Jè choa̱ xi mangósòn‑kao̱ jè xti yánchjín xo̱ngó xi te ma‑ni
25
»Kꞌoa̱ kꞌia̱a koa̱ngósòn‑kao̱ jña batéxoma jè xi tíjna ya̱ ngꞌajmi,
jè xti yánchjín xo̱ngó xi te ma‑ni xi kiskoé chrjoa̱ lꞌí‑le̱,
kꞌoa̱ kikoya‑le̱ jè xꞌi̱n xi tíbixan.
2 Aòn ma‑ni xti yánchjín xi tjín‑le̱ kjoa̱nkjìn‑tokòn kꞌoa̱ aòn ma‑ni xi chi̱nì.
3 Jè xi chi̱nì kiskoé chrjoa̱ lꞌí‑le̱,
to̱nga lìkoi kiskoé sìti̱ xi machjén‑le̱ chrjoa̱ lꞌí‑le̱;
4 to̱nga jè xi tjín‑le̱ kjoa̱nkjìn‑tokòn kiskoé sìti̱‑le̱ kao̱ chrjoa̱ lꞌí‑le̱.
5 Kꞌoa̱ koan‑tseyà‑le̱ jè xꞌi̱n xi tíbixan,
kꞌoa̱ koan‑nijñá‑le̱ ngatsꞌi xti yánchjín xo̱ngó xo̱kjoan kꞌoa̱ tsakjayofè.
6 Kꞌoa̱ kꞌia̱ nga je basen ni̱tje̱n,
kinòꞌyà jngo‑le̱ jta̱ xi nꞌión kinchja̱ kitsò:
“Jeè nchroá jè xꞌi̱n xi tíbixan;
títjo̱o,
tangíchꞌà yandia̱o”.
7 Kꞌia̱ tsakisótje̱n ngatsꞌi xti yánchjín xo̱ngó xo̱kjoan,
kꞌoa̱ tsakatiónda chrjoa̱ lꞌí‑le̱.
8 Kꞌoa̱ jè xi chi̱nì kitsò‑le̱ jè xi tjín‑le̱ kjoa̱nkjìn‑tokòn:
“Tꞌaì tsé‑naí‑ji̱n jè sìti̱‑no,
nga̱ jè chrjoa̱ lꞌí‑na̱ji̱n jeè tjióbitsꞌao”.
9 To̱nga jè xi tjín‑le̱ kjoa̱nkjìn‑tokòn kitsò‑le̱:
“Jmé‑ni nga tsì kjoe̱tꞌa‑ni tsai̱n‑ji̱n kꞌoa̱ ni̱ tsao̱on‑jìn kàtafetꞌa.
To̱saà tangión jña saténa,
kꞌoa̱ ti̱ndá‑lao̱o yao‑no”.
10 To̱nga kꞌia̱ nga tjiófì jña kikatse sìti̱,
jaꞌai jè xꞌi̱n xi tíbixan;
kꞌoa̱ jè xti yánchjín xo̱ngó xi tjiónda jaꞌasꞌen‑kao̱ jè chjo̱ta̱ xi tíbixan ya̱ jña koi̱xan;
kꞌoa̱ kisꞌechjoà jè xo̱ntjoa̱ jña tíjna kjoa̱bixan.
11 Xi koanskan‑ni kꞌoa̱ti̱ jaꞌai jè xti yánchjín xo̱ngó xikꞌa,
kitsò:
“Nai,
nai,
chjóꞌaì‑naíji̱n”.
12 To̱nga jè kinchja̱,
kitsò:
“Ñaki kìxi̱i xi xin‑no,
nga lìkoi ꞌbexkon‑no”.
13 »Ti̱yondao ngantsjaì,
nga̱ lìkoi ꞌyao jmé ni̱chrjin‑ni kꞌoa̱ jmé choa̱‑ni kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.
Choa̱ xi mangósòn‑kao̱ jè tao̱n xi tsakꞌaì‑le̱ jàn cho̱ꞌnda
14 »Ti̱yondao‑ni,
nga̱ ya̱ jña batéxoma jè xi tíjna ya̱ ngꞌajmi,
ya̱a mangósòn‑kao̱ jngo chjo̱ta̱ xi kjin ki,
kinchja̱‑le̱ cho̱ꞌnda‑le̱,
kꞌoa̱ kisintsja tao̱n‑le̱.
