3 Kꞌoa̱ jè nai̱i jaꞌasꞌenjin ni̱ma̱‑le̱ Judas,

jè xi Iscariote ꞌmì kao̱‑ni,

jngo xi ya̱ maxki̱kao̱ chjo̱ta̱ xi tejaò xi xá kiskoéjin‑ni Jesús;

4 kꞌoa̱ jè Judas Iscariote ki kꞌoa̱ tsakjákao̱ jè na̱ꞌmi xi tjió títjòn‑le̱ na̱ꞌmi,

kao̱ chjo̱ta̱ xi tjió títjòn‑le̱ chjo̱ta̱ xi síkoìnda̱ yo̱ngo̱,

kꞌoa̱ tsakjákao̱ josꞌìn nga koa̱n tsjoátꞌa Jesús.

5 Jè chjo̱ta̱ xo̱kjoan koan‑tsjoa‑le̱ kꞌoa̱ tsakꞌéndaya‑ni nga tao̱n tsjoá‑le̱.

6 Kꞌoa̱ jè Judas Iscariote kitsjoa én‑le̱,

kꞌoa̱ tsakásjai jósꞌìn nga tsjoátꞌa Jesús nga tsì jè chjo̱ta̱‑nkjìn kàtasꞌejin‑le̱.

7 Kichò ni̱chrjin‑le̱ sꞌoí kꞌia̱ nga bichi nio̱xtìla̱ xi tsìn‑le̱ na̱ꞌyo̱san,

nga koi ni̱chrjin tjínè‑le̱ nga nìkꞌen barrè xi tꞌatsꞌe̱ jè sꞌoí nga tsì tsꞌakao̱‑le̱ kjoa̱biya chjo̱ta̱ judío.

8 Kꞌoa̱ Jesús kisikasén Pedro kao̱ Juan,

kitsò‑le̱:

—Tangión,

tꞌèndao jme xi koi̱chaà xi tꞌatsꞌe̱ sꞌoí nga tsì tsꞌakao̱‑le̱ kjoa̱biya chjo̱ta̱ judío.

9 Kꞌia̱ Pedro kao̱ Juan kitsò‑le̱:

—Jñá‑ni me‑lì nga kꞌoéndai‑ji̱n.

10 Jesús kitsò‑le̱:

—A ꞌya‑ñò,

kꞌia̱ nga koi̱tjásꞌao̱on ya̱ na̱xi̱nandá‑nꞌión Jerusalén,

jngo chjo̱ta̱ sa̱téjion xi jngo nisa nandá yꞌa;

tangítje̱n‑ngilao̱o saꞌnda ya̱ ndꞌia jña kjoa̱ꞌasꞌen,

11 kꞌoa̱tꞌìn‑lao̱o jè xi tsꞌe̱ ndꞌia:

“Jè xi Bakóya i̱i tsò‑lì:

‹Jñá tíjna jè ꞌnde jña nga koakje̱n sꞌoí‑jiàn kao̱ chjo̱ta̱‑na̱ xi kòtꞌayàtꞌa‑na,

xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío›”.

12 Kꞌia̱ jè koa̱kò jngo‑no ndꞌia xi tíjna sòn‑ngꞌa,

xi nꞌión teyà xi to̱ je tíjnanda;

ya̱ tꞌèndao xi koi̱chi‑nià.

13 Kꞌia̱ ki,

kꞌoa̱sꞌìn koansjai‑le̱ josꞌìn nga kitsò‑le̱ Jesús;

kꞌoa̱ tsakatiónda ngayije xi koa̱chjén‑le̱ nga koa̱kje̱n tꞌatsꞌe̱ sꞌoí nga tsì tsꞌakao̱‑le̱ kjoa̱biya chjo̱ta̱ judío.

14 Kꞌia̱ nga je kichò choa̱‑le̱ jochon koa̱kje̱n,

jaꞌai Jesús kꞌoa̱ tsakꞌèjnatꞌa yámìxa̱,

kao̱ chjo̱ta̱ xi xá kisikasén‑ni.

15 Kꞌoa̱ kitsò‑le̱:

—¡Nꞌión tìkoya‑le̱ nga koàkje̱n‑kao̱‑no tꞌatsꞌe̱ jè sꞌoí nga tsì tsꞌakao̱‑le̱ kjoa̱biya chjo̱ta̱ judío,

ti̱ngini‑le̱ nga kꞌoai̱‑na kjoa̱ñꞌain!

16 Nga̱ kꞌoa̱axin‑no nga tsì ti̱ koàkje̱n‑nia tꞌatsꞌe̱ sꞌoí jè,

jo saꞌnda nga koi̱tjosòn ya̱ jña batéxoma Niná,

jò kjoàn sꞌìn tjín‑ni.

