Jè Én nda‑le̱ Jesucristo xi jaꞌaín-le̱ Juan yꞌa, alì tsà koi‑jìn xi tsò-nile̱ nga jè ngꞌa síkꞌéjna xi kiski, to̱saà koi nga jè kàtabitjojeya ꞌya xi tínchja̱‑ni xo̱n xo̱kji. Jè jaꞌaín xi Juan tsò, Niná tsjoá kjoa̱tjaò, tsò-nile̱.

Jo saꞌnda nga ti̱-a kꞌia̱‑ni nga kitsꞌia na̱xi̱nandá‑le̱ Jesucristo, kꞌoa̱asꞌìn tsaꞌya‑le̱ nga jè Juan xi kiski xo̱n xo̱kji, ni̱ nga-làni jè jaꞌaín‑le̱ xi kiski likoi matsen ya̱ jin én nda‑le̱ Jesucristo, ngatsꞌi chjo̱ta̱ xi títjòn tsakatiò xi koan‑kjaín‑le̱ kꞌoa̱asꞌìn tsabe nga Juan jé xi xá kisikasén‑ni Jesucristo, jè kisꞌenè-le̱ xá xo̱kji. Jokji xo̱n én nda xo̱kji nga likoi yꞌa jaꞌaín‑le̱ xi kiski, koiì xi ñaki sꞌejngo‑ni tokoán nga jè Juan kiski xo̱n xo̱kji, nga̱ jè‑ní xi ñaki nda tjíjin‑le̱ jme xi koan tꞌatsꞌe̱ xá xi jaꞌaisꞌín Jesús, jmé‑ni nga síkꞌéjna basen‑niná jngo xo̱n én nda xi ngìsa̱ kja̱ꞌaí sꞌìn kichji kꞌoa̱ kja̱ꞌaí tsò‑sa én nda yꞌa ti̱kꞌoa̱-nile̱ xo̱n én nda xi ngìkꞌa, kꞌoa̱ tjín‑le̱ ngayeje kjoa̱téxoma xi machjén nga jè én xi kiski kátakjoétjaò ngatsꞌi chjo̱ta̱‑le̱ Jesucristo, nga ni̱jme‑jìn kjoa̱ kàtama‑ni.

Jè én nda-le̱ Jesucristo jè-bi̱, kꞌoa̱asꞌìn ꞌya‑le̱ nga kꞌia̱ kichji nó ñokan kꞌoa̱ nó ñokan kao̱‑te xi koanskan‑nile̱ nga kitsin Jesucristo. Kꞌia nga je ñachàn‑te nó jaꞌato nga Juan tsabe‑ni xko̱n ngayije xá xi kisꞌin Jesús i̱ soꞌnde.

Jè xá xi kiski‑ni Juan koiì nga síkꞌéjna basen‑ná jngo én xi tjín‑le̱ nganꞌión nga nchja̱‑ná tꞌatsꞌe̱ Jesucristo josꞌìn nga chjo̱ta̱ koan, ñaki ndàsꞌìn síkꞌéjnasòtsen nga Jesús jè‑ní ꞌNdí‑le̱ Niná xi kinìkasén‑ni ngꞌajmi kꞌoa̱ nga to̱ tꞌatsꞌe nchroá‑ni kjoa̱bijnachon xi tsì kꞌia fetꞌa. Juan kꞌoa̱asꞌìn síkꞌéjnasòtsen ꞌyá-ni Jesucristo kꞌoa̱ nga Niná ma, saꞌnda én xi bꞌétsꞌia̱kao̱ títjón‑ni jotsò Jn.1:1 «Kꞌia̱ nga kitsꞌia‑ni ngayije, Jè Én jeè tíjna, kꞌoa̱ jè Én ya̱a tíjnakao̱ Niná, kꞌoa̱ jè Én Niná‑ní». Kꞌoa̱ kꞌia̱ nga je meè síkjetꞌa én xi kiski, ñaki nda kꞌoa̱tsò jme xá xi kiski-ni: « Nꞌión nkjìn sa kjoa̱xkón xi kisꞌin Jesús ya̱ ngixko̱n chjo̱ta̱ xi ya̱ kòtꞌayàtꞌa-le̱, jña-nile̱ xi tsì faꞌaitꞌa i̱ xo̱n xo̱kji. To̱nga én jè koiì kichji-ni, jmé-ni nga koa̱nkjaín-nino nga Jesús Jè-ní Xi Niná Kisikasén, jè-ní ꞌNdí le̱ Niná, kꞌoa̱ jmé-ni kꞌia̱ nga koa̱nkjaín-no sꞌe̱e-no kjoa̱bijnachon xi to̱ tꞌatsꞌe̱». Jn.20:30‑31.