—A tichòtsen‑lao̱o ngayije xo̱chon.

Ñaki kìxi̱i xi xin‑no,

nga ni̱ ngìjngo‑jìn la̱jao̱ ti̱ sa̱tiósòn‑nile̱ xínkjín i̱‑bi̱,

jngokꞌà koi̱xo̱jen ngayije.

3 Kꞌoa̱ kꞌia̱ nga ya̱ tíjna Jesús ya̱ nindo Yá Olivo,

jè chjo̱ta̱ xi ya̱ kòtꞌayatꞌa‑le̱ tsakinchabꞌàkjátꞌa tꞌaxìn‑le̱,

kitsò‑le̱:

—Kꞌoa̱tꞌìn‑naíji̱n,

kꞌiá‑ni nga kꞌoa̱koa̱n kjoa̱ jè‑bi̱,

kꞌoa̱ jmé choa̱ xi sꞌe̱ kꞌia̱ nga kjoàꞌai̱ ngìndiai,

kꞌoa̱ kꞌia̱ nga je me kjoe̱tꞌa ni̱chrjin xi tiyoaà.

4 Kinchja̱ Jesús,

kitsò‑le̱:

—Ti̱koìndao̱o yao‑no,

jmé‑ni nga tsìꞌya xi kꞌoa̱na̱cha̱‑nino.

5 Nga̱ nꞌión nkjìn chjo̱ta̱ kjoa̱ꞌaí xi si̱ichjén jaꞌaín‑na,

nga koi̱tso̱:

“An‑nià Jè Xi Niná Kisikasén”;

kꞌoa̱ nkjìn chjo̱ta̱ kꞌoa̱na̱cha̱‑le̱.

6 Kꞌoa̱ koi̱nóꞌyàlao̱o nga tjiókjàn chjo̱ta̱ nga kjoa̱jchán tíjna,

kꞌoa̱ sꞌe̱ én nga kꞌoa̱ti̱ kjoa̱jchán je tjín jña kjin‑tꞌa;

to̱nga alì koi‑jìn bixòjen‑ni kjoa̱faꞌaitsjen‑no,

nga̱ machjén nga kꞌoa̱koa̱n ngayije kjoa̱ jè;

to̱nga kje sa kjoe̱tꞌa‑jìn ni̱chrjin.

7 Nga̱ koi̱sótje̱n‑nè xínkjín na̱xi̱nandá‑yꞌai kao̱ xi kja̱ꞌaí na̱xi̱nandá‑yꞌai,

kꞌoa̱ jè xi batéxoma koi̱sótje̱n‑nè xínkjín kao̱ xi xìn batéxoma;

kꞌoa̱ sꞌe̱e chꞌin toán xi bangaba kꞌoa̱ sꞌe̱ kjinchrá,

kꞌoa̱ nkjìn ꞌnde jña chaón xkón kjoa̱ꞌa.

8 Kꞌoa̱ ngayije kjoa̱ xi tìxin‑no,

to̱ kꞌoe̱etsꞌia̱kao̱‑ni ngayije kjoa̱ñꞌain xi sꞌe̱ joni tsà jngo chjo̱on xi bꞌétsꞌia̱ nga makjine ꞌndí‑le̱.

9 »Kꞌoa̱ kꞌia̱a tsjoátꞌa‑no chjo̱ta̱ nga kjoa̱ñꞌain si̱ikjaꞌá‑no,

si̱ikꞌen‑no,

kꞌoa̱ koa̱n‑chꞌaoke‑no ngatsꞌi chjo̱ta̱ xi to̱ tꞌatsꞌa̱n.

10 Kꞌia̱ nga koi ni̱chrjin nkjìn xi si̱ikatió kjoa̱makjaín‑le̱,

kꞌoa̱ tsjoátꞌa ngañá xínkjín nga kàtabꞌaì‑le̱ kjoa̱ñꞌain,

kꞌoa̱ koa̱n‑chꞌaoke ngañá xínkjín.

11 Kꞌoa̱ nkjìn chjo̱ta̱ bꞌana̱cha̱ sꞌe̱ xi Niná nchja̱ya ngajao‑le̱ koi̱tso̱‑le̱ yao‑le̱,

kꞌoa̱ nkjìn chjo̱ta̱ kꞌoa̱na̱cha̱‑le̱;

12 kꞌoa̱ xi to̱ tꞌatsꞌe̱ nga nꞌión koa̱n‑nkjìnya kjoa̱ xi chꞌao tjín,

nkjìn chjo̱ta̱ xi koi̱nje̱nchꞌán kjoa̱tsjoacha xi tjín‑le̱.

