Kꞌia̱ nga Jesús jaꞌasꞌen ya̱ na̱xi̱nandá Jerusalén
11
Kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ kichò ya̱ na̱xi̱nandá‑ꞌndí Betfagé kao̱ ya̱ na̱xi̱nandá‑ꞌndí Betania,
xi matsen‑tꞌa‑ni ya̱ nindo Yá Olivo,
nga kichómachrian‑le̱ ya̱ na̱xi̱nandá Jerusalén,
Jesús kisikasén jaò chjo̱ta̱ xi ya̱ kòtꞌayàtꞌa‑le̱,
2 kꞌoa̱ i̱ kitsò‑le̱:
«Tangión ya̱ na̱xi̱nandá‑ꞌndí xi matsen‑tꞌa ján,
kꞌia̱ nga koi̱tjásꞌao̱on ya̱,
koa̱nsjai jngo‑no bórró ꞌndí xi ya̱ tjítꞌanꞌión,
xi ni̱sajngo‑jìn chjo̱ta̱ bꞌèjnasòn‑le̱;
chjójndáꞌñón kꞌoa̱ nchroákao̱‑naó.
3 Kꞌoa̱ tsà ꞌya xi koi̱tso̱‑no:
“Án‑ni kꞌoa̱nꞌiàn‑sínio”,
i̱ tꞌìn‑lao̱o:
“Jè Nai‑ná koa̱n‑chjén‑le̱, kꞌoa̱ kꞌia̱ xó si̱ikasén‑ni”».
4 Kꞌia̱ ki ngajaò,
kꞌoa̱ koansjai‑le̱ jè bórró ꞌndí xi tjítꞌanꞌión nditsin,
chrian xo̱ntjoa̱ ndꞌia,
ya̱ xkó‑le̱ ndia̱a, kꞌoa̱ kiskojndáꞌñón.
5 Kꞌoa̱ jè chjo̱ta̱ xi ya̱ tjió,
tjín kꞌa xi kitsò‑le̱:
«Án‑ni kꞌoa̱tìnꞌiàn‑nio nga jè bórró ꞌndí tichjojndáꞌñó‑nio».
6 Kꞌoa̱a kitsò‑le̱ josꞌìn nga Jesús tsakꞌénè‑le̱;
kꞌoa̱ kꞌia̱a kitjoꞌndè‑le̱ nga ki.
7 Kꞌoa̱ jaꞌaikao̱‑le̱ Jesús jè bórró ꞌndí,
tsakándasòn‑le̱ najño xi batiòjté chjo̱ta̱ kꞌoa̱ kꞌia̱ tsakꞌèjnasòn‑le̱ Jesús.
8 Kꞌoa̱ti̱ nkjìn chjo̱ta̱ xi tsakánda‑le̱ ya̱ yandia̱a najño xi batiòjté,
kꞌoa̱ tjín kꞌa xi ntsja yá tsakate,
kꞌoa̱ati̱ tsakánda.
9 Kꞌoa̱ jè chjo̱ta̱ xi tje̱n títjòn kao̱ jè xi tje̱n‑ngitsao‑le̱,
nꞌión tsakꞌéjta,
kitsò:
—¡Kàtasꞌe‑le̱ kjoa̱jeya Niná!a
¡Jó to̱nda‑le̱ ya̱ ngixko̱n Niná jè chjo̱ta̱ ngajko̱ xi Niná tífaꞌai ngajao‑le̱!b
10 ¡Jó to̱nda‑le̱ ya̱ ngixko̱n Niná jè xi tífaꞌai,
Xi koa̱tèxoma ngajao‑le̱ chjo̱ta̱ jchínga‑ná David!
¡Kàtasꞌe‑le̱ kjoa̱jeya Niná saꞌnda jña fetꞌa‑ni ngꞌajmi!
11 Kꞌoa̱ Jesús jaꞌasꞌenjin ya̱ na̱xi̱nandá Jerusalén,
xi je koan jaꞌasꞌen nditsin‑le̱ yo̱ngo̱;
kiskòtsen‑le̱ ngayije jme xi tjín,
jeè kjima‑njiòn nga koi ni̱chrjin,
kꞌia̱ ki ya̱ na̱xi̱nandá Betania kao̱ chjo̱ta̱‑le̱ xi tejaò xi xá kiskoéjin‑ni Jesús.
