—Án‑ni nga i̱ jin‑le̱ kꞌen tifasjai‑nio jè xi tíjnakon.

6 Lìtsà i̱ jìn ti̱ tíjna‑ni,

nga̱ jeè kàfaꞌáyajin‑nile̱ kꞌen.

Ti̱kjaꞌaitsjaon jè én xi tsakjákao̱‑no kꞌia̱ nga ya̱ sa tíjna ya̱ ꞌnde Galilea,

7 kꞌia̱ nga kitsò:

“Machjén nga jè ꞌNdí‑le̱ Chjo̱ta̱ ya̱ koa̱ntsja chjo̱ta̱jé,

kꞌoa̱ nga sꞌe̱tꞌa krò,

kꞌoa̱ nga kjoa̱ꞌáyajin‑nile̱ kꞌen nga koa̱n jàn‑ni ni̱chrjin”.

8 Kꞌia̱ jè yánchjín jaꞌaitsjen‑le̱ én xi kinchja̱ Jesús,

9 kꞌia̱nga je jaꞌai‑ni ya̱ ngijao xi tsꞌe̱ kꞌen,

kitsjoa‑le̱ én xi tꞌatsꞌe̱ ngayije kjoa̱ jè,

jè chjo̱ta̱ xi to̱ tejngo sa ma xi xá tsakjaꞌájin‑ni Jesús kao̱ ngatsꞌi chjo̱ta̱ xikꞌa.

10 Jè María xi Magdala tsꞌe̱,

Juana,

María na̱‑le̱ Jacobo,

kꞌoa̱ kao̱ yánchjín xikꞌa,

xi kitsòya‑le̱ kjoa̱ xi koan jè chjo̱ta̱ xi xá kisikasén‑ni Jesús.

11 To̱nga jè chjo̱ta̱ xo̱kjoan to̱ kjoa̱ská koan‑le̱ én‑le̱ yánchjín,

kꞌoa̱ lìkoi koan‑kjaín‑le̱.

12 To̱nga Pedro kitjo‑ni ndꞌia,

kitòka saꞌnda jña tíjna ngijao xi tsꞌe̱ kꞌen;

kꞌia̱ nga kiskòtsen‑sꞌèn,

tsabe nga to̱koi tjió najño xi kisꞌejtéjon yao‑le̱ Jesús,

kꞌia̱ nga tífì ngìndia‑ni ya̱ Jerusalén ñaki to̱kꞌoa̱a kjima‑le̱ tꞌatsꞌe̱ jme kjoa̱ xi koan.

13 Kꞌoa̱ i̱i koan,

nga ti̱koi‑ni ni̱chrjin,

jaò chjo̱ta̱ xi ya̱ kòtꞌayàtꞌa‑le̱ Jesús tjiófì ya̱ jngo na̱xi̱nandá‑ꞌndí xi Emaús ꞌmì,

xi tejngo jmi metro kjin tíjna‑le̱ ya̱ Jerusalén.

14 Kꞌia̱ nga tjiófì tjiófaóya‑ni ngayije jme kjoa̱ xi koan.

15 Kꞌia̱ nga tjiófaóya‑ni kꞌoa̱ nga tjiófaóti tꞌatsꞌe̱ kjoa̱ xi koan,

jè soaà Jesús kichòka‑nchrꞌoè kꞌoa̱ ñatje̱n ki.

16 To̱nga kisꞌeꞌma‑le̱ xko̱n,

jmé‑ni nga tsì skoe̱xkon‑ni Jesús.

17 Kꞌoa̱ kitsò‑le̱:

—Jmé xo̱ síkji nda tichobàya‑nio kꞌia̱ nga timangión,

kꞌoa̱ án‑ni nga ba tjió síni‑no.

18 Kꞌia̱ kinchja̱ jè xi Cleofas ꞌmì,

kitsò‑le̱:

—A to̱ jngoò ji xi xìn jàꞌai̱‑ni xi tsì kisꞌejin‑lì,

jè kjoa̱ xi koan i̱ Jerusalén ni̱chrjin xi jaꞌato.

19 Kꞌia̱ Jesús kitsò‑le̱:

—Jmé kjoa̱ xi koan.

