—Jè chjo̱ta̱ xo̱kji kàꞌyatꞌain‑ji̱n nga na̱xi̱nandá‑na̱ji̱n tíbincháská‑le̱,

kꞌoa̱ bꞌéchjoà nga bꞌèchjí‑le̱e tao̱n jè César xi chjo̱ta̱xá títjòn‑le̱ Roma,

kꞌoa̱atsò nga jè soa Jè Xi Niná Kisikasén,

jngo xi chjo̱ta̱xá ngajko̱ ma.

3 Kꞌia̱ Pilato kiskònangi‑le̱,

kitsò:

—A ji‑ní jè Chjo̱ta̱xá Ngajko̱‑le̱ chjo̱ta̱ judío.

Kꞌia̱ kinchja̱ Jesús,

kitsò:

—Kꞌoa̱atjín josi.

4 Kꞌoa̱ Pilato kitsò‑le̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xikꞌa:

—Ni̱jmejìn‑là kjoa̱ masjai‑na xi tꞌatsꞌe̱ chjo̱ta̱ xo̱kji xi kjoa̱ñꞌain bakìn‑le̱.

5 To̱nga jè chjo̱ta̱ xo̱kjoan nꞌión sa tsakángi,

kitsò:

—Kjoa̱siì bꞌéntjè i̱ jin‑le̱ na̱xi̱nandá,

nga tíbakóya ngakijndà ꞌnde Judea,

tsakꞌétsꞌia̱kao̱‑ni ꞌnde Galilea saꞌnda i̱.

6 Kꞌia̱ nga kinchrꞌoé Pilato jè én xi ꞌnde Galilea tsò,

kꞌia̱ kiskònangi,

kitsò:

—A ꞌnde Galilea tsꞌe̱ chjo̱ta̱ xo̱kji.

7 Kꞌia̱ nga kisꞌejin‑le̱ nga ya̱ nchja̱‑ni ꞌnde Galilea jña‑ni nga jè Herodes Antipas batéxoma,

kisikasén‑kon‑le̱ Herodes Antipas,

nga koi ni̱chrjin kꞌoa̱ati̱ ya̱ tíjna ya̱ Jerusalén.

8 Kꞌia̱ nga Herodes Antipas tsabe Jesús nꞌión koan‑tsjoa‑le̱,

nga̱ kjoatseè me‑le̱ nga skoe̱;

nga̱ nꞌión nkjìn kjoa̱ kinchrꞌoé xi tꞌatsꞌe̱ Jesús,

kꞌoa̱ kiskoyà nga me‑le̱ skoe̱ nga jngo kjoa̱xkón koa̱kò‑le̱.

9 Kꞌoa̱ nꞌión nkjìn kjoa̱ xi kiskònangi‑le̱,

to̱nga Jesús ni̱jme‑jìn xi kitsò.

10 Kꞌoa̱ ya̱ tjió na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,

kꞌoa̱ nꞌión sa tsakángi.

11 Kꞌia̱ jè Herodes Antipas kao̱ chjo̱ta̱ kjoa̱jchán‑le̱ to̱ taon tsabe Jesús kꞌoa̱ tsakijnòke,

jngo najño xi nꞌión nda kji xi síchjèn chjo̱ta̱xá ngajko̱ kisikꞌakjá;

kꞌoa̱ kisikasén ngìjngokꞌà‑le̱ Pilato.

12 Kꞌia̱ nga ti̱koi‑ni ni̱chrjin mìyo̱ koan‑le̱ xínkjín jè Pilato kao̱ Herodes Antipas;

nga̱ tikeè xínkjín ngasꞌa̱.

