Jè choa̱ xi mangósòn‑kao̱ barrè xi kicha
15
Ngatsꞌi chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ chjo̱ta̱jé tsakꞌétsꞌia̱kao̱ nga tsakinchatꞌachrian‑le̱ Jesús jmé‑ni nga koi̱nchañon‑nile̱,
2 kꞌoa̱ jè chjo̱ta̱ fariseo kao̱ chjo̱ta̱ xi kji kjoa̱téxoma‑le̱ Niná xi kiski Moisés tjiófaóyaché‑ni Jesús,
tjiótsò:
—Jè chjo̱ta̱ xo̱kji chjo̱ta̱jé nchja̱nda‑le̱ kꞌoa̱ ya̱a kjèn‑kao̱.
3 Kꞌia̱ Jesús kitsòya‑le̱ choa̱ jè xi mangósòn‑kao̱ jngo kjoa̱,
kitsò:
4 «ꞌYá‑ni jòn xi jngo ciento̱ barrè tjín‑le̱,
tsà jngo barrè‑le̱ si̱icha,
xi tsì tsà si̱ikatió xi ñokan kao̱ chrjaꞌaòn‑ño ya̱ ꞌnde tꞌaxìn‑tꞌa,
kꞌoa̱ koai̱kásjai xi kàcha,
jo saꞌnda nga koa̱nsjai‑le̱.
5 Kꞌoa̱ kꞌia̱nga je masjai‑le̱ xi kàcha kao̱o kjoa̱tsjoa bántjaìnchrja;
6 kꞌoa̱ kꞌia̱ nga bichò‑ni ya̱ ndꞌia‑le̱,
nchja̱maxkó‑le̱ mìyo̱‑le̱ kao̱ xi ya̱ ndai ndꞌia‑le̱ tjió,
nga tsò‑le̱:
“Ti̱tsjoakao̱‑naò,
nga̱ jeè kàmasjai‑nina jè barrè‑na̱ xi kicha tsàkai”.
7 Kꞌoa̱axin‑no nga kꞌoa̱sꞌìn ngìsa̱ tse kjoa̱tsjoa sꞌe̱ ya̱ ngꞌajmi xi tꞌatsꞌe̱ jngo chjo̱ta̱jé xi síkꞌantjaìya kjoa̱faꞌaitsjen‑le̱,
ti̱kꞌoa̱‑ni tsà tꞌatsꞌe̱ xi ñokan kao̱ chrjaꞌaòn‑ño chjo̱ta̱ kìxi̱ xi tsì machjén‑le̱ nga si̱ikꞌantjaìya kjoa̱faꞌaitsjen‑le̱.
Choa̱ xi mangósòn‑kao̱ tao̱n xi kicha
8 »Axo̱ tsà jngo chjo̱on xi te tao̱n chroa tjió‑le̱,
xi si̱icha jngo tao̱n‑le̱,
a tsí tsà kꞌoe̱etꞌa‑í lꞌí‑le̱,
kꞌoa̱ kꞌoe̱echa ya̱ ya ndꞌia‑le̱,
kꞌoa̱ ñaki ndaà koa̱asjai jo saꞌnda nga koa̱nsjai‑le̱.
9 Kꞌoa̱ kia̱nga je masjai‑le̱,
nchja̱maxkó‑le̱ yánchjín mìyo̱‑le̱ kao̱ yáchjín xi ya̱ ndai ndꞌia‑le̱ tjió,
kꞌoa̱tsò‑le̱:
“Ti̱tsjoakao̱‑naò,
nga̱ jeè kàmasjai‑nina jè tao̱n chroa‑na̱ xi kicha tsàkai”.
10 Kꞌoa̱axin‑no nga kꞌoa̱ti̱ sꞌìn tjín kjoa̱tsjoa ya̱ ngixko̱n cho̱ꞌnda ngꞌajmi‑le̱ Niná xi tꞌatsꞌe̱ jngo chjo̱ta̱jé xi síkꞌantjaìya kjoa̱faꞌaitsjen‑le̱».
Choa̱ xi mangósòn‑kao̱ jngo ti xi kicha
11 Jesús kꞌoa̱ati̱ kitsò‑sa:
«Jngo chjo̱ta̱ xi jaò xti xꞌi̱n tjió‑le̱;
12 kꞌoa̱ jè xi ma ꞌndí kitsò‑le̱ nꞌai‑le̱:
“Nꞌai,
tꞌai̱‑naí jotjín tsojmì xi an bꞌakao̱‑na”;
kꞌoa̱ jè nꞌai‑le̱ kisixkoa̱ya‑le̱ jotjín tsojmì xi bꞌakao̱‑le̱ nga jngó jngó.
13 Ti̱ kje nkjìn ni̱chrjin faꞌato‑ni,
jè ti xi ma ꞌndí tsakꞌéxkó ngayije tsojmì‑le̱,
kjin ki ya̱ jngo ꞌnde jña tꞌaxìn;
kꞌoa̱ ya̱ kisikjeya ngayije tsojmì xi tsakꞌaì‑le̱ kꞌoa̱ nꞌión kisikitsón kjoa̱bijnachon‑le̱.
14 Kꞌoa̱ kꞌia̱ nga je kisikjeya ngayije,
jngo kjinchrá xi nꞌión,
jaꞌai ya̱ ꞌnde xo̱kji,
tsakꞌétsꞌia̱ nga kjoa̱ñꞌain tsakjaꞌá nga koan‑tsìn‑le̱ xi tsakjèn.
