2 —ꞌya‑niò nga to̱ ngìjaò ni̱chrjin cha sa‑le̱ nga koi̱tjo jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,^a

kꞌoa̱ jè ꞌNdí‑le̱ Chjo̱ta̱ ya̱a koa̱ntsjatꞌa chjo̱ta̱xá nga si̱ikꞌen‑tꞌa krò.

3 Kꞌia̱ jè na̱ꞌmi xi tjió títjòn‑le̱ na̱ꞌmi,

kao̱ chjo̱ta̱ xi kji kjoa̱téxoma‑le̱ Niná xi kiski Moisés,

kꞌoa̱ kao̱ chjo̱ta̱ jchínga‑le̱ chjo̱ta̱ judío,

koanxkó ya̱ nditsin ndꞌia‑le̱ na̱ꞌmi títjòn xi Caifás ꞌmì,

4 kꞌoa̱ ya̱ tsakjaóya‑ni jme‑ní nga kao̱ kjoa̱chꞌàna̱cha̱ jtsoa̱‑ni Jesús,

kꞌoa̱ si̱ikꞌen.

5 To̱nga kitsò:

—Alì tsà kꞌia̱‑jìn koi̱ndoaà kꞌia̱ nga sꞌe̱jna sꞌoí,

jmè‑ni nga tsì kjoa̱si sꞌe̱‑síni ya̱ jin‑le̱ chjo̱ta̱.

6 Kꞌoa̱ kꞌia̱ nga tíjna Jesús ya̱ na̱xi̱nandá‑ꞌndí Betania,

ya̱ ndꞌia‑le̱ Simón jè xi jtsé biꞌndojon kisꞌe‑le̱ yao‑le̱,

7 jngo chjo̱on jaꞌaikòn‑le̱ Jesús,

xi yꞌa jngo lamìta̱ xi la̱jao̱ koan‑nda‑ni,

kꞌoa̱ tjiá‑le̱ sìti̱ chjí xi na̱ská na̱nje̱n,

kꞌoa̱ tsakꞌéjtenjòn jko̱ Jesús kꞌia̱ nga tíkjèn.

8 Kꞌia̱ nga tsabe jè‑bi̱ jè chjo̱ta̱ xi ya̱ kòtꞌayàtꞌa‑le̱ Jesús,

koanjti‑le̱,

kitsò:

—Án‑ni nga to̱ kꞌoa̱sꞌìn tínìkitsón‑ni sìti̱.

9 Nga̱ kàmaà tsàkai nga nꞌión chjí kàsaténa‑ni,

kꞌoa̱ kàmaà nga jè chjo̱ta̱ xi yo̱ma̱ tjió kàbꞌaì‑le̱ tao̱n.

10 Kꞌia̱ nga kinchrꞌoé Jesús,

kitsò‑le̱:

—Án‑ni nga nìsi‑nilao̱o jè chjo̱on,

nga̱ nꞌión nda tjín kjoa̱ xi kàsꞌín tꞌatsꞌa̱n.

11 Nga̱ jè chjo̱ta̱ xi yo̱ma̱ sꞌìn tjió i̱i koa̱tiòkao̱ ntsjaì‑no,^b

to̱nga an lìkoi tsà i̱ koàte̱jnakao̱ ntsjaì‑no.

12 Nga̱ kꞌia̱ nga kàbꞌéjten‑jòn‑na jè sìti̱ xi na̱ská na̱nje̱n,

koiì kꞌoa̱ kàsꞌìn‑ni jmé‑ni nga kàsíkꞌéjnanda‑ni yao‑na̱ kꞌia̱ nga sꞌe̱jnaya ya̱ ngijao jña sꞌeyoyà kꞌen.

13 Ñaki kìxi̱i xi xin‑no,

to̱jña‑ni nga koi̱nókjoa̱ya én‑nda jè,

ngakijndà soꞌnde kꞌoa̱ati̱ kꞌoa̱xki̱ jme xi kàsꞌín chjo̱on xo̱kji,

jmé‑ni nga si̱kjaꞌaitsjenyà‑ni tꞌatsꞌe̱.