Kꞌoa̱ jè chjo̱ta̱ xo̱kjoan kitsò‑le̱:

—Tꞌatsꞌe̱ Jesús xi Nazaret tsꞌe̱,

jngo chjo̱ta̱ xi kinchja̱ya ngajao‑le̱ Niná,

nꞌión kisꞌe‑le̱ nganꞌión ya̱ ngixko̱n Niná jè xá xi kisꞌin kao̱ jè én xi kinchja̱ ya̱ jin‑le̱ chjo̱ta̱;

20 kꞌoa̱ josꞌìn nga jè na̱ꞌmi xi tjió títjòn‑le̱ na̱ꞌmi kao̱ chjo̱ta̱xá‑na̱ji̱n,

kisijé‑nè kjoa̱ñꞌain nga kàtanìkꞌen kꞌoa̱ krò kisikꞌen‑tꞌa.

21 To̱nga ji̱n,

tichoyà‑lai̱ji̱n tsàkai nga jè xi tsjoá‑le̱ kjoa̱ndaí na̱xi̱nandá Israel;

kꞌoa̱ xi ngìjngo sa‑ni,

ndꞌai̱,

jeè jàn ni̱chrjin kꞌia̱ nga kꞌoa̱koan kjoa̱ jè.

22 To̱nga a ꞌya‑nì jmè‑ni,

kꞌoa̱ati̱ tjió kꞌa yánchjín xi ya̱ tjiójin‑naji̱n xi to̱ kjimaxkón‑naji̱n jo tjiótsò,

jè xi ta̱njiòn‑ya kàfì ya̱ ngijao xi tsꞌe̱ kꞌen jña kisꞌejnaya yao‑le̱ Jesús;

23 kꞌoa̱ nga tsì kàmasjai‑le̱ yao‑le̱ Jesús,

kꞌoa̱ tjiótsò nga kàfaꞌai‑ni nga kꞌoa̱ti̱ kàbe cho̱ꞌnda ngꞌajmi,

xi kàtsò‑le̱ nga tíjnakon‑ni Jesús.

24 Kꞌoa̱ tjín kꞌa xi ya̱ tjiójin‑naji̱n xi kàfì ya̱ jña tíjna ngijao xi tsꞌe̱ kꞌen,

kꞌoa̱ kꞌoaàsꞌìn kàmasjai‑le̱ jo kàtsò jè yánchjín,

to̱nga xi jè Jesús lìkoi kàbe.

25 Kꞌia̱ Jesús kitsò‑le̱:

—¡Jòn xi chjo̱ta̱ chi̱ni‑jiòn kꞌoa̱ xi ñꞌain ma‑le̱ ni̱ma̱‑no nga makjaín‑le̱ ngayije jme xi kitsò ngatsꞌi chjo̱ta̱ xi kinchja̱ya ngajao‑le̱ Niná!

26 A tsí tsà kꞌoa̱sꞌìn tjínè‑le̱ nga kjoa̱ñꞌain tsakjaꞌá Jè Xi Niná Kisikasén,

ti̱ngi‑ni nga kjoa̱ꞌasꞌen ya̱ kjoa̱jeya‑le̱.

27 Kꞌoa̱ tsakꞌétsꞌia̱kao̱‑ni saꞌnda ngayije kjoa̱téxoma‑le̱ Niná xi kiski Moisés,

kꞌoa̱ kao̱ ngayije xo̱n xi kiski ngatsꞌi chjo̱ta̱ xi kinchja̱ya ngajao‑le̱ Niná,

kꞌoa̱sꞌìn kitsòya‑le̱ ngayije én xi tjítꞌa Xo̱n‑le̱ Niná jme‑ni xi tsò xi tꞌatsꞌe̱.

28 Kꞌia̱ nga kichò ya̱ na̱xi̱nandá‑ꞌndí jña‑ni nga tjiófì,

Jesús jo xi kjiìn sa tífì kisꞌin.

