò‑le̱:

“Ji kꞌoa̱ati̱ aòn na̱xi̱nandá‑nꞌión koa̱tèxoma‑lai̱”.

20 »Jaꞌai ngìjngo cho̱ꞌnda xi kitsò:

“Nai,

i̱ tíjna jè tao̱n‑li̱,

najñoò tíjnatjaòjin‑na;

21 nga̱ kitsokjoòn‑lè,

nga ji nꞌión bꞌènè‑jìn,

nga chjoai jè tao̱n xi njensòn‑le̱ xi kja̱ꞌaí,

kꞌoa̱ bꞌèxkoí xi tsì ji tsakꞌèntjaì”.

22 Kꞌia̱ jè nai‑le̱ kitsò‑le̱:

“Cho̱ꞌnda tsꞌè,

ti̱jè én xi kàbitjo‑ni ndso̱ꞌbai xo̱ sikao̱‑lì nga kjoa̱ñꞌai tsjoa‑lè.

ꞌYa‑ní nga an nꞌión bꞌenè,

nga kjoé xi tsì tsà an kinjen‑sòn‑na,

kꞌoa̱ bꞌexkoá jè xi tsì tsà an tsakꞌentjè.

23 Án‑nini nga tsì ya̱ kinìkꞌasꞌen‑ni tao̱n‑na̱ ya̱ ndꞌia jña maxákao̱ tao̱n,

jmé‑ni kꞌia̱ nga kàfaꞌai̱‑nia,

kàbꞌaì‑nina tao̱n‑na̱ kao̱ ꞌndí‑le̱”.

24 Kꞌoa̱ kitsò‑le̱ chjo̱ta̱ xi ya̱ tjió:

“Chja̱ꞌa‑lao̱o tao̱n,

kꞌoa̱ jè tꞌaì‑lao̱o xi te ya kisiki‑njen‑sòn sa”.

25 Jè chjo̱ta̱ xi ya̱ tjió kitsò‑le̱:

“Nai,

jeè te ya kꞌoa̱kji tao̱n tjín‑le̱”.

26 Kꞌoa̱ jè nai‑le̱ kitsò:

“Kꞌoa̱axin‑no an nga to̱ꞌya‑ni xi tjín‑le̱,

kꞌoa̱i sa‑le̱;

to̱nga jè xi tsìn‑le̱,

saꞌnda jme xi tjín‑le̱ to̱sa̱a tjóꞌa‑le̱.

27 Kꞌoa̱ti̱ jè xi chꞌao sꞌìn fìkao̱‑na,

xi kai‑le̱ nga an koatexoma‑le̱,

nchroákao̱o i̱‑bi̱,

kꞌoa̱ i̱ ngixkoan ti̱chásion”».

28 Kꞌia̱ nga je kitsòya kjoa̱ jè,

tje̱n títjòn Jesús nga kimi ya̱ Jerusalén.

29 Kꞌia̱ nga je kichòchrian ya̱ na̱xi̱nandá‑ꞌndí Betfagé kao̱ ya̱ na̱xi̱nandá ꞌndí Betania,

ya̱ nindo Yá Olivo,

jaò chjo̱ta̱ xi ya̱ kòtꞌayàtꞌa‑le̱ kisikasén,

30 kitsò‑le̱:

—Tangión ya̱ na̱xi̱nandá‑ꞌndí xi matsen‑tꞌa‑ni i̱,

kꞌoa̱ kꞌia̱ nga koi̱tjásꞌao̱on ya̱ koa̱nsjai jngo‑no bórró ꞌndí xi tjítꞌanꞌión,

xi ni̱sajngo‑jìn chjo̱ta̱ bꞌèjnasòn‑le̱;

chjójndáꞌñón,

kꞌoa̱ nchroákao̱o.

31 Kꞌoa̱ tsà ꞌya xi skónangi‑no nga koi̱tso̱:

“Án‑ni nga bórró tichjojndáꞌñó‑sínio,”

i̱ tꞌìn‑lao̱o:

“Koiì nga jè Nai‑ná machjén‑le̱”.

32 Ki jè chjo̱ta̱ xi kinikàsén,

kꞌoa̱sꞌìn koansjai‑le̱ jo nga kitsò‑le̱ Jesús.

33 Kꞌoa̱ kꞌia̱ nga tjiókjojndáꞌñó jè bórró ꞌndí,

jè nai‑le̱ kitsò:

—Án‑ni nga jòn tichjojndáꞌñó‑sínio jè bórró ꞌndí.

