5 Tomás kitsò‑le̱:

—Nai,

lìkoi ꞌyai‑ji̱n jña‑ni tiꞌmi;

jókoa̱n‑ni jchai̱‑ji̱n jè ndia̱a.

6 Jesús kitsò‑le̱:

—An‑nià jè ndia̱a,

kꞌoa̱ jè én xi ñaki kìxi̱,

kꞌoa̱ jè kjoa̱bijnachon;

ni̱ to̱ꞌya‑jìn xi nchroákon‑le̱ Nꞌai tsà tsì makjaín‑le̱ tꞌatsꞌa̱n.

7 Tsà ꞌyaxkon‑naó,

kꞌoa̱ati̱ ꞌyaxkon Nꞌai‑na̱;

kꞌoa̱ bꞌétsꞌia̱‑ni ndꞌai̱ ꞌyaxkon‑nió,

kꞌoa̱ jeè tsaꞌyao.

8 Felipe kitsò‑le̱:

—Nai,

ta̱kò‑naíji̱n jè Nꞌai,

kꞌoa̱ kꞌoéjngo‑nìji̱n tokoìn‑ji̱n.

9 Jesús kitsò‑le̱:

—Felipe,

a tsí je nꞌión kjoatse nga i̱ tìjna̱kao̱‑no,

kꞌoa̱ a to̱jo kjeè ꞌyaxkon‑naí.

Jè xi je tsabe‑na kꞌoa̱ti̱ je tsabe jè Nꞌai;

án‑ni nga i̱ si‑síni:

“Ta̱kò‑naíji̱n jè Nꞌai”.

10 A tsí makjaín‑lì nga an to̱jngo‑nià kao̱ jè Nꞌai,

kꞌoa̱ jè Nꞌai to̱jngoò kao̱ an.

Jè én xi an tìfakao̱‑no,

lìtsà to̱ an‑jìn xi kꞌoa̱sꞌìn me‑na nchjà,

to̱saà jè Nꞌai xi tíjnajin ni̱ma̱‑na̱,

jé xi kꞌoa̱sꞌín ngayije xá xi sꞌian.

11 Kàtamakjaín‑no nga an to̱jngo‑nià kao̱ jè Nꞌai,

kꞌoa̱ jè Nꞌai to̱jngoò kao̱ an;

kꞌoa̱ tsà mai,

kàtamakjaín‑no tꞌatsꞌa̱n xi to̱ tꞌatsꞌe̱ kjoa̱xkón xi sꞌian.

12 Ñaki kìxi̱i xi xin‑no:

Jè xi makjaín‑le̱ tꞌatsꞌa̱n,

jè kjoa̱xkón xi sꞌian kꞌoa̱ati̱ koan‑le̱ kꞌoa̱sꞌiìn;

kꞌoa̱ saꞌnda kjoa̱ꞌatotꞌa‑le̱ xá xi tìsꞌian,

nga̱ an ya̱a tìfikon‑le̱ jè Nꞌai.

13 Kꞌoa̱ ngayije jme‑ni xi si̱jé‑lao̱o jè Nꞌai kao̱ nganꞌión‑le̱ jaꞌaín‑na̱,

kꞌoa̱asꞌian,

jmé‑ni nga jè Nꞌai koi̱tjojeya‑ni xi to̱ tꞌatsꞌe̱ ꞌNdí‑le̱.

14 Tsà jme‑ni xi si̱jaó kao̱ nganꞌión‑le̱ jaꞌaín‑na̱,

aàn kꞌoa̱sꞌian.

15 »Tsà tsjoacha‑naó,

ti̱kitjosòn jè kjoa̱téxoma xi bꞌenè‑no.

16 Kꞌoa̱ aàn kꞌoetsꞌoà‑le̱ jè Nꞌai,

kꞌoa̱ jè tsjoá ngìjngo‑no Xi Si̱ije tokòn-no,

jmé‑ni nga i̱ kꞌoéjnakao̱ ntsjaì‑nino:

17 jè Sén Ni̱chrjin Tsje xi koa̱kòya‑no én xi ñaki kìxi̱,

jè chjo̱ta̱ xi kjoa̱soꞌnde tjiójin lìkoi kjoétjaò nga̱ tsì be,

kꞌoa̱ ni̱ bexkon‑jìn;

to̱nga jòn ꞌyaxkon‑nió,

nga̱ ya̱a tìjnakao̱ ntsjaì‑no kꞌoa̱ ya̱a kꞌoéjnajin ni̱ma̱‑no.

18 »Alì tsà to̱ sikatióchꞌa̱n‑jìn‑no;

kjoàꞌai̱nchrꞌoè ngìndia‑nino.

