—Ji xi bakòyai,

jmé kꞌoa̱síkjoan‑ni jè la̱jao̱,

kꞌoa̱ jmé kꞌoa̱ síkjoan‑ni ndꞌia.

2 Jesús kinchja̱,

kitsò‑le̱:

—A tìꞌya‑nì jè ndꞌia yꞌai xo̱kjoan.

Ngayije la̱jao̱ xi tjiósòn‑le̱ xínkjín, ni̱jngo‑jìn xi tsì koi̱xo̱jen.

3 Xi je koan‑ni Jesús tsakꞌèjna ya̱ nindo Yá Olivo,

xi matsen‑tꞌa‑ni ya̱ yo̱ngo̱.

Kꞌoa̱ Pedro,

Jacobo,

Juan,

kao̱ Andrés kiskònangitꞌaxìn‑le̱ kitsò‑le̱:

4 —Kꞌoa̱tꞌìn‑naíji̱n,

kꞌiá‑ni kꞌoa̱koa̱n kjoa̱ jè.

Kꞌoa̱ jókji choa̱ xi sꞌe̱ kꞌia̱ nga koi̱tjosòn ngayije kjoa̱ xi tiꞌmì‑lai̱.

5 Jesús tsakꞌétsꞌia̱kao̱ nga kinchja̱,

kitsò:

—Ti̱koìndao̱o yao‑no jmé‑ni nga tsìꞌya xi kꞌoa̱na̱cha̱‑nino;

6 nga̱ nꞌión nkjìn chjo̱ta̱ kjoa̱ꞌaí xi si̱ichjén jaꞌaín‑na̱,

nga koi̱tso̱:

“An‑nià Jè xi Niná Kàsíkasén”;

kꞌoa̱ nkjìn chjo̱ta̱ kꞌoa̱na̱cha̱‑le̱.

7 To̱nga kꞌia̱ nga koi̱nóꞌyà‑lao̱o nga tjiókjàn chjo̱ta̱ nga kjoa̱jchán tíjna kao̱ nga sꞌe̱ én nga kꞌoa̱ti̱ kjoa̱jchán je tjín jña kjin‑tꞌa,

alì koi‑jìn síkixòjen kjoa̱faꞌaitsjen‑no,

nga̱ machjén nga kꞌoa̱koa̱n;

to̱nga kje sa kjoe̱tꞌa‑jìn ni̱chrjin.

8 Nga̱ koi̱sótje̱n‑nè xínkjín na̱xi̱nandá kao̱ xi kja̱ꞌaí na̱xi̱nandá,

kꞌoa̱ jè xi batéxoma koi̱sótje̱n‑nè xínkjín kao̱ xi xìn na̱xi̱nandá batéxoma;

kꞌoa̱ nkjìn ꞌnde jña nga chaón nꞌión kjoa̱ꞌa,

kꞌoa̱ sꞌe̱e kjinchrá kao̱ kjoa̱si;

kꞌia̱ nga̱ sꞌe̱ kjoa̱ jè, to̱kꞌia̱a tífìtsꞌia kjoa̱ñꞌain jo ma‑le̱ jngo chjo̱on xi makjine ꞌndí‑le̱.

9 »To̱nga jòn ti̱koìndao̱o yao‑no;

nga̱ cha̱nìtꞌa‑no ya̱ jtín xi kjinèntsja kjoa̱téxoma‑le̱ chjo̱ta̱ judío,

kꞌoa̱ ya̱ ndꞌia jña maxkia̱ xo̱n‑le̱ Niná koi̱chon‑no chrjoa̱xín; kꞌoa̱ saꞌnda ngixko̱n chjo̱ta̱xá títjòn kao̱ ya̱ ngixko̱n chjo̱ta̱xá ngajko̱ cha̱nìtꞌa‑no xi to̱ tꞌatsꞌa̱n, jmé‑ni nga jòn kꞌoai̱‑nio én‑no xi tꞌatsꞌa̱n.

10 Nga̱ machjén nga títjòn koi̱nókjoa̱ya‑le̱ én nda-na̱ ngatsꞌi jotjín ntje̱ tjín soꞌnde.

11 To̱nga kꞌia̱ nga kjoa̱ꞌaíkao̱‑no chjo̱ta̱,

nga si̱intsjatꞌa‑no chjo̱ta̱xá,

alì koi‑jìn nìkjaó jmé xi koixón,

ni̱ koi‑jìn nìkjaꞌaitsjen‑jiòn,

nga̱ jña‑nile̱ én xi kꞌia̱ kꞌoai̱‑no koiì xi koi̱nókjoa̱o;

nga̱ tsì tsà jòn‑jiòn xi koi̱nókjoa̱o,

nga̱ jé Sén Ni̱chrjin Tsje xi si̱ikinchja̱‑no.