17 Kꞌoa̱ kꞌia̱ nga Jesús je kiskoé cho̱tsín,

kitsjoa‑le̱ kjoa̱nda Niná,

kꞌoa̱ kitsò:

—Chjoaó jè‑bi̱,

kꞌoa̱ ti̱kꞌabí‑lao̱o xìngio̱o;

18 nga̱ kꞌoa̱axin‑no nga tsì ti̱ skꞌoi̱‑nia xi totseè nchroá‑ni,

saꞌnda kꞌia̱ nga kjoa̱ꞌaí jña batéxoma Niná.

19 Kꞌoa̱ kiskoé nio̱xtìla̱ kꞌoa̱ kitsjoa‑le̱ kjoa̱nda Niná,

kisixkoa̱ kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱,

kitsò:

—Koiì jè yao‑na̱,

xi tsjoa tꞌatsao̱on;

kꞌoa̱tꞌia̱on jè‑bi̱ nga si̱ikjaꞌaìtsjenyaò xi tꞌatsꞌa̱n.

20 Kꞌoa̱ati̱ sꞌìn kisꞌin kꞌia̱ nga je tsakjèn,

kiskoé jè cho̱tsín,

kitsò:

—Jè xi tjiá cho̱tsín,

jngoya‑le̱e jè njín‑na̱ xi to̱ tꞌatsao̱on xíjten,^b

kꞌoa̱ koiì xi bꞌénꞌión jngo kjoa̱chjo̱tse̱.^c

21 To̱nga koe̱e‑ni,

jè xi tsjoátꞌa‑na i̱i tíjnatꞌakao̱‑na yámìxa̱.

22 Xi ñaki kjoa̱kìxi̱ jè ꞌNdí‑le̱ Chjo̱ta̱ ni̱kꞌen‑ní,

josꞌìn nga ti̱ngi‑ni kisꞌenda;^d

to̱nga ¡ma̱xó‑nile̱ yao‑le̱ jè chjo̱ta̱ xi tsjoátꞌa!

23 Kꞌia̱ jè chjo̱ta̱‑le̱ xi tejaò xi xá kiskoéjin‑ni Jesús tsakꞌétsꞌia̱kao̱ nga tsakjaótiya‑ni,

ꞌyá‑ni xi tejaò xi tsjoátꞌa.

24 Kꞌia̱ jè chjo̱ta̱ xi tejaò xi Jesús xá tsakjaꞌájin‑ni,

koa̱ati̱ sꞌìn tsakjaótiya‑ni jókji xi tejaò xi koa̱se̱njna títjòn.

25 To̱nga Jesús kitsò‑le̱:

«Jè chjo̱ta̱xá ngajko̱‑le̱ na̱xi̱nandá‑yꞌai kꞌoa̱asꞌìn batéxoma josꞌìn nga jè me‑le̱,

kꞌoa̱ jè xi batéxoma‑le̱ na̱xi̱nandá‑yꞌai,

ndaà tjiósꞌín tsò‑le̱ yao‑le̱;

26 to̱nga jòn lì kꞌoa̱‑jìn nꞌiaòn,

jè xi kꞌoéjna títjòn‑no kꞌoa̱sꞌìn kàtabꞌèjna joni tsà jè xi fetꞌa‑ni,

kꞌoa̱ jè xi koa̱se̱n títjòn‑no joni tsà jè xi cho̱ꞌnda‑no kàtama.

27 Nga̱,

jókji xi tíjna títjòn,

a jé xi bꞌèjnatꞌa yámìxa̱,

axo̱ jè xi batió chroa̱ ya̱ sòn yámìxa̱.

A tsí tsà jè xi bꞌèjnatꞌa yámìxa̱.

To̱nga an kꞌoa̱asꞌìn tìjna̱kao̱‑no joni tsà jè xi batió chroa̱ ya̱ sòn yámìxa̱.

28 »To̱nga jòn‑niò xi i̱ tiyokao̱ntsjaì‑naó kꞌia̱ nga tífaꞌainè‑na kjoa̱ñꞌain.

29 An tsjoa‑noni,

jngo ꞌnde jña koa̱tèxomao,

josꞌìn nga an kitsjoa‑na Nꞌai‑na̱,

30 jmé‑ni nga ya̱ koi̱chi‑nio kꞌoa̱ sꞌio̱‑nio ya̱ tꞌa yámìxa̱‑na̱,

ya̱ jña an batèxoma,

kꞌoa̱ ya̱ koi̱yosòn yáxìle̱ nga kꞌoai̱‑no nganꞌión nga koa̱tèxoma‑lao̱o jè xi tejaò ntje̱‑le̱ na̱xi̱nandá Israel».