19 To̱ choatseè sa,

kꞌoa̱ jè chjo̱ta̱ xi kjoa̱soꞌnde tjiójin lìkoi ti̱ skoe̱‑nina;

to̱nga jòn jcha̱a‑naó,

nga̱ an tìjna̱kon‑nià,

jòn kꞌoa̱ati̱ koi̱yochon.

20 Kꞌia̱ nga koi ni̱chrjin koa̱njin‑no nga an to̱jngo‑nià kao̱ jè Nꞌai,

kꞌoa̱ nga jòn to̱jngo‑niò kao̱ an,

kꞌoa̱ an to̱jngo‑nià kao̱ jòn.

21 Jè xi nchrꞌoé jè kjoa̱téxoma xi an bꞌénè,

kꞌoa̱ síkitjosòn,

jè‑ní xi tsjoake‑na;

kꞌoa̱ jè xi tsjoake‑na,

jè Nꞌai‑na̱ koa̱n-tsjoake,

kꞌoa̱ an tsjoake̱e koa̱n‑jiàn kꞌoa̱ koakosòn‑tseèn‑le̱ ꞌya‑nia an.

22 Kꞌia̱ kitsò Judas (lìtsà jè jìn xi Iscariote ꞌmì):

—Nai,

jósꞌìn tjín‑ni nga to̱ ji̱n koa̱kò sòn‑tsen‑naíji̱n yao‑li̱,

kꞌoa̱ nga jè chjo̱ta̱ xi kjoa̱soꞌnde tjiójin lìkoi koa̱kò sòn‑tsen‑lai̱ yao‑li̱.

23 Kinchja̱ Jesús kꞌoa̱ i̱ kitsò‑le̱:

—Jè xi tsjoake‑na,

si̱ikitjosòn én‑na̱;

kꞌoa̱ jè Nꞌai‑na̱ tsjoake koa̱n,

kꞌoa̱ kjoàꞌai̱chon‑lai̱ji̱n,

kꞌoa̱ ya̱a koi̱yokao̱ ntsjaì‑ji̱n.

24 Jè xi tsì tsjoake‑na lìkoi síkitjosòn én‑na̱;

kꞌoa̱ jè én xi kinòꞌyaò lìtsà tsꞌa̱n‑jiàn,

to̱saà tsꞌe̱ jè Nꞌai,

xi kisikasén‑na.

25 »Kꞌoa̱a tìxin‑no jè én jè nga i̱ sa tìjna̱kao̱‑no.

26 To̱nga jè Xi Si̱ijekon‑no,

jè Sén Ni̱chrjin Tsje,

jè xi tꞌatsꞌa̱n si̱ikasén‑no jè Nꞌai,

jé koa̱kòya‑no ngayije kjoa̱,

kꞌoa̱ si̱ikjaꞌaitsjenyà‑no ngayije jme xi kixin‑no.

27 »Jè kjoa̱nchꞌán sikꞌéjna‑no,

jè kjoa̱nchꞌán‑na̱ tsjoa‑no;

lìtsà kꞌoa̱asꞌìn tsjoa‑no josꞌìn tsjoá jè soꞌnde.

Alì nìchoajìn‑lao̱o yao‑no kꞌoa̱ ni̱ tsokjón‑jìn ni̱ma̱‑no.

28 Jeè kinòꞌyaò nga i̱ kixin‑no:

“Tìfi‑nià,

kꞌoa̱ kjoàꞌai̱koòn ngìndia‑no”.

Tsà tsjoacha‑naó,

nꞌión‑jìn kinìtsjoao,

nga̱ jeè kꞌoa̱kàxin‑no nga ya̱ tìfikon‑le̱ jè Nꞌai;

nga̱ jè Nꞌai ngìsa̱a sa ngꞌa tíjna ti̱kꞌoa̱‑ni an.

29 Kꞌoa̱ ndꞌai̱,

kꞌoa̱a tìxin‑no to̱ngi‑nile̱ nga kꞌoa̱koa̱n,

jmé‑ni kꞌia̱ nga kꞌoa̱koa̱n,

koa̱n‑kjaín‑nino.

30 »Lìkoi tsà ti̱ nkjìn én kjoakao̱‑nino;

nga̱ jeè nchroá nai̱i,

xi batéxoma i̱ soꞌnde,

kꞌoa̱ jè ni̱jme‑jìn nganꞌión tjín‑le̱ xi kao̱ an.

31 To̱nga jmé‑ni nga ngatsꞌi chjo̱ta̱ kàtabe nga tsjoake̱ jè Nꞌai,

kꞌoa̱ josꞌìn nga jè Nꞌai tsakꞌénè‑na,

koiì xi kꞌoa̱sꞌian.

»Ti̱nchando,

kꞌoa̱ tjián.