12 »Kꞌoa̱ jè xi ti̱ ndsꞌe̱‑ni tsjoátꞌa ndsꞌe̱ nga kàtanìkꞌen,

kꞌoa̱ jè xi nꞌai tsjoátꞌa ti‑le̱ nga kàtanìkꞌen;

kꞌoa̱ jè xi xti koi̱sótje̱n‑nè xijchá‑le̱ nga kàtanìkꞌen.

13 Kꞌoa̱ koa̱n‑chꞌaokeè‑no ngatsꞌi chjo̱ta̱ xi to̱ tꞌatsꞌa̱n;

to̱nga jè xi chókjoa̱jin‑le̱ saꞌnda nga kjoe̱tꞌa‑ni,

jè‑ní xi koi̱tjontjaì.

14 »To̱nga kꞌia̱ nga jchao̱o jme xi Niná tike,

kꞌoa̱ jè xi kꞌoa̱sꞌiìn nga Niná tsjiókon jè yo̱ngo̱,

jè kjoa̱ jè‑bi̱ kꞌoa̱koa̱n ya̱ ꞌnde jña tsì bꞌakao̱‑le̱ nga kꞌoa̱koa̱n,

josꞌìn nga ti̱ngì‑ni kꞌoa̱kitsò Daniel jè xi kinchja̱ya ngajao‑le̱ Niná,

(jè xi bꞌéxkia̱,

nda kàtamacho̱ya‑le̱), kꞌia̱ jè xi ya tjió ya̱ ꞌnde Judea kàtabanga ya̱ sòn nindo.

15 Jè xi ya̱ sòn‑ngꞌa ndꞌia‑le̱ tíjna,

alì bitjojen‑jìn,

ni̱ faꞌasꞌen‑jìn nga skoé jme xi tjió ya̱ ndꞌia‑le̱;

16 kꞌoa̱ jè xi ya̱ tísíxá ya̱ jin‑jñá,

alì najño xi bꞌejnajté‑jìn fìkꞌá ndꞌia‑le̱.

17 To̱nga ¡ma̱xó‑nile̱ yao‑le̱ ngatsꞌi yánchjín xi ꞌndí kꞌia̱ tjióyàꞌma‑le̱,

kꞌoa̱ jè xi sꞌa̱ síkaki ꞌndí‑le̱ kꞌia̱ nga koi ni̱chrjin!

18 Ti̱jé‑lao̱o Niná jmé‑ni nga tsì tsà kꞌia̱ nga cha̱n nchꞌán koi̱yó‑nio;

19 nga̱ kꞌia̱ nga koi ni̱chrjin jè kjoa̱ñꞌain xi sꞌe̱ ni̱sakꞌia‑jìn kꞌoa̱kji kjoa̱ñꞌain kisꞌe jo saꞌnda nga Niná kisinda soꞌnde,

saꞌnda ndꞌai̱,

kꞌoa̱ ni̱kꞌia‑jìn ti̱ sꞌe̱‑ni.

20 Kꞌoa̱ tsà jè Nai‑ná tsì kisi̱ichoaya ni̱chrjin xo̱kjoan,

ni̱ꞌya‑jìn xi koi̱tjontjaí;

to̱nga xi to̱ tꞌatsꞌe̱ jè chjo̱ta̱ xi Niná tsakjaꞌájin,

jè Nai‑ná kisichoayaà ni̱chrjin xo̱kjoan.

21 »Kꞌia̱ tsàꞌya xi koi̱tso̱‑no:

“Koe̱e‑ni,

i̱i tíjna i̱ Jè Xi Niná Kisikasén”;

axo̱ tsà koi̱tso̱‑no:

“Ya̱ tíjna ya̱,”

alì makjaínjìn‑no.

22 Nga̱ sꞌe̱e chjo̱ta̱ bꞌana̱cha̱ xi koi̱tso̱ nga Jè Xi Niná Kisikasén,

kꞌoa̱ sꞌe̱e chjo̱ta̱ bꞌana̱cha̱ xi Niná nchja̱ya ngajao‑le̱ koi̱tso̱‑le̱ yao‑le̱,

kꞌoa̱ nkjìn choa̱ kao̱ kjoa̱xkón xi koa̱n‑le̱ sꞌiìn,

jmé‑ni nga kꞌoa̱na̱cha̱‑ni,

tsà koa̱n‑láni‑le̱ saꞌnda kꞌoa̱na̱cha̱a‑le̱ chjo̱ta̱ xi kitjoéjin.

