Jesús bꞌétsꞌoantjaì chjo̱ta̱ xi ya̱ kòtꞌayàtꞌa‑le̱
17
Koiì én jè xi kinchja̱ Jesús,
kꞌoa̱ kiskòtsen ngꞌajmi,
kitsò:
«Nꞌai,
jeè kichòka choa̱‑le̱;
chꞌa̱sjejeyai ꞌNdí‑li̱,
jmé‑ni nga kꞌoa̱ti̱ jè ꞌNdí‑li̱ kꞌoa̱sjejeya‑nilì;
2 josꞌìn nga tsakꞌaì‑lai̱ nga jè koa̱tèxoma‑le̱ ngatsꞌi chjo̱ta̱,
jmé‑ni nga tsjoá‑nile̱ kjoa̱bijnachon xi tsìkꞌia fetꞌa ngatsꞌi chjo̱ta̱ xi ji tsakꞌaì‑lai̱.
3 Kꞌoa̱ koiì jè xi kjoa̱bijnachon xi tsìkꞌia fetꞌa:
nga kàtabexkon‑lì ji,
Niná xi to̱ jngo‑jìn xi ñaki kjoa̱kìxi̱ nga Niná‑jìn,
kꞌoa̱ nga kꞌoa̱ati̱ kàtabexkon Jesucristo,
jè xi ji kinìkasaín.
4 An jeè tsꞌakꞌasjèjeya‑lè i̱ soꞌnde;
jeè koanjngo‑na jè xá xi ji tsakꞌaì‑naí nga kisꞌian.
5 Nꞌai,
chꞌa̱sjejeya‑naí ndꞌai̱ ya̱ ngakìxi̱‑li̱,
kao̱ kjoa̱jeya xi kisꞌe‑na kao̱ ji kꞌia̱ nga kje‑sa sꞌenda soꞌnde.
6 »Jeè tsakakosò‑tsen‑le̱ ꞌyá‑ni ji,
jè chjo̱ta̱ xi tsakꞌaì‑naí i̱ soꞌnde;
tsi̱‑ní tsàkai kꞌoa̱ aàn tsakꞌaì‑naí,
kꞌoa̱ jè tjiósíkitjosòn én‑li̱.
7 Ndꞌai̱ jeè be nga ngayije kjoa̱ xi ji tsakꞌaì‑naí,
tꞌatsi̱i nchroá‑ni;
8 nga̱ jè én xi ji tsakꞌaì‑naí,
jeè kitsjoa‑le̱;
kꞌoa̱ kiskoétjaò‑ní,
kꞌoa̱ jeè tsabe nga kjoa̱kìxi̱ nga tꞌatsi̱ jàꞌai̱‑nia,
kꞌoa̱ jeè koan‑kjaín‑le̱ nga ji kinìkasén‑naí.
9 An bꞌetsꞌoaà‑lè xi tꞌatsꞌe̱;
lìtsà jè‑jìn chjo̱ta̱ xi kjoa̱soꞌnde tjiójin xi bꞌetsꞌoàntjaì‑jiàn,
to̱saà jè xi ji tsakꞌaì‑naí;
nga̱ tsi̱‑ní,
10 kꞌoa̱ ngatsꞌi xi tsꞌa̱n tsi̱‑ní,
kꞌoa̱ jè xi tsi̱ tsꞌa̱n‑nià;
kꞌoa̱ jeè tìbìtjo̱jeya‑jiàn xi to̱ tꞌatsꞌe̱.
11 »Kꞌoa̱ lìtsà ti̱ i̱ jìn soꞌnde koate̱jna‑nia;
to̱nga jè chjo̱ta̱‑na̱ xi tsakꞌaì‑naí i̱i soꞌnde tjió,
kꞌoa̱ an ya̱a tìfikon‑lè.
Nꞌai xi nꞌión xkón tijnai,
jokjoan xi ji tsakꞌaì‑naí nda ti̱koìndai̱ kao̱ nganꞌión‑li̱,
jmé‑ni nga to̱jngo kàtama‑ni joni tsà ñá.
12 Kꞌia̱ nga i̱ tsakàte̱jnakoa̱ i̱ soꞌnde,
aàn kisikoìnda̱ kao̱ nganꞌión‑li̱;
jè chjo̱ta̱ xi ji tsakꞌaì‑naí,
aàn kisikoìnda̱,
kꞌoa̱ ni̱jngo‑jìn xi kicha,
to̱jè‑ní xi ndia̱a kjoa̱biya kiskoéjin xi kicha,
jmé‑ni nga koi̱tjosòn‑ni jotsò Xo̱n Én‑li̱.a
13 »To̱nga ndꞌai̱ ya̱a tìfikon‑lè;
kꞌoa̱ i̱i soꞌnde tìnchjà én jè,
jmé‑ni nga jè kjoa̱tsjoa‑na̱ kàtamajngo‑ni ya̱ jin ni̱ma̱‑le̱ chjo̱ta̱‑na̱.
