Chjo̱ta̱ tsakásjai josꞌìn nga si̱ikꞌen Jesús
14
Kꞌia̱ nga ngìjaò ni̱chrjin cha sa‑le̱ nga koe̱etsꞌia̱ jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,a
kꞌoa̱ kao̱ sꞌoí xi tsꞌe̱ nio̱xtìla̱ xi tsìn‑le̱ na̱ꞌyo̱san;
kꞌoa̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés tsakásjai jmé kjoa̱chꞌàna̱cha̱ xi si̱ichjén nga jtsoa̱ kꞌoa̱ nga si̱ikꞌen Jesús.
2 Kꞌoa̱ tjiótsò:
«Lìkoi tsà kꞌia̱ nga sꞌe̱jna sꞌoí koi̱ndoa̱a,
jmé‑ni nga tsì kjoa̱si sꞌe̱‑síni i̱ na̱xi̱nandá».
Kꞌia̱ nga sìti̱ chjí xi na̱ská na̱nje̱n tsakꞌéjtenjòn jko̱ Jesús jngo chjo̱on
3 To̱nga kꞌia̱ nga Jesús tíjna ya̱ na̱xi̱nandá‑ꞌndí Betania ya̱ ndꞌia‑le̱ Simón xi jtsé biꞌndojon kisꞌe‑le̱ yao‑le̱,
kꞌia̱ nga Jesús tíjnatꞌa yámìxa̱,
jaꞌainchrꞌoè jngo chjo̱on xi yꞌa jngo lamìta̱ xi la̱jao̱ koan‑nda‑ni xi tjiá‑le̱ sìti̱ chjí xi na̱ská na̱nje̱n xi ñaki naxó-le̱ nardo kisꞌenda-ni;
kꞌoa̱ tsakakjánjkò lamìta̱,
tsakꞌéjtenjòn jko̱ Jesús.
4 To̱nga tjín kꞌà xi koanjti‑le̱,
kꞌoa̱ kitsò:
—Án‑ni nga to̱ kꞌoa̱sꞌìn tíbitson‑ni jè sìti̱ xi na̱ská na̱nje̱n.
5 Nga̱ kàmaà nga kàsaténa tsàkai,
tsꞌato‑jìn jàn ciento̱ ni̱chrjin chjí‑le̱ cho̱ꞌnda tjín‑ni,
kꞌoa̱ jè tao̱n‑le̱ kàmaà nga jè kàbꞌaì‑le̱ chjo̱ta̱ xi yo̱ma̱ sꞌìn tjió.
Kꞌoa̱ chꞌaosꞌìn kisikꞌaxki̱ jè chjo̱on.
6 To̱nga Jesús kitsò:
—Alì kꞌoa̱‑jìn ꞌmì‑lao̱o,
án‑ni nga jè nìsi‑nilao̱o.
Nga̱ nꞌión na̱skà‑tjín jme xi kásꞌín tꞌatsꞌa̱n.
7 Nga̱ sꞌe̱ ntsjaí chjo̱ta̱ xi yo̱ma̱ sꞌìn tjió,b
kꞌoa̱ to̱kꞌia‑ni nga koa̱nme‑no koa̱an nda si̱kao̱o;
to̱nga an lìkoi tsà i̱ koàte̱jnakao̱ ntsjaì‑no.
8 Jè chjo̱on kꞌoa̱a kàsꞌín jña tje̱n kàfichó nganꞌión‑le̱;
nga̱ to̱ngì‑ni katsjòjon yao‑na̱ sìti̱ xi na̱ská na̱nje̱n xi tꞌatsꞌe̱ kꞌia̱ nga sꞌe̱jnaya yao‑na̱ ya̱ ngijao jña sꞌeyoyà kꞌen.
9 Ñaki kìxi̱i xi xin‑no,
to̱jña‑ni nga koi̱nókjoa̱ya én nda xo̱kji‑bi̱,
ngakijndà soꞌnde,
kꞌoa̱ati̱ kꞌoa̱xki jme xi kàsꞌín chjo̱on xo̱kji, jmé‑ni nga kjoa̱ꞌaítsjenyà‑ni tꞌatsꞌe̱.
Judas kitsjoatꞌa Jesús
10 Kꞌia̱ Judas Iscariote,
jngo chjo̱ta̱‑le̱ xi tejaò xi xá kiskoéjin‑ni Jesús,
kikon‑le̱ na̱ꞌmi xi tjió títjòn‑le̱ na̱ꞌmi,
jmé‑ni nga tsjoátꞌa‑nile̱ Jesús.