13 Kꞌia̱ Pilato kinchja̱maña‑le̱ na̱ꞌmi xi tjió títjòn‑le̱ na̱ꞌmi kao̱ chjo̱ta̱xá‑le̱ chjo̱ta̱ judío kꞌoa̱ kao̱ ngatsꞌi chjo̱ta̱,

14 kitsò‑le̱:

—Jòn kꞌoa̱asꞌìn kàfaꞌai̱kao̱‑naó jè chjo̱ta̱ xo̱kji joni tsà jngo chjo̱ta̱ xi chjo̱ta̱ tíbincháská‑le̱;

to̱nga koe̱e‑ni,

kꞌia̱ nga je kàsijtsòꞌa i̱ ngixkòn,

ni̱jme‑jìn kjoa̱ xi tifanaò kàmasjai‑na xi tꞌatsꞌe̱.

15 Kꞌoa̱ ni̱ jè‑jìn Herodes Antipas kàsokó‑le̱ kjoa̱ xi tꞌatsꞌe̱,

nga̱ jeè kàsikasén‑tꞌa‑le̱;

kꞌoa̱ koe̱e‑ni,

ni̱jme‑jìn xi kisꞌin xi kjoa̱biya bakìn‑le̱ chjo̱ta̱ xo̱kji.

16 Koiì sikꞌéjnandaí‑nia nga je tsjoa‑le̱ kjoa̱ñꞌain.

17 Kꞌoa̱ Pilato kꞌoa̱asꞌìn be‑ni nga jngo chjo̱ta̱ xi ndo̱yá tíjna síkꞌéjnandaí‑le̱ chjo̱ta̱ na̱xi̱nandá nga xki̱ sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.

18 To̱nga ngatsꞌi chjo̱ta̱‑nkjìn to̱ jngo kisꞌin jta̱‑le̱ nga kiskiꞌndiáxá,

kitsò:

—¡Kàtanìkꞌen Jesús,

kꞌoa̱ jè Barrabás ti̱kꞌéjnandaì‑naíji̱n!

19 Jè Barrabás kjoa̱siì tsakꞌéntjè ya̱ jin na̱xi̱nandá kꞌoa̱ jngo chjo̱ta̱ kisikꞌen,

koiì nga ndo̱yá kinìkꞌéjna‑ni.

20 Kꞌia̱ kinchja̱ ngìjngokꞌà Pilato,

nga meè‑le̱ si̱ikꞌéjnandaí Jesús;

21 to̱nga jè chjo̱ta̱‑nkjìn ngìndia tsakꞌéjta,

kitsò:

—¡Krò tjatꞌai,

krò tjatꞌai!

22 Xi ma‑ni jàn kꞌa Pilato kitsò‑le̱:

—Kꞌoa̱ jmé kjoa̱ xi chꞌao tjín kisꞌin‑ni chjo̱ta̱ xo̱kji.

Ni̱jme‑jìn kjoa̱ masjai‑na xi tꞌatsꞌe̱ xi kjoa̱biya bakìn‑le̱;

tsjoaà‑le̱ kjoa̱ñꞌain,

kꞌoa̱ sikꞌéjnandaí‑nia.

23 To̱nga ngatsꞌi nꞌión sa tsakꞌéjta,

kisijé nga krò kàtasꞌetꞌa.

Kꞌoa̱ jè chjo̱ta̱‑nkjìn kao̱ na̱ꞌmi xi tjió títjòn‑le̱ na̱ꞌmi nꞌión tsakꞌéjta kꞌoa̱ koi nga kinjèn‑nile̱.

24 Kꞌia̱ Pilato kitsjoa én‑le̱ nga kꞌoa̱sꞌìn kàtabitjosòn jme xi jè tjiósíjé;

25 kꞌoa̱ kisikꞌéjnandaí‑le̱ Barrabás,

jè xi ndo̱yá tíjnaꞌya tꞌatsꞌe̱ nga kjoa̱si tsakꞌéntjè kꞌoa̱ nga tjín xi kisikꞌen,

jè xi kꞌoa̱sꞌìn kisijé chjo̱ta̱‑nkjìn;

kꞌoa̱ kitsjoatꞌa Jesús nga kꞌoa̱sꞌìn si̱ikao̱ josꞌìn nga koanme‑le̱ ngatsꞌi.