14 An jeè kitsjoa‑le̱ én‑li̱;
kꞌoa̱ jè chjo̱ta̱ xi kjoa̱soꞌnde tjiójin koan‑chꞌaokeè,
nga̱ lìtsà i̱i soꞌnde tsꞌe̱,
joni tsà an,
nga tsì tsà i̱ soꞌnde tsꞌa̱n.
15 Lìtsà koi‑jìn xá bꞌetsꞌoà‑nilè nga chja̱ꞌàxìn i̱ soꞌnde,
to̱saà koi nga ti̱koìndai̱ tꞌatsꞌe̱ kjoa̱ xi tsꞌe̱ nai̱i.
16 Lìtsà i̱i soꞌnde tsꞌe̱,
joni tsà an,
nga tsì tsà i̱ soꞌnde tsꞌa̱n.
17 Kao̱ jè én‑li̱ xi ñaki kìxi̱ chjoétꞌaxìn‑ni;
nga̱ jè én‑li̱ ñaki kìxi̱‑ní.
18 Josꞌìn nga ji kinìkasén‑naí i̱ soꞌnde,
kꞌoa̱ati̱ sꞌìn sikasén an ya̱ jin‑le̱ chjo̱ta̱ soꞌnde.
19 Kꞌoa̱ to̱ tꞌatsꞌe̱e chjo̱ta̱‑na̱ nga tìsintsjatꞌa‑lè yao‑na̱ nga tìsixá‑leè,
jmé‑ni nga kꞌoa̱ati̱ kao̱ jè én‑li̱ xi ñaki kìxi̱ chjoé‑ni chjo̱ta̱‑na̱ nga kàtasíxá‑lì.
20 »To̱nga lìtsà to̱jè‑jìn chjo̱ta̱‑na̱ xi i̱ tjiókao̱‑na xi tìbꞌetsꞌoàntjaì‑jiàn,
kꞌoa̱ati̱ tꞌatsꞌe̱ jè chjo̱ta̱ xi koan‑kjaín‑le̱ tꞌatsꞌa̱n xi to̱ tꞌatsꞌe̱ jè én xi koi̱nchja̱ jè,
21 jmé‑ni nga to̱jngo kàtama‑ni ngatsꞌi;
joni tsà ji Nꞌai,
nga to̱jngo ma‑jìn kao̱ an,
kꞌoa̱ an kao̱ ji,
nga kꞌoa̱ti̱ jè to̱jngo kàtama kao̱ ñá;
jmé‑ni nga jè chjo̱ta̱ koa̱n‑kjaín‑nile̱ nga ji kinìkasén‑naí.
22 Jè kjoa̱jeya xi tsakꞌaì‑naí,
an jeè kitsjoa‑le̱,
jmé‑ni nga to̱jngo kàtama‑ni,
joni tsà ñá nga to̱jngo maà.
23 Nga an to̱jngo koan kao̱ jè,
kꞌoa̱ ji to̱jngoò maà kao̱ an,
jmé‑ni nga ñaki to̱ jngo kàtama‑ni,
kꞌoa̱ jmé‑ni nga kàtabe‑ni jè chjo̱ta̱ nga ji kinìkasén‑naí,
kꞌoa̱ nga kꞌoa̱ti̱ sꞌìn tsjoachai chjo̱ta̱‑na̱,
josꞌìn tsjoacha‑naí an.
24 »Nꞌai,
jè xi tsakꞌaì‑naí,
meè‑na nga ya̱ jña tìjna̱ an,
kꞌoa̱ti̱ ya̱ kàtabatiòkao̱‑na,
jmé‑ni nga skoe̱‑ni jè kjoa̱jeya‑na̱ xi ji tsakꞌaì‑naí;
nga̱ tsjoacha‑naí saꞌnda nga to̱ngi‑nile̱ nga kje‑sa sꞌenda soꞌnde.
25 Nꞌai xi kìxi̱‑jìn,
jè chjo̱ta̱ xi kjoa̱soꞌnde tjiójin lìkꞌia tjióbexkon‑lì,
to̱nga an jeè ꞌbexkon‑lè,
kꞌoa̱ jè chjo̱ta̱‑na̱ jeè tsabe nga ji kinìkasén‑naí.
26 Kꞌoa̱ jeè tsakako‑le̱ ꞌyá‑ni ji,
kꞌoa̱ sꞌa̱a‑sa koako‑le̱,
jmé‑ni nga jè kjoa̱tsjoacha xi kao̱ tsjoacha‑ninaí kꞌoéjnajin‑ni ni̱ma̱‑le̱,
kꞌoa̱ an kꞌoa̱ati̱ ya̱ koàte̱jnajin‑le̱».