14 Kꞌia̱ jngo chjo̱ta̱‑le̱ xi tejaò xi xá kiskoéjin‑ni Jesús,

xi Judas Iscariote ꞌmì,

kikon‑le̱ na̱ꞌmi xi tjió títjòn‑le̱ na̱ꞌmi,

15 kꞌoa̱ kitsò‑le̱:

—Jmé xi meè‑no nga kꞌoai̱‑naó kꞌoa̱ an tsjoatꞌa‑no Jesús.

Kꞌia̱ jè na̱ꞌmi títjòn kan‑tè tao̱n chroa kitsjoa‑le̱.

16 Kꞌoa̱ Judas kꞌia̱a saꞌnda tsakásjai josꞌìn nga koa̱n tsjoátꞌa Jesús.

17 Jè ni̱chrjin xi títjòn‑le̱ sꞌoí kꞌia̱ nga bichi nio̱xtìla̱ xi tsì na̱ꞌyo̱san tjín‑le̱,

jè chjo̱ta̱ xi ya̱ kòtꞌayàtꞌa‑le̱ Jesús jaꞌaikòn‑le̱,

kitsò‑le̱:

—Jñá‑ni me‑lì nga kꞌoéndai‑ji̱n jè xi koi̱chi sꞌoí‑niá,

jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.

18 Kꞌia̱ Jesús kitsò‑le̱:

—Tangión ya̱ na̱xi̱nandá‑nꞌión,

tangíchón‑lao̱o jè chjo̱ta̱ xi je ꞌyaxkoaàn,

kꞌoa̱ i̱ tꞌìn‑lao̱o:

“I̱i títsò jè xi bakóya:

‹Jeè tíjnachrian jè ni̱chrjin‑na̱;

ya̱a ndꞌia‑li̱ koakje̱n sꞌoí‑jiàn kao̱ chjo̱ta̱ xi an kòtꞌayàtꞌa‑na,

jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío›”.

19 Kꞌoa̱ jè chjo̱ta̱ xi ya̱ kòtꞌayàtꞌa‑le̱ kꞌoa̱kisꞌin josꞌìn nga Jesús tsakꞌénè‑le̱,

kꞌoa̱ ya̱ tsakꞌénda jè xi tsakjèn sꞌoí‑ni xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío.

20 Kꞌia̱ nga je koan‑njiòn,

Jesús tsakꞌèjnatꞌakao̱ yámìxa̱ jè chjo̱ta̱‑le̱ xi tejaò xi xá kiskoéjin‑ni.

21 Kꞌia̱ nga tjiókjèn,

kitsò‑le̱:

—Ñaki kìxi̱i xi xin‑no,

nga jngo jòn xi ya̱ si̱intsjatꞌa‑na je chjo̱ta̱ xi tike‑na.

22 Kꞌoa̱ nꞌión koanba‑le̱ chjo̱ta̱ xi ya̱ kòtꞌayàtꞌa‑le̱,

tsakꞌétsꞌia̱ nga jngó jngó nga kitsò‑le̱:

—A an‑nià,

Nai.

23 Kꞌia̱ kinchja̱ Jesús,

kitsò‑le̱:

—Jè xi i̱ títsjòngindákao̱‑na nio̱xtìla̱ ya̱ chroa̱,

jè‑ní xi tsjoátꞌa‑na.

24 Xi kjoa̱kìxi̱,

jè ꞌNdí‑le̱ Chjo̱ta̱ kꞌoa̱asꞌìn koi̱yá josꞌín tjítꞌa xo̱n‑le̱ Niná,^c

to̱nga ¡ma̱xó‑ni jè chjo̱ta̱ xi tsjoátꞌa jè ꞌNdí‑le̱ Chjo̱ta̱!

To̱ ngìsa̱a nda‑nile̱ jè chjo̱ta̱ xo̱kji tsà tsì kitsin.

25 Kꞌia̱ kitsò Judas,

jè xi tsjoátꞌa Jesús:

—Ji xi bakòyai,

a an‑nià.

Jesús kitsò‑le̱:

—Jaon,

jiì xo̱ tisi.

