4 To̱nga Jesús to̱ jeè be ngayije jme kjoa̱ xi tínchroánè‑le̱,

kꞌia̱ kitjonchrꞌoè kꞌoa̱ kitsò‑le̱:

—ꞌYá‑ni xi tifasjao.

5 Jè chjo̱ta̱ kitsò‑le̱:

—Jé Jesús xi Nazaret tsꞌe̱.

Jesús kitsò‑le̱:

—An‑nià.

Kꞌoa̱ Judas,

jè xi títsjoátꞌa Jesús kꞌoa̱ti̱ ya̱ tje̱njin‑le̱ chjo̱ta̱ xo̱kjoan.

6 Kꞌia̱ nga Jesús kitsò‑le̱:

«An‑nià»,

jè chjo̱ta̱ xo̱kjoan ki‑ni yátsꞌi̱n,

kꞌoa̱ kitsaotꞌa nangi.

7 Kꞌia̱ ngìndia kiskònangi‑le̱:

—ꞌYá‑ni xi tìbijnchisjaò.

Kꞌia̱ jè chjo̱ta̱ kitsò:

—Jé Jesús xi Nazaret tsꞌe̱.

8 Jesús kitsò:

—Jeè kꞌoa̱kàxin‑no nga an‑jiàn;

kꞌoa̱ tsà an xi tìbijnchisjaì‑naó,

tꞌai̱ꞌnde‑lao̱o nga kàtafì jè chjo̱ta̱‑na̱.

9 Jmé‑ni nga kꞌoa̱sꞌìn kitjosòn‑ni én xi kinchja̱ Jesús nga kitsò:

«Jè chjo̱ta̱ xi ji tsakꞌaì‑naí,

ni̱jngo‑jìn kisichà».

10 Kꞌia̱ Simón Pedro xi jngo ki̱cha̱ndo yꞌa,

tsakꞌasje kꞌoa̱ tsaká‑le̱ cho̱ꞌnda‑le̱ na̱ꞌmi títjòn nga tsakatetꞌa chrjoa̱ño ngakìxi̱.

Kꞌoa̱ jè cho̱ꞌnda‑le̱ na̱ꞌmi títjòn,

Malco ꞌmì.

11 Kꞌia̱ Jesús kitsò‑le̱ Pedro:

—Cha̱nìsꞌen‑ni chrjoa̱‑le̱ ki̱cha̱ndo‑li̱;

jè cho̱tsín kjoa̱ñꞌain xi jè Nꞌai títsjoá‑na,

a tsí tjínè‑na nga skꞌoia̱.

12 Kꞌia̱ jè jtín‑le̱ chjo̱ta̱ kjoa̱jchán kao̱ jè ngajko̱‑le̱ chjo̱ta̱ kjoa̱jchán,

kꞌoa̱ kao̱ chjo̱ta̱ xi síkoìnda̱ yo̱ngo̱,

xi kisikasén chjo̱ta̱ jchínga‑le̱ chjo̱ta̱ judío,

kitsoa Jesús,

kꞌoa̱ nꞌó tsakꞌétꞌa,

13 kꞌoa̱ títjòn ya̱ ndꞌia‑le̱ Anás kikao̱;

nga̱ jè nꞌaichá‑le̱e Caifás,

jè Caifás xi na̱ꞌmi títjòn nga koi nó.

14 Jé Caifás xi kꞌoa̱tsò kjoa̱faꞌaitsjen kitsjoa‑le̱ chjo̱ta̱ jchínga‑le̱ chjo̱ta̱ judío,

nga ngìsa̱ kjen‑ndia̱a nga to̱jngo chjo̱ta̱ koi̱yántjaì na̱xi̱nandá.

15 Kꞌoa̱ jè Simón Pedro kao̱ ngìjngo chjo̱ta̱ xi ya̱ kòtꞌayàtꞌa‑le̱ Jesús kitje̱n‑ngile̱.

Kꞌoa̱ jè na̱ꞌmi títjòn bexkoòn jè chjo̱ta̱ xi ngìjngo,

kꞌoa̱ jaꞌasꞌen‑kao̱ Jesús ya̱ nditsin ndꞌia‑le̱ na̱ꞌmi títjòn;

16 to̱nga Pedro ya̱a tsakꞌèjna nditsin,

ya̱ jchro xo̱ntjoa̱.

Kitjo‑ni jè chjo̱ta̱ xi ya̱ kòtꞌayàtꞌa‑le̱ Jesús xi jè na̱ꞌmi títjòn bexkon,

kꞌoa̱ tsakjákao̱ jè chjo̱on xi síkoìnda̱ xo̱ntjoa̱,

kꞌoa̱ kisikjaꞌasꞌen Pedro.