11 Kꞌia̱ nga jè kinchrꞌoé,
koan‑tsjoa‑le̱,
kꞌoa̱ kitsjoa én‑le̱ nga tsjoá‑le̱ tao̱n.
Kꞌoa̱ kꞌia̱ Judas tsakásjai jósꞌìn nga tsjoátꞌa Jesús.
Jesús tsakjèn sꞌoí kao̱ chjo̱ta̱ xi tejaò
12 Ni̱chrjin xi títjòn‑le̱ sꞌoí nga bichi nio̱xtìla̱ xi tsìn‑le̱ na̱ꞌyo̱san,
kꞌia̱ nga nìkꞌen barrè xi tꞌatsꞌe̱ sꞌoí nga tsì tsꞌakao̱‑le̱ kjoa̱biya chjo̱ta̱ judío,
jè chjo̱ta̱ xi ya̱ kòtꞌayàtꞌa‑le̱ Jesús kitsò‑le̱:
—Jñá‑ni me‑lì nga koangín kꞌèndai‑ji̱n xi koi̱chi‑niá nga sꞌe̱jna sꞌoí.
13 Kꞌoa̱ kisikasén jaò chjo̱ta̱ xi ya̱ kòtꞌayàtꞌa‑le̱,
kꞌoa̱ i̱ kitsò‑le̱:
—Tangión ya̱ na̱xi̱nandá‑nꞌión Jerusalén,
kꞌoa̱ ya̱ sa̱téjion jngo chjo̱ta̱ xi jngo nisa nandá yꞌa;
tangítje̱n‑ngilao̱o,
14 kꞌoa̱ ya̱ jña kjoa̱ꞌasꞌen,
kꞌoa̱tꞌìn‑lao̱o jè xi tsꞌe̱ ndꞌia:
“Jè xi bakóya i̱i títsò:
Jñá tíjna jè ꞌnde jña nga koakje̱n sꞌoí‑jiàn kao̱ chjo̱ta̱‑na̱ xi kòtꞌayàtꞌa‑na, xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío”.
15 Kꞌoa̱ jè koa̱kò jngo‑no ndꞌia xi tíjnasòn‑ngꞌa xi nꞌión teyà xi to̱ je tíjnanda;
ya̱ tꞌèndao jme xi koi̱chi‑niá.
16 Ki chjo̱ta̱ xi jaò xi ya̱ kòtꞌayàtꞌa‑le̱ kꞌoa̱ kichò ya̱ na̱xi̱nandá‑nꞌión,
kꞌoa̱asꞌìn koansjai‑le̱ josꞌìn nga kitsò‑le̱ Jesús;
kꞌoa̱ tsakatiónda xi koakje̱n sꞌoí‑ni,
xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.
17 Kꞌia̱ nga je koan‑njiòn,
jaꞌai Jesús kao̱ chjo̱ta̱‑le̱ xi tejaò xi xá kiskoéjin‑ni, ya̱ ndꞌia jña je tíjnanda‑le̱.
18 Kꞌia̱ nga tsakatiòtꞌa yámìxa̱,
nga je tjiókjèn,
Jesús kitsò:
—Ñaki kìxi̱i xi xin‑no nga jngo xi tijòn‑nio,
xi i̱ tíkjèn‑kao̱‑na xi tsjoátꞌa‑na.
19 Kꞌia̱ koanba‑le̱ ngatsꞌi,
kꞌoa̱ i̱ kitsò‑le̱ nga jngó jngó:
—A an‑nià.
Kꞌoa̱ jè xi ngìkꞌa kitsò:
—Axo̱ an‑nià.
20 Jesús kinchja̱,
kitsò‑le̱:
—Jngo jòn xi tejaò xi xá kiskoéjin‑nino, jè xi i̱ títsjòngindákao̱‑na nio̱xtìla̱ i̱ ya̱ chroa̱ xi tìbichiyaà.
21 Xi kjoa̱kìxi̱ jè ꞌNdí‑le̱ Chjo̱ta̱ koi̱yá‑ní,
josꞌìn nga tjítꞌa xi tꞌatsꞌe̱ ya̱ xo̱n‑le̱ Niná,c
to̱nga, ¡Ma̱xó‑nile̱ yao‑le̱ jè chjo̱ta̱ xi tsjoátꞌa jè ꞌNdí‑le̱ Chjo̱ta̱! To̱ ngìsa̱a nda‑nile̱ tsà tsì kitsin jè chjo̱ta̱ xo̱kji.
