5 »An‑nià jè yá totseè,

kꞌoa̱ jòn‑nió jè yá‑ndsa̱;

jè xi an tíjnakao̱ ntsjaì‑na,

kꞌoa̱ an ya̱ tíjnakao̱ ntsjaì‑jiàn,

jè‑ní xi nꞌión nkjìn to ba‑le̱;

nga̱ tsà tìyotꞌaxìn‑naó lìjme xi koa̱n sꞌia̱on.

6 Jè xi tsì an tíjnakao̱ ntsjaì‑na,

kꞌoa̱asꞌìn kjin sꞌe̱tsao jo nìkao̱ jngo yántsja yá xi tsì ba‑le̱ to̱ nga titꞌa,

kꞌoa̱ xì;

kꞌoa̱ kꞌia̱ sꞌexkó,

kꞌoa̱ ya̱ sꞌetsaojin lꞌí kꞌoa̱ faꞌájnga̱.

7 »Tsà ya̱ tiyokao̱ ntsjaì‑naò kꞌoa̱ tsà tíjnajin ntsjaì‑no én‑na̱ ya̱ jin ni̱ma̱‑no,

ti̱jaó ngayije jme xi me‑no kꞌoa̱ kꞌoai̱i‑no.

8 Kꞌoa̱ koiì jè xi bitjojeya‑ni jè Nꞌai‑na̱,

nga nkjìn to kàtaba‑no,

kꞌoa̱ kꞌoa̱asꞌìn jcha̱‑nile̱ nga an chòtꞌayàtꞌa‑naó.

9 Josꞌìn nga jè Nꞌai tsjoake‑na,

kꞌoa̱ati̱sꞌìn tsjoake̱‑no an;

jè kjoa̱tsjoacha‑na̱ kàtasꞌejna‑jin ntsjaì ni̱ma̱‑no.

10 Tsà si̱kitjosòn jè kjoa̱téxoma xi an bꞌènè,

tíjnajin ntsjaí jè kjoa̱tsjoacha‑na̱ ya̱ jin ni̱ma̱‑no,

josꞌìn nga an tìsikitjosoàn jè kjoa̱téxoma xi bꞌénè Nꞌai‑na̱,

kꞌoa̱ ya̱a tíjnajin ntsjaì ya̱ jin ni̱ma̱‑na̱ kjoa̱tsjoacha‑le̱.

11 »Koiì nga kꞌoa̱tsò én xi tìfakao̱‑nino,

jmé‑ni nga jè kjoa̱tsjoa‑na̱ kꞌoéjnajin‑ni ni̱ma̱‑no,

kꞌoa̱ nga kàtamajngo kjoa̱tsjoa‑no.

12 Koiì jè kjoa̱téxoma‑na̱ xi bꞌenè‑no:

Nga kàtamatsjoacha ngañaó xìngio̱o ngantsjaì,

josꞌìn nga an tsjoake̱‑no.

13 Ni̱ꞌya‑jìn xi tjín‑le̱ kjoa̱tsjoacha xi ngìsa̱ tse,

ti̱kꞌoa̱‑ni tsà jngo xi tsjoántjaì kjoa̱bijnachon‑le̱ xi to̱ tꞌatsꞌe̱ mìyo̱‑le̱.

14 Jòn‑niò mìyo̱‑na̱,

tsà si̱kitjosòn jè xi an bꞌenè‑no.

15 Lìkoi tsà ti̱ cho̱ꞌnda xín‑nino,

nga̱ jè cho̱ꞌnda lìkoi be jme xi sꞌín jè nai‑le̱;

to̱nga mìyo̱‑na̱a xin‑no,

nga̱ ngayije kjoa̱ xi kinchrꞌoe‑le̱ Nꞌai‑na̱ koiì xi tìxinya‑no.

16 Alì tsà jòn‑jìn kichjoéjin‑naò,

to̱saà an kiskoéjin‑no,

kꞌoa̱ koiì xá tìtsjoa‑no nga tangión,

kꞌoa̱ nga nkjìn to kàtaba‑no,

kꞌoa̱ nga jè to xi koa̱‑no kàtabꞌèjna ngantsjaì;

jmé‑ni nga ngayije xi si̱jé‑lao̱o jè Nꞌai xi kao̱ nganꞌión‑le̱ jaꞌaín‑na̱,

jè kàtatsjoá‑no.