13 To̱nga jè xi tàja koa̱se̱njna saꞌnda nga kjoe̱tꞌa kjoa̱ jè,

jé‑ní xi koi̱tjontjaì.

14 Kꞌoa̱ koi̱nókjoa̱yajin‑le̱ chjo̱ta̱ ngakijndà soꞌnde,

jè én nda xi tꞌatsꞌe̱ jña batéxoma jè xi tíjna ngꞌajmi,

jmé‑ni nga koi̱nchrꞌoé‑ni ngatsꞌi jotjín ntje̱ tjín;

kꞌoa̱ kꞌia̱a kjoe̱tꞌa ni̱chrjin jè.

15 »Koiì kjoa̱,

kꞌia̱ nga jcha̱o nga koi̱chò ya̱ ꞌnde xi Niná kiskoétꞌaxìn jme xi Niná tike,

kꞌoa̱ xi kꞌoa̱sꞌi̱in nga Niná tsjiókon yo̱ngo̱,

josꞌìn nga ti̱ngì‑ni kꞌoa̱kitsò Daniel jè xi kinchja̱ya ngajao‑le̱ Niná^a (jè xi bꞌéxkia̱,

nda kàtamacho̱ya‑le̱),

16 kꞌia̱ jè chjo̱ta̱ xi tjió ya̱ ꞌnde Judea kàtabanga ya̱ sòn nindo.

17 Kꞌoa̱ jè xi ya̱ sòngꞌa ndꞌia‑le̱ tíjna,

alì bitjojen‑jìn nga skoé jme xi tjió ya̱ ya ndꞌia‑le̱;

18 kꞌoa̱ jè xi ya̱ tísíxá ya̱ jin‑jñá,

alì najño xi bꞌèjnajté‑jìn fìkjaꞌá ya̱ ndꞌia‑le̱.

19 »To̱nga ¡ma̱xó‑nile̱ yao‑le̱ ngatsꞌi yánchjín xi ꞌndí kꞌia̱ tjióyàꞌma‑le̱,

kꞌoa̱ jè xi sꞌa̱ síkaki ꞌndí‑le̱ kꞌia̱ nga koi ni̱chrjin!

20 Tꞌètsꞌoa‑lao̱o Niná,

jmè‑ni nga tsìkꞌia nga cha̱n‑nchꞌán,

ni̱ kꞌia̱‑jìn nga ni̱chrjin xotò,

ni̱chrjin nga bexkón Niná chjo̱ta̱ judío kàtabꞌakao̱‑le̱ nga koi̱yó;

21 nga̱ kꞌia̱ nga koi ni̱chrjin nꞌión tse kjoa̱ñꞌain sꞌe̱,^b

ni̱sakꞌia‑jìn kꞌoa̱kji kjoa̱ñꞌain kisꞌe jo saꞌnda nga kisꞌenda soꞌnde saꞌnda ndꞌai̱,

kꞌoa̱ ni̱kꞌia‑jìn ti̱ sꞌe̱‑ni.

22 Kꞌoa̱ tsà tsì‑làni ni̱choaya jè ni̱chrjin xo̱kjoan,

ni̱ꞌya‑jìn xi koi̱tjontjaì;

to̱nga xi to̱ tꞌatsꞌe̱ jè chjo̱ta̱ xi Niná kiskoéjin,

ni̱choayaà jè ni̱chrjin xo̱kjoan.

23 »Kꞌoa̱ tsà ꞌya xi koi̱tso̱‑no:

“Koe̱e‑ni,

i̱ tíjna i̱ Jè Xi Niná Kisikasén,”

axo̱ “Ya̱ tíjna ya̱,”

alì makjaínjìn‑no.

24 Nga̱ sꞌe̱e chjo̱ta̱ bꞌana̱cha̱ xi koi̱tso̱ nga Jè xi Niná kisikasén,

kꞌoa̱ sꞌe̱e chjo̱ta̱ bꞌana̱cha̱ xi Niná nchja̱ya ngajao‑le̱ koi̱tso̱‑le̱ yao‑le̱,

kꞌoa̱ nꞌión tse choa̱ kao̱ kjoa̱xkón xi koa̱kò,

jmé‑ni nga kꞌoa̱na̱cha̱‑nile̱,

tsà koa̱n‑làni,

saꞌnda jè chjo̱ta̱ xi Niná kiskoéjin nga kꞌoa̱sjentjaì.