29 To̱nga jè chjo̱ta̱ xi jaò ma‑ni tsakꞌénè kjoa̱nꞌión‑le̱ nga ya̱ kàtabꞌèjnakao̱‑ni,

kitsò‑le̱:

—I̱ ti̱jnakao̱‑ninaíji̱n nga̱ jeè kjimaxòn,

kꞌoa̱ to̱ jeè meè koa̱njiòn.

Kꞌoa̱ jaꞌasꞌen Jesús ya̱ ndꞌia,

kꞌoa̱ ya̱ tsakꞌèjnakao̱.

30 Kꞌoa̱koan kꞌia̱ nga tíjnatꞌakao̱ ya̱ yámìxa̱ jè chjo̱ta̱ xi jao,

kiskoé nio̱xtìla̱ kꞌoa̱ kitsjoa‑le̱ kjoa̱nda Niná,

kisixkoa̱,

kꞌoa̱ kitsjoa‑le̱.

31 Kjoan kꞌia̱a tsì ti̱ kisꞌeꞌma‑ni‑le̱ xko̱n,

kꞌoa̱ tsabexkon nga jè Jesús;

to̱nga jè ndi̱to̱n kisichaxkon‑le̱ yao‑le̱.

32 Kꞌia̱ kitsò‑le̱ xínkjín:

—A tsí ñaki tsen‑ná kàma‑le̱ ni̱ma̱‑ná,

kꞌia̱ nga kàfákao̱‑ná ya̱ ya ndia̱a,

kꞌoa̱ kꞌia̱ nga kàtsòya‑ná én xi tjítꞌa Xo̱n‑le̱ Niná.

33 Kꞌoa̱ nga ti̱koi‑ni choa̱ tsitjo‑ni ndꞌia,

ki ngìndia‑ni ya̱ Jerusalén,

kꞌoa̱ koansjai‑le̱ nga tjióxkó jè xi to̱ tejngo sa ma xi xá tsakjaꞌájin‑ni Jesús,

kao̱ jè xi ya̱ ñatje̱n tjiókao̱,

34 xi tjiótsò:

—Ñaki kìxi‑ní nga je kàfaꞌáyajin‑nile̱ kꞌen jè Nai‑ná,

kꞌoa̱ jeè kàbakó sòn‑tsen‑le̱ yao‑le̱ jè Simón.

35 Kꞌia̱ jè chjo̱ta̱ xi jaò kitsòya jè kjoa̱ xi koan ya̱ ya ndia̱a,

kꞌoa̱ josꞌìn tsabexkon kꞌia̱ nga Jesús kisixkoa̱ nio̱xtìla̱.

36 Kꞌia̱ nga sꞌa̱ tjiótsòya sa jè chjo̱ta̱ xi jaò tꞌatsꞌe̱ kjoa̱ jè,

Jesús jaꞌaikasènjna‑jin basen‑le̱,

kꞌoa̱ kitsò‑le̱:

—Kjoa̱nchꞌán kàtasꞌe‑no.

37 Kꞌoa̱ kꞌia̱ kixinchaxkón kꞌoa̱ kitsokjòn,

kitsò kjoa̱faꞌaitsjen‑le̱ nga to̱ sén ni̱chrjin xi tjióbe.

38 To̱nga Jesús kitsò‑le̱:

—Án‑ni nga bijkon‑sínio,

kꞌoa̱ nga kꞌoa̱tsò kjoa̱faꞌaitsjen faꞌaijin‑ni ni̱ma̱‑no.

39 Chótsen‑lao̱o jè ndsa̱ kao̱ ndso̱koa,

nga̱ an‑nià;

ti̱kao̱o yao‑na̱,

kꞌoa̱ chótsaon;

nga̱ jngo sén ni̱chrjin,

tsìn‑le̱ yao kꞌoa̱ ni̱ ninda‑jìn tjín‑le̱,

josꞌìn tiꞌyao nga tjín‑na an.

40 Kꞌoa̱ nga kꞌoa̱ títsò‑le̱,

tsakakó‑le̱ ntsja kao̱ ndso̱ko̱.

41 Kꞌoa̱ lìkoi ndi̱to̱n koan‑kjaín‑le̱,

koiì nga tsjoa tjió‑le̱,

kꞌoa̱ nga ñaki to̱kꞌoa̱ kjima‑le̱,

kꞌoa̱ koiì nga Jesús kitsò‑nile̱:

—A tjín tsé‑no i̱ xi ma bichi.

