»Xi koi én jè,

lìkoi kꞌoa̱kixin‑no nga títjòn,

nga̱ an i̱i tsakàte̱jnakao̱‑no.

5 To̱nga ndꞌai̱ tìfikon‑nile̱ jè xi kisikasén‑na;

kꞌoa̱ ni̱jngo‑jìn jòn xi ꞌmì‑naó:

“Jñá tiꞌmi”.

6 Kꞌia̱ nga kꞌoa̱tìxian kjoa̱ jè,

to̱saà nꞌión kjimaba‑le̱ ni̱ma̱‑no.

7 To̱nga an kꞌoa̱axìn‑no én xi ñaki kìxi̱:

Kjen‑ndia̱a‑no nga kjoiá an;

nga̱ tsà tsì kjoiá,

jè Xi Si̱ijekon‑no lìkoi kjoa̱ꞌaíkon‑no;

to̱nga tsà kjoiá,

aàn sikasén‑no.

8 Kꞌoa̱ kia̱nga jè xi kjoa̱ꞌaí,

koa̱kò nga̱‑a‑le̱ jé‑le̱ chjo̱ta̱,

kꞌoa̱ti̱ koa̱kò nga̱‑a‑le̱ kjoa̱kìxi̱,

kꞌoa̱ kꞌoa̱ati̱ koa̱kò nga̱‑a‑le̱ kjoa̱ñꞌain xi tsjoá Niná.

9 Tꞌatsꞌe̱ jé,

nga tsì makjaín‑le̱ tꞌatsꞌa̱n;

10 tꞌatsꞌe̱ kjoa̱kìxi̱,

nga tìfikon‑le̱ jè Nꞌai,

kꞌoa̱ lìkoi ti̱ jcha̱‑ninaó;

11 kꞌoa̱ tꞌatsꞌe̱ kjoa̱ñꞌain xi tsjoá Niná,

nga̱ jè nai̱i xi batéxoma i̱ soꞌnde,

jeè tíjnanè‑le̱ kjoa̱ñꞌain.

12 »Nꞌión nkjìn‑sa kjoa̱ xi tjín‑na xi xín‑no,

to̱nga ndꞌai̱ lìkoi chókjoa̱‑le̱ ni̱ma̱‑no tsà kꞌoa̱xín‑no.

13 To̱nga kꞌia̱ nga kjoa̱ꞌaí jè Sén Ni̱chrjin Tsje koa̱kòya‑no én xi ñaki kìxi̱,

jé‑ní xi koandia̱a‑no josꞌìn tjín ngayije én xi ñaki kìxi̱;

nga̱ tsì tsà to̱jè‑jìn kꞌoa̱ yao‑le̱ nga koi̱nchja̱,

to̱saà koi koi̱nchja̱ ngayije én xi koi̱nchrꞌoé,

kꞌoa̱ jè koi̱tso̱ya‑no jè kjoa̱ xi sꞌa̱ nchroá.

14 Jé kꞌoa̱sjejeya‑na;

nga̱ koiì xi tsꞌa̱n skoé,

kꞌoa̱ koiì koa̱kòya‑no.

15 Ngayije jme xi tjín‑le̱ jè Nꞌai tsꞌa̱n‑nià;

koiì kꞌoa̱kàxin‑nia nga jé skoé xi tsꞌa̱n,

kꞌoa̱ nga koiì koa̱kòyà‑no.

16 »To̱ ngì choatseè sa nga i̱ tìjna̱kao̱‑no,

kꞌoa̱ lìkoi ti̱ jcha̱‑ninaó;

to̱nga to̱ choa ni̱chrjin kjoa̱ꞌato nga koa̱n jcha̱ ngìndia‑naò;

nga̱ an ya̱a tìfikon‑le̱ jè Nꞌai.

17 Kꞌoa̱ tjín kꞌa chjo̱ta̱ xi ya̱ kòtꞌayàtꞌa‑le̱ Jesús xi i̱ kitsò ngañá‑le̱ xínkjín:

—Jmè‑ni xo̱ tsò‑le̱ nga i̱ tsò‑niná:

“To̱ ngì choatseè sa nga i̱ tìjna̱kao̱‑no,

kꞌoa̱ lìkoi ti̱ jcha̱‑ninaó;

to̱nga to̱ choaà ni̱chrjin kjoa̱ꞌato nga koa̱n jcha̱ ngìndia‑naó”;

kꞌoa̱ “nga̱ an ya̱a tìfikon‑le̱ jè Nꞌai”.

18 Kꞌoa̱ kitsò‑le̱ xínkjín:

—Jmé‑ni xo̱ tsò‑le̱ nga̱ i̱ tsò‑ni:

“To̱ ngì choatseè sa nga i̱ tìjna̱kao̱‑no”.

Lìkoi macho̱ya‑ná jmé‑ni xo̱ tsò‑le̱.

19 Jesús tsabe nga me‑le̱ skónangi‑le̱,

kꞌoa̱ i̱ kitsò‑le̱:

—A koiì tichjònangi‑lao̱o xìngio̱o tꞌatsꞌe̱ nga i̱ kàxian:

“To̱ ngì choatseè sa nga i̱ tìjna̱kao̱‑no,

kꞌoa̱ lìkoi ti̱ jcha̱‑ninaó;

to̱nga to̱ choaà ni̱chrjin kjoa̱ꞌato nga koa̱n jcha̱ ngìndia‑naó”.