26 Kꞌia̱ nga tjiókjèn,

Jesús kiskoé nio̱xtìla̱,

kitsjoa‑le̱ kjoa̱nda Niná,

kꞌoa̱ kisixkoa̱ nio̱xtìla̱,

kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱,

kꞌoa̱ kitsò:

—Chjoaó,

ti̱cho;

jè‑bi̱ yao‑na̱ní.

27 Kꞌoa̱ kiskoé jè cho̱tsín,

kꞌia̱ nga je kitsjoa‑le̱ kjoa̱nda Niná,

kitsjoa‑le̱ chjo̱ta̱ xi ya̱ kòtꞌayàtꞌa‑le̱,

kitsò:

—Tꞌio̱o ngatsꞌio xi tjiá cho̱tsín;

28 nga̱ koiì jè njín‑na̱ xi xíjten,^d

xi kꞌoe̱enꞌión kjoa̱chjo̱tse̱,^e

jmé‑ni nga nkjìn chjo̱ta̱ jcha̱tꞌa‑ni‑le̱ jé‑le̱.

29 Kꞌoa̱ kꞌa̱axin‑no nga bꞌétsꞌia̱‑ni ndꞌai̱ lìkoi ti̱ skꞌoi̱‑nia jme xi totseè nchroá‑ni,

saꞌnda koi ni̱chrjin nga skꞌoi̱kao̱‑no xi chjo̱tse̱ ya̱ jña batéxoma jè Nꞌai‑na̱.

30 Kꞌoa̱ kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ je kise‑le̱ Niná,

ki ya̱ nindo Yá Olivo.

31 Kꞌia̱ Jesús kitsò‑le̱:

—Jè ni̱tje̱n xo̱kji,

koi̱njión‑tokòn‑naó ngatsꞌio,

nga̱ kꞌoa̱asꞌìn tjítꞌa xo̱n‑le̱ Niná:

33 Kꞌia̱ kinchja̱ Pedro,

kitsò‑le̱:

—Ni̱nga ngatsꞌi tsjión‑kon‑lì,

an ni̱ kꞌia‑jìn tsjion‑kon‑lè.

34 Jesús kitsò‑le̱:

—Ñaki kìxi̱i xi xin‑lè,

nga jè ni̱tje̱n xo̱kji,

to̱ngi‑nile̱ nga skíꞌndiá cháxichá,

jàn kꞌa kꞌoa̱sí nga tsì ꞌyaxkon‑naí.

35 Pedro kitsò‑le̱:

—Ni̱nga machjén nga koi̱yákao̱‑lè,

ni̱kꞌiajìn‑là kꞌoa̱xián nga tsì ꞌbexkon‑lè.

Kꞌoa̱ ngósòn kitsò ngatsꞌi chjo̱ta̱ xi ya̱ kòtꞌayàtꞌa‑le̱ Jesús.

36 Kꞌia̱ kichò ya̱ ꞌnde Getsemaní,

Jesús kao̱ chjo̱ta̱ xi ya̱ kòtꞌayàtꞌa‑le̱,

kꞌoa̱ i̱ kitsò‑le̱:

—Ti̱yo i̱,

kꞌoa̱ tìfikjakao̱‑là Niná.

37 Kꞌoa̱ kikao̱ Pedro,

kao̱ ngajaò xti‑le̱ Zebedeo,

tsakꞌétsꞌia̱ nga koanba‑le̱ Jesús,

kꞌoa̱ nꞌión kitsokjòn ya̱ jin ni̱ma̱‑le̱.

38 Kꞌia̱ Jesús kitsò‑le̱:

—Nꞌión ba‑le̱ ni̱ma̱‑na̱,

jo xi jeè koi̱yá ma‑na;

ti̱yo i̱,

kꞌoa̱ ti̱yochon‑kao̱‑naó

39 Jesús kibꞌàkjá choa,

tsakajnajten‑tꞌa nangi,

tsakjákao̱ Niná,

kꞌoa̱ i̱ kitsò:

«Ji Nꞌai‑na̱,

tsà koa̱n,

chja̱ꞌàxìn‑naí jè cho̱tsín kjoa̱ñꞌain xo̱kji;

to̱nga lìtsà koi kꞌoa̱ kàtama josꞌìn nga an me‑na,

koiì xi kꞌoa̱ kàtama josꞌìn nga ji me‑lì».

