«Nga̱ ya̱ jña batéxoma jè xi tíjna ya̱ ngꞌajmi,

ya̱a mangósòn‑kao̱ jngo chjo̱ta̱ xi nai‑le̱ nangi ma,

xi ta̱njiòn‑ya kikásjai cho̱ꞌnda xi si̱ixájin jña kjintjè‑le̱ totseè.

2 Kꞌoa̱ kꞌia̱ nga je tsakꞌéndakao̱ cho̱ꞌnda nga kꞌoa̱tjín kꞌoe̱echjí‑le̱ jotjín sꞌechjí‑le̱ cho̱ꞌnda nga jngo ni̱chrjin,

kꞌia̱ kisikasén ya̱ jña kjintjè‑le̱ totseè.

3 Jè nai‑le̱ nangi ngìndia kitjo ndꞌia‑le̱,

je‑la̱ choa̱ ñajan nga ta̱njiòn,

kꞌoa̱ tsabe sa chjo̱ta̱ xi to̱ jyò tjió ya̱ jin ndi̱tsi̱n;

4 kꞌoa̱ kitsò‑le̱:

“Kꞌoa̱ti̱ tangín ni̱xaó tsànda‑jòn ya̱ nangi jña kjintjè‑na totseè,

kꞌoa̱ an tsjoa‑no chjí‑no jotjín xi kìxi̱”.

Kꞌoa̱ jè cho̱ꞌnda xo̱kjoan kisíxá.

5 Kꞌoa̱ jè nai‑le̱ nangi kitjo ngìndia ndꞌia‑le̱ kꞌia̱ nga je me nchisen kꞌoa̱ nga je me choa̱ jan nga koanxòn,

to̱jo kꞌoa̱kisꞌin.

6 Kꞌoa̱ ngìndia kitjo nga jeme choa̱ aòn nga koanxòn,

koansjai sa‑le̱ chjo̱ta̱ xi to̱ jyò tjió;

kꞌoa̱ kitsò‑le̱:

“Án‑ni nga to̱ i̱ jyò tìyo‑nio bꞌajndà ni̱chrjin”.

7 Kꞌia̱ jè kitsò:

“Koiì nga kje ꞌya xi tsjoáxá‑naji̱n”.

Jè nai‑le̱ nangi kitsò‑le̱:

“Kꞌoa̱ti̱ tangín ni̱xaó tsànda jòn ya̱ jña kjintjè‑na totseè,

kꞌoa̱ kꞌoa̱i‑no chjí‑no jotjín xi kìxi̱”.

8 »Kꞌia̱ nga je koanxòn,

jè nai‑le̱ nangi jña kjintjè totseè,

kitsò‑le̱ jè cho̱ꞌnda xi kjinèntsja tsojmì xi tjín‑le̱:

“Ti̱nókjoa̱‑lai̱ jè cho̱ꞌnda xi kàfìsíxá kꞌoa̱ tꞌèchjí‑lai̱ xá ni̱chrjin‑le̱,^a

jè tꞌètsꞌia̱kao̱‑ni xi skan kàfìsíxá kꞌoa̱ jè xi títjòn kàfì ti̱kjetꞌa‑ni”.

9 Kꞌoa̱ kꞌia̱ nga jaꞌai xi je me choa̱ aòn kisíxá,

kiskoé chjí‑le̱ nga jngó jngó,

jotjín machjí‑le̱ cho̱ꞌnda nga jngo ni̱chrjin.

10 Kꞌia̱ nga jaꞌai jè xi títjòn kisixá,

kisikꞌaitsjen nga ngìsa̱ tse koa̱n‑chjí‑le̱;

to̱nga kꞌoa̱ati̱ tjín kisꞌechjí‑le̱ jotjín machjí‑le̱ cho̱ꞌnda nga jngo ni̱chrjin.

11 Kꞌoa̱ nga je tsakꞌaì‑le̱ chjí‑le̱,

chꞌaosꞌìn kisikꞌaxki̱ jè nai‑le̱ nangi,

12 kitsò:

“Jè xi skan kàfìsíxá,

to̱ jngotjò kàsíxá,

kꞌoa̱ kꞌoa̱ati̱ tjín kàbꞌéchjí‑lai̱ jotjín kàbꞌéchjí‑naíji̱n,

xi nꞌión kànìxaì‑ji̱n kàbꞌajnda ni̱chrjin,

kꞌoa̱ kànìkjaín‑lai̱‑ji̱n ndoá”.