42 Kꞌoa̱ kꞌia̱ kitsjoa choa‑le̱ jti̱ tsjò kꞌoa̱ jngo chrjoa̱ntsjén‑le̱ cho̱ ntsjén.

43 Kꞌoa̱ Jesús kiskoé kꞌoa̱ kiskine ya̱ ngixko̱n ngatsꞌi xi ya̱ tjió.

44 Kꞌoa̱ kitsò‑le̱:

—Koiì jè én xi tsakjakao̱‑no kꞌia̱ nga ya̱ tsakàte̱jnakao̱‑no;

nga tjínè‑le̱ nga kitjosòn ngayije én xi tjítꞌa xi tꞌatsꞌa̱n ya̱ kjoa̱téxoma‑le̱ Niná xi kiski Moisés,

kao̱ jè én xi kiski ngatsꞌi chjo̱ta̱ xi kinchja̱ya ngajao‑le̱ Niná,

kꞌoa̱ kao̱ én‑le̱ Niná xi tjítꞌa ya̱ xo̱n Salmos.

45 Kꞌia̱ kisi-isen jin kjoa̱faꞌaitsjen‑le̱ jmé‑ni nga koan‑cho̱ya‑nile̱ jotsò Xo̱n‑le̱ Niná;

46 kꞌoa̱ kitsò‑le̱:

—Kꞌoa̱atsò jè én‑le̱ Niná xi tjítꞌa xo̱n,

kꞌoa̱ kꞌoa̱asꞌìn tjínè‑le̱ nga Jè Xi Niná Kisikasén kjoa̱ꞌà kjoa̱ñꞌain,^a

kꞌoa̱ ni̱kꞌen kꞌoa̱ kjoa̱ꞌáyàjin‑nile̱ kꞌen nga koa̱n jàn‑ni ni̱chrjin;^b

47 kꞌoa̱ nga tꞌatsꞌe̱ Jè Xi Niná Kisikasén kàtanòkjoa̱ya ngakijndà na̱xi̱nandá nga kàtasíkꞌantjaìya kjoa̱faꞌaisjen‑le̱ chjo̱ta̱ kꞌoa̱ kao̱ josꞌìn jcha̱tꞌa‑le̱ jé‑le̱,

sꞌe̱tsꞌia̱kao̱‑ni i̱ Jerusalén.

48 Kꞌoa̱ jòn kꞌoao̱o én jme xi tsaꞌyao kꞌoa̱ jme xi kinòꞌyaò tꞌatsꞌe̱ kjoa̱ jè.

49 Koe̱e‑ni,

an sikasénjen‑nèno jè xi kitsò Nꞌai‑na̱ nga tsjoá‑no;

to̱nga jòn ya̱a ti̱yo ya̱ na̱xi̱nandá‑nꞌión Jerusalén,

saꞌnda nga kꞌoe̱ejtsanè‑no nganꞌión xi ngꞌá nchroá‑ni.

50 Kꞌoa̱ Jesús kikao̱ chjo̱ta̱ xi ya̱ kòtꞌayàtꞌa‑le̱ ya̱ saꞌnda na̱xi̱nandá‑ꞌndí Betania ,

kꞌoa̱ tsakjén‑ngꞌa ntsja,

kisichikon‑tꞌain.

51 Kꞌoa̱ kꞌia̱ nga tísíchikon‑tꞌain,

tsakasènxìn‑le̱ kꞌoa̱ kitjoémi ya̱ ngꞌajmi.

52 Kꞌia̱ nga je tsabexkón Jesús chjo̱ta̱ xo̱kjoan,

nꞌión tsjoa tjió‑le̱ nga ki‑ni ya̱ Jerusalén;

53 kꞌoa̱ nchaon nchaon ya̱ tsakatiò ya̱ nditsin‑le̱ yo̱ngo̱,

tjióbꞌasjejeya kꞌoa̱ kitsjoa‑le̱ kjoa̱nda Niná.

Kꞌoa̱kàtama.