40 Xi je koan,

jaꞌai jña‑ni tjió chjo̱ta̱ xi ya̱ kòtꞌayàtꞌa‑le̱,

kꞌoa̱ tsabe nga kjiofè,

kꞌia̱ kitsò‑le̱ Pedro:

—A tsí kàma kàbiyochon‑kao̱ jngotjó‑naò.

41 Ti̱yochon kꞌoa̱ ti̱nókjoa̱kao̱o Niná,

jmé‑ni nga tsì jè kjoa̱ xi skótꞌayàkao̱‑no si̱ikinjen‑nino;

jè sén ni̱chrjin tíjnanda‑ní,

to̱nga jè yao tsìn‑le̱ nganꞌión.

42 Ngìjngokꞌà ki,

kꞌoa̱ tsakjákao̱ Niná xi ma‑ni jaò kꞌa,

kitsò:

«Nꞌai‑na̱,

tsà tsì koa̱n nga tsì skꞌoi̱ya cho̱tsín kjoa̱ñꞌain xo̱kji,

kꞌoa̱ kàtama josꞌìn nga ji me‑lì».

43 Jaꞌai ngìjngokꞌà,

kꞌoa̱ tsabe nga kjiofè chjo̱ta̱ xi ya̱ kòtꞌayàtꞌa‑le̱ nga̱ ñaki tjióngi‑nꞌión nijñá xko̱n.

44 Kꞌoa̱ kisikatió,

ki ngìndia,

kꞌoa̱ tsakjákao̱ Niná xi ma‑ni jàn‑kꞌa,

to̱jo koiì én kꞌoa̱kitsò.

45 Kꞌia̱ jaꞌaikòn‑le̱ chjo̱ta̱ xi ya̱ kòtꞌayàtꞌa‑le̱,

kꞌoa̱ kitsò‑le̱:

—Soyofaò,

kꞌoa̱ ti̱kjáyao.

Koe̱e‑ni,

jeè kichò choa̱‑le̱ nga jè ꞌNdí‑le̱ Chjo̱ta̱ ya̱a koa̱ntsja chjo̱ta̱jé.

46 Ti̱sótjao̱on,

tjián;

chótsaon jeè nchroá chrian jè xi an títsjoátꞌa‑na.

47 Ti̱kꞌia̱‑ni nga tínchja̱ Jesús,

jaꞌai Judas,

jngo xi tejaò xi xá kiskoéjin‑ni Jesús,

kꞌoa̱ tje̱n‑kao̱ chjo̱ta̱‑nkjìn xi yꞌa ki̱cha̱ndo kꞌoa̱ xi yꞌa yá,

xi jaꞌai‑ni tꞌatsꞌe̱ na̱ꞌmi xi tjió títjòn‑le̱ na̱ꞌmi,

kao̱ tꞌatsꞌe̱ chjo̱ta̱ jchínga‑le̱ chjo̱ta̱ judío.

48 Kꞌoa̱ jè xi kitsjoatꞌa Jesús,

ti̱ngi‑ni kitsjoa‑le̱ choa̱ chjo̱ta̱ xi tje̱n‑kao̱,

kitsò‑le̱:

«Jè xi an kꞌoetꞌatsꞌoà,

jè‑ní,

tꞌètꞌanꞌión».

49 Ti̱ꞌa kꞌia̱ kichòkon‑nile̱ Jesús,

kꞌoa̱ kitsò‑le̱:

—ꞌNda‑lì ji xi bakòyai.

Kꞌoa̱ tsakꞌétꞌatsꞌoà.

50 Kꞌoa̱ Jesús kitsò‑le̱:

—Ji mìyo̱,

jmé xá xi jaꞌai̱‑ni.

Kꞌia̱ jè chjo̱ta̱‑nkjìn tsakinchabꞌàkjátꞌa‑le̱ Jesús,

kitsoa kꞌoa̱ tsakꞌétꞌanꞌión.