31 Kꞌoa̱ kitsò sa jè Nai‑ná:

—Simón,

Simón,

koe̱e‑ni jè nai̱i kisíjékjoa̱ nga kꞌoe̱tsaojneyà‑no jo nìkao̱ trigo nga nìtsje;

32 to̱nga an jeè tìbꞌetsꞌoàntjaì‑lè nga tsì kàtacha kjoa̱makjaín‑li̱;

kꞌoa̱ ji,

kꞌia̱ nga si̱kꞌófayatꞌa‑ninaí,

tꞌaì nganꞌión‑lai̱ jè ndsꞌai».

33 Pedro kitsò‑le̱:

—Nai,

nì tsà to̱koi‑jìn tìjna̱nda‑le̱ nga kjoíkao̱‑lè ni̱nga ndo̱yá kꞌoín,

kꞌoa̱ati̱ tìjna̱nda ni̱nga ya̱ koi̱yá‑kao̱‑lè.

34 Kꞌia̱ Jesús kitsò‑le̱:

—Pedro,

kꞌoa̱axin‑lè nga jè cháxichá lìkoi skíꞌndiá ndꞌai̱ tsà kje jàn‑kꞌa kꞌoa̱si‑jìn nga tsì ꞌyaxkon‑naí.

35 Kꞌia̱ Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Kꞌia̱ nga kisikasén‑no nga tsì tsà chrjoa̱tao̱n kichꞌaò,

ni̱ xijtsa‑jìn,

kꞌoa̱ ni̱ jténꞌó‑jìn,

a kichaà‑no jme xi koan‑chjén‑no.

Ngatsꞌi chjo̱ta̱ xi ya̱ kòtꞌayàtꞌa‑le̱ kitsò:

—Ni̱jme‑jìn xi kicha‑najin.

36 Kꞌia̱ Jesús kitsò‑le̱:

—To̱nga ndꞌai̱,

jè xi tjín‑le̱ chrjoa̱tao̱n kàtakjoé,

kꞌoa̱ati̱ kàtakjoé xijtsa‑le̱;

kꞌoa̱ jè xi tsìn‑le̱ ki̱cha̱ndo kàtabaténa najño xi bꞌèjnajté kꞌoa̱ kàtabatse jngo.

37 Nga̱ kꞌoa̱axin‑no,

nga machjén nga koi̱tjosòn sa xi tꞌatsꞌa̱n josꞌìn tjítꞌa xo̱n‑le̱ Niná,

jña nga tsò:

“Kꞌoa̱ ya̱a koanxki̱kao̱ chjo̱ta̱ tsꞌe̱n;”^e

nga̱ jme xi kichji xi tꞌatsꞌa̱n kꞌoa̱asꞌìn bitjosòn.

38 Kꞌia̱ kitsò chjo̱ta̱ xi ya̱ kòtꞌayàtꞌa‑le̱:

—Nai,

kjioò jaò i̱ ki̱cha̱ndo.

Kꞌoa̱ Jesús kitsò‑le̱:

—To̱ i̱ kàtafetꞌa‑ná.

39 Kꞌia̱ Jesús kitjo,

josꞌìn be‑ni ki ya̱ nindo Yá Olivo;

kꞌoa̱ jè chjo̱ta̱ xi ya̱ kòtꞌayàtꞌa‑le̱ kꞌoa̱ati̱ ya̱ kitje̱n‑ngi‑le̱.

40 Kꞌia̱ nga kichò ya̱ ꞌnde xo̱kji,

kitsò‑le̱:

—Ti̱nókjoa̱kao̱o Niná jmé‑ni nga tsì jè kjoa̱ xi skótꞌayàkao̱‑no si̱ikinjen‑nino.

41 Kꞌoa̱ Jesús tsakasènxìn‑le̱ kibꞌàkjá jokji kjin sasèn jngo la̱jao̱;

kꞌoa̱ tsakasènxkónchꞌin,

tsakjákao̱ Niná,

42 kitsò:

«Nꞌai,

tsà me‑lì chja̱ꞌàxìn‑naí jè cho̱tsín kjoa̱ñꞌain xo̱kji;

to̱nga lìtsà koi kꞌoa̱ kàtama josꞌìn nga an me‑na,

koiì xi kꞌoa̱ kàtama josꞌìn nga ji me‑lì».