22 Kꞌia̱ nga tjiókjèn,
Jesús kiskoé nio̱xtìla̱ kꞌoa̱ kisichikon‑tꞌain,
kꞌoa̱ kisixkoa̱ kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱,
kitsò:
—Chjoaó,
yao‑naà jè‑bi̱.
23 Kꞌoa̱ kiskoé cho̱tsín,
kꞌia̱ nga je kitsjoa kjoa̱nda,
kitsjoa‑le̱ chjo̱ta̱ xi ya̱ kòtꞌayàtꞌa‑le̱;
kꞌoa̱ tsakꞌi ngatsꞌi.
24 Kꞌoa̱ i̱ kitsò‑le̱:
—Koiì jè‑bi̱ njín‑na̱d xi xíjten nga kꞌoe̱enꞌión kjoa̱ chjo̱tse̱,e
xi xíjten tꞌatsꞌe̱ nkjìn chjo̱ta̱.
25 Ñaki kìxi̱i xi xin‑no nga lìkoi ti̱ skꞌoi̱‑nia xi totseè nchroá‑ni, saꞌnda koi ni̱chrjin nga skꞌoia̱ xi chjo̱tse̱ ya̱ jña batéxoma Niná.
Jesús kꞌoa̱kitsò nga Pedro kꞌoa̱koi̱tso̱ nga tsì bexkon
—Ngatsꞌio koi̱njión‑tokòn‑naó koi ni̱tje̱n xo̱kji;
nga̱ kꞌoa̱asꞌìn tjítꞌa xo̱n‑le̱ Niná:
“Sikìꞌoan jè chjo̱ta̱ xi koꞌnda barrè,
Kꞌoa̱ jè barrè jtsao̱ba”.f
28 To̱nga xi koa̱nskan‑ni nga je kjoa̱ꞌáya‑na,
kjoí títjòn‑no ya̱ ꞌnde Galilea.
29 Kꞌia̱ Pedro kitsò‑le̱ Jesús:
—Nda tsà ngatsꞌi tsjión‑kon‑lì,
xi an mai.
30 Kꞌoa̱ Jesús kitsò‑le̱:
—Ñaki kìxi̱i xi xin‑lè ji,
ndꞌai̱, koi ni̱tje̱n xo̱kji, to̱ngi‑ni nga kje jaò kꞌa kjiꞌndiá cháxichá, jàn kꞌa kꞌoa̱sí nga tsì ꞌyaxkon‑naí.
31 To̱nga jè,
ngìsa̱a sa nꞌión tse kꞌoa̱kitsò:
—Tsà machjén nga ya̱ koi̱yákao̱‑lè,
ni̱kꞌiajìn‑là kꞌoa̱xián nga tsì ꞌbexkon‑lè.
Kꞌoa̱ti̱ ngósòn kitsò ngatsꞌi.
Jesús tsakjákao̱ Niná ya̱ nindo Getsemaní
32 Kꞌia̱ nga jaꞌai,
ya̱ ꞌnde jña Getsemaní ꞌmì,
Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:
—Ti̱yo‑laoò i̱‑bi̱, kꞌoa̱ an Niná tìfikjakoa̱.
33 Kꞌoa̱ kikao̱ Pedro,
Jacobo,
kao̱ Juan,
kꞌoa̱ tsakꞌétsꞌia̱ nga nꞌión koanba‑le̱ Jesús,
kꞌoa̱ nꞌión kitsokjòn ya̱ jin ni̱ma̱‑le̱.
34 Kꞌoa̱ kitsò‑le̱:
—Nꞌión ba‑le̱ ni̱ma̱‑na̱,
jo xi jeè koi̱yá ma‑na;
ti̱yo i̱ kꞌoa̱ ti̱yochon.
35 Ki bꞌàkjá choa,
tsakajnajten‑tꞌa nangi,
kꞌoa̱ tsakjákao̱ Niná tsà koa̱n‑ni nga kàtatjòxìn‑le̱ kjoa̱ñꞌain.
36 Kꞌoa̱ tsakꞌétsꞌia̱kao̱ nga i̱ kitsò:
«Abba Nꞌai,
ji ma‑lì ngayije kjoa̱;
chja̱ꞌàxìn‑naí jè cho̱tsín kjoa̱ñꞌain xo̱kji;
to̱nga lìtsà koi kꞌoa̱ kàtama josꞌìn nga an me‑na,
koiì xi kꞌoa̱ kàtama josꞌìn nga ji me‑lì».