13 Jè nai‑le̱ nangi kinchja̱ kitsò jngo‑le̱ cho̱ꞌnda xo̱kjoan:

“ꞌNdí mìyo̱,

alì jme xi chꞌao tìsikao̱‑lè;

a tsí kàkjen‑ndia̱a‑nálì na̱ti nga kꞌoa̱tjín kꞌoechjí‑lè jotjín machjí‑le̱ cho̱ꞌnda nga jngo ni̱chrjin.

14 Chjoaí jè xi ji bꞌakao̱‑lì,

kꞌoa̱ tꞌin;

to̱nga meè‑na nga kꞌoa̱ti̱ tjín tsjoa‑le̱ jè xi kàfetꞌa‑ni jotjín tìtsjoa‑lè ji.

15 A tsí tiꞌndè‑na nga kꞌoa̱sꞌian josꞌìn me‑na kao̱ jme xi tsꞌa̱n.

Axo̱ maxìn‑tokòn‑ní nga nda‑jiàn chjo̱ta̱”.

16 »Kꞌoa̱a koa̱n,

jè xi tjió títjòn kjoe̱tꞌa‑ni,

kꞌoa̱ jè xi fetꞌa‑ni,

jé koa̱tió títjòn;

nga̱ nkjìn xi tínòkjoa̱‑le̱,

to̱nga to̱ choaà xi tjoéjin».

17 Kꞌia̱ nga tje̱nyandia̱a nga tífìmi Jesús ya̱ Jerusalén,

kikao̱tꞌaxìn chjo̱ta̱‑le̱ xi tejaò xi xá kiskoéjin‑ni xi ya̱ kòtꞌayatꞌa‑le̱,

kꞌoa̱ kitsò‑le̱:

18 —Koe̱e‑ni,

ya̱a Jerusalén timangín‑miaà,

kꞌoa̱ jè ꞌNdí‑le̱ Chjo̱ta̱ ya̱a kꞌoa̱n‑ntsjatꞌa na̱ꞌmi xi tjió títjòn‑le̱ na̱ꞌmi,

kꞌoa̱ kao̱ chjo̱ta̱ xi kji kjoa̱téxoma‑le̱ Niná xi kiski Moisés,

kꞌoa̱ tsjoá én‑le̱ nga kàtanìkꞌen;

19 kꞌoa̱ ya̱a tsjoátꞌa‑le̱ chjo̱ta̱ xi tsì tsà judío‑jìn,

jmé‑ni nga koi̱jnòke‑ni,

koa̱a‑le̱ kao̱ chrjoa̱xín xi ki̱cha̱ tjiójkò,

kꞌoa̱ koa̱atꞌa krò;

to̱nga xi koa̱n jàn‑ni ni̱chrjin kjoa̱ꞌáyajin‑nile̱ kꞌen.

20 Kꞌia̱ jè chjo̱on‑le̱ Zebedeo kao̱ xti‑le̱ tsakinchabꞌàkjátꞌa‑le̱ Jesús,

kꞌoa̱ jè chjo̱on tsakajnajten‑tꞌa ngi ndso̱ko̱ Jesús,

kꞌoa̱ jngo kjoa̱nda kisijé‑le̱.

21 Jesús kitsò‑le̱:

—Jmé xi me‑lì.

Jè chjo̱on kitsò:

—Tꞌè‑naì nga ya̱ jña koa̱tèxomai,

jè ngajaò xti‑na̱ xo̱kjoan ya̱ kàtabatiòtꞌa‑lì,

jngo ya̱ ngakìxi̱‑li̱,

kꞌoa̱ jè xi ngìjngo ya̱ ngaskón‑li̱.

22 Kꞌia̱ kinchja̱ Jesús,

kitsò:

—Lìkoi ꞌyao jme xi nìjaó.

A koa̱an sꞌio̱yao cho̱tsín kjoa̱ñꞌain xi an skꞌoi̱ya,

kꞌoa̱ a koa̱an sꞌe̱jtsa‑naò kjoa̱ñꞌain josꞌìn nga an sꞌe̱jtsanè‑na.

Kꞌoa̱ Jacobo kao̱ Juan kitsò:

—Koa̱an‑naji̱n.

