«Ñꞌain tjín‑le̱ nga tsì sꞌe̱ kjoa̱ xi sa̱téngikao̱ chjo̱ta̱,

to̱nga ¡ma̱xó‑nile̱ yao‑le̱ jè chjo̱ta̱ xi kꞌoa̱sꞌin!

2 To̱ ngìsa̱a‑la̱ nda‑nile̱ chjo̱ta̱ xo̱kji tsà jngo natsí sꞌe̱tꞌanꞌión‑ngi ya̱ yásin,

kꞌoa̱ nga ya̱ kàtanìkꞌatje̱n‑jin ndáchikon,

ti̱kꞌoa̱‑ni nga si̱ikajngijé jngo xi choa kjoa̱makjaín‑le̱.

3 Ti̱koìndao̱o yao‑no.

»Tsà jè ndsꞌai koa̱jngijé xi tꞌatsi̱,

ti̱chákjáya‑lai̱,

kꞌoa̱ tsà si̱ikꞌantjaìya kjoa̱faꞌaitsjen‑le̱;

ti̱chatꞌa‑lai̱.

4 Kꞌoa̱ tsà ñato kꞌa nga jngo ni̱chrjin koa̱jngijé xi tꞌatsi̱,

kꞌoa̱ tsà ñato kꞌa nga jngo ni̱chrjin kjoa̱ꞌaíkon‑lì nga koi̱tso̱‑lì:

“Jeè kisikꞌantjaìya kjoa̱faꞌaisjen‑na̱,

ti̱chatꞌa‑naí”;

ti̱chatꞌa‑lai̱».

5 Jè chjo̱ta̱ xi xá kisikasén‑ni Nai‑ná,

kitsò:

—Ti̱tseyai kjoa̱makjaín‑naji̱n.

6 Kꞌia̱ jè Nai‑ná kitsò:

—Ni̱ sí to̱kꞌoa̱ na̱kji kjoa̱makjaín‑no joni tsà jngo na̱xi̱n‑le̱ mostaza,

koa̱an‑no nga kꞌoín‑lao̱o jè yá sicómoro xo̱kji:

“Chjónèyai yao‑li̱,

kꞌoa̱ tꞌin ki̱se̱njnantjèjin ya̱ ndáchikon”;

kꞌoa̱ jè si̱ikitjosòn‑no.

7 »ꞌYá‑ni jòn xi tíjna jngo‑le̱ cho̱ꞌnda xi fìkꞌénchi,

axo̱ xi barrè fìkoꞌnda,

kꞌia̱nga faꞌai‑ni tꞌa xá‑le̱,

xi kjitꞌà nangi ꞌmì‑lao̱o:

“Ti̱tjásꞌai̱n,

ti̱jnatꞌai yámìxa̱”.

8 A tsí tsà to̱sa ꞌmì‑lao̱o:

“Tꞌènda‑naí xi koàkje̱n‑nia,

tꞌéxkóngi najño‑li̱,

kꞌoa̱ tꞌèya‑naí xi koàkje̱n‑nia kao̱ nandá xi skꞌoia̱ jò saꞌnda nga koa̱nskia;

kꞌoa̱ xi je koa̱n koakje̱n kꞌia̱ koi̱chi kꞌoa̱ kꞌia̱ sꞌoi̱ ji”.

9 A bꞌaì‑lao̱o kjoa̱nda jè cho̱ꞌnda nga je kàsítjosòn jme xi kàsꞌetꞌain‑le̱.

An,

xin‑ñà nga mai.

10 Kꞌoa̱ati̱ sꞌìn‑ni jòn,

kꞌia̱nga je kàbitjosòn‑no ngayije xi kàsꞌetꞌain‑no,

kꞌoa̱tixón:

“Ñá‑ñá cho̱ꞌnda xi tsìjme chjí‑ná,

nga̱ jme xi tjínè‑ná nga sꞌia̱an to̱koi kꞌoa̱ kànꞌiàn”.

11 Kꞌia̱ nga Jesús tífì ya̱ Jerusalén,

jaꞌajin basen ya̱ ꞌnde Samaria kao̱ ya̱ ꞌnde Galilea.

