Choa̱ xi mangósòn‑kao̱ josꞌìn machjén nga chja̱koa̱ Niná
18
Jesús kꞌoa̱ati̱ tsakakóya jngo‑le̱ choa xi mangósòn‑kao̱ jngo kjoa̱ xi tꞌatsꞌe̱ jokji nꞌión machjén nga koi̱nòkjoa̱koa̱a Niná ngantsjaì ni̱chrjin,
kꞌoa̱ nga lìkꞌia si̱kijtaà,
2 kitsò:
«Ya̱ jngo na̱xi̱nandá‑nꞌión tsakꞌèjna jngo chjo̱ta̱xá xi bꞌéndajin kjoa̱,
xi ni̱ kitsokjòn‑kejìn Niná,
ni̱ chjo̱ta̱‑jìn tsabexkón.
3 Kꞌoa̱ti̱ tsakꞌèjna ya̱ na̱xi̱nandá‑nꞌión xo̱kji jngo chjo̱on kꞌàn,
kꞌoa̱ ya̱ tsakꞌamjen kjajétꞌa‑le̱ chjo̱ta̱xá xo̱kji,
nga kitsò:
“Tꞌèndajin‑naí jè kjoa̱ xi tjín‑na kao̱ jè chjo̱ta̱ xi tike‑na”.
4 Kꞌoa̱ jè chjo̱ta̱xá xo̱kji koan‑kai‑le̱ nga ndi̱to̱n tsakꞌéndajin‑le̱ kjoa̱‑le̱;
to̱nga xi koan‑tse‑ni kitsò ya̱ jin kjoa̱faꞌaitsjen‑le̱:
“Nda tsà tsì tsokjon‑ke Niná,
ni̱ ꞌbexkón‑jiàn chjo̱ta̱,
5 to̱nga to̱koiì,
nga jè chjo̱on kꞌàn xo̱kji nꞌión tífaꞌaisísi‑na,
to̱sa̱a kꞌoendajin‑le̱ kjoa̱‑le̱,
nga̱ tsà to̱ si to̱ nda i̱ kjoa̱ꞌaíkon‑na,
to̱chaàn tsì ti̱ koa̱n‑tsejta‑nia”».
6 Kꞌia̱ kitsò jè Nai‑ná:
«Ti̱nchaño jo kitsò jè chjo̱ta̱xá xi bꞌéndajin kjoa̱ xi tsì tsà kao̱ kjoa̱kìxi̱ bꞌéndajin‑ni kjoa̱.
7 Kꞌoa̱ jè Niná,
a tsí kꞌoe̱endajin‑le̱ kjoa̱‑le̱ jè chjo̱ta̱ xi xá tsakjaꞌájin‑ni,
xi jngotjò ngosá nchja̱mingi‑le̱ nga ni̱chrjin kao̱ nga ni̱tje̱n.
A nꞌión tse ska̱nìchrjin‑le̱ nga si̱isin‑le̱
8 Kꞌoa̱axin‑no nga ndi̱to̱n kꞌoe̱endajin‑le̱.
To̱nga kꞌia̱ nga kjoa̱ꞌaí ngìndia‑ni jè ꞌNdí‑le̱ Chjo̱ta̱,
a koa̱nsjai‑le̱ i̱ soꞌnde chjo̱ta̱ xi makjaín‑le̱ tꞌatsꞌe̱».
Choa̱ xi mangósòn‑kao̱ jngo chjo̱ta̱ fariseo kao̱ jngo chjo̱ta̱ xi síkꞌéchjí tao̱n‑basen
9 Jesús,
kꞌoa̱ati̱ kitsòya‑le̱ jè choa̱ xo̱kji,
xi mangósòn‑kao̱ jngo kjoa̱,
jè chjo̱ta̱ xi ti̱jè bꞌasje kìxi̱‑ni yao‑le̱,
kꞌoa̱ xi bꞌasjengi xi ngìkꞌa,
kitsò:
10 «Jaò chjo̱ta̱ kimi ya̱ nditsin‑le̱ yo̱ngo̱ nga kikjákao̱ Niná:
Jngo xi chjo̱ta̱ fariseo,
kꞌoa̱ xi ngìjngo chjo̱ta̱ xi tao̱n síkꞌéchjí tꞌatsꞌe̱ chjo̱ta̱xá títjòn‑le̱ Roma.
