Jesús tsakanéjon ndso̱ko̱ chjo̱ta̱ xi ya̱ kòtꞌayàtꞌa‑le̱
13
Ti̱ꞌa‑nile̱ nga kje fìtsꞌia‑jìn jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,
Jesús beè nga je kichò ni̱chrjin‑le̱ nga si̱ikꞌéjna soꞌnde,
nga koai̱kon‑le̱ Nꞌai‑le̱,
josꞌìn koan‑tsjoake ngatsꞌi chjo̱ta̱ xi tsꞌe̱ xi tjió i̱ soꞌnde,
kꞌoa̱asꞌìn nꞌión koan‑tsjoake ngantsjaì kao̱ ngayije ni̱ma̱‑le̱.
2‑3 Kꞌoa̱ nga jè nai̱i je kꞌoa̱sꞌìn tsakꞌéjnajin ni̱ma̱‑le̱ Judas Iscariote,
xi ti‑le̱ Simón,
nga̱ jè kàtatsjoátꞌa Jesús,
kꞌoa̱ nga Jesús jeè be nga jè Nꞌai kisintsja ngayije jme xi tjín,
kꞌoa̱ nga tꞌatsꞌe̱ Niná jaꞌai‑ni kꞌoa̱ nga Niná tífìkon ngìndia‑nile̱,
kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ tjiókjèn sꞌoí nga njiòn
4 tsakisótje̱n‑tꞌa yámìxa̱,
kꞌoa̱ tsakjaꞌáxìn najño xi tíjnajté,
kꞌoa̱ kiskoé jngo najño xi ma nìxìjon‑ni,
tsakꞌékjá kjándiá‑le̱.
5 Xi je koan,
jngo chrjoa̱ tsakꞌéya nandá,
kꞌoa̱ tsakꞌétsꞌia̱kao̱ nga tsakanéjon ndso̱ko̱ chjo̱ta̱ xi ya̱ kòtꞌayàtꞌa‑le̱,
kꞌoa̱ kisixìjon‑ni kao̱ jè najño xi tsakꞌékjá kjándiá‑le̱.
6 Kꞌia̱ Jesús kichòkàtꞌa‑le̱ Simón Pedro jmé‑ni nga koa̱nèjon‑ni ndso̱ko̱;
kꞌoa̱ Pedro kitsò‑le̱:
—Nai,
án‑ni nga ji koa̱nèjonsí‑ni ndso̱koa.
7 Kinchja̱ Jesús kꞌoa̱ i̱ kitsò‑le̱:
—Jme xi tìsꞌian lìkoi macho̱ya‑lì ji ndꞌai̱;
to̱nga skaàn koa̱n‑cho̱ya‑nilì.
8 Pedro kitsò‑le̱:
—Ni̱kꞌia‑jìn‑là nga ji koa̱nèjoin ndso̱koa.
Jesús kitsò‑le̱:
—Tsà tsì koanèjoàn ndso̱koi,
lìkoi sꞌe̱‑lì ꞌnde xi kao̱ an.
9 Simón Pedro kitsò‑le̱:
—Nai,
lìtsà to̱jè‑jìn ndso̱koa banèjoin,
to̱saà kꞌoa̱ti̱ ta̱nèjoin ndsa̱ kao̱ jkoa.
10 Jesús kitsò‑le̱:
—Jè xi je koan‑tsje,
lìkoi ti̱ machjén‑ni nga sa̱néjon ngayije yao‑le̱,
to̱ jé sa ndso̱ko̱ xi machjén nga sa̱néjon nga̱ jeè koan‑tsje yije;
kꞌoa̱ jòn jeè koan-tsje‑jiòn,
ni̱nga tsì tsà ngatsꞌio.
11 Nga̱ jeè be ꞌyá‑ni xi tsjoátꞌa;
koiì nga kitsò‑ni:
«Lìtsà ngatsꞌi‑jiòn nga je koan-tsjao».
12 Kꞌia̱ nga je koan tsakanéjon ndso̱ko̱ chjo̱ta̱ xi ya̱ kòtꞌayàtꞌa‑le̱,
Jesús kiskoé najño xi bꞌèjnajté,
tsakꞌèjnatꞌa ngìndia yámìxa̱,
kꞌoa̱ i̱ kitsò‑le̱:
—A macho̱yaà‑no jmè xi kàsikao̱‑no.
