Choa̱ xi mangósòn‑kao̱ cho̱ꞌnda xi tsì kìxi̱, xi kjinèntsja tsojmì xi tjín‑le̱ nai‑le̱
16
Jesús kꞌoa̱ati̱ kitsò‑le̱ chjo̱ta̱ xi ya̱ kòtꞌayàtꞌa‑le̱:
«Tsakꞌéjna jngo chjo̱ta̱ nchi̱ná xi kisꞌe‑le̱ jngo cho̱ꞌnda xi tsakánèntsja tsojmì xi tjín‑le̱,
kꞌoa̱ jè cho̱ꞌnda xo̱kji kisꞌengi ya̱ ngixko̱n nai‑le̱ nga je tísíkje tsojmì‑le̱.
2 Kꞌia̱ jè nai‑le̱ kinchja̱‑le̱,
kꞌoa̱ kitsò‑le̱:
“Jmé‑ni én xo̱ tsò tìnchrꞌoe tꞌatsi̱.
Kꞌoa̱tꞌìn‑naì jòsꞌìn tiꞌmikoai̱ xá‑li̱ nga ji kisikanèntsja‑lè tsojmì xi tjín‑na,
nga̱ lìkoi ti̱ ji kjoánèntsja‑ni”.
3 Kꞌia̱ jè cho̱ꞌnda xo̱kji kitsò kjoa̱ꞌfaꞌaintsjen‑le̱:
“Jmé xi sꞌian nda̱ ndꞌai̱.
Nga̱ jè nai‑na̱ tífàꞌaà‑na xá‑na̱.
Tsà xá ꞌaí sꞌian,
lìkoi koa̱n‑na;
kꞌoa̱ tsà tao̱n sijésoàn,
koa̱n‑soaà‑na.
4 Je ꞌbe jme xi sꞌian jmé‑ni kꞌia̱ nga je tjóꞌa‑na xá‑na̱,
sꞌe̱‑nina ꞌya xi skoétjaò‑na ya̱ ndꞌia‑le̱”.
5 »Kꞌia̱ kinchja̱‑le̱ nga jngó jngó chjo̱ta̱ xi kitje̱n‑le̱ tsꞌe̱ nai‑le̱,
kitsò‑le̱ jè xi títjòn:
“Jótjín xi kitje̱n‑lì tsꞌe̱ nai‑na̱”.
6 Jè chjo̱ta̱ xi kitje̱n‑le̱ kitsò:
“Jngo ciento̱ chrjoa̱ xíné tjín‑ni”.
Kꞌia̱ jè cho̱ꞌnda xo̱kji kitsò‑le̱:
“Chjoaí xo̱n‑li̱ jña tjítꞌa‑lì,
ndi̱to̱n ti̱jnai,
kꞌoa̱ ñachàn‑te tꞌètꞌai”.
7 Kꞌia̱ kitsò ngìjngo‑le̱ chjo̱ta̱ xi kitje̱n‑le̱:
“Kꞌoa̱ ji,
jótjín xi kitje̱n‑lì”.
Kꞌia̱ jè chjo̱ta̱ xo̱kji kitsò:
“Jngo ciento̱ chꞌá trigo”.
Jè cho̱ꞌnda xo̱kji kitsò‑le̱:
“Chjoaí xo̱n‑li̱ jña tjítꞌa‑lì,
kꞌoa̱ ñokan tꞌètꞌai”.
8 »Kꞌoa̱ jè nai‑le̱ tsakꞌasjengꞌa jè cho̱ꞌnda xi tsì kìxi̱,
nga kisꞌe‑le̱ kjoa̱nkjìn‑to̱kòn josꞌìn nga kisꞌin;
nga̱ jè chjo̱ta̱ xi tsì bexkón Niná,
nꞌión tjín‑le̱ kjoa̱nkjìn‑tokòn jòsꞌìn nga síkao̱ xínkjín,
ti̱kꞌoa̱‑ni jè chjo̱ta̱ xi bexkón Niná.
9 Kꞌoa̱ an kꞌoa̱a xin‑no:
Ti̱kinjaon mìyo̱ kao̱ kjoa̱nchi̱ná xi tjín i̱ soꞌnde,
jmé‑ni nga kꞌia̱ nga je koa̱n‑tsìn‑no,
tjoétjaò‑nio ya̱ ndꞌia xi tjín ya̱ ngꞌajmi.
10 »Jè xi ma nìnꞌiótꞌa xi to̱ choa tjín‑ni,
kꞌoa̱ati̱ ma nìnꞌiótꞌa xi tse tjín‑ni;
to̱nga jè xi tsì kìxi̱ síxákao̱ xi to̱ choa tjín‑ni,
kꞌoa̱ati̱ lìkoi kìxi̱ síxákao̱ xi tse tjín‑ni.