17 Koiì jè‑bi̱ xi bꞌenè‑no:

Nga kàtamatsjoacha ngañaó xìngio̱o ngantsjaì.

18 »Tsà jè chjo̱ta̱ machꞌaoke‑no,

tꞌèjin‑tokòn nga an ngìsa̱ títjòn koan‑chꞌaoke‑na ti̱kꞌoa̱‑ni jòn.

19 Tsà i̱‑làni tsao̱on i̱ soꞌnde,

jè chjo̱ta̱ xi kjoa̱soꞌnde tjiójin kꞌoa̱‑jìn sꞌìn koa̱n-tsjoake‑no josꞌìn tsjoake xínkjín;

to̱nga koiì nga lìtsà i̱ soꞌnde tsao̱on,

to̱saà an xi kiskoéjin‑no i̱ jin‑le̱ chjo̱ta̱ xi kjoa̱soꞌnde tjiójin,

koiì kjoa̱ nga chꞌaoke‑nino.

20 Ti̱kjaꞌaitsjaon jè én xi an tsakjakao̱‑no:

“Jè cho̱ꞌnda,

lìtsà ngìsa̱‑jìn ngꞌa tíjna ti̱kꞌoa̱‑ni jè nai‑le̱”.

Tsà tjiófìtje̱n‑ngike‑na chjo̱ta̱,

kꞌoa̱ati̱ koai̱tje̱n‑ngike‑no jòn;

tsà tjiósíkitjosòn én‑na̱,

kꞌoa̱ati̱ si̱ikitjosòn én‑no.

21 To̱nga to̱ tꞌatsꞌa̱an nga kꞌoa̱sikao̱o‑no chjo̱ta̱ ngayije kjoa̱ jè,

nga̱ tsì bexkon jè xi kisikasén‑na.

22 Tsà tsì‑làni jàꞌai̱‑jiàn,

kꞌoa̱ tsà tsì‑làni tsakjakoa̱ chjo̱ta̱ xo̱kjoan,

lìkoi‑la̱ tjióbe tsà jé tjiójin;

to̱nga ndꞌai̱ ni̱jme‑jìn xi koa̱n koi̱nchangi‑ni jé‑le̱.

23 Jè xi an chꞌaoke‑na,

kꞌoa̱ati̱ chꞌaoke Nꞌai‑na̱.

24 Tsà tsì‑làni ngixko̱n chjo̱ta̱ xo̱kjoan kꞌoa̱kisꞌian ngayije kjoa̱xkón xi ni̱saꞌya‑jìn xi kꞌoa̱sꞌín,

lìkoi‑jìn tjióbe tsà jé tjiójin;

to̱nga tjióbeè ngayije kjoa̱xkón xi tìsꞌian,

kꞌoa̱ to̱jo koan‑chꞌaoke‑na an kao̱ Nꞌai‑na̱.

25 To̱nga koiì nga kꞌoa̱kjima‑ni jmé‑ni nga kàtabitjosòn‑ni jè én xi tjítꞌa jè kjoa̱téxoma‑le̱ Niná xi kiski Moisés,

xi tsò:

“To̱ kjoa̱tjaó nga koan‑chꞌaoke‑na”.^a

26 »To̱nga kꞌia̱ nga kjoa̱ꞌaí jè Xi Si̱ijekon‑no,

jè xi an sikasén‑no tꞌatsꞌe̱ jè Nꞌai,

jè Sén Ni̱chrjin xi koa̱kòya‑no én xi ñaki kìxi̱,

jè xi ya̱ nchroá‑ni tꞌatsꞌe̱ jè Nꞌai,

jé xi tsjoá én‑le̱ tꞌatsꞌa̱n.

27 Kꞌoa̱ jòn,

kꞌoa̱ati̱ kꞌoa̱o én‑no xi tꞌatsꞌa̱n,

nga̱ i̱i tìyokao̱‑naó jo saꞌnda nga kiskoéjin‑no.