15 Jngo xi aòn millòn tao̱n chroa kitsjoa‑le̱,
kꞌoa̱ xi ngìjngo jaò millòn kitsjoa‑le̱,
kꞌoa̱ xi ngìjngo jngo millòn kitsjoa‑le̱,
nga jngó jngó kitsjoa‑le̱ josꞌìn nga ma‑le̱ síxá;
kꞌoa̱ kꞌia̱ kjin ki.
16 Kꞌoa̱ jè cho̱ꞌnda xi aòn millòn tao̱n tsakꞌaì‑le̱ ki,
kisixákao̱,
kꞌoa̱ ngì aòn millòn kinjènsòn‑le̱.
17 Kꞌoa̱ti̱ kisꞌin jè xi jaò millòn tao̱n tsakꞌaì‑le̱,
kꞌoa̱ti̱ ngìjaò millòn kinjènsòn‑le̱.
18 To̱nga jè xi jngo millòn tao̱n tsakꞌaì‑le̱ ki kꞌoa̱ jngo nga̱jao̱ kiskoꞌngi jña tsakꞌéjnaꞌma tao̱n‑le̱ nai‑le̱.
19 »Kꞌia̱ nga je nꞌión nkjìn sá jaꞌato jaꞌai jè nai‑le̱ cho̱ꞌnda xo̱kjoan,
kꞌoa̱ tsakꞌéndajin josꞌìn kisixákao̱ jè tao̱n xi koantsja nga jngó jngó.
20 Kꞌoa̱ nga jaꞌai jè xi aòn millòn tsakꞌaì‑le̱ ngì aòn millòn jaꞌaikao̱,
kitsò:
“Nai aòn‑ná millòn kinìntsja‑naí;
i̱ tíjna‑nilì,
ngì aòn millòn kinjènsòn‑na”.
21 Kꞌoa̱ jè nai‑le̱ kitsò‑le̱:
“Nda tjín‑ni,
cho̱ꞌnda xi ma nìnꞌiótꞌa‑lì kꞌoa̱ xi nda ma‑lì nìxaí;
koaàn kisinꞌiótꞌa‑lè nga nda kinìxákoai̱ ni̱nga to̱ choa ma‑ni xi kisintsja‑lè,
ndꞌai̱ ngìsa̱a tse sintsja‑lè;
ti̱tjásꞌai̱n jña tíjna‑le̱ kjoa̱tsjoa nai‑li̱”.
22 Kꞌoa̱ti̱ jaꞌai jè xi jaò millòn tsakꞌaì‑le̱,
kitsò:
“Nai,
jaò millòn‑nà kinìntsja‑naí;
i̱ tíjna‑nilì,
ngìjaò millòn kinjensòn‑na”.
23 Jè nai‑le̱ kitsò‑le̱:
“Nda tjín‑ni,
cho̱ꞌnda xi ma nìnꞌiótꞌa‑lì kꞌoa̱ xi nda ma‑lì nìxaí;
koaàn kisinꞌiótꞌa‑lè nga nda kinìxákoai̱ ni̱nga to̱ choa ma‑ni xi kisintsja‑lè,
ndꞌai̱ ngìsa̱a tse sintsja‑lè;
ti̱tjásꞌai̱n jña tíjna‑le̱ kjoa̱tsjoa nai‑li̱”.
24 »To̱nga kꞌia̱ nga jaꞌai jè xi jngo millòn kinìntsja,
kitsò:
“Nai,
ꞌbexkoòn‑lè nga ñaki kꞌoa̱sꞌìn bitjosòn‑lì josꞌìn nga ji me‑lì,
nga bꞌèxkoí jè tsojmì xi tsì tsà ji bꞌèntjaì,
kꞌoa̱ nga bꞌèxkoí jè tsojmì xi tsì ji kichjojndì;
25 koiì jè xi kitsokjon‑le̱,
kꞌoa̱ kikꞌejnàꞌma‑nià tao̱n‑li̱ ya̱ jin nangi;
i̱ tíjna‑nilì tao̱n xi tsi̱”.