37 Xi je koan,
jaꞌai jña‑ni tjió chjo̱ta̱ xi jàn xi ya̱ kòtꞌayàtꞌa‑le̱ tsabe nga kjiofè;
kꞌia̱ kitsò‑le̱ Pedro:
—Simón,
a tisojnafè‑ní.
A tsí kàma kàbijnachon jngo hora‑jìn.
38 Ti̱yochon kꞌoa̱ ti̱nókjoa̱kao̱o Niná,
jmé‑ni nga tsì jè kjoa̱ xi skótꞌayàkao̱‑no si̱ikinjen‑nino,
jè sén ni̱chrjin‑ná tíjnanda‑ní,
to̱nga jè yao tsìn‑le̱ nganꞌión.
39 Ngìjngokꞌà ki kꞌoa̱ tsakjákao̱ Niná,
kꞌoa̱ to̱ jo ti̱koi én kinchja̱ ngá‑ni.
40 Kꞌia̱ nga jaꞌai,
ngìjngokꞌà koansjai‑le̱ nga ti̱ kjiofè ngá‑ni,
nga̱ ñaki tjióngi‑nꞌión nijñá xko̱n;
kꞌoa̱ lìkoi be jmè xi koi̱tso̱‑le̱.
41 Jesús jaꞌai xi koan‑ni jàn‑kꞌa,
kꞌoa̱ kitsò‑le̱:
—Jeè koa̱n sòyofaò,
ti̱kjáyao.
To̱ koa̱n‑nino,
jeè kichó choa̱‑le̱; chótsaon nga jè ꞌNdí‑le̱ Chjo̱ta̱ ya̱ koa̱ntsja chjo̱ta̱jé.
42 Ti̱sótjao̱on,
tjián;
chótsaon jeè nchroáchrian jè xi an tsjoátꞌa‑na.
Kꞌia̱ nga kindoa Jesús
43 Ti̱kꞌia̱‑ni nga tínchja̱ Jesús jaꞌai Judas,
jngo xi tejaò xi xá kiskoéjin‑ni Jesús,
kꞌoa̱ nkjìn chjo̱ta̱ tje̱n‑kao̱ xi yꞌa ki̱cha̱ndo kao̱ yá,
xi jaꞌai‑ni tꞌatsꞌe̱ na̱ꞌmi xi tjió títjòn‑le̱ na̱ꞌmi,
kao̱ tꞌatsꞌe̱ chjo̱ta̱ xi kji kjoa̱téxoma‑le̱ Niná xi kiski Moisés,
kao̱ tꞌatsꞌe̱ chjo̱ta̱ jchínga.
44 Kꞌoa̱ Judas jè xi kitsjoatꞌa,
ti̱ngi‑ni kitsjoa‑le̱ choa̱ jè chjo̱ta̱,
kitsò‑le̱:
«Jè xi an kꞌoetꞌatsꞌoà,
jè‑ní;
nda tꞌètꞌanꞌión kꞌoa̱ nꞌión nda ti̱koìndao̱o».
45 Kꞌia̱ nga jaꞌai‑nchrꞌoè jè xi kitsjoatꞌa,
tsakasèn‑tꞌachrian‑le̱,
kꞌoa̱ kitsò‑le̱:
—Ji xi bakòyai.
Kꞌoa̱ tsakꞌétꞌatsꞌoà.
46 Kꞌia̱ jè chjo̱ta̱ kitsoa kꞌoa̱ tsakꞌétꞌanꞌión.
47 To̱nga jngo xi ya̱ tíjna,
tsakꞌasje ki̱cha̱ndo,
kisikìꞌaon jè cho̱ꞌnda‑le̱ na̱ꞌmi títjòn,
tsakatetꞌa chrjoa̱ño.
48 Kꞌia̱ kinchja̱ Jesús,
kitsò‑le̱:
—Án‑ni nga jo xi chjo̱ta̱ xi kjoa̱si bꞌéntjè kàfàꞌai̱chꞌaò kjoan‑sínio,
nga kao̱ ki̱cha̱ndo kao̱ yá kàfàꞌai̱ndoa‑ninaó.