13 Jòn kꞌoa̱a bixón nga an xi bakòya‑no kꞌoa̱ nga Nai ꞌmì‑naó;
kꞌoa̱ ndaà tjín jo bixón,
nga̱ koi‑nià.
14 Nga tsà an xi Nai ma‑jiàn kꞌoa̱ xi bakoyà,
kàbanejoàn ndso̱ko,
jòn kꞌoa̱ati̱ tjínè‑no nga koa̱nèjon ngañá‑lao̱o ndso̱ko̱ xìngio̱o.
15 Nga̱ jngoò choa̱ kàbꞌejnà‑no an,
jmé‑ni nga josꞌìn kàsikao̱‑no kꞌoa̱ti̱sꞌìn si̱kao̱‑sínio xìngio̱o.
16 Ñaki kìxi̱i xi xin‑no:
Jè cho̱ꞌnda,
lìtsà ngìsa̱‑jìn ngꞌa tíjna ti̱kꞌoa̱‑ni jè nai‑le̱,
kꞌoa̱ ni̱ jè‑jìn xi nìkasén ngìsa̱ ngꞌa tíjna ti̱kꞌoa̱‑ni jè xi síkasén.
17 Tsà ꞌyao kjoa̱ jè,
jó to̱nda‑no ya̱ ngixko̱n Niná tsà kꞌoa̱sꞌia̱on.
18 »Alì tsà ngatsꞌi‑jiòn nga kꞌoa̱tìxin‑no;
nga̱ ꞌbe‑nià jókjoan xi an kiskoéjian;
to̱nga jmé‑ni nga kꞌoa̱sꞌìn koi̱tjosòn‑ni Xo̱n Én‑le̱ Niná:
“Jè xi kjèn‑kao̱‑na nio̱xtìla̱,
ti̱ jé tsakisótje̱n‑nè‑nina”.a
19 Ndꞌai̱ kꞌoa̱atìxin‑no to̱ngi‑ni nga kje kꞌoa̱ma‑jìn,
jmé‑ni kꞌia̱ nga je kꞌoa̱koa̱n,
koa̱n‑kjaín‑sínino nga An‑nià.
20 Ñaki kìxi̱i xi xin‑no:
Jè xi kjoétjaò ꞌya‑ni xi an sikasén,
aàn xi kjoétjaò‑na;
kꞌoa̱ jè xi an kjoétjaò‑na,
jé kjoétjaò xi kisikasén‑na».
Jesús kitsòya nga Judas tsjoátꞌa
21 Kꞌia̱ nga je kꞌoa̱kitsò Jesús jè én xo̱ tsò,
aòn koan‑le̱ ni̱ma̱‑le̱,
kꞌoa̱ i̱ kitsò:
—Ñaki kìxi̱i xi xin‑no,
nga jngo jòn xi tsjoátꞌa‑na.
22 Kꞌia̱ jè chjo̱ta̱ xi ya̱ kòtꞌayàtꞌa‑le̱ kiskòtsen‑à ngañá xínkjín,
nga̱ tsì be ꞌyá‑ni xo̱ títsò‑le̱.
23 Kꞌoa̱ jngo chjo̱ta̱ xi ya̱ kòtꞌayàtꞌa‑le̱ Jesús,
jè xi nꞌión tsjoake ya̱ tíjnatꞌa‑le̱.
24 Kꞌia̱ Simón Pedro kisikꞌatji‑le̱ jko̱,
jmé‑ni nga kàtakjònangi‑sínile̱ Jesús ꞌyá‑ni xo̱ títsò‑le̱.
25 Kꞌia̱ jè,
kisichrian sa‑le̱ Jesús,
kitsò‑le̱:
—Nai,
ꞌyá‑ni xo̱ tiꞌmì‑lai̱.
26 Jesús kitsò:
—Jè xi an tsjoa‑le̱ nio̱xtìla̱ xi sikaꞌnchia̱,
jè‑ní.
Kꞌoa̱ kisikaꞌnchi̱ nio̱xtìla̱ kꞌoa̱ kitsjoa‑le̱ jè Judas Iscariote,
ti‑le̱ Simón.