11 Jè chjo̱ta̱ fariseo sén‑ndo‑ni,
nga tífàkao̱ Niná ya̱ jin ni̱ma̱‑le̱ títsò:
“Niná,
tsjoaà‑lè kjoa̱nda nga̱ tsì tsà kꞌoa̱kjoan‑jiàn jokjoan jè chjo̱ta̱ xikꞌa,
nga chjo̱ta̱ ché,
nga chjo̱ta̱ xi tsìn‑le̱ kjoa̱kìxi̱,
nga chjo̱ta̱ chajngi,
ni̱ kꞌoa̱‑jìn kjoan‑jiàn jokjoan chjo̱ta̱ xo̱kji sénjna ya̱,
xi tao̱n síkꞌéchjí tꞌatsꞌe̱ chjo̱ta̱xá títjòn‑le̱ Roma;
12 kꞌia̱ nga ñato ni̱chrjin jaò ni̱chrjin bate̱jnanchjan xi tꞌatsi̱,
kꞌoa̱ tsjoaà‑lè xi jngoyá nìjaí xi te ya,
xi tꞌatsꞌe̱ ngayije jotjín njen‑na”.
13 »To̱nga jè chjo̱ta̱ xi tao̱n síkꞌéchjí tꞌatsꞌe̱ chjo̱ta̱xá títjòn‑le̱ Roma,
kjiìn tsakasènjna‑ni,
saꞌnda lìkoi tsò kon nga skótsen‑ngꞌà,
to̱sa̱a to̱ ꞌme̱‑le̱ tísíjtsin‑tꞌa,
nga títsò:
“Niná,
jcha̱ma̱tokòn‑naí,
nga̱ chjo̱ta̱jé‑nià an”.
14 Kꞌoa̱axin‑no,
nga jè chjo̱ta̱ xo̱kji kꞌia̱ nga kijen‑ni ndꞌia‑le̱ jeè kitjo kìxi̱ ya̱ ngixko̱n Niná ti̱kꞌoa̱‑ni jè xi ngìjngo xi chjo̱ta̱ fariseo;
nga̱ to̱ꞌya‑ni xi ngꞌa bꞌasje yao‑le̱,
Niná kꞌao̱je̱n‑ngi;
kꞌoa̱ jè xi nangi bꞌasje yao‑le̱,
Niná ngꞌa si̱ikꞌéjna».
Jesús síchikon‑tꞌain xti ꞌndí
15 Tjín kꞌa chjo̱ta̱ xi xti ꞌndí faꞌaikao̱tꞌa‑le̱ Jesús,
jmé‑ni nga kàtasíchikon‑tꞌain‑ni;
kꞌia̱ nga tsabe kjoa̱ jè,
jè chjo̱ta̱ xi ya̱ kòtꞌayàtꞌa‑le̱ kinchja̱tikao̱ jè xi kichòkao̱ xti ꞌndí.
16 To̱nga Jesús kinchja̱bꞌàkjá‑le̱ xti ꞌndí kꞌoa̱ kitsò‑le̱ jè chjo̱ta̱ xi ya̱ kòtꞌayàtꞌa‑le̱:
—Tꞌaìꞌnde‑lao̱o jè xti ꞌndí nga an kàtanchroákon‑na,
alì bꞌèchjoàjìn‑lao̱o;
nga̱ jè xi kꞌoa̱kjoan joni tsà xti ꞌndí,
tsꞌe̱e ya̱ jña batéxoma Niná.
17 Ñaki kìxi̱i xi xin‑no,
to̱ꞌya‑ni xi tsì kꞌoa̱sꞌìn kjoétjaò jña batéxoma Niná joni jngo ti ꞌndí,
lìkoi koa̱n kjoa̱ꞌasꞌen ya̱.
Jè chjo̱ta̱ nchi̱ná xi tsì kitje̱n‑ngi‑le̱ Jesús
18 Jngo chjo̱ta̱ títjòn kiskònangi‑le̱,
kitsò:
—Ji chjo̱ta̱ nda xi bakòyai,
jmé xi sꞌian nga tsꞌa̱n koa̱n kjoa̱bijnachon xi tsìkꞌia fetꞌa.
