—Ñaki kìxi̱i xi xin‑no,

nga jè chjo̱on kꞌàn xo̱kji xi nꞌión yo̱ma̱ sꞌìn tíjna,

ngìsa̱a tse chjí‑le̱ kjoa̱tjaò xi kàbꞌéjna ti̱kꞌoa̱‑ni jotjín kàsíkatió ngatsꞌi chjo̱ta̱.

4 Nga̱ ngatsꞌi chjo̱ta̱ xo̱kjoan,

koiì kàtsjoátꞌa‑le̱ Niná jña‑nile̱ xi je to̱ njen‑ngi‑le̱;

to̱nga jè chjo̱on kꞌàn xo̱kji nda tsà nꞌión yo̱ma̱ sꞌìn tíjna,

kàsikꞌéjna ngayije xi jè machjén‑le̱ nga koa̱n kꞌoéjnakon‑ni.

5 Kꞌoa̱ tjín kꞌa xi tjiófaóya‑ni tꞌatsꞌe̱ yo̱ngo̱ kao̱ ngayije xi tjín ndai‑le̱,

nga na̱ská na̱kjoan la̱jao̱ kisꞌenda‑ni kao̱ kjoa̱tjaò xi nꞌión chjí xi koan‑nꞌión‑jon‑ni,

Jesús kitsò‑le̱:

6 —Xi tꞌatsꞌe̱ ngayije xi tichòtsen‑lao̱o,

kjoa̱ꞌaí ni̱chrjin nga tsì ti̱ sa̱tiósòn‑nile̱ xínkjín jè la̱jao̱‑le̱,

nga̱ jngokꞌà koi̱xo̱jen ngayije.

7 Kꞌoa̱ jè chjo̱ta̱ xi kotꞌayàtꞌa‑le̱ Jesús,

kiskònangi‑le̱,

kitsò‑le̱:

—Ji xi bakòyai,

kꞌiá‑ni nga kꞌoa̱koa̱n kjoa̱ xi tiꞌmì‑lai̱.

Kꞌoa̱ jmé choa̱ xi koa̱n‑tsen kꞌia̱ nga koa̱n‑chrian‑le̱ nga koi̱tjosòn ngayije kjoa̱ jè.

8 Kꞌia̱ Jesús kitsò‑le̱:

—Ti̱koìndao̱o yao‑no jmé‑ni nga tsì chꞌa̱na̱cha̱‑nino;

nga̱ nꞌión nkjìn chjo̱ta̱ kjoa̱ꞌaí xi si̱ichjén jaꞌaín‑na̱,

xi koi̱tso̱:

“An‑nià Jè Xi Niná Kisikasén,”

kꞌoa̱ koi̱tso̱ sa:

“Jeè machrian‑le̱ ni̱chrjin”.

To̱nga alì ya̱ jìn mangíntje̱n‑ngi‑lao̱o.

9 Kꞌoa̱ kꞌia̱ nga koi̱nóꞌyà‑lao̱o nga ngakijndà ꞌnde je kjoa̱jchán tjín kꞌoa̱ kao̱ kjoa̱si,

alì bijkon‑jiòn;

nga̱ machjén nga títjòn koi̱tjosòn kjoa̱ jè;

to̱nga kje‑sa kjoe̱tꞌa ndi̱to̱n‑jìn ni̱chrjin.

10 Kꞌia̱ Jesús kitsò‑le̱:

—Koi̱sótje̱n‑nèle̱ xínkjín na̱xi̱nandá‑yꞌai kao̱ xi kja̱ꞌaí na̱xi̱nandá‑yꞌai,

kꞌoa̱ jè xi batéxoma koi̱sótje̱n‑nè xínkjín kao̱ xi xìn batéxoma;

11 kꞌoa̱ nkjìn chaón xkón xi nꞌión kjoa̱ꞌa,

kꞌoa̱ nkjìn ꞌnde jña sꞌe kjinchrá kao̱ chꞌin toán xi bangaba;

kꞌoa̱ nꞌión nkjìn kjoa̱ sꞌe̱ xi tso̱kjòn‑le̱ chjo̱ta̱ kꞌoa̱ nkjìn choa̱ xi koa̱n‑tsen ya̱ ngꞌajmi.

12 »To̱nga ti̱ngini‑le̱ ngayije kjoa̱ jè,

koi̱ndoa̱a‑no,

kꞌoa̱ koai̱tje̱n‑ngikè‑no chjo̱ta̱,

kꞌoa̱ ya̱a si̱intsja‑no jè chjo̱ta̱ xi batéxoma ya̱ ndꞌia jña maxkia̱ xo̱n‑le̱ Niná nga si̱ijtsòꞌa‑no kꞌoa̱ ndo̱yá si̱ikatióꞌyà‑no,

kꞌoa̱ cha̱nìtꞌa‑no ngixko̱n chjo̱ta̱xá ngajko̱ kao̱ ya̱ ngixko̱n chjo̱ta̱xá títjòn,

jmé‑ni nga si̱ijtsòꞌa‑nino xi to̱ tꞌatsꞌa̱n.