17 Kꞌia̱ jè chjo̱on cho̱ꞌnda xi síkoìnda̱ xo̱ntjoa̱ kitsò‑le̱ Pedro:

—A tsí tsà kꞌoa̱ti̱ ya̱ chòtꞌayàtꞌa‑lai̱ tsàndaji chjo̱ta̱ xo̱kji.

Pedro kitsò:

—Mai,

lìtsà ya̱ jìn kòtꞌayàtꞌa‑le̱ an.

18 Kꞌoa̱ jè cho̱ꞌnda‑le̱ na̱ꞌmi títjòn kao̱ chjo̱ta̱ xi síkoìnda̱ yo̱ngo̱ ya̱a nchandai lꞌí xi tsakꞌétse;

nga̱ nchꞌán nga koi ni̱chrjin,

kꞌoa̱ tjiómasíso‑le̱ yao‑le̱;

kꞌoa̱ kꞌoa̱ati̱ ya̱ sénjnajin‑le̱ Pedro nga tísíso‑le̱ yao‑le̱.

19 Kꞌoa̱ jè na̱ꞌmi títjòn kiskònangi‑le̱ Jesús tꞌatsꞌe̱ chjo̱ta̱ xi ya̱ kòtꞌayàtꞌa‑le̱ kao̱ tꞌatsꞌe̱ josꞌìn tjín‑ni xi bakóya.

20 Jesús kitsò‑le̱:

—An kixinya sòn‑tsen‑le̱ ngatsꞌi chjo̱ta̱;

ngantsjaì tsakakoyà ya̱ ndꞌia jña maxkia̱ xo̱n‑le̱ Niná kao̱ ya̱ nditsin‑le̱ yo̱ngo̱,

jña‑ni batiòjtín ngatsꞌi chjo̱ta̱ judío,

kꞌoa̱ ni̱jme‑jìn xi to̱ kinchjàꞌma‑jiàn.

21 Án‑ni nga an chjònangi‑ninaí,

chjónangi‑lai̱ jè xi kinchrꞌoé,

jmé‑ni én xi tsakjakoa̱;

koe̱e‑ni,

jè tjiójin‑le̱ jme xi kixian.

22 Kꞌia̱ nga je kꞌoa̱kitsò Jesús én jè,

jngo chjo̱ta̱ xi síkoìnda̱ yo̱ngo̱,

xi ya̱ tíjna,

kisijtsin‑à Jesús,

kitsò:

—Jótsò tokoìn nga kꞌoa̱ꞌmì‑lai̱ jè na̱ꞌmi títjòn.

23 Jesús kitsò‑le̱:

—Tsà chꞌao tsò én xi kànchjà,

tꞌai én‑li̱ jñá‑ni nga chꞌao kaxian;

kꞌoa̱ tsà nda kàxian,

án‑ni nga bꞌè‑ninaí.

24 Kꞌoa̱ kꞌia̱ tsakꞌénè jè Anás nga nꞌó kisꞌetꞌa Jesús,

nga kisikasén‑tꞌa‑le̱ Caifás,

jè xi na̱ꞌmi títjòn.

25 Kꞌoa̱ to̱jo ya̱a sꞌa̱ sénjna Pedro nga tísíso‑le̱ yao‑le̱.

Kꞌoa̱ tsakꞌìn‑le̱:

—A tsí kꞌoa̱ti̱ ya̱ chòtꞌayàtꞌa‑lai̱ tsàndaji.

Pedro kꞌoa̱kitsò nga tsì bexkon Jesús,

kitsò:

—Mai,

lìtsà ya̱‑jìn kòtꞌayàtꞌa‑le̱ an.

26 Jngo cho̱ꞌnda‑le̱ na̱ꞌmi títjòn,

xi xínkjín ma‑ni jè xi Pedro tsakatetꞌa chrjoa̱ño,

kitsò‑le̱:

—A tsí kàꞌbe‑nálè nga ya̱ tìjnakoai̱ Jesús ya̱ jña kji yá ntjè.

27 Pedro ngìjngokꞌà kꞌoa̱kitsò nga tsì bexkon Jesús;

kꞌoa̱ kjoan kiskiꞌndiá cháxichá.

28 Kꞌia̱ nꞌión ta̱njiòn sa nga kitjokao̱ Jesús ya̱ ndꞌia‑le̱ Caifás nga kikao̱ saꞌnda ya̱ nditsin ndꞌia‑le̱ Pilato,

kꞌoa̱ jè chjo̱ta̱ judío lìkoi jaꞌasꞌen ya̱ nditsin ndꞌia‑le̱ Pilato,

jmé‑ni nga tsì jndí koa̱n‑ni ngixko̱n Niná,

josꞌìn be‑ni,

kꞌoa̱ jmé‑ni nga koa̱n koa̱kje̱n sꞌoí‑ni xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.

29 Kꞌia̱ Pilato kitjonchrꞌoè chjo̱ta̱ xo̱kjoan,

kꞌoa̱ i̱ kitsò‑le̱:

—Jmé kjoa̱ xi soyojétꞌain‑nio jè chjo̱ta̱ xo̱kji.