Jesús kisíxì yá higo
12 Nga koan‑nchaon‑ni,
Jesús kao̱ chjo̱ta̱ xi ya̱ kòtꞌayàtꞌa‑le̱ kitjo‑ni ya̱ na̱xi̱nandá‑ꞌndí Betania, kꞌoa̱ koanbao‑le̱ Jesús.
13 Kꞌoa̱ kjiìn tsabe‑ni jngo yá higo nga tjín‑le̱ xka̱,
ki kotsen‑le̱ tsà ya‑nile̱ to;
to̱nga kꞌia̱ nga kichònchrꞌoè nìjme xi kisoko‑le̱ to̱ xka̱a tjín‑le̱,
nga̱ tsì tsà ni̱chrjin‑le̱ higo‑jìn nga kꞌia̱.
14 Kꞌia̱ Jesús kitsò‑le̱ jè yá higo:
«Ni̱kꞌiajìn‑là nga ꞌya xi ti̱ kàtakjine‑ni to xi ba‑lì».
Kꞌoa̱ jè chjo̱ta̱ xi ya̱ kòtꞌayàtꞌa‑le̱ kinchrꞌoé én xi kinchja̱ Jesús.
Jesús kinchja̱‑ntjaì yo̱ngo̱
15 Jesús kao̱ chjo̱ta̱ xi ya̱ kòtꞌayàtꞌa‑le̱ jaꞌai ya̱ na̱xi̱nandá Jerusalén;
kꞌoa̱ jaꞌasꞌen Jesús ya̱ nditsin‑le̱ yo̱ngo̱,
tsakꞌétsꞌia̱kao̱ nga tsakꞌaonsje chjo̱ta̱ xi tjióbaténa kao̱ xi tjióbatse ya̱ nditsin‑le̱ yo̱ngo̱;
kiskanìtíkjá yámìxa̱‑le̱ jè xi tao̱n tjiósíkꞌantjaì,
kꞌoa̱ati̱ kiskanitíkjá yáxìle̱‑le̱ jè xi to̱nia̱ tjióbaténa;
16 kꞌoa̱ lìkoi kitsjoaꞌndè nga ꞌya xi tsojmì jaꞌatoyakao̱ ya̱ nditsin‑le̱ yo̱ngo̱.
17 Kꞌoa̱ tsakakóya‑le̱ chjo̱ta̱ kitsò:
—A tsí i̱ sꞌìn tjítꞌa xo̱n‑le̱ Niná:
“Jè ndꞌia‑na̱, ndꞌia jña nòkjoa̱kao̱ Niná koi̱tso̱‑le̱ ngatsꞌi na̱xi̱nandá soꞌnde”.c To̱nga jòn ngijao‑le̱ ché kinìkꞌónyaò.d
18 Kꞌoa̱ kinchrꞌoé jè chjo̱ta̱ xi kji kjoa̱téxoma‑le̱ Niná xi kiski Moisés kao̱ na̱ꞌmi xi tjió títjòn‑le̱ na̱ꞌmi,
tsakásjai‑le̱ josꞌìn nga koa̱n si̱ikꞌen Jesús;
nga̱ kitsokjòn‑le̱,
koiì nga̱ ngatsꞌi chjo̱ta̱ to̱ maxkón‑le̱ josꞌìn nga bakóya Jesús.
19 To̱nga kꞌia̱ nga je koan‑njiòn Jesús kitjo‑ni ya̱ na̱xi̱nandá Jerusalén.
Josꞌìn nga kixì jè yá higo
20 Xi koan‑nchaon‑ni,
Jesús kao̱ chjo̱ta̱ xi ya kòtꞌayátꞌa‑le̱ nga tjiófaꞌa nga ta̱njiòn, tsabe nga je kixì yá higo saꞌnda ja̱ma̱‑le̱.
21 Kꞌia̱ Pedro jaꞌaitsjen‑le̱,
kitsò‑le̱ Jesús:
—Ji xi bakòyai,
chótsen‑lai̱,
jeè kixì jè yá higo xi kꞌoa̱ tsakꞌìn‑lai̱ nga tsì ti̱ to kàtaba‑nile̱.
22 Kꞌia̱ Jesús kitsò‑le̱:
—Kàtasꞌe‑no kjoa̱makjaín tꞌatsꞌe̱ Niná.