26 Kinchja̱ nai‑le̱,
kitsò‑le̱:
“Cho̱ꞌnda xi chꞌao kjoain kꞌoa̱ xi tsꞌaì,
ꞌya‑ní nga bꞌexkoá jña tsì tsà an tsakꞌentjè,
kꞌoa̱ nga bꞌexkoá jè xi tsì tsà an kjojndià.
27 Koiì kjoa̱,
nga tjínè‑nilì tsàkai nga kinìkꞌasꞌain tao̱n‑na̱ ya̱ ndꞌia jña maxákao̱ tao̱n,
kꞌoa̱ jmé‑ni kꞌia̱ nga kàfaꞌai̱‑jiàn,
kàbꞌaì‑ninaí tao̱n‑na̱ kao̱ ꞌndí‑le̱”.
28 »Chja̱ꞌa‑lao̱o‑ni jè tao̱n,
kꞌoa̱ to̱sa̱a jè tꞌaì‑lao̱o jè xi te millòn tao̱n tíjna‑le̱.
29 Nga̱ jè xi tjín‑le̱ kꞌoai̱i‑le̱,
kꞌoa̱ nꞌión tse sꞌe̱sa‑le̱;
kꞌoa̱ jè xi tsìn‑le̱,
saꞌnda jmè xi tjín‑le̱ to̱sa̱a tjóꞌa‑le̱.
30 Kꞌoa̱ jè cho̱ꞌnda xi tsìjme chjí‑le̱,
ti̱kꞌatje̱njion kjoa̱njiòn xi kjijna ya̱ nditsián;
ya̱a skíꞌndiá kꞌoa̱ ya̱a jtsao̱kjao ni̱ꞌño̱.
Kꞌia̱ nga Niná si̱ijtsòꞌa ngatsꞌi chjo̱ta̱ na̱xi̱nandá
31 »Kꞌia̱ nga kjoaꞌaí ngìndia‑ni jè ꞌNdí‑le̱ Chjo̱ta̱ kao̱ lꞌí isen‑le̱ koa̱kò nga tjín‑le̱ nganꞌión,
nga tje̱n‑kao̱ ngatsꞌi cho̱ꞌnda ngꞌajmi‑le̱,
kꞌia̱ kꞌoéjnasòn jè yáxìle̱ xi tsꞌe̱ kjoa̱téxoma‑le̱ kao̱ kjoa̱jeya‑le̱,
32 kꞌoa̱ ya̱ ngixko̱n koa̱nxkó ngatsꞌi jotjín ntje̱ tjín ngakijndà soꞌnde;
kꞌoa̱ si̱ikatiótꞌaxìn‑le̱ xínkjín nga jngó jngó josꞌín jè chjo̱ta̱ xi barrè koꞌnda nga faꞌáxìnjin barrè ya̱ jin‑le̱ tìndso̱.
33 Kꞌoa̱ ya̱ ngakìxi̱‑le̱ si̱ikatió jè barrè,
kꞌoa̱ jè tìndso̱ ya̱ ngaskón‑le̱.
34 »Kꞌia̱ jè xi Chjo̱ta̱xá Ngajko̱,
koi̱tso̱‑le̱ jè xi ngakìxi̱‑le̱ tjió:
“Nchroaó,
jòn xi kjoa̱nda kisoko‑no ya̱ ngixko̱n Nꞌai‑na̱,
ti̱tjásꞌao̱on ya̱ ꞌnde jña jè Nꞌai‑na̱ tsakꞌéjnanda‑no saꞌnda nga kisꞌenda soꞌnde.
35 Nga̱ kꞌia̱ nga koanbao‑na,
kinìkjèn‑nánaó;
kꞌoa̱ kꞌia̱ nga koanfatì‑na,
tsakꞌaì‑nánaó nandá xi tsakꞌia̱;
kꞌia̱ nga tsakꞌamjen jña tsì na̱xi̱nandá‑na̱,
kichjoétjaò‑nánaó ya̱ ndꞌia‑no;
36 kꞌia̱ nga to̱ tsakajnajtià,
tsakꞌaì‑naó najño xi tsakꞌakjá;
kꞌia̱ nga kisokochꞌìn‑na,
kicho̱chòtsen‑naó;
kꞌia̱ nga ndo̱yá tsakàte̱jnaꞌya,
tsangìchòtsen‑nánaó”.