13 Kꞌoa̱ kꞌia̱ nga kꞌoa̱ koa̱n‑tꞌaon kjoa̱ jè‑bi̱ koiì xi skóꞌaìꞌnde‑no nga koa̱n kꞌoa̱o én‑no xi tꞌatsꞌa̱n.

14 Kꞌoa̱tꞌaò ni̱ma̱‑no nga tsì ti̱ngi‑ni si̱kꞌaitsjaon josꞌìn koi̱nókjoa̱ntjaò yao‑no,

15 nga̱ aàn tsjoa‑no én kao̱ kjoa̱nkjìn‑tokòn,

xi tsì koa̱n‑le̱ nga si̱ikinjen‑le̱ ni̱ koa̱njìn‑le̱ nga kꞌoe̱ekjaoꞌàkao̱ ngatsꞌi xi koa̱tiòchjoà.

16 To̱nga saꞌnda ti̱ jé‑ni nꞌai‑no,

kꞌoa̱ jè ndsꞌao,

xìngio̱o,

mìyo̱‑no koai̱kao̱tꞌa‑no;

kꞌoa̱ tjín kꞌa‑jiòn xi si̱kꞌen‑no;

17 kꞌoa̱ koa̱n‑chꞌaoke‑no ngatsꞌi chjo̱ta̱ xi to̱ tꞌatsꞌa̱n.

18 To̱nga ni̱jngo‑jìn ntsja̱jko xi to̱ ndia̱a jcha̱.

19 Tsà chókjoa̱jin-no ngayije kjoa̱ so̱kò-no kjoa̱bijnachon xi tsì kꞌia fetꞌa.

20 »To̱nga kꞌia̱ nga jchao̱o na̱xi̱nandá‑nꞌión Jerusalén,

nga kitsendai‑le̱ chjo̱ta̱ kjoa̱jchán,

kàtaꞌyao nga to̱ je kichò ni̱chrjin‑le̱ nga koi̱xo̱ya.

21 Kꞌia̱ jè chjo̱ta̱ xi tjió ya̱ ꞌnde Judea,

kàtabanga ya̱ sòn nindo;

kꞌoa̱ jè xi tjió ya̱ na̱xi̱nandá‑nꞌión Jerusalén,

kàtabitjojin,

kꞌoa̱ jè xi ya̱ tjió jña choa ndꞌia tjín,

alì ya̱‑jìn faꞌasꞌenjin ya̱ na̱xi̱nandá‑nꞌión Jerusalén.

22 Nga̱ jè ni̱chrjin xo̱kjoan kꞌia̱a koa̱njndà‑ni jmé xi kisꞌin chjo̱ta̱,^a

jmé‑ni nga koi̱tjosòn‑ni ngayije kjoa̱ xi tjítꞌa xo̱n én‑le̱ Niná.

23 To̱nga ¡ma̱xó‑nile̱ yao‑le̱ ngatsꞌi yánchjín xi ꞌndí tjióyàꞌma‑le̱,

kꞌoa̱ jè xi kꞌia̱ síkaki ꞌndí‑le̱ nga koi ni̱chrjin!,

nga̱ tseè kjoa̱ñꞌain sꞌe̱ i̱ ꞌnde xo̱kji,

kꞌoa̱ kjoa̱ꞌaínè‑le̱ kjoa̱jti‑le̱ Niná chjo̱ta̱ xi i̱ tsꞌe̱.

24 Kꞌoa̱ ki̱cha̱ndo si̱kꞌen‑ni,

kꞌoa̱ ngatsꞌi xi kꞌoa̱ngi nꞌó sꞌe̱tꞌa nga koai̱nìkatió ngakijndà na̱xi̱nandá‑yꞌai;

kꞌoa̱ i̱ na̱xi̱nandá‑nꞌión Jerusalén jé chjo̱ta̱ xi tsì tsà judío‑jìn kjoa̱ꞌaí síkixòya,

jo saꞌnda nga kjoe̱tꞌa jotjín ni̱chrjin tsakꞌaì‑le̱ nga koa̱tèxoma chjo̱ta̱ xi tsì tsà judío‑jìn.