23 Ñaki kìxi̱i xi xin‑no nga to̱ꞌya‑ni xi koi̱tso̱‑le̱ nindo xo̱kji:
“Ti̱se̱nxìn,
kꞌoa̱ ti̱kꞌatje̱njin yao‑li̱ ya̱ jin ndáchikon,”
kꞌoa̱ tsà tsì jaò kꞌoe̱e ni̱ma̱‑le̱,
tsà makjaín‑le̱ nga kꞌoa̱koa̱n jme én xi títsò,
koi̱tjosón‑le̱.
24 Koiì kjoa̱ kꞌoa̱xin‑nino nga to̱jme‑ni xi si̱jaó nga koi̱nókjoa̱kao̱o Niná,
kàtamakjaín‑no nga kꞌoai̱‑no,
kꞌoa̱ kꞌoa̱asꞌìn koi̱tjosòn‑no.
25 Kꞌoa̱ kꞌia̱ nga tinòkjoa̱kao̱o Niná,
ti̱chatꞌa‑lao̱o xìngio̱o,
tsà jme kjoa̱ xi tjín‑no kao̱ chjo̱ta̱, jmé‑ni nga kꞌoa̱ti̱ jè Nꞌai‑no xi tíjna ya̱ ngꞌajmi si̱ichatꞌa‑síni‑no jé‑no.
26 Nga tsà jòn xi tsì si̱chatꞌao,
kꞌoa̱ati̱ jè Nꞌai‑no xi tíjna ya̱ ngꞌajmi lìkoi si̱ichatꞌa‑no jé‑no.
Xá xi yꞌa Jesús
27 Jesús kao̱ chjo̱ta̱ xi ya̱ kòtꞌayàtꞌa‑le̱ jaꞌai ngìjngo kꞌa ya̱ Jerusalén;
kꞌia̱ nga tsòꞌba ya̱ nditsin‑le̱ yo̱ngo̱,
jaꞌaikòn‑le̱ na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés kꞌoa̱ kao̱ chjo̱ta̱ jchínga,
28 kꞌoa̱ kitsò‑le̱:
—Jmé xá xi tjín‑lì nga kꞌoa̱nꞌià‑síni ngayije kjoa̱ jè,
kꞌoa̱ ꞌyá‑ni xi koi xá kitsjoa‑lì nga kꞌoa̱nꞌià‑síni.
29 Kinchja̱ Jesús,
kitsò‑le̱:
—Kꞌoa̱ti̱ an jngo kjoa̱ skònangi‑no;
kꞌoa̱tꞌìn‑naó, kꞌoa̱ kꞌia̱ kꞌoa̱xín‑no jmé xá xi yꞌa an nga kꞌoa̱sꞌian kjoa̱ jè.
30 Kꞌia̱ nga Juan kiskanìsꞌen‑ngindá chjo̱ta̱,
a tꞌatsꞌe̱e jè xi tíjna ya̱ ngꞌajmi axo̱ tꞌatsꞌe̱ chjo̱ta̱.
Kꞌoa̱tꞌìn‑naó.
31 Kꞌia̱ jè chjo̱ta̱ xo̱kjoan tsakjaótiya‑ni,
kitsò‑le̱ xínkjín:
«Kꞌia̱ tsà koixoán nga tsꞌe̱ xi tíjna ngꞌajmi,
kꞌoa̱a koi̱tso̱‑ná:
“Kꞌoa̱ án‑ni nga tsì koan‑kjaín‑nino én xi kinchja̱ya”.
32 Kꞌoa̱ tsà koixoán nga tsꞌe̱ chjo̱ta̱...»
To̱nga jè chjo̱ta̱ na̱xi̱nandá tsokjòn‑le̱, nga̱ ngatsꞌi chjo̱ta̱ kꞌoa̱atsò nga jè‑ní Juan xi ñaki kjoa̱kìxi̱ nga nchja̱ya ngajao‑le̱ Niná.
33 Kꞌia̱ jè chjo̱ta̱ xo̱kjoan kitsò‑le̱ Jesús:
—Lìkoi ꞌyai‑ji̱n.
Kꞌia̱ kinchja̱ Jesús kitsò‑le̱:
—Ni̱ an‑jìn kꞌoa̱xín‑no jmé xá xi yꞌa nga kꞌoa̱sꞌian kjoa̱ jè.