49 Ni̱chrjin nga nchaon ya̱ tsakàte̱jnakao̱‑no nga tsakakoyà ya̱ nditsin‑le̱ yo̱ngo̱,
kꞌoa̱ lìkoi kindoa‑naó;
to̱nga koiì kꞌoa̱ kjima‑ni, jmé‑ni nga kàtabitjosòn‑ni jotsò jè Xo̱n Én‑le̱ Niná.
50 Kꞌia̱ ngatsꞌi chjo̱ta̱ xi ya̱ kòtꞌayàtꞌa‑le̱,
tsakanga‑le̱, kitsjion‑kon.
51 To̱nga jngo chjo̱ta̱ xi sꞌa̱ xti tje̱n‑ngi‑le̱ Jesús,
xi to̱jngo najño‑te tíjnajté;
kꞌoa̱ jè chjo̱ta̱ kitsoa;
52 to̱nga jè,
kisikꞌéjna najño‑te xi tíjnajté, to̱ kijnajtì nga kitòka.
Kꞌia̱ nga Jesús tsangìkao̱ ya̱ ngixko̱n jtín xi kjinèntsja kjoa̱téxoma
53 Jè chjo̱ta̱ xi kitsoa Jesús ya̱ jaꞌaikao̱tꞌa‑le̱ na̱ꞌmi títjòn;
kꞌoa̱ koanña ngatsꞌi na̱ꞌmi xi tjió títjòn‑le̱ na̱ꞌmi,
kao̱ chjo̱ta̱ jchínga,
kꞌoa̱ kao̱ chjo̱ta̱ xi kji kjoa̱téxoma‑le̱ Niná xi kiski Moisés.
54 Kꞌoa̱ Pedro to̱ kjiìn kitje̱n‑ngi‑nile̱ saꞌnda ya̱ nditsin‑le̱ ndꞌia‑le̱ na̱ꞌmi títjòn;
kꞌoa̱ ya̱ tsakꞌèjnakao̱ jè chjo̱ta̱ xi síkoìnda̱ yo̱ngo̱,
kisiso‑le̱ yao‑le̱ kao̱ lꞌí xi ya̱ tjítse.
55 Kꞌoa̱ jè na̱ꞌmi xi tjió títjòn‑le̱ na̱ꞌmi kao̱ jè jtín xi kjinèntsja kjoa̱téxoma‑le̱ chjo̱ta̱ judío tsakásjai jmé én xi koa̱anè Jesús,
jmé‑ni nga koa̱n si̱ikꞌen‑ni;
to̱nga lìkoi koansjai‑le̱.
56 Nga̱ nkjìn chjo̱ta̱ xi én xi tsì kꞌoa̱tjín tsakánè Jesús,
to̱nga jè én‑le̱ lìkoi koan‑ngósòn.
57 Kꞌoa̱ kꞌia̱ tsakinchando kꞌa,
tsakánè Jesús én xi tsì kꞌoa̱tjín,
kitsò:
58 —Ji̱in kinòꞌyà‑lai̱ji̱n nga kitsò:
“Aàn sikixòya jè yo̱ngo̱ xo̱kji xi ntsja chjo̱ta̱ koan‑nda‑ni,
kꞌoa̱ to̱ jàn ni̱chrjin kꞌoendà ngìjngo‑nia xi tsì ntsja chjo̱ta̱ sꞌe̱nda‑ni”.
59 To̱nga ni̱ kꞌoa̱‑jìn sꞌìn koan‑ngósòn én‑le̱.
60 Kꞌia̱ jè na̱ꞌmi títjòn,
tsakasènjnajin basen‑le̱ chjo̱ta̱,
kiskònangi‑le̱ Jesús,
kitsò:
—A tsí jme én xi nòkjoai̱. Jmé én xo̱ tsò tjióbánè‑lì chjo̱ta̱.
61 To̱nga jè to̱ jyó tsakꞌèjna,
kꞌoa̱ ni̱jme‑jìn xi kitsò.
Jè na̱ꞌmi títjòn ngìndia kiskònangi‑le̱,
kꞌoa̱ kitsò‑le̱:
—A ji‑nì ꞌNdí‑le̱ Jè xi Nꞌión Xkón Tíjna, xi Jè Si̱ikasén.