15 Kꞌoa̱ kikajngixá,
kikon jngo‑le̱ chjo̱ta̱ xi ya̱ tsꞌe̱ ꞌnde xo̱kji,
kꞌoa̱ chjo̱ta̱ xi ya̱ tsꞌe̱ kitsjoaxá‑le̱,
kisikasén ya̱ jña tjín‑le̱ nangi jmé‑ni nga kàtakoꞌnda‑ni chi̱nga̱.
16 Kꞌoa̱ koanme‑le̱ nga koi koa̱nski‑ni jè to xi kjèn chi̱nga̱,
to̱nga ni̱ꞌya‑jìn xi kitsjoa‑le̱.
17 Kꞌoa̱ kꞌia̱ nga koan‑ndaya‑ni kjoa̱faꞌaitsjen‑le̱,
kitsò:
“¡A kꞌoa̱akji cho̱ꞌnda tjín ya̱ ndꞌia‑le̱ nꞌai‑na̱ xi saꞌnda njen‑ngi‑le̱ tsojmì xi kjèn,
kꞌoa̱ an jeè tìmꞌen kjinchrá i̱‑bi̱!
18 To̱sa̱a tìfi ngìndia‑nia kꞌoa̱ kjoínchrꞌoè nꞌai‑na̱,
kꞌoa̱ i̱ xín‑le̱:
‹Nꞌai,
kisokojé‑na ngixko̱n Xi Tíjna Ngꞌajmi kꞌoa̱ kao̱ tꞌatsi̱.
19 Lìkoi ti̱ bakìn‑nina nga ꞌndí‑li̱ kꞌoín‑naí;
to̱ kꞌoa̱sꞌìn jcha̱tokòn‑naí josꞌìn ꞌyatokoìn jngo cho̱ꞌnda‑li̱›”.
20 Kꞌoa̱ kinchroa,
jaꞌainchrꞌoè nꞌai‑le̱.
»Kꞌoa̱ kia̱nga sꞌa̱‑sa kjin tínchroá,
jè nꞌai‑le̱ tsabe,
kꞌoa̱ koanma̱ke,
kitòkanchrꞌoè,
kitsoakjásin,
kꞌoa̱ tsakꞌétꞌatsꞌoà.
21 Kꞌoa̱ jè ti kitsò‑le̱ nꞌai‑le̱:
“Nꞌai,
tsakajngijé‑nià ngixko̱n Xi Tíjna Ngꞌajmi kꞌoa̱ kꞌoa̱ati̱ tsakajngijé xi tꞌatsi̱,
kꞌoa̱ lìkoi ti̱ bakìn‑nina nga ꞌndí‑li̱ kꞌoín‑naí”.
22 To̱nga jè nꞌai‑le̱ ti kitsò‑le̱ cho̱ꞌnda‑le̱:
“Chꞌa̱sjao jè najño xi ngìsa̱ nda kji,
kꞌoa̱ ti̱kꞌakjaó;
kꞌoa̱ tꞌèya jngo‑lao̱o tao̱n‑ngo ya̱ na̱jmá‑ntsja,
kꞌoa̱ tjaya‑lao̱o jténꞌó.
23 Kꞌoa̱ nchroákao̱o jè nchra̱ja̱ ꞌndí xi nchjá kji kꞌoa̱ ti̱kꞌaon,
kꞌoa̱ koi̱chà kꞌoa̱ sꞌoí kꞌoéjnaà;
24 nga̱ jè ti‑na̱ xo̱kji jeè kꞌen tsàkai,
kꞌoa̱ je jaꞌáya‑nile̱;
kicha tsàkai,
kꞌoa̱ jeè kàmasjai‑ni”.
Kꞌoa̱ tsakꞌétsꞌia̱kao̱ nga kisitsjoa.
25 »Kꞌoa̱ jè ti‑le̱ xi majchínga ya̱ tíjna ya̱ jin tsojmì ntjè;
kꞌia̱ nga jaꞌai chrian ya̱ ndꞌia‑le̱,
kinchrꞌoé nga tífane kꞌoa̱ nga tíchà;
26 kꞌia̱ kinchja̱ jngo‑le̱ cho̱ꞌnda,
kiskònangi‑le̱ án‑ni kꞌoa̱ kjima‑ni.
27 Jè cho̱ꞌnda kitsò‑le̱:
“Jé ndsꞌai xi je kàfaꞌai‑ni;
kꞌoa̱ jé nꞌai‑li̱ xo̱ kàtsò nga kànìkꞌen jè nchra̱ja̱ ꞌndí xi nchjá kji,
koiì nga nda sꞌìn kàfaꞌai‑ni”.
28 Kꞌia̱ koanjti‑le̱,
kꞌoa̱ koan‑kai‑le̱ nga jaꞌasꞌen ndꞌia.
Kꞌia̱ kitjo jè nꞌai‑le̱,
kꞌoa̱ tsakꞌétsꞌoa‑le̱ nga kàtafaꞌasꞌen ndꞌia.
29 To̱nga jè,
kitsò‑le̱ nꞌai‑le̱:
“Koe̱e‑ni,
jeè nkjìn nó nga tìsixá‑lè joni jngo cho̱ꞌnda,
ni̱jngokꞌà‑jìn tìfàꞌa̱tontjaì‑lè,
kꞌoa̱ ni̱sajngokꞌà‑jìnlà nga bꞌaì jngo‑naí tìndso̱ nga koakje̱n‑kao̱ sꞌoí‑jiàn mìyo̱‑na̱.
30 To̱nga kꞌia̱ nga kàfaꞌai‑ni jè ti xo̱kji‑lì xi kisikjeya tsojmì‑li̱ kao̱ yánchjín xi yao‑le̱ baténa,
kànìkꞌen‑lai̱ nchra̱ja̱ ꞌndí xi nchjá kji”.