37 »Kꞌia̱ koi̱nchja̱ jè chjo̱ta̱ xi kìxi̱ koi̱tso̱:
“Nai,
kꞌiá‑ni nga tsaꞌya‑laìji̱n nga koanbao‑lì,
kꞌoa̱ nga kinìkjèn‑laìji̱n,
axo̱ kꞌiá‑ni nga koanfatì‑lì,
kꞌoa̱ nga tsakꞌaì‑laìji̱n xi kiꞌyoì.
38 Kꞌoa̱ kꞌiá‑ni nga tsakitòmjain jña nga tsì na̱xi̱nandá‑li̱ kꞌoa̱ nga kichjoétjaò‑laì‑ji̱n,
axo̱ kꞌiá‑ni nga kisojnajtì kꞌoa̱ nga tsakꞌaì‑laìji̱n najño xi kichꞌakjaí.
39 Axo̱ kꞌiá‑ni tsaꞌya‑laìji̱n nga kisokochꞌìn‑lì,
axo̱ nga ndo̱yá tsakijnaꞌyai,
kꞌoa̱ nga tsangìchòtsen‑laìji̱n”.
40 Kꞌia̱ koi̱nchja̱ jè chjo̱ta̱xá ngajko̱,
koi̱tso̱:
“Ñaki kìxi̱i xi xin‑no,
kꞌia̱ nga kꞌoa̱ kinìkao̱o jngo ndsꞌe axo̱ tìchja,
xi nꞌión nangi tjió,
aàn xo̱ kinìkao̱‑naó”.
41 »Kꞌoa̱ kꞌia̱ i̱ koi̱tso̱‑le̱ jè xi ya̱ tjió ya̱ ngaskón‑le̱:
“Ti̱nchaxìn‑naó jòn xi kjoa̱ñꞌain kijnanè‑no,
tangión ya̱ ꞌnde jña kijna lꞌí xi tsìkꞌia bitsꞌao xi jè nai̱i kao̱ ngatsꞌi cho̱ꞌnda‑le̱ kisꞌenda‑le̱.
42 Nga̱ kꞌia̱ nga koanbao‑na,
lìkoi kinìkjèn‑naó;
kꞌia̱ nga koanfatì‑na,
lìkoi tsakꞌaì‑naó nandá xi tsakꞌia̱;
43 kꞌia̱ nga tsakꞌamjenjiàn jña tsì na̱xi̱nandá‑na̱ lìkoi kichjoétjaó‑naó ya̱ ndꞌia‑no;
kꞌia̱ nga tsakajnajtià lìkoi tsakꞌaì‑naó najño xi tsakꞌakjá;
kꞌia̱ nga kisokochꞌìn‑na kꞌoa̱ kꞌia̱ nga ndo̱yá tsakàte̱jnaꞌya lìkoi tsangìchòtsen‑naó”.
44 »Kꞌoa̱ kꞌia̱ kꞌoa̱ti̱ koi̱nchja̱ tsànda jè,
koi̱tso̱:
“Nai,
kꞌiá‑ni nga tsaꞌya‑laìji̱n nga koanbao‑lì,
kꞌoa̱ nga koanfatì‑lì,
nga tsakitòmjain jña tsì na̱xi̱nandá‑li̱,
nga kisòjnajtì,
nga kisokochꞌìn‑lì,
axo̱ nga ndo̱yá tsakijnaꞌyai,
kꞌoa̱ nga lìkoi tsakisén‑kao̱‑laìji̱n”.
45 Kꞌia̱ koi̱nchja̱ jè Chjo̱ta̱xá ngajko̱,
koi̱tso̱‑le̱:
“Ñaki kìxi̱i xi xin‑no,
kꞌia̱ nga lìkoi kinìsin‑lao̱o jngo ndsꞌe axo̱ tìchja,
xi nꞌión nangi tjió,
aàn xo̱ kinìkao̱‑naó”.
46 »Kꞌoa̱ jè chjo̱ta̱ xo̱kjoan ya̱a nikasén ya̱ ꞌnde kjoa̱ñꞌain xi tsìkꞌia fetꞌa,
to̱nga jè chjo̱ta̱ kìxi̱ ya̱ koai̱ jña tjín kjoa̱bijnachon xi tsìkꞌia fetꞌa.a