62 Kꞌoa̱ Jesús kitsò‑le̱:
—Jaon An‑nià;
kꞌoa̱ jcha̱‑nió jè ꞌNdí‑le̱ Chjo̱ta̱ nga ya̱ kꞌoéjna ya̱ ngakìxi̱‑le̱ Jè Xi Nꞌión Tse Nganꞌión Tjín‑le̱ kꞌoa̱ nga kjoa̱ꞌaí jin yojbi ya̱ ngꞌajmi.g
63 Kꞌia̱ jè na̱ꞌmi títjòn tsakasén‑jnda najño‑le̱,
kitsò:
—Jósa sꞌìn koa̱n‑chjén‑ná chjo̱ta̱ xi én‑le̱ tsjoá.
64 Jeè kànòꞌyaò nga kànchja̱ꞌaon‑le̱ Jè Xi Nꞌión ꞌYaxkón;
jó bixón jòn.
Kꞌia̱ ngatsꞌi kisingósòn én‑le̱ nga kàtabꞌaì‑le̱ kjoa̱ñꞌain,
kꞌoa̱kitsò nga kjoa̱biya bakìn‑le̱.h
65 Kꞌoa̱ tjín kꞌa xi tsakꞌétsꞌia̱kao̱ nga tsakꞌéchrájon,
kꞌoa̱ tsakꞌéꞌma nkjaín,
tsakꞌaon‑a xo̱ngo̱,
kꞌoa̱ kitsò‑le̱:
—Tsà kjoa̱kìxi̱ nga Niná nòkjoa̱ya ngajao‑lai̱,
kꞌoa̱‑là si, ꞌyá‑ni xi kàbꞌé‑lì.
Kꞌoa̱ jè chjo̱ta̱ xi síkoìnda̱ yo̱ngo̱ kꞌoa̱ti̱ tsakꞌé‑le̱.
Pedro kꞌoa̱kitsò nga tsì bexkon Jesús
66 Kꞌia̱ nga Pedro tíjna ya̱ nangi‑ni,
ya̱ nditsin, jaꞌai jngo chjo̱on cho̱ꞌnda‑le̱ na̱ꞌmi títjòn;
67 kꞌia̱nga tsabe nga Pedro tísíso‑le̱ yao‑le̱,
kiskòtsen‑à kitsò‑le̱:
—Ji kꞌoa̱ati̱ ya̱ tsakitòmjen‑koai̱ Jesús xi Nazaret tsꞌe̱.
68 To̱nga jè Pedro kꞌoa̱kitsò nga tsì bexkon,
kitsò:
—Lìkoi ꞌbexkoan,
kꞌoa̱ lìkoi be jmé xo̱ tiꞌmì‑lai̱.
Kꞌoa̱ kitjo saꞌnda jchro xo̱ntjoa̱;
kꞌoa̱ kiskiꞌndiá cháxichá.
69 Kꞌoa̱ jè chjo̱on cho̱ꞌnda tsabe ngá‑ni,
tsakꞌétsꞌia̱kao̱ nga kꞌoa̱kitsò‑le̱ jè chjo̱ta̱ xi ya̱ tjió:
—Jè chjo̱ta̱ xo̱kji kꞌoa̱ati̱ chjo̱ta̱‑le̱ ma.
70 To̱nga jè Pedro kꞌoa̱kitsò nga tsì bexkon Jesús.
Xi koan jngotjò‑ni,
jè chjo̱ta̱ xi ya̱ tjió kitsò ngìjngokꞌà‑le̱ Pedro:
—Ñaki kìxi̱ nga chjo̱ta̱‑le̱ ma‑jìn,
nga̱ ꞌnde Galilea tsi̱, nga kꞌoa̱ati̱sꞌìn nòkjoai̱ josꞌìn nchja̱ jè.
71 Kꞌia̱ Pedro tsakꞌétsꞌia̱kao̱ nga kisijé‑nè kjoa̱ñꞌain chjo̱ta̱ xo̱kji ngixko̱n Niná,
kꞌoa̱ Niná tsakasèn‑nꞌión‑ni nga kitsjoa én‑le̱,
kitsò:
—Lìkoi ꞌbexkoan jè chjo̱ta̱ xo̱ tiꞌmì‑lao̱o.
72 Kꞌoa̱ jè cháxichá kiskiꞌndiá xi ma‑ni jaòkꞌa.
Kꞌia̱ Pedro jaꞌaitsjen‑le̱ jè én xi Jesús kitsò‑le̱:
«To̱ngi‑ni nga kje jaòkꞌa kjiꞌndiá cháxichá,
jàn‑kꞌa kꞌoa̱ꞌsí nga tsì ꞌyaxkon‑naí».
Kꞌia̱ nga tísíkꞌaitsjen én xo̱ tsò, tíkjiꞌndiá.