34 Kꞌia̱ jè chjo̱ta̱ xi ya̱ kòtꞌayàtꞌa‑le̱ Jesús kitsò:

—Koiì nga jè Nai‑ná machjén‑le̱.

35 Kꞌoa̱ jaꞌaikao̱‑le̱ Jesús;

kꞌoa̱ kꞌia̱ nga je tsakándasòn‑le̱ bórró ꞌndí najño xi batiòjté chjo̱ta̱,

kisikꞌéjnasòn Jesús.

36 Kꞌoa̱ kꞌia̱ nga tífaꞌa Jesús,

chjo̱ta̱‑nkjìn tsakánda‑le̱ ya̱ ya ndia̱a najño xi batiòjté.

37 Kꞌia̱ nga je kichòchrian ya̱ nindo Yá Olivo,

ngatsꞌi jè chjo̱ta̱‑nkjìn xi ya̱ kòtꞌayàtꞌa‑le̱ xi ya̱ tje̱n‑kao̱,

koan‑tsjoa‑le̱,

tsakꞌétsꞌia̱kao̱ nga tsakꞌasjejeya Niná,

nꞌión tsakꞌéjta xi to̱ tꞌatsꞌe̱ ngayije kjoa̱ xi tsabe xi to̱kꞌoa̱ koan‑nile̱,

38 kitsò:

39 Kꞌia̱ kitsò kꞌa chjo̱ta̱ fariseo xi ya̱ tje̱njin‑le̱ chjo̱ta̱‑nkjìn:

—Ji xi bakòyai,

ti̱katiójyoì chjo̱ta̱ xi kòtꞌayàtꞌa‑lì.

40 Kꞌia̱ kinchja̱ Jesús kitsò‑le̱:

—Kꞌoa̱axin‑no,

tsà jè koa̱tiòjyò,

jé la̱jao̱ nꞌión kꞌoe̱ejta.

41 Kꞌia̱ nga Jesús kichòchrian ya̱ na̱xi̱nandá‑nꞌión Jerusalén,

kꞌia̱ nga tsabe,

kiskiꞌndiátꞌain,

42 kitsò:

«¡Tsà to̱ macho̱yalà‑nilì je ji,

ni̱nga to̱koi ni̱chrjin xo̱kji xi tsi̱,

jè xi kjoa̱nchꞌán koa̱n‑lì!

To̱nga ndꞌai̱ tjíꞌmaà‑lì.

43 Nga̱ kjoa̱ꞌaínè‑lì ni̱chrjin kꞌia̱ nga jè xi chꞌao sꞌìn fìkao̱‑lì,

kꞌoe̱enchꞌoándai‑lì kao̱ chrjaó,

kjoa̱ꞌaíkatiòndai‑lì,

kꞌoa̱ ngakijndà kꞌoe̱echjoandai‑lì,

44 kꞌoa̱ si̱ikixòjen‑lì ꞌnda tꞌa nangi,

kꞌoa̱ jngokꞌà si̱ikjesòn chjo̱ta̱‑li̱ xi ya̱ tjiósíjchá yao‑le̱,

kꞌoa̱ ni̱jngo‑jìn la̱jao̱ chrjaó xi ti̱ sa̱tiósòn‑nile̱ xínkjín,

koiì kjoa̱ nga tsì tsaꞌyai jme ni̱chrjin‑ni nga jaꞌaikòn‑lì Niná».

45 Kꞌia̱ nga Jesús jaꞌasꞌen ya̱ nditsin‑le̱ yo̱ngo̱,

tsakꞌétsꞌia̱kao̱ nga tsakꞌaonsje ngatsꞌi xi ya̱ tjióbaténa kao̱ jè xi ya̱ tjióbatse,

46 kitsò kao̱‑nile̱:

—Kꞌoa̱asꞌìn tjítꞌa xo̱n‑le̱ Niná:

“Jè ndꞌia‑na̱,

koiì ndꞌia jña chobàkao̱ Niná”;^b

to̱nga jòn ngijao‑le̱ ché kinìkꞌónyao.^c

47 Kꞌoa̱ nchaon nchaon tsakakóya ya̱ nditsin‑le̱ yo̱ngo̱;

to̱nga jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés kao̱ jè chjo̱ta̱ títjòn‑le̱ na̱xi̱nandá tsakásjai‑le̱ josꞌìn nga si̱ikꞌen.

48 Kꞌoa̱ lìkoi koansjai‑le̱ jme‑ni xi si̱ikao̱,

nga̱ ngatsꞌi chjo̱ta̱ ya̱a tjiókao̱ Jesús,

ñaki ndaà tjióbincháñon‑le̱.