27 Kꞌia̱ nga je tsakꞌéꞌa tsꞌoa nio̱xtìla̱,
jè nai̱i jaꞌasꞌenjin ni̱ma̱‑le̱ Judas Iscariote.
Kꞌia̱ Jesús kitsò‑le̱:
—Jme xi sꞌiai̱n,
ndi̱to̱n kꞌoa̱tꞌiai̱n.
28 To̱nga ni̱jngo‑jìn xi ya̱ tjiótꞌa yámìxa̱ koan‑cho̱ya‑le̱ án‑ni nga kꞌoa̱kitsò‑nile̱.
29 Nga̱ tjín kꞌa xi kꞌoa̱sꞌìn kisikꞌaitsjen nga i̱ kitsò‑nile̱ Jesús:
«Ti̱ndaí jme xi koa̱n‑chjén‑ná xi tꞌatsꞌe̱ sꞌoí»;
axo̱ «tꞌaì choa‑lai̱ tao̱n jè chjo̱ta̱ xi yo̱ma̱ sꞌìn tjió»,
nga̱ jé Judas Iscariote tíjna‑le̱ xijtsa tao̱n.
30 Kꞌia̱ nga Judas Iscariote je tsakꞌéꞌa tsꞌoa nio̱xtìla̱,
ndi̱to̱n kitjo;
kꞌoa̱ jeè njiòn.
Jè kjoa̱téxoma chjo̱tse̱ xi bꞌénè Jesús
31 Kꞌia̱ nga je kitjo Judas Iscariote,
Jesús kitsò:
—Ndꞌai̱i tíbìtjojeya jè ꞌNdí‑le̱ Chjo̱ta̱ kꞌoa̱ Niná tíbìtjojeya xi to̱ tꞌatsꞌe̱.
32 Tsà Niná tíbìtjojeya xi to̱ tꞌatsꞌe̱,
kꞌoa̱ati̱ Niná kꞌoa̱sjejeya kao̱ kjoa̱jeya xi ti̱ tsꞌe̱‑ni,
kꞌoa̱ ndi̱to̱on kꞌoa̱sjejeya.
33 »ꞌNdí xti,
to̱ ngì choatseè‑sa nga i̱ koate̱jnakao̱‑no.
Koi̱jnchísjaiì‑naó;
to̱nga jo kixin‑le̱ jè chjo̱ta̱ jchínga‑le̱ chjo̱ta̱ judío,
kꞌoa̱ati̱ xin‑no jòn ndꞌai̱:
“Jña‑ni nga an tìfia,
jòn lìkoi koa̱n koangión”.
34 Jngo kjoa̱téxoma chjo̱tse̱ bꞌenè‑no:
Nga kàtamatsjoacha ngañaó xìngio̱o;
josꞌìn nga an tsjoake̱‑no,
nga kꞌoa̱ti̱ sꞌìn kàtamatsjoacha ngañaó xìngio̱o.
35 Koiì jè xi skoe̱‑ni ngatsꞌi chjo̱ta̱ nga tꞌatsꞌa̱n tichòtꞌayaò,
tsà koa̱n-tsjoacha ngañaó xìngio̱o.
Jesús kꞌoa̱kitsò nga Pedro koi̱tso̱ nga tsì bexkon.
36 Simón Pedro kitsò‑le̱:
—Nai,
jñá‑ni tiꞌmi.
Jesús kitsò‑le̱:
—Jña‑ni nga tìfia,
lìkoi koa̱n kꞌoíntje̱n‑ngi‑naí ndꞌai̱;
to̱nga xi koa̱nskan‑ni kꞌoíntje̱ngiì‑naí.
37 Pedro kitsò‑le̱:
—Nai,
án‑ni nga tsì koa̱n‑nina kjoítje̱n‑ngi‑lè ndꞌai̱.
Tsjoantjaì‑niá kjoa̱bijnachon‑na xi to̱ tꞌatsi̱.
38 Jesús kitsò‑le̱:
—A kꞌoai̱ntjaí‑ní kjoa̱bijnachon‑li̱ xi to̱ tꞌatsꞌa̱n.
Ñaki kìxi̱i xi xin‑lè:
Lìkoi skíꞌndiá jè cháxichá,
tsà kje jàn kꞌa kꞌoa̱si‑jìn nga tsì ꞌyaxkon‑naí.