30 Kꞌia̱ kinchja̱ chjo̱ta̱ xo̱kjoan kꞌoa̱ i̱ kitsò:

—Tsà tsì‑làni chjo̱ta̱ tsꞌe̱n chjo̱ta̱ xo̱kji,

lìkoi‑jìn tsà i̱ kàfaꞌai̱kao̱tꞌa‑laìji̱n.

31 Kꞌia̱ Pilato kitsò‑le̱:

—Jòn tangíkao̱o,

kꞌoa̱ tjanaò kjoa̱ñꞌain josꞌìn tjín jè kjoa̱téxoma‑no.

Kꞌoa̱ jè chjo̱ta̱ jchínga‑le̱ chjo̱ta̱ judío kitsò‑le̱:

—Jòn,

lìkoi bꞌaìꞌnde‑naíji̱n nga chjo̱ta̱ si̱kꞌaìn‑ji̱n.

32 Koiì kꞌoa̱koan‑ni jmé‑ni nga koi̱tjosòn‑ni jè én xi kitsò Jesús,

nga̱ jeè kꞌoa̱sꞌìn kitsòya josꞌìn nga koi̱yá.

33 Kꞌia̱ Pilato jaꞌasꞌen ngìjngokꞌà ya̱ nditsin ndꞌia‑le̱,

kinchja̱‑le̱ Jesús kꞌoa̱ i̱ kitsò‑le̱:

—A ji‑ní jè Chjo̱ta̱xá Ngajko̱‑le̱ chjo̱ta̱ judío.

34 Jesús kitsò‑le̱:

—A to̱ tsi̱‑ní koa̱faꞌaitsjen xo̱ tsò,

axo̱ kja̱ꞌaí xi kꞌoa̱kitsò‑lì ꞌya‑nia an.

35 Pilato kitsò‑le̱:

—A tseèn kjiꞌe̱‑lè nga chjo̱ta̱ judío‑jiàn an.

Jé chjo̱ta̱ xi ya̱ to̱jngo na̱xi̱nandá‑no kao̱ na̱ꞌmi xi tjió títjòn‑le̱ na̱ꞌmi xi i̱ kàfaꞌaikao̱‑lì.

Jmé kjoa̱ xi kinꞌiaìn.

36 Kinchja̱ Jesús kitsò:

—Ya̱ jña an batèxoma alì tsà i̱‑jìn soꞌnde nchja̱‑ni;

tsà i̱‑làni soꞌnde nchja̱‑ni,

si̱itoán‑ntjaì‑jìn‑na jè cho̱ꞌnda‑na̱,

jmé‑ni nga tsì ya̱ chjo̱ta̱ judío koa̱ntsjatꞌa‑ña;

to̱nga jña an batèxoma alì tsà i̱ jìn soꞌnde nchja̱‑ni.

37 Kꞌia̱ Pilato kitsò‑le̱:

—Ngo̱ chjo̱ta̱xá ngajko̱o‑la̱jìn tsòkꞌoa̱.

Jesús kitsò‑le̱:

—Jiì xo̱ si nga chjo̱ta̱xá ngajko̱‑jiàn.

An koiì xá kitsin‑nia,

kꞌoa̱ koiì xá jàꞌai̱‑ña i̱ soꞌnde,

jmé‑ni nga tsjoa‑sínia én‑na̱ xi tꞌatsꞌe̱ én xi ñaki kìxi̱.

To̱ꞌya‑ni xi jè én xi ñaki kìxi̱ fìtꞌa‑le̱,

basén‑ñoò én xi nchjà.

38 Pilato kitsò‑le̱:

—Jmé‑ni én xi ñaki kìxi̱.

Kꞌia̱ nga je kꞌoa̱kitsò Pilato én jè,

kꞌia̱a kitjonchrꞌoè ngìndia chjo̱ta̱ judío,

kꞌoa̱ kitsò‑le̱:

—Ni̱jme‑jìn jé masjai‑na xi tꞌatsꞌe̱ chjo̱ta̱ xo̱kji.

39 To̱nga jòn kꞌoa̱asꞌìn ꞌya‑nio nga sikꞌéjnandaí jngo‑no chjo̱ta̱ xi ndo̱yá tíjna kꞌia̱ nga chꞌàsjao sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.

A meè‑noni nga sikꞌéjnandaí‑no jè Chjo̱ta̱xá Ngajko̱‑le̱ chjo̱ta̱ judío.

40 Kꞌia̱ nꞌión kinchja̱ ngìjngokꞌà ngatsꞌi chjo̱ta̱,

kitsò:

—Xi jè xo̱kji mai,

to̱saà jè Barrabás ti̱kꞌéjnandaì‑naíji̱n.

Kꞌoa̱ jè Barrabás jngoò chjo̱ta̱ xi nꞌión chꞌaokjoan.