11 Nga̱ tsà jè kjoa̱nchi̱ná xi tjín i̱ soꞌnde lìkoi koan‑no nga kìxi̱ kinìxákao̱o,
ꞌyá xi si̱intsja‑no jè kjoa̱nchi̱ná xi tsꞌe̱ ngꞌajmi.
12 Kꞌoa̱ tsà tsì koan‑no kinìkoìndao̱o tsojmì xi tsì tsao̱on,
ꞌyá xi tsjoá‑no xi ñaki tsao̱on koa̱n.
13 Ni̱jngo‑jìn cho̱ꞌnda xi koa̱n nga jaò nai si̱ixá‑le̱;
nga̱ jngo koa̱n‑chꞌaoke kꞌoa̱ xi ngìjngo koa̱n‑tsjoake,
axo̱ jngo xi skoe̱xkón kꞌoa̱ xi ngìjngo kꞌoa̱sjengi.
Lìkoi koa̱n si̱xá‑lao̱o Niná kꞌoa̱ kao̱ kjoa̱nchi̱ná».
14 Kꞌoa̱ti̱ jè chjo̱ta̱ fariseo xi nꞌión tsjoake tao̱n kinchrꞌoé ngayije kjoa̱ jè,
kꞌoa̱ to̱ tsakijnòkengꞌà Jesús.
15 Kꞌia̱ Jesús kitsò‑le̱:
«Jòn‑niò xi ti̱jòn chꞌàsje kìxi̱‑nio yao‑no ya̱ ngixko̱n chjo̱ta̱;
to̱nga jè Niná beè ni̱ma̱‑no;
nga̱ jè kjoa̱ xi ngìsa̱ nꞌión síchjí‑le̱ chjo̱ta̱,
ya̱ ngixko̱n Niná koiì jè xi nꞌión jndí.
Jè kjoa̱téxoma‑le̱ Niná koi̱tjosòn
16 »Jè kjoa̱téxoma‑le̱ Niná xi kiski Moisés kao̱ jè én xi kiski ngatsꞌi chjo̱ta̱ xi kinchja̱ya ngajao‑le̱ Niná ya̱a tje̱n jetꞌa kꞌia̱ nga jaꞌai Juan xi kiskanìsꞌen‑ngindá;
kꞌoa̱ kꞌia̱a saꞌnda tínòkjoa̱ya‑ni xi tꞌatsꞌe̱ jña batéxoma Niná,
kꞌoa̱ ngatsꞌi bꞌasjeè nganꞌión nga ya̱ me‑le̱ kjoa̱ꞌasꞌen.
17 To̱nga ngìsa̱a choa ñꞌain tjín nga kjoa̱ꞌato ngꞌajmi kao̱ soꞌnde,
ti̱kꞌoa̱‑ni nga jngo én xi tsꞌe̱ kjoa̱téxoma‑le̱ Niná xi tsì koi̱tjosòn.
Jesús bakóya tꞌatsꞌe̱ chjo̱ta̱ xi tsjion xínkjín
18 »To̱ꞌya‑ni xi tsjion chjo̱on‑le̱,
kꞌoa̱ tsà ngìjngo chjo̱on koi̱xan‑kao̱,
tísíchajngiì;
kꞌoa̱ jè chjo̱ta̱ xi bixan‑kao̱ jè chjo̱on xi kinjion,
kꞌoa̱ati̱ tísíchajngi.
Jè chjo̱ta̱ nchi̱ná kao̱ Lázaro
19 »Tsakꞌèjna jngo chjo̱ta̱ xi nꞌión nchi̱ná koan,
xi tsakꞌakjá najño chjí xi nꞌión nda kjoan,
kꞌoa̱ nchaon nchaon tsakjèn sꞌoí‑ni tsojmì xi nꞌión chjí.
20 Kꞌoa̱ti̱ tsakꞌèjna jngo chjo̱ta̱ yo̱ma̱ xi Lázaro tsakꞌìn xi tao̱n síjé,
xi jtsé yajon ngayije yao‑le̱,
xi ya̱ nìkꞌéjnajchro xo̱ntjoa̱ ndꞌia‑le̱ chjo̱ta̱ nchi̱ná,
21 kꞌoa̱ koanmeè‑le̱ nga koi koanski‑ni jè xkoa̱ xi tsaongi ya̱ yámìxa̱‑le̱ chjo̱ta̱ nchi̱ná;
kꞌoa̱ saꞌnda jè niáa faꞌai kꞌoa̱ komàyaà jtsé‑le̱.