20 Ñaki kìxi̱i xi xin‑no,

nga jòn chjíꞌndiaó,

kꞌoa̱ koa̱nbaà‑no,

kꞌoa̱ jè chjo̱ta̱ xi kjoa̱soꞌnde tjiójin koa̱n-tsjoaà‑le̱;

to̱nga nda tsà jòn koa̱nba‑no,

jè kjoa̱ba‑no kjoa̱tsjoaà kꞌónya.

21 Kꞌia̱ nga jngo chjo̱on tsin ꞌndí‑le̱,

makjineè ꞌndí‑le̱,

nga̱ jeè kichò ni̱chrjin‑le̱;

to̱nga kꞌia̱ nga je kàtsin ꞌndí‑le̱,

lìkoi ti̱ faꞌaitsjen‑nile̱ jè kjoa̱ñꞌain xi kàfaꞌato‑jin,

xi to̱ tꞌatsꞌe̱ jè kjoa̱tsjoa xi tjín‑le̱ nga jngo ꞌndí kàtsin i̱ soꞌnde.

22 Kꞌoa̱ati̱ jòn kjoa̱baà tjín‑no ndꞌai̱;

to̱nga skoeè ngìndia‑no,

kꞌoa̱ koa̱n-tsjoaà‑le̱ ni̱ma̱‑no,

kꞌoa̱ ni̱ꞌya‑jìn xi koa̱n‑le̱ kjoa̱ꞌàxìn‑no kjoa̱tsjoa‑no.

23 Kꞌia̱ nga koi ni̱chrjin,

ni̱jme‑jìn xi chjónangi‑naò.

Ñaki kìxi̱i xi xin‑no,

nga ngayije xi si̱jé‑lao̱o jè Nꞌai kao̱ nganꞌión‑le̱ jaꞌaín‑na̱,

jé tsjoá‑no.

24 Saꞌnda ndꞌai̱ ni̱sajme‑jìn xi nìjaó xi kao̱ nganꞌión‑le̱ jaꞌaín‑na̱;

ti̱jaó,

kꞌoa̱ kꞌoai̱i‑no,

jmé‑ni nga jè kjoa̱tsjoa‑no koa̱njngo‑ni.

25 »Jè kjoa̱ jè,

kao̱o choa̱ xi mangósòn‑kao̱ jngo kjoa̱ tìfakao̱‑no;

to̱nga nchroá ni̱chrjin kꞌia̱ nga tsì tsà ti̱ kao̱ choa̱ xi mangósòn‑kao̱ jngo kjoa̱ kjoakao̱‑nino,

to̱saà ñaki kjoakao̱ kìxi̱‑no xi tꞌatsꞌe̱ Nꞌai.

26 Kꞌia̱ nga koi ni̱chrjin kao̱ nganꞌión‑le̱ jaꞌaín‑na̱ si̱jaó;

kꞌoa̱ lìtsà xin‑jìn‑no nga an kꞌoetsꞌoà‑le̱ jè Nꞌai xi tꞌatsao̱on,

27 nga̱ jè soaà jè Nꞌai xi tsjoake‑no,

nga̱ jòn koan-tsjoacha‑naó,

kꞌoa̱ koan‑kjaín‑no nga tꞌatsꞌe̱ Niná jàꞌai̱‑nia.

28 Tꞌatsꞌe̱e jè Nꞌai kinchroa‑nia,

kꞌoa̱ jàꞌai̱‑jiàn i̱ soꞌnde;

kꞌoa̱ ngìndia sikꞌéjna‑jiàn soꞌnde,

kꞌoa̱ tìfikon‑le̱ jè Nꞌai.

29 Jè chjo̱ta̱ xi kòtꞌayàtꞌa‑le̱ Jesús kitsò‑le̱:

—Koe̱e‑ni,

ndꞌai̱ tinòkjoa̱ kìxi̱‑ní,

kꞌoa̱ lìtsà ti̱koi tìnìchjén‑ni jè choa̱ xi mangósòn‑kao̱ jngo kjoa̱.

30 Ndꞌai̱ macho̱yaà‑naji̱n nga ꞌyai ngayije kjoa̱,

kꞌoa̱ lìkoi machjén nga ꞌya xi skónangi‑lì;

koiì kjoa̱ nga makjaín‑ninaji̱n nga tꞌatsꞌe̱ Niná jàꞌai̱‑ni.

31 Jesús kitsò‑le̱:

—A makjaín‑no ndꞌai̱.

32 Koe̱e‑ni,

jeè kichò choa̱‑le̱,

kꞌoa̱ jeè jaꞌai,

kꞌia̱ nga jè chjo̱ta̱ kꞌoe̱etsaoba‑no nga koi̱yó nga jngó jngó,

kꞌoa̱ to̱ aàn si̱kꞌéjna‑naó;

to̱nga lìtsà to̱ an‑jìn tìjna̱,

nga̱ jè Nꞌai i̱i tíjnakao̱‑na.

33 Kꞌoa̱asꞌìn tìfakao̱‑no jè kjoa̱ jè,

jmé‑ni nga kao̱ an sꞌe̱‑nino kjoa̱nchꞌán.

I̱ soꞌnde kjoa̱ñꞌaiìn sꞌe̱‑no;

to̱nga kàtasꞌe‑no kjoa̱nꞌiónjin,

nga̱ an jeè kisikinjen‑le̱ kjoa̱ xi tjín i̱ soꞌnde.