26 Kꞌoa̱ kꞌia̱ nga chjo̱ta̱ kjoa̱jchán tjiófìkao̱ Jesús,

kitsoa jngo chjo̱ta̱ xi Simón ꞌmì xi ya̱ na̱xi̱nandá‑nꞌión Cirene tsꞌe̱,

xi ya̱ jaꞌai‑ni jin tsojmìntjè xi kji ya̱ chrian Jerusalén,

kꞌoa̱ kinìkántjaìchrja krò‑le̱ Jesús jmé‑ni nga kàtabꞌatje̱n‑ngi‑nile̱ Jesús.

27 Kꞌoa̱ nꞌión nkjìn chjo̱ta̱ na̱xi̱nandá xi ya̱ tje̱n‑ngi‑le̱,

kꞌoa̱ nkjìn yánchjín xi tjiókjiꞌndiá kꞌoa̱ xi tjiósíjtsin‑tꞌà ꞌme̱‑le̱ nga tjiókjiꞌndiába xi tꞌatsꞌe̱ Jesús.

28 To̱nga Jesús kisikꞌófayaꞌa,

kitsò‑le̱:

—Yánchjín xi i̱ Jerusalén tsao̱on,

alì an‑jìn chjíꞌndiátꞌain‑naó,

to̱saà jòn chjíꞌndiátꞌaòn yao‑no,

kꞌoa̱ti̱ chjíꞌndiátꞌaòn xti‑no.

29 Nda ti̱nóꞌyaò,

nga̱ kjoa̱ꞌaí ni̱chrjin kꞌia̱ nga koi̱tso̱ én:

“Jó to̱nda‑le̱ ya̱ ngixko̱n Niná jè yánchjín ꞌndi̱,

kꞌoa̱ jè yánchjín xi tsì ꞌndí kisꞌe‑le̱,

kꞌoa̱ jè yánchjín xi tsì ꞌndí kisikaki”.

30 Kꞌia̱ kꞌoe̱etsꞌia̱kao̱ nga kꞌoín‑lao̱o nindo xi ngꞌa kjoan:

“Kàtabixònjen-nènaíji̱n;”

kꞌoa̱ kꞌoín‑lao̱o nindo xi ꞌndí kjoan:

“Tꞌèjtsaꞌma‑naíji̱n”.^a

31 Nga̱ tsà jè yá xkoén kꞌoa̱ kjimatꞌain kjoa̱ jè,

jè yá kixì,

a tsí ngìsa̱ to̱ koa̱n‑tꞌain.

32 Kꞌoa̱ati̱ jè chjo̱ta̱ kjoa̱jchán tjiófìkao̱ jaò chjo̱ta̱ xi nꞌión tsꞌe̱n,

jmé‑ni nga kꞌoa̱ati̱ si̱ikꞌen‑ni.

33 Kꞌoa̱ kꞌia̱ nga kichò ya̱ ꞌnde jña Ninda Jko̱ Kꞌen ꞌmì,

ya̱ kisꞌetꞌa krò Jesús,

kꞌoa̱ti̱ krò kisꞌetꞌa chjo̱ta̱ xi nꞌión tsꞌe̱n,

jngo xi ngakìxi̱‑le̱,

kꞌoa̱ xi ngìjngo ya̱ ngaskón‑le̱.

34 Kꞌoa̱ Jesús tsakꞌétsꞌia̱kao̱ nga kitsò:

—Nꞌai,

ti̱chatꞌa‑lai̱ chjo̱ta̱ xo̱kjoan nga̱ tsì be jme xi tjiósꞌín.