22 »Kꞌoa̱ kichó ni̱chrjin nga kꞌen Lázaro,
kꞌoa̱ nkjìn cho̱ꞌnda ngꞌajmi‑le̱ Niná kikao̱,
ya̱ kisíkꞌéjnatꞌa‑le̱ Abraham;
kꞌoa̱ti̱ kꞌen jè chjo̱ta̱ nchi̱ná,
kꞌoa̱ kisꞌeñe.
23 Kꞌoa̱ ya̱ ꞌnde jña kijna lꞌí xi ni̱kꞌia‑jìn fìtsꞌao,
kiskòtsen ngꞌà jè chjo̱ta̱ xi nchi̱ná koan,
kꞌia̱ nga ya̱ tífaꞌá kjoa̱ñꞌain,
kꞌoa̱ kjiìn tsabe‑ni Abraham kao̱ Lázaro nga ya̱ tíjnatꞌa‑le̱.
24 Kꞌia̱ jè chjo̱ta̱ xi nchi̱ná koan,
nꞌión kinchja̱,
kitsò:
“Nꞌai Abraham,
jcha̱ma̱tokòn‑naí,
kꞌoa̱ ti̱kasén‑kon‑naí Lázaro nga kàtasíkaꞌnchi̱tjòn‑ni nandá jè na̱jmá‑ntsja,
jmé‑ni nga kàtasíkinjenchꞌán‑jon‑ni nijen;
nga̱ tseè kjoa̱ñꞌain tìfaꞌa i̱ jin lꞌí”.
25 To̱nga Abraham kitsò‑le̱:
“ꞌNdí,
ti̱kjaꞌaitsjain nga tsakꞌaì‑lì ngayije tsojmì xi kisꞌe‑lì kꞌia̱ nga tsakijnachoin ya̱ soꞌnde;
kꞌoa̱ Lázaro nꞌión tse kjoa̱ñꞌain tsakꞌèjnajin;
to̱nga ndꞌai̱ jeè tínìjekon i̱‑bi̱,
kꞌoa̱ ji kjoa̱ñꞌain tichjaꞌaì.
26 Kꞌoa̱ xi ngìjngo sa‑ni,
jngoò nga̱jao̱ xi nꞌión na̱nga̱ ti̱xꞌa̱ tíjnaꞌnchòbasen‑ná,
kꞌoa̱ to̱ꞌya‑ni xi me‑le̱ nga i̱ koai̱‑ni nga ya̱ koai̱kon‑no lìkoi koa̱n,
ni̱ jè‑jìn xi ya̱ tjió jña tijnai koa̱n koi̱nchroa i̱”.
27 »Kꞌia̱ kitsò jè chjo̱ta̱ xi nchi̱ná koan:
“Bꞌetsꞌoà‑lè-ni nꞌai,
nga ti̱kasaín Lázaro ya̱ ndꞌia‑le̱ nꞌai‑na̱,
28 nga̱ aòn ma‑ni ndsꞌe xi ya̱ sꞌa̱ tjió,
jmé‑ni nga Lázaro kàtatsòya‑nile̱ kꞌoa̱ jmé‑ni nga tsì kꞌoa̱ti̱ i̱ kàtanchroá‑ni tsànda jè i̱ ꞌnde kjoa̱ñꞌain xo̱kji”.
29 Kꞌia̱ Abraham kitsò‑le̱:
“Ya̱a tíjna‑le̱ kjoa̱téxoma‑le̱ Niná xi kiski Moisés kao̱ jè én xi kiski ngatsꞌi chjo̱ta̱ xi kinchja̱ya ngajao‑le̱ Niná;
ya̱ kàtabincháñon‑le̱”.
30 Kꞌia̱ jè chjo̱ta̱ xi nchi̱ná koan,
kitsò:
“Mai‑jìn nꞌai Abraham;
to̱nga tsà ꞌya‑ni xi je kꞌen xi koai̱kon‑le̱,
si̱ikꞌantjaìya‑jìn kjoa̱faꞌaitsjen‑le̱”.
31 To̱nga Abraham kitsò‑le̱:
“Tsà tsì bincháñon‑le̱ kjoa̱téxoma‑le̱ Niná xi kiski Moisés kao̱ én xi kiski ngatsꞌi chjo̱ta̱ xi kinchja̱ya ngajao‑le̱ Niná,
kꞌoa̱ati̱ lìkoi koan‑kjaín‑le̱ nda tsà jngo koi̱sótje̱njin‑nile̱ kꞌen nga koai̱kon‑le̱”».