43 Kꞌoa̱ jaꞌaikòn jngo‑le̱ cho̱ꞌnda ngꞌajmi xi kitsjoa nganꞌión‑le̱.

44 Kꞌoa̱ kꞌia̱ nga tífaꞌákon Jesús,

ngìsa̱a sa nda tsakjákao̱ Niná;

kꞌoa̱ jè ndásjèya‑le̱ nga títìn tꞌa nangi nꞌión tsian kjoan,

jo njín tjió.

45 Kꞌia̱ tsakasèn‑ndo nga je koan tsàkjákao̱ Niná,

kꞌoa̱ jaꞌainchrꞌoè chjo̱ta̱ xi ya̱ kòtꞌayàtꞌa‑le̱,

to̱nga kjiofè xi to̱ tꞌatsꞌe̱ nga nꞌión ba‑le̱;

46 kꞌia̱ kitsò‑le̱:

—Án‑ni nga tìsoyofè‑nio.

Ti̱sótjao̱on,

kꞌoa̱ ti̱nókjoa̱kao̱o Niná jmé‑ni nga tsì jè kjoa̱ xi skótꞌayàkao̱‑no si̱ikinjen‑nino.

47 Kꞌia̱ nga tínchja̱ Jesús,

to̱ i̱i koan jaꞌai chjo̱ta̱‑nkjìn;

kꞌoa̱ jè Judas,

jngo chjo̱ta̱‑le̱ xi tejaò xi xá kiskoéjin‑ni Jesús,

tje̱n títjòn‑le̱ chjo̱ta̱‑nkjìn;

kꞌoa̱ tsakasèn‑tꞌachrian‑le̱ Jesús nga tsakꞌétꞌatsꞌoà.

48 Kꞌia̱ Jesús kitsò‑le̱:

—Judas,

a kao̱o jngo kjoa̱bꞌètꞌatsꞌoà bꞌaìtꞌa‑ni jè ꞌNdí‑le̱ Chjo̱ta̱.

49 Kꞌia̱ nga tsabe jè xi ya̱ tjiókao̱ Jesús jme xi koan,

kꞌia̱ kitsò‑le̱:

—Nai,

a si̱toán‑kao̱‑nìji̱n kao̱ ki̱cha̱ndo.

50 Kꞌoa̱ jngo chjo̱ta̱ xi ya̱ kòtꞌayàtꞌa‑le̱ Jesús kisikìꞌaon jngo cho̱ꞌnda‑le̱ na̱ꞌmi títjòn,

kꞌoa̱ tsakatetꞌa chrjoa̱ño ngakìxi̱.

51 Kꞌia̱ kinchja̱ Jesús kitsò:

—Alì kꞌoa̱‑jìn nꞌiaòn,

to̱ koa̱an‑ni.

Kꞌia̱ Jesús kisikao̱ chrjoa̱ño cho̱ꞌnda‑le̱ na̱ꞌmi títjòn,

kisindaya‑ni.

52 Kꞌoa̱ Jesús tsakjákao̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi tjió títjòn‑le̱ chjo̱ta̱ xi síkoìnda̱ yo̱ngo̱ kao̱ chjo̱ta̱ jchínga,

xi jaꞌainè,

kitsò‑le̱:

—A chjo̱ta̱ xi kjoa̱si bꞌéntjè kàfàꞌai̱chꞌaò,

nga sí yá kao̱ ki̱cha̱ndo kichꞌà‑sínio.

53 Kꞌia̱ nga ni̱chrjin nga nchaon ya̱a tsakàte̱jnakao̱‑no ya̱ nditsin‑le̱ yo̱ngo̱,

lìkoi kꞌia̱ kichjòmitjao̱on ndsao̱o nga kindoa‑naó;

to̱nga ndꞌai̱ jeè kàbichó ni̱chrjin‑no kao̱ ni̱chrjin‑le̱ nga koa̱tèxoma jè kjoa̱njiòn.

54 Kꞌoa̱ chjo̱ta̱ xo̱kjoan kitsoa Jesús,

kikao̱,

kꞌoa̱ kichòkao̱ ya̱ ndꞌia‑le̱ na̱ꞌmi títjòn.

Kꞌoa̱ Pedro to̱ kjiìn tje̱n‑ngika‑le̱.

55 Kꞌoa̱ nga jè chjo̱ta̱ xo̱kjoan tsakꞌétse lꞌí ya̱ ngabasen‑le̱ nditsin,

tsakatiòndai‑le̱;

kꞌoa̱ Pedro kꞌoa̱ti̱ ya̱ tsakꞌèjnajin‑le̱.