19 Jesús kitsò‑le̱:
—Án‑ni nga chjo̱ta̱ nda ꞌmì‑ninaí.
Ni̱jngo‑jìn chjo̱ta̱ xi nda,
to̱ jngoò jè Niná xi nda.
20 Jeè ꞌyai jmé xi bꞌénè kjoa̱téxoma‑le̱ Niná,
nga tsò:
“Alì nìchajngi‑jìn;a
alì nìkꞌen‑jìn;b
alì nìché‑jìn;c
alì jè‑jìn én xi tsì kꞌoa̱tjín fanaì xi kja̱ꞌaí;d
jcha̱xkoín nꞌai‑li̱ kao̱ na̱‑li̱”.e
21 Jè chjo̱ta̱ títjòn kitsò:
—Ngayije jme xi tinìkꞌaxki̱,
kꞌoa̱asꞌìn tìsikitjosoàn ngantsjaì jo saꞌnda nga sꞌa̱ xtia.
22 Kꞌia̱nga kinchrꞌoé Jesús én jè,
kitsò‑le̱:
—To̱ jo ngìjngo‑sa kjoa̱ xi cha‑lì:
Ta̱tènai ngayije jme xi tjín‑lì,
kꞌoa̱ tꞌaì‑lai̱ jè xi yo̱ma̱ tjió,
kꞌoa̱ sꞌe̱e‑lì kjoa̱nchi̱ná ya̱ ngꞌajmi;
kꞌoa̱ nchroaí,
nchroátje̱n‑ngi‑naí.
23 Kꞌia̱ nga chjo̱ta̱ xo̱kji kinchrꞌoé én xo̱ tsò,
nꞌión koanba‑le̱,
nga̱ nꞌión nchi̱ná.
24 Kꞌia̱nga tsabe Jesús nga nꞌión koanba‑le̱ chjo̱ta̱ xo̱kji,
kitsò:
—Jmé kꞌoa̱sìkji ñꞌain koa̱n‑nile̱ nga kjoa̱ꞌasꞌen ya̱ jña batéxoma Niná jè chjo̱ta̱ xi kjoa̱nchi̱ná tjín‑le̱.
25 Nga̱ to̱ ngìsa̱a choa ñꞌain tjín nga kjoa̱ꞌasꞌen ya̱ xko̱n nindo jngo cho̱ chꞌá xi camello ꞌmì,
ti̱kꞌoa̱‑ni nga jngo chjo̱ta̱ nchi̱ná kjoa̱ꞌasꞌen ya̱ jña batéxoma Niná.
26 Kꞌoa̱ jè chjo̱ta̱ xi kinchrꞌoé‑le̱ én xo̱ tsò,
kitsò:
—ꞌYá‑ni xi koa̱n koi̱tjontjaì tsòkꞌoa̱.
27 Kꞌia̱ Jesús kitsò‑le̱:
—Jè kjoa̱ xi lìkoi ma‑le̱ kꞌoa̱sꞌín chjo̱ta̱,
Niná ma‑le̱ kꞌoa̱sꞌín.
28 Kꞌia̱ Pedro kitsò:
—Koe̱e‑ni,
ji̱n‑ji̱n jeè kinìkatoí‑ji̱n ngayije jme xi tjín‑naji̱n,
kꞌoa̱ timatje̱n‑ngi‑laìji̱n.
29 Kꞌia̱ Jesús kitsò‑le̱:
—Ñaki kìxi̱i xi xin‑no,
nga ni̱jngo‑jìn xi je kisikatió ndꞌia‑le̱,
axo̱ xijchá‑le̱,
axo̱ ndsꞌe̱,
axo̱ chjo̱on‑le̱,
axo̱ xti‑le̱,
xi to̱ tꞌatsꞌe̱ jña batéxoma Niná,
30 xi tsì ngìsa̱ sa tse kꞌoai̱‑le̱ ni̱chrjin xi tiyoaà ndꞌai̱,
kꞌoa̱ jè ni̱chrjin xi sꞌa̱ nchroá kꞌoai̱‑le̱ kjoa̱bijnachon xi tsìkꞌia fetꞌa.