25 Jeè to̱ngi‑ni kꞌoa̱tìxin‑no.

26 »Koiì kjoa̱,

tsà kꞌoín‑no:

“Koe̱e‑ni,

ya̱ tíjna ya̱ ꞌnde tꞌaxìn‑tꞌa,”

alì ya̱‑jìn mangión;

kꞌoa̱ tsà i̱ kꞌoín‑no:

“Koe̱e‑ni,

ya̱ tíjnaꞌya jña nìkjáya ya̱ ya ndꞌia,”

alì makjaínjìn‑no.

27 Nga̱ joma jè lꞌí chꞌao̱n xi nchroá‑ni jña tjo‑ni tsꞌoí,

kꞌoa̱ matsen saꞌnda jña kantjaì‑ni tsꞌoí,

kꞌoa̱ati̱ sꞌìn koa̱n kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.

28 Nga̱ to̱jña‑ni nga kijna yao kꞌen,

ya̱a koa̱nña níké.

29 »Kꞌia̱ nga je kjoe̱tꞌa jè kjoa̱ñꞌain xi sꞌe̱ nga koi ni̱chrjin,

kjoan sꞌe̱njión tsꞌoí,

kꞌoa̱ jè sá lìkoi ti̱ si̱i-isen‑ni,

kꞌoa̱ jè niñò koi̱xo̱jen‑ngiì,^c

kꞌoa̱ ngayije nganꞌión xi tjín ya̱ jin sén koa̱n‑tìnyaà‑le̱.

30 »Kꞌoa̱ kꞌia̱ koa̱n‑tsen ya̱ ngꞌajmi jè choa̱ xi tsꞌe̱ jè ꞌNdí‑le̱ Chjo̱ta̱;

kꞌoa̱ kꞌia̱ skíꞌndiába ngatsꞌi ntje̱ xi tjín ngakijndà soꞌnde,

kꞌoa̱ skoe̱ jè ꞌNdí‑le̱ Chjo̱ta̱ kꞌia̱ nga kjoa̱ꞌaíjin yojbi ya̱ ngꞌajmi,^d

kao̱ nganꞌión‑le̱ kꞌoa̱ kao̱ nga nꞌión si̱i‑isen kjoa̱jeya‑le̱.

31 Kꞌoa̱ si̱ikasén cho̱ꞌnda ngꞌajmi‑le̱,

si̱ikjane chrjao xi nꞌión koi̱nóꞌyà‑le̱,

kꞌoa̱ Niná kꞌoe̱exkó nga ño xi̱ngi̱‑le̱ soꞌnde ngatsꞌi chjo̱ta̱ xi xá kiskoéjin‑ni,

xi jngo ngoa‑le̱ soꞌnde saꞌnda xi ngìjngo ngoa‑le̱.

32 »Kàtama‑no jme xi tsòya‑ni jè choa̱ xi mangósòn‑kao̱ yá higo:

Kꞌia̱ nga je tíbꞌétsꞌén yántsja,

kꞌoa̱ kꞌia̱ nga je tínchroá‑le̱ xka̱,

ꞌya‑niò nga je machrian‑le̱ nga koa̱njchá to̱ xi ya‑le̱.

33 Kꞌoa̱ti̱ sꞌìn‑ni jòn,

kꞌia̱ nga jchao̱o ngayije kjoa̱ jè,

kàtaꞌyao nga je tíjnachrian ya̱ jchro xo̱ntjoa̱ nga kjoe̱tꞌa ni̱chrjin jè.

34 Ñaki kìxi̱i xi xin‑no,

nga tsì koi̱yá jè chjo̱ta̱ xi i̱ tsꞌe̱ saꞌnda nga kꞌoa̱koa̱n ngayije jè‑bi̱.

35 Jè ngꞌajmi kao̱ soꞌnde kjoe̱tꞌaà ni̱chrjin‑le̱,

to̱nga ngayije én‑na̱ lìkoi kjoe̱tꞌa ni̱chrjin‑le̱.

36 »To̱nga koi ni̱chrjin kꞌoa̱ kꞌiá‑ni nga kꞌoa̱koa̱n lìꞌya xi be,

saꞌnda ni̱ jè‑jìn cho̱ꞌnda ngꞌajmi,

to̱ jngoò jè Nꞌai‑na̱ xi be.