23 Jesús kitsò‑le̱:

—Xi kjoa̱kìxi̱,

jè cho̱tsín xi an skꞌoi̱ya sꞌio̱ya‑nió,

kꞌoa̱ jè kjoa̱sꞌejtsanè xi an tísꞌejtsanè,

kꞌoa̱ati̱sꞌìn sꞌe̱jtsa‑naò;

to̱nga xi ya̱ koi̱yotꞌa‑naó ngakìxi̱‑na̱ kao̱ ngaskón‑na̱,

lìtsà an bꞌakao̱‑na nga tsjoa‑no,

jé kꞌoai̱‑le̱ ꞌya‑ni xi jè Nꞌai‑na̱ tsakatiónda‑le̱ nga tsjoá‑le̱.

24 Kꞌia̱ nga kinchrꞌoé jè én xo̱ tsò jè chjo̱ta̱ xi ngi te xi xá kiskoéjin‑ni Jesús,

koanjti‑le̱ xi tꞌatsꞌe̱ chjo̱ta̱ xi jaò.

25 Kꞌia̱ Jesús,

kinchja̱‑le̱ chjo̱ta̱‑le̱ xi tejaò xi xá kiskoéjin‑ni,

kitsò‑le̱:

—ꞌya‑niò nga jè chjo̱ta̱xá títjòn‑le̱ na̱xi̱nandá‑yꞌai batéxoma‑le̱ josꞌìn me‑le̱,

kꞌoa̱ jè xi xá ngꞌa tjín‑le̱ síkꞌatonè‑le̱ kjoa̱téxoma.

26 To̱nga xi ya̱ jin‑no jòn lìkoi tjínè‑le̱ kꞌoa̱ koa̱n,

to̱ꞌya‑ni xi me‑le̱ nga ngꞌa kꞌoéjna‑no,

tjínè‑le̱ nga to̱sa jè cho̱ꞌnda‑no kàtama,

27 kꞌoa̱ to̱ꞌya‑ni xi me‑le̱ nga jè kꞌoéjna títjòn‑no tjínè‑le̱ nga cho̱ꞌnda‑no kàtama;

28 joni jè ꞌNdí‑le̱ Chjo̱ta̱,

alì tsà koi xá jaꞌai‑ni nga cho̱ꞌnda sꞌe̱‑le̱,

to̱saà koi xá jaꞌai nga jè xi cho̱ꞌnda koa̱n,

kꞌoa̱ jaꞌai tsjoá kjoa̱bijnachon‑le̱ nga jaꞌai kꞌéchjí‑ntjaì jmé‑ni nga nkjìn chjo̱ta̱ kàtabitjontjaì‑ni.

29 Kꞌia̱ nga tíbìtjo‑ni ya̱ na̱xi̱nandá‑nꞌión Jericó Jesús kao̱ chjo̱ta̱ xi ya̱ kòtꞌayàtꞌa‑le̱,

nꞌión nkjìn chjo̱ta̱ tje̱n‑ngi‑le̱.

30 Kꞌoa̱ jaò chjo̱ta̱ xka̱ ya̱ tjió ndai ndia̱a,

kꞌia̱ nga kinchrꞌoé nga Jesús tífaꞌa,

kiskiꞌndiáxá,

kitsò:

—¡Nai,

xi ntje̱‑le̱ David tje̱n‑ni,

jcha̱ma̱tokòn‑naíji̱n!

31 Kꞌoa̱ jè chjo̱ta̱‑nkjìn kinchja̱tikao̱,

jmé‑ni nga jyò kàtabatiò‑ni;

to̱nga jè chjo̱ta̱ xka̱ to̱ ngìsa̱a nꞌión kiskiꞌndiáxá,

kitsò:

—¡Nai,

xi ntje̱‑le̱ David tje̱n‑ni,

jcha̱ma̱tokòn‑naíji̱n!

32 Kꞌoa̱ tsakasènjna Jesús,

kinchja̱‑le̱,

kꞌoa̱ kitsò‑le̱:

—Jmé xi me‑no nga sikao̱‑no.

33 Jè chjo̱ta̱ xka̱ kitsò:

—Nai,

meè‑naji̱n nga kàtamatsen‑naji̱n.

34 Kꞌia̱ Jesús koanma̱ke,

kisikao̱ xko̱n chjo̱ta̱ xka̱,

kꞌoa̱ kjoan koan‑tsen‑le̱;

kꞌoa̱ kitje̱n‑ngi‑le̱ Jesús.