Ngìjngo kꞌa Jesús kitsòya tꞌatsꞌe̱ kjoa̱biya‑le̱ kꞌoa̱ kao̱ kjoa̱faꞌáya‑le̱
31 Jesús kikao̱tꞌaxìn chjo̱ta̱‑le̱ xi tejaò xi xá kiskoéjin‑ni,
kitsò‑le̱:
«Koe̱e‑ni,
jeè timangín‑miaà ya̱ Jerusalén,
kꞌoa̱ koi̱tjosòn ngayije kjoa̱ xi tjítꞌa tꞌatsꞌe̱ ꞌNdí‑le̱ Chjo̱ta̱,
josꞌìn kiski ngatsꞌi chjo̱ta̱ xi kinchja̱ya ngajao‑le̱ Niná.
32 Nga̱ ya̱a koa̱ntsjatꞌa chjo̱ta̱ xi tsì tsà judío‑jìn,
koi̱jnòkeè,
koi̱nchja̱ꞌaon‑le̱ kꞌoa̱ kꞌoe̱echrájoòn.
33 Kꞌoa̱ kꞌia̱ nga je koa̱a‑le̱ chrjoa̱xín xi ki̱cha̱ tjiójkò,
si̱ikꞌen;
to̱nga xi koa̱n jàn‑ni ni̱chrjin kjoa̱ꞌáyajin‑nile̱ kꞌen».
34 To̱nga jè chjo̱ta̱ xi ya̱ kòtꞌayàtꞌa‑le̱ ni̱jme‑jìn xi koanjin‑le̱ jè kjoa̱ xi kitsò‑le̱,
nga̱ jè én jè‑bi̱ kisꞌeꞌmaà‑le̱,
kꞌoa̱ lìkoi koan‑cho̱ya‑le̱ jme xi tíꞌmì‑le̱.
Jngo chjo̱ta̱ xka̱ xi ya̱ na̱xi̱nandá‑nꞌión Jericó tsꞌe̱ koan‑tsèn‑le̱
35 Kꞌoa̱koan kꞌia̱nga kichòchrian Jesús ya̱ na̱xi̱nandá‑nꞌión Jericó,
jngo chjo̱ta̱ xka̱ tíjna ya̱ ndai ndia̱a nga tísíjé tao̱n;
36 kꞌoa̱ kꞌia̱ nga kinchrꞌoé‑le̱ jè chjo̱ta̱‑nkjìn xi ya̱ tjiófaꞌa,
kiskònangi jmé xi kjima.
37 Kꞌoa̱ tsakꞌìn‑le̱ nga jè Jesús xi Nazaret tsꞌe̱ xi ya̱ tífaꞌa.
38 Kꞌia̱ nꞌión kinchja̱,
kitsò:
—¡Jesús,
xi ntje̱‑le̱ David tje̱n‑ni,
jcha̱ma̱tokòn‑naí!
39 Kꞌoa̱ ngatsꞌi chjo̱ta̱ xi tje̱n‑títjòn kinchja̱tikao̱ jmé‑ni nga kàtabꞌèjnajyò‑ni;
to̱nga jè tsakꞌétsꞌia̱kao̱ nga ngìsa̱ sa nꞌión kinchja̱ kitsò:
—¡Ji xi ntje̱‑le̱ David tje̱n‑ni,
jcha̱ma̱tokòn‑naí!
40 Kꞌia̱ Jesús tsakasènjna,
tsakꞌénè nga kàtafìchjaꞌà‑le̱;
kꞌia̱nga jaꞌaikòn‑le̱ chjo̱ta̱ xka̱,
kiskònangi‑le̱,
41 kitsò‑le̱:
—Jmé xi me‑lì nga sikao̱‑lè.
Kꞌoa̱ jè chjo̱ta̱ xka̱ kitsò:
—Nai,
meè‑na nga kàtamatsen‑na.
42 Jesús kitsò‑le̱:
—Kàtamatsen‑lì,
jé kjoa̱makjaín‑li̱ kàbꞌasjentjaì‑lì.
43 Kꞌia̱ jè chjo̱ta̱ xka̱ kjoan koan‑tsen‑le̱,
kꞌoa̱ kitje̱n‑ngi‑le̱ Jesús,
tsakꞌasjejeya kao̱‑ni Niná;
kꞌoa̱ ngatsꞌi chjo̱ta̱,
kꞌia̱nga tsabe kjoa̱ jè,
kꞌoa̱ati̱ tsakꞌasjejeya Niná.