Kꞌia̱ jè chjo̱ta̱ kjoa̱jchán kisiskákao̱‑na̱cha̱ najño‑le̱ Jesús kꞌoa̱ kisikꞌabí‑le̱ xínkjín.^b

35 Kꞌoa̱ jè chjo̱ta̱‑nkjìn tjiókòtsen;

kꞌoa̱ saꞌnda jè chjo̱ta̱xá‑le̱ chjo̱ta̱ judío tjióbijnòke,

tjiótsò:

—Tsakꞌasjentjaí xi kja̱ꞌaí;

ti̱jè kàtabꞌasjentjaì‑ni yao‑le̱,

tsà ñaki kjoa̱kìxi̱ nga jé xo̱kji Jè Xi Niná Kisikasén,

jè xi Niná kiskoéjin.

36 Jè chjo̱ta̱ kjoa̱jchán kꞌoa̱ati̱ tsakijnòke,

tsakinchatꞌa chrian‑le̱ kꞌoa̱ tsakꞌétꞌa‑le̱ tsꞌoa Jesús ndá totseè xi xá satiósan‑ni,

37 kꞌoa̱ kitsò‑le̱:

—Tsà ji‑ní jè Chjo̱ta̱xá Ngajko̱‑le̱ chjo̱ta̱ judío,

ti̱ ji chꞌa̱sjentjaì‑ni yao‑li̱.

38 Kꞌoa̱ti̱ kisꞌetꞌa én ya̱ sòn jko̱ Jesús xi én griego,

én latín,

kao̱ én hebreo kichji xi tsò:

«JÉ XO̱KJI XI CHJO̱TA̱XÁ NGAJKO̱‑LE̱ CHJO̱TA̱ JUDÍO».

39 Kꞌoa̱ jngo chjo̱ta̱ xi nꞌión tsꞌe̱n xi kꞌoa̱ti̱ krò kjitꞌa,

xi jngotjò jngosà tínchja̱ꞌaon‑nile̱ Jesús,

títsò:

—Tsà ji‑ní Jè Xi Niná Kisikasén,

ti̱ ji chꞌa̱sjentjaì‑ni yao‑li̱ kꞌoa̱ chꞌa̱sjentjaì‑naíji̱n.

40 Kinchja̱ chjo̱ta̱ xi ngìjngo xi nꞌión tsꞌe̱n,

kinchja̱tikao̱,

kitsò‑le̱:

—A ni̱ Niná‑jìn bijkon‑lai̱,

ni̱nga kꞌoa̱ti̱ koi kjoa̱ñꞌain tìchjaꞌaì ꞌnda tsà ji.

41 Ñá,

xi ñaki kjoa̱kìxi̱ bakìn‑ná nga kjoa̱ñꞌain tìchjaꞌá,

nga̱ koiì kjoa̱ñꞌain tíbꞌaí‑ná xi bakìn‑le̱ jme xi kinꞌián;

to̱nga jè chjo̱ta̱ xo̱kji ni̱jngo‑jìn kjoa̱ xi chꞌao tjín kisꞌin.

42 Kꞌoa̱ jè chjo̱ta̱ tsꞌe̱n xo̱kji kitsò‑le̱ Jesús:

—Ti̱kjaꞌaìtsjain xi tꞌatsꞌa̱n kꞌia̱ nga kjoáꞌai̱katèxomai.

43 Kꞌia̱ Jesús kitsò‑le̱:

—Ñaki kìxi̱i xi xin‑lè,

nga ndꞌai̱ ya̱a koi̱jnakao̱‑naí ya̱ ꞌnde jña na̱skána̱chon ya̱ ngꞌajmi.

44 Kꞌoa̱ jo‑la̱ni tsà nchisen,

nga kisꞌenjiòn soꞌnde saꞌnda nga choa̱ jàn nga koanxòn.

45 Kꞌoa̱ kꞌia̱ jè tsꞌoí kisꞌenjiòn,

kꞌoa̱ jè najño xi kitje̱nchjoà ya̱ ya yo̱ngo̱ kixijndájen,

jaòya koan.

46 Kꞌia̱ Jesús nꞌión kiskiꞌndiáxá,

kitsò:

—Nꞌai,

ya̱ ya ndsai̱ sikꞌéjna jè sén ni̱chrjin‑na̱.^c

Kꞌia̱ nga je kꞌoa̱kitsò,

kꞌen.