23 To̱nga jòn ti̱koìndao̱o yao‑no;

nga̱ to̱ngì‑ni je kꞌoa̱tìxin‑no ngayije.

24 »To̱nga kꞌia̱ nga koi ni̱chrjin,

nga je kjoe̱tꞌa jè kjoa̱ñꞌain,

jè tsꞌoí sꞌe̱njiòn, kꞌoa̱ jè sá lìkoi ti̱ si̱i-isen‑ni,^a

25 kꞌoa̱ jè niñò jtsao̱jen‑ngiì,^b

kꞌoa̱ ngayije nganꞌión xi tjín ya̱ jin sén koan‑tìnyaà‑le̱.

26 Kꞌia̱ ngatsꞌi chjo̱ta̱ skoe̱ kꞌia̱ nga jè ꞌNdí‑le̱ Chjo̱ta̱ kjoa̱ꞌaí ya̱ jin yojbi^c kao̱ tse nganꞌión‑le̱ kao̱ kjoa̱jeya‑le̱.

27 Kꞌoa̱ kꞌia̱ si̱ikasén cho̱ꞌnda ngꞌajmi‑le̱,

kꞌoa̱ kꞌoe̱exkó jè chjo̱ta̱‑le̱ xi xá tsakjaꞌájin‑ni,

nga ño xi̱ngi̱‑le̱ soꞌnde,

xi jngo ngoa‑le̱ soꞌnde saꞌnda xi ngìjngo ngoa‑le̱.

28 »Kàtama‑no jmé xi tsòya‑ni jè choa̱ xi mangósòn‑kao̱ tꞌatsꞌe̱ jè yá higo:

Kꞌia̱ nga je bꞌétsꞌén yántsja,

kꞌoa̱ nchroá‑le̱ xka̱,

ꞌya‑niò nga je machrian‑le̱ nga koa̱njchá to̱ xi ya‑le̱.

29 Kꞌoa̱ati̱ sꞌìn jòn,

kꞌia̱ nga jchao̱o nga kꞌoa̱koa̱n kjoa̱ xo̱kjoan,

kàtaꞌyao nga je tíjnachrian ya̱ jchro xo̱ntjoa̱ nga kjoa̱ꞌaí ngìndia jè ꞌNdí‑le̱ Chjo̱ta̱.

30 Ñaki kìxi̱i xi xin‑no,

nga tsì koi̱yá jè chjo̱ta̱ xi i̱ tsꞌe̱ saꞌnda nga kꞌoa̱koa̱n ngayije jè‑bi̱.

31 Jè ngꞌajmi kao̱ jè soꞌnde kjoe̱tꞌa ni̱chrjin‑le̱,

to̱nga ngayije én‑na̱ lìkoi kjoe̱tꞌa ni̱chrjin‑le̱.

32 »To̱nga xi koi ni̱chrjin kꞌoa̱ kꞌiá‑ni nga kꞌoa̱koa̱n,

lìꞌya xi be,

ni̱ jè jìn‑là cho̱ꞌnda ngꞌajmi,

ni̱ jè jìn‑là ꞌNdí,

to̱sa jé Nꞌai xi be.

33 Nda chótsaon,

ti̱yondao ngantsjaì kꞌoa̱ ti̱nókjoa̱kao̱o Niná;

nga̱ lìkoi ꞌyao jmé ni̱chrjin‑ni nga kꞌoa̱koa̱n.

34 Kꞌoa̱asꞌìn koa̱n joni tsà jngo chjo̱ta̱ xi kjin ki,

kisikꞌéjna ndꞌia‑le̱,

kꞌoa̱ kisintsja cho̱ꞌnda‑le̱,

kꞌoa̱ nga jngó jngó kitsjoa‑le̱ xá‑le̱,

kꞌoa̱ jè xi síkoìnda̱ xo̱ntjoa̱ tsakꞌénè‑le̱ nga kàtabꞌèjnakonꞌnda.

35 Ti̱yondao ngantsjaì nga̱ tsìꞌyao kꞌiá‑ni kjoa̱ꞌaí jè nai‑le̱ ndꞌia;

a kꞌia̱a nga sꞌa̱ kjimanjiòn,

axo̱ kꞌia̱a nga basenya‑ni̱tje̱n,

axo̱ kꞌia̱a jochon kjíꞌndiá cháxichá,

axo̱ kꞌia̱a nga ta̱njiòn;

36 alì soyofè‑jiòn tsà mai to̱sa kꞌiá kjoa̱ꞌaí kꞌoa̱ skoe̱‑no nga tìsoyofaòo.

37 Kꞌoa̱ jè xi xin‑no jòn,

kꞌoa̱ati̱ xin‑le̱ ngatsꞌi:

Ti̱yondao ngantsjaì.