12 Kꞌia̱nga jaꞌasꞌen jngo na̱xi̱nandá‑ꞌndí,

te chjo̱ta̱ xi jtsé biꞌndojon tjín‑le̱ kinchroanchrꞌoè,

nkjiìn tsakincha‑ni

13 kꞌoa̱ nꞌión kinchja̱,

kitsò:

—Jesús,

ji xi bakòyai,

jcha̱ma̱tokòn‑naíji̱n.

14 Kꞌia̱ nga Jesús tsabe,

kitsò‑le̱:

—Tangión,

ta̱kò‑lao̱o yao‑no jè na̱ꞌmi.^a

Kꞌoa̱ i̱ koan kꞌia̱nga je tjiófì,

to̱ i̱i koan,

koan‑ndaya yao‑le̱.

15 Kꞌia̱ nga jngo chjo̱ta̱ xo̱kjoan xi tsabe yao‑le̱ nga je koan‑ndaya,

ti̱kꞌoa̱asꞌìn kinchroa‑ni,

tíbꞌasjejeya Niná nga nꞌión tíkjiꞌndiáxá,

16 kꞌoa̱ tsakajnajten‑tꞌa nangi ya̱ ngi ndso̱ko̱ Jesús nga títsjoá‑le̱ kjoa̱nda;

kꞌoa̱ jè chjo̱ta̱ xo̱kji ya̱a ꞌnde Samaria tsꞌe̱.

17 Kinchja̱ Jesús,

kitsò:

—A tsí tsà te ma‑ni chjo̱ta̱ xi kàmandaya.

Kꞌoa̱ xi ngì ñajan,

jñá tjió.

18 A tsí ꞌya sa xi je kamandaya xi kànchroá ngìndia kꞌoa̱ kàfaꞌaikꞌasjejeya Niná.

A to̱ jé chjo̱ta̱ xo̱kji xi tsì tsà judío‑jìn.

19 Kꞌia̱ Jesús kitsò‑le̱:

—Ti̱sótjai̱n,

tꞌin;

jé kjoa̱makjaín‑li̱ kàbꞌasjentjaí‑lì.

20 Tjín kꞌa chjo̱ta̱ fariseo xi kiskònangi‑le̱ Jesús,

kꞌiá‑ni nga kjoa̱ꞌaí katéxoma Niná,

kꞌia̱ kinchja̱ Jesús kitsò‑le̱:

—Jña batéxoma Niná lìtsà kao̱ choa̱ kjoa̱ꞌaí,

21 ni̱ koi̱tso̱‑jìn chjo̱ta̱:

“Koe̱e‑ni i̱ tíjna,”

axo̱ “Koe̱e‑ni ya̱ tíjna ya̱”;

chótsaon,

nga̱ jña batéxoma Niná jeè i̱ tíjnajin basen‑no.

22 Kꞌia̱ Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Kjoa̱ꞌaí ni̱chrjin kꞌia̱ nga koa̱nme‑no nga jchao̱o jngo ni̱chrjin xi tsꞌe̱ ꞌNdí‑le̱ Chjo̱ta̱,

kꞌoa̱ lìkoi jchao̱o.

23 Kꞌoa̱ koi̱tso̱o‑no chjo̱ta̱:

“Koe̱e‑ni̱ i̱ tíjna,”

axo̱ “Koe̱e‑ni̱ ya̱ tíjna ya̱”.

Alì mangín‑jiòn,

ni̱ mangíntje̱n‑ngi‑jìn‑lao̱o.

24 Nga̱ josꞌìn sí-isen jè lꞌí chꞌao̱n kꞌia̱ nga síkjate saꞌnda jngo ngoa‑le̱ ngꞌajmi saꞌnda xi ngìjngo ngoa‑niján,

kꞌoa̱ati̱ sꞌìn si̱i-isen jè ꞌNdí‑le̱ Chjo̱ta̱ ni̱chrjin kꞌia̱ nga kjoa̱ꞌaí ngìndia‑ni.