37 »To̱nga jo kisꞌin chjo̱ta̱ xi tsakatiò ni̱chrjin‑le̱ Noé,^e

kꞌoa̱ti̱ sꞌi̱in chjo̱ta̱ xi tjió kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.

38 Nga̱ jokoan nga ti̱ngini‑le̱ nga kitsendá soꞌnde,

jè chjo̱ta̱ tjiókjèn kꞌoa̱ tjióꞌbi,

tjióbixan kꞌoa̱ tjióbꞌénꞌión kjoa̱bixan,

saꞌnda ni̱chrjin kꞌia̱ nga jè Noé jaꞌasꞌen ya̱ chitso xi nꞌión ꞌmbá kji,

39 kꞌoa̱ lìkoi koan‑cho̱ya‑le̱ chjo̱ta̱ saꞌnda nga jaꞌai ni̱chrjin nga kitsendá soꞌnde kꞌoa̱ kisikjesòn ngatsꞌi chjo̱ta̱,^f

kꞌoa̱ati̱sꞌìn koa̱n kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.

40 Kꞌia̱ nga koi ni̱chrjin jaò chjo̱ta̱ xi ñatje̱n tjiósíxá ya̱ jin jñá;

jngo tjoé,

kꞌoa̱ jè xi ngìjngo si̱kꞌéjnaà.

41 Jaò yánchjín xi ñatje̱n tjióbꞌaoya nche̱e;

jngo tjoé,

kꞌoa̱ xi ngìjngo si̱kꞌéjnaà.

42 »Ti̱yondao ngantsjaì,

nga̱ tsìꞌyao jochon nga kjoa̱ꞌaí jè Nai‑no.

43 To̱nga kàtaꞌyao jè‑bi̱,

tsà jè‑làni nai‑le̱ ndꞌia sꞌe̱jin‑le̱ jochon nga kjoa̱ꞌaínchrꞌoè ché,

kꞌoéjnakon‑jìn,

kꞌoa̱ lìkoi‑jìn tsjoáꞌnde‑le̱ ché nga ya̱ kjoa̱ꞌasꞌen ndꞌia‑le̱.

44 Koiì kjoa̱,

kꞌoa̱ti̱ jòn nchaon nchaon ti̱yondao;

nga̱ jè ꞌNdí‑le̱ Chjo̱ta̱ kꞌia̱a kjoa̱ꞌaí jochon nga tsì tichoyà‑lao̱o.

45 »ꞌYá‑nini jè cho̱ꞌnda xi ma nìnꞌiótꞌa kꞌoa̱ xi nkjìn‑kon,

xi nai‑le̱ kitsjoaxá‑le̱ nga síkoìnda̱ jè cho̱ꞌnda xikꞌa jmé‑ni nga kàtasíkjèn‑ni jochon nga koi̱chò choa̱‑le̱.

46 Jó to̱nda‑le̱ ya̱ ngixko̱n Niná cho̱ꞌnda xo̱kji,

xi kꞌoa̱tìsꞌìn kꞌia̱ nga kjoa̱ꞌaí jè nai‑le̱.

47 Ñaki kìxi̱i xi xin‑no nga jè nai‑le̱ cho̱ꞌnda xo̱kji jè si̱ikánèntsja ngayije jme xi tjín‑le̱.

48 To̱nga tsà jè cho̱ꞌnda tsꞌe̱n xo̱kji,

koi̱tso̱ ya̱ jin ni̱ma̱‑le̱:

“Sꞌa̱a kꞌoa̱chrjin sa‑le̱ jè nai‑na̱”;

49 kꞌoa̱ kꞌoe̱etsꞌia̱kao̱ nga si̱iñꞌain‑le̱ jè cho̱ꞌnda xínkjín,

kꞌoa̱ saꞌnda koa̱kje̱n kꞌoa̱ skꞌoíkao̱ jè cháchꞌi̱,

50 kꞌoa̱ kꞌia̱a kjoa̱ꞌaí jè nai‑le̱ cho̱ꞌnda xo̱kji,

ni̱chrjin nga tsì tíkoya‑le̱,

kꞌoa̱ jochon nga tsì kjijin‑kon,

51 kꞌoa̱ tseè kjoa̱ñꞌain si̱ikjaꞌá,

kꞌoa̱ ya̱a si̱ikꞌéjnajin‑le̱ chjo̱ta̱ jaò‑nkjaín;

kꞌoa̱ ya̱a skíꞌndiá,

kꞌoa̱ ya̱a jtsao̱kjao ni̱ꞌño̱.