25 »Kꞌoa̱ kꞌia̱ nkjìn choa̱ sꞌe̱ ya̱ tsꞌoí,

ya̱ sá,

kꞌoa̱ ya̱ niñò,^b

kꞌoa̱ i̱ soꞌnde nꞌión tse kjoa̱ꞌaon sꞌe̱ ya̱ jin ni̱ma̱‑le̱ chjo̱ta̱,

sꞌe̱njiònjin‑le̱ kjoa̱faꞌaisjen‑le̱ nga koi̱nchrꞌoé‑le̱ nga nꞌión kjoa̱ne ndáchikon kꞌoa̱ nga koa̱n‑tìnya‑le̱;

26 kꞌoa̱ jè chjo̱ta̱ koi̱yáya nga nꞌión tso̱kjòn kꞌoa̱ nga skoe̱ jme kjoa̱xkón xi kjoa̱ꞌaínè‑le̱ soꞌnde;

nga̱ ngayije nganꞌión xi tjín ya̱ jin sén koa̱n‑tìnyaà‑le̱.

27 Kꞌia̱ ngatsꞌi chjo̱ta̱ skoe̱ kꞌia̱ nga jè ꞌNdí‑le̱ Chjo̱ta̱ kjoa̱ꞌaíjin jngo yojbi^c kao̱ nganꞌión‑le̱ kꞌoa̱ kao̱ nga nꞌión si̱i‑isen kjoa̱jeya‑le̱.

28 Kꞌia̱ nga kꞌoe̱etsꞌia̱ nga kꞌoa̱koa̱n kjoa̱ jè,

ti̱ncha kìxio̱o,

chótsen‑ngꞌaò,

nga̱ jeè tíjnachrian kjoa̱ndaì‑no nga je koa̱n‑chjíntjaò».

29 Kꞌoa̱ati̱ tsakakóya‑le̱ jngo choa̱ xi mangósòn‑kao̱ jngo kjoa̱,

kitsò‑le̱:

«Chótsen‑lao̱o jè yá higo kao̱ ngayije yá.

30 Kꞌia̱ nga je bꞌétsꞌén,

ndaà ꞌyao jòn nga je machrian‑le̱ nga koa̱njchá to̱ xi ya‑le̱.

31 Kꞌoa̱ati̱ sꞌìn jòn,

kꞌia̱ nga jchao̱o nga kꞌoa̱koa̱n ngayije kjoa̱ jè,

kàtaꞌyao nga je tíjnachrian nga Niná koa̱tèxoma‑le̱ ngatsꞌi chjo̱ta̱.

32 »Ñaki kìxi̱i xi xin‑no,

nga tsì koi̱yá jè chjo̱ta̱ xi tjín ndꞌai̱ saꞌnda nga koi̱tjosòn ngayije kjoa̱ jè.

33 Jè ngꞌajmi kao̱ soꞌnde kjoe̱tꞌa ni̱chrjin‑le̱,

to̱nga ngayije én‑na̱ lìkoi kjoe̱tꞌa ni̱chrjin‑le̱.

34 »Kꞌoa̱ati̱ ti̱koìndao̱o yao‑no,

nga tsì tsà kjoa̱chi̱nga̱ꞌa‑jìn kꞌoa̱ ni̱ kjoa̱chꞌi̱‑jìn kꞌoa̱ ni̱ kjoa̱níkjájon xi tjín i̱ soꞌnde‑jìn kàtatse‑ni ni̱ma̱‑no,

jme‑ni nga tsì to̱ i̱ koa̱n kjoa̱ꞌaínè‑no ni̱chrjin xo̱kji.

35 Nga̱ joni tsà che̱en sꞌìn ska̱nè ngatsꞌi chjo̱ta̱ xi tjió jngo tjíjtsa soꞌnde.

36 Ti̱yonda ntsjaò‑ni kꞌoa̱ ti̱nókjoa̱kao̱o Niná ngantsjaì ni̱chrjin,

ti̱jé‑lao̱o nga kàtabakin‑no nga tsìjme xi si̱ikao̱‑no ngayije kjoa̱ xi kjoa̱ꞌaí,

kꞌoa̱ nga koa̱n koichokinchaò ya̱ ngixko̱n ꞌNdí‑le̱ Chjo̱ta̱».

37 Kꞌoa̱ kꞌia̱ nga ni̱chrjin Jesús bakóya ya̱ nditsin‑le̱ yo̱ngo̱;

kꞌoa̱ nga manjiòn,

bitjo,

ya̱a fìkꞌèjna ya̱ nindo Yá Olivo.

38 Kꞌoa̱ ngatsꞌi chjo̱ta̱ faꞌaikòn‑le̱ nga ta̱njiòn ya̱ nditsin‑le̱ yo̱ngo̱,

jmé‑ni nga bincháñon‑nile̱.