56 To̱nga jngo chjo̱on cho̱ꞌnda‑le̱ na̱ꞌmi títjòn,

tsabe nga ya̱ tíjnandai lꞌí Pedro,

nda‑jàn kiskòtsen‑le̱,

kꞌoa̱ kitsò:

—Jè chjo̱ta̱ xo̱kji kꞌoa̱ati̱ ya̱ tíjnakao̱ Jesús.

57 Pedro kꞌoa̱kitsò nga tsì bexkon Jesús,

kitsò:

—Ji chjo̱on,

lìkoi ꞌbexkoan ꞌyá‑ni Jesús.

58 Xi koan jngotjò‑ni ngìjngo chjo̱ta̱ xi tsabe,

kitsò:

—Ji kꞌoa̱ati̱ chjo̱ta̱‑le̱ mai.

Kꞌoa̱ Pedro kitsò:

—Ji xé,

nga̱ lìtsà chjo̱ta̱‑le̱ Jesús jiàn an.

59 Jngo‑la̱ hora koanskan‑ni,

ngìjngo xi kisikìxi̱ya,

kitsò:

—Xi ñaki kìxi̱ jè chjo̱ta̱ xo̱kji kꞌoa̱‑ná ti̱ya̱ tíjnakao̱ Jesús,

nga̱ koa̱ati̱ ya̱ ꞌnde Galilea tsꞌe̱.

60 Kꞌoa̱ Pedro kitsò:

—Ji xé lìkoi be jme xo̱ ꞌmì‑lai̱.

Kꞌoa̱ ti̱ꞌa kꞌia̱‑ni nga tínchja̱ Pedro,

kiskiꞌndiá cháxichá.

61 Kꞌia̱ kisikꞌófaya jè Nai‑ná,

kiskòtsen‑le̱ Pedro;

kꞌia̱ Pedro jaꞌaitsjen‑le̱ jè én xi Nai‑ná kitsò‑le̱:

«Nga ti̱ngì‑ni nga kje kjiꞌndiá cháxichá,

jàn‑kꞌa kꞌoa̱sí nga tsì ꞌyaxkon‑naí».

62 Kꞌoa̱ Pedro kitjo ya̱ nditsin,

ñaki kao̱ kjoa̱ba kiskiꞌndiá.

63 Kꞌoa̱ jè chjo̱ta̱ xi tjiósíkoìnda̱ Jesús nꞌión tjióbijnòke,

kꞌoa̱ tjióbꞌé‑le̱;

64 kꞌoa̱ najño tsakꞌéchjoàngi‑ni xko̱n,

tjiósíjtsin‑à,

kꞌoa̱ tjiókjònangi‑le̱,

tjiótsò‑le̱:

—Tsà kjoa̱kìxi̱ nga Niná nòkjoa̱ya ngajao‑lai̱,

kꞌoa̱‑là si,

ꞌyá‑ni xi kàbꞌé‑lì.

65 Kꞌoa̱ nkjìn sa kjoa̱ xi kitsò‑le̱ nga kinchja̱ꞌaon‑le̱.

66 Kꞌia̱ nga je koan-isen,

koanña chjo̱ta̱ jchínga‑le̱ na̱xi̱nandá kao̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,

jaꞌaikao̱ Jesús ya̱ ngixko̱n jtín xi kjinèntsja kjoa̱téxoma‑le̱ chjo̱ta̱ judío,

kitsò‑le̱:

67 —Kꞌoa̱tꞌìn‑naíji̱n,

a ji‑ní Jè Xi Kisikasén‑lì Jè Xi Tíjna Ngꞌajmi.

Kꞌia̱ Jesús kitsò‑le̱:

—Tsà kꞌoa̱xín‑no,

lìkoi koa̱n‑kjaín‑no;

68 tsà kꞌoa̱ti̱ skònangi‑no,

lìkoi‑jìn koi̱nókjoa̱o kꞌoa̱ ni̱ si̱kꞌéjnandaí jìn‑la̱naó.

69 To̱nga bꞌétsꞌia̱‑ni ndꞌai̱,

jè ꞌNdí‑le̱ Chjo̱ta̱ ya̱a kꞌoéjna ya̱ ngakìxi̱‑le̱ Niná,

xi nꞌión tse nganꞌión tjín‑le̱.

70 Kꞌia̱ kitsò ngatsꞌi:

—A tisi‑ní nga ji‑jìn jè ꞌNdí‑le̱ Niná.

Kꞌoa̱ Jesús kitsò‑le̱:

—Saꞌnda jòn xo̱ bixón nga an‑jiàn.

71 Kꞌia̱ ngatsꞌi kitsò:

—Jmé sa én‑le̱ chjo̱ta̱ xi machjén‑ná,

nga̱ ñá soaà tinòꞌyà‑le̱e én xi tíbìtjo tsꞌoa.