25 To̱nga machjén nga títjòn tse kjoa̱ñꞌain kjoa̱ꞌà,

kꞌoa̱ nga kꞌoa̱sjengi chjo̱ta̱ xi tjín ndꞌai̱.

26 »Josꞌìn kisꞌin chjo̱ta̱ xi tsakatiò ni̱chrjin‑le̱ Noé,^b

kꞌoa̱ati̱ sꞌi̱in chjo̱ta̱ xi tjió kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.

27 Kꞌia̱ tjiókjèn,

tjióꞌbi,

tjióbixan,

kꞌoa̱ tjióbꞌénꞌión kjoa̱bixan,

saꞌnda ni̱chrjin nga jaꞌasꞌen Noé ya̱ chitso xi nꞌión ꞌmbá kji,

kꞌoa̱ jaꞌai ni̱chrjin nga kitsendá soꞌnde kꞌoa̱ kisikjesòn ngatsꞌi chjo̱ta̱.^c

28 »Kꞌoa̱ati̱ sꞌìn jo kisꞌin chjo̱ta̱ xi tsakatiò ni̱chrjin‑le̱ Lot;^d

nga tjiókjèn,

tjióꞌbi,

tjióbatse,

tjióbaténa,

tjióbꞌéntjè,

tjióbꞌénda ndꞌia;

29 to̱nga ni̱chrjin nga jè Lot kitjo‑ni ya̱ na̱xi̱nandá‑nꞌión Sodoma,

tsakꞌa‑ni ya̱ ngꞌajmi lꞌí kao̱ xólꞌí,

kꞌoa̱ kisikjesòn ngatsꞌi chjo̱ta̱ xi ya̱ tsꞌe̱.

30 Kꞌoa̱ati̱ sꞌìn koa̱n ni̱chrjin kꞌia̱ nga koa̱n‑tsen jo‑jàn kji jè ꞌNdí‑le̱ Chjo̱ta̱.

31 »Kꞌia̱nga koi ni̱chrjin,

jè xi ya̱ tíjna ya̱ sòn‑ngꞌa ndꞌia‑le̱ alì bitjojen‑jìn nga skoé jè tsojmì xi tjióꞌyà ya̱ ndꞌia‑le̱;

kꞌoa̱ jè xi ya̱ tísíxá ya̱ jin jñá,

alì ti̱ya̱‑jìn ndꞌia‑le̱ nchroá‑ni nga kjoa̱ꞌaìkꞌá tsojmì xi tjín‑le̱.

32 Ti̱kjaꞌaitsjaon jokoan jè chjo̱on‑le̱ Lot.^e

33 To̱ꞌya‑ni xi nꞌión síkjájon‑le̱ yao‑le̱ nga kꞌoa̱sjentjaì kjoa̱bijnachon‑le̱,

to̱sa̱a si̱icha;

kꞌoa̱ to̱ꞌya‑ni xi si̱icha kjoa̱bijnachon‑le̱,

to̱saà kꞌoa̱sjentjaì.

34 Kꞌoa̱axin‑no kꞌia̱ nga koi ni̱tje̱n,

jaò xi kjiosòn ya̱ na̱chan;

jngo xi tjoé,

kꞌoa̱ xi ngìjngo si̱kꞌéjnaà.

35 Jaò yánchjín xi ñatje̱n tjióbꞌaoya nche̱e,

jngo xi tjoé,

kꞌoa̱ xi ngìjngo si̱kꞌéjnaà».

36 Jaò chjo̱ta̱ xi ñatje̱n tjiósíxá ya̱ jin jñá;

jngoò xi tjoé,

kꞌoa̱ xi ngìjngo si̱kꞌéjnaà.

37 Kꞌia̱ kinchja̱ jè chjo̱ta̱ xi ya̱ kòtꞌayàtꞌa‑le̱ Jesús kitsò‑le̱:

—Jñá‑nini nga kꞌoa̱koa̱n Nai.

Jesús kitsò‑le̱:

—Ya̱ jña sꞌe̱jna yao kꞌen,

ya̱a koa̱nña níké.