47 Kꞌia̱ nga jè chjo̱ta̱ kjoa̱jchán ngajko̱ xi jngo ciento̱ chjo̱ta̱ kjoa̱jchán kjinè‑ntsja tsabe jme xi koan,

tsakꞌasjejeya Niná,

kitsò:

—Ñaki kìxi̱i nga jè chjo̱ta̱ xo̱kji chjo̱ta̱ kìxi̱i‑ní.

48 Kꞌoa̱ ngatsꞌi chjo̱ta̱‑nkjìn xi ya̱ tjiókòtsen‑le̱ kjoa̱ xi koan,

kꞌia̱ nga tsabe jme xi koan,

ki‑ni kꞌoa̱ tjiósíjtsin‑tꞌà ꞌme̱‑le̱.

49 To̱nga ngatsꞌi xi bexkon Jesús,

kao̱ yánchjín xi kinchroatje̱n‑ngi‑nile̱ saꞌnda ꞌnde Galilea,

kjiìn tjió‑ni nga tjiókòtsen‑le̱ kjoa̱ jè.

50 Tsakꞌèjna jngo chjo̱ta̱ xi José tsakꞌìn,

xi nda chjo̱ta̱ kꞌoa̱ xi chjo̱ta̱ kìxi̱,

xi ya̱ na̱xi̱nandá‑nꞌión Arimatea tsꞌe̱,

xi ꞌnde Judea nchja̱‑ni,

xi ya̱ tíjnajin‑le̱ jtín xi kjinèntsja kjoa̱téxoma‑le̱ chjo̱ta̱ judío,

nda̱a chjo̱ta̱ kꞌoa̱ chjo̱ta̱ kìxi̱‑ní.

51 Jè chjo̱ta̱ xo̱kji kꞌoa̱ati̱ tíkoya nga skoe̱ jña batéxoma Niná,

kꞌoa̱ jè lìkoi kisasen‑le̱ josꞌìn kisijngo kjoa̱faꞌaitsjen‑le̱ kꞌoa̱ jè kjoa̱ xi kisꞌin jè jtín xi kinèntsja kjoa̱téxoma‑le̱ chjo̱ta̱ judío,

52 kikon‑le̱ Pilato,

kꞌoa̱ kisijé yao‑le̱ Jesús.

53 Kꞌia̱ nga je tsakꞌaje̱n‑tꞌa krò,

jngo najño‑te tsakájtéjon,

kꞌoa̱ ya̱ kisikájnaya jngo ngijao xi tsꞌe̱ kꞌen xi xá kiskoꞌaitꞌa‑ni na̱xi̱,

jña‑ni nga ni̱sajngo‑jìn kꞌen sꞌejnaya.

54 Koiì ni̱chrjin nga batiònda‑le̱ tꞌatsꞌe̱ ni̱chrjin xotò,

kꞌoa̱ jeè me bichó choa̱‑le̱ jochon nga bꞌétsꞌia̱ ni̱chrjin nga xotò nga bexkón Niná chjo̱ta̱ judío.

55 Kꞌoa̱ jè yánchjín xi ya̱ ñatje̱n kinchroa‑ni kao̱ Jesús saꞌnda ꞌnde Galilea,

kꞌoa̱ti̱ kitje̱n‑ngi‑le̱ José,

kꞌoa̱ tsabe ngijao xi tsꞌe̱ kꞌen kꞌoa̱ jósꞌìn nga ya̱ kisꞌejnaya yao‑le̱ Jesús.

56 Kꞌia̱ nga kichò ngìndia‑ni ya̱ Jerusalén,

tsakatiónda chao xi na̱ská na̱nje̱n kao̱ sìti̱‑xi xi nda nje̱n;

kꞌoa̱ tsakatiòkjáya nga ni̱chrjin xotò ni̱chrjin nga bexkón Niná chjo̱ta̱ judío josꞌìn bꞌénè kjoa̱téxoma‑le̱ Niná.^d