51 To̱nga jngo xi ya̱ tjiókao̱ Jesús,

tsakꞌasje ki̱cha̱ndo‑le̱,

kisikìꞌaon jngo cho̱ꞌnda‑le̱ na̱ꞌmi títjòn,

tsakatetꞌa jngo chrjoa̱ño.

52 Kꞌia̱ Jesús kitsò‑le̱:

—Tjajnaya‑ni ya̱ chrjoa̱‑le̱ jè ki̱cha̱ndo‑li̱;

nga̱ ngatsꞌi chjo̱ta̱ xi ki̱cha̱ síkꞌen‑ni kꞌoa̱ati̱ ki̱cha̱ koi̱yá‑ni.

53 A nìkjaꞌaitsjen‑nì nga tsì koa̱n‑na kjoakoa̱ ndꞌai̱ jè Nꞌai‑na̱,

kꞌoa̱ nga tsì si̱ikasén‑na tsꞌato jàn kan kao̱ tejaò jmi cho̱ꞌnda ngꞌajmi‑le̱.

54 To̱nga jósꞌìn koi̱tjosòn‑ni én xi tjítꞌa Xo̱n‑le̱ Niná,

xi machjén nga kꞌoa̱koa̱n.

55 Ti̱ꞌa kꞌia̱‑ni Jesús kitsò‑le̱ chjo̱ta̱‑nkjìn:

—Án‑ni nga jo chjo̱ta̱ xi kjoa̱si bꞌéntjè kàfàꞌai̱ndoao kjoan‑sínio,

nga ki̱cha̱ndo kao̱ yá kichꞌà‑nio nga kafaꞌai̱ndoa‑naó.

Nchaon nchaon‑ná ya̱ tsakàte̱jnakao̱‑no nga tsakakoyà ya̱ nditsin‑le̱ yo̱ngo̱,

kꞌoa̱ lìkoi kꞌia̱ kindoa‑naó.

56 To̱nga koiì i̱ kjima‑ni jmé‑ni nga tíbitjosòn‑ni jotsò Xo̱n‑le̱ Niná josꞌìn kiski ngatsꞌi jè chjo̱ta̱ xi kinchja̱ya ngajao‑le̱ Niná.

Kꞌia̱ ngatsꞌi chjo̱ta̱ xi ya̱ kòtꞌayàtꞌa‑le̱ Jesús tsakanga‑le̱ kꞌoa̱ kitsjion‑kon.

57 Jè chjo̱ta̱ xi kitsoa Jesús ya̱ kikao̱‑le̱ Caifás jè xi na̱ꞌmi títjòn,

jña tjióxkó jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ jchínga‑le̱ chjo̱ta̱ judío.

58 To̱nga Pedro to̱ kjìn tje̱n‑ngika‑nile̱,

jo saꞌnda nga kichò ya̱ nditsin‑le̱ na̱ꞌmi títjòn;

kꞌoa̱ jaꞌasꞌen,

ya̱ tsakꞌèjnakao̱ jè chjo̱ta̱ xi síkoìnda̱ ndꞌia,

jmé‑ni nga skoe̱‑ni josꞌìn kjoe̱tꞌa‑ni kjoa̱.

59 Kꞌoa̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga,

kꞌoa̱ ngatsꞌi xi xá tjín‑le̱ ya̱ jtín xi kjinèntsja kjoa̱téxoma‑le̱ chjo̱ta̱ judío,

tsakásjai én ndiso xi koa̱anè Jesús,

jmé‑ni nga koa̱n si̱ikꞌen‑ni,

60 kꞌoa̱ lìkoi kisoko‑le̱,

nda tsà nkjìn chjo̱ta̱ kichò tsjoánè én ndiso.

To̱nga xi jetꞌa‑ni jaꞌai jaò chjo̱ta̱ xi én ndiso kichò tsjoánè,

61 xi kitsò:

—Jè chjo̱ta̱ xo̱kji kitsò:

“Koa̱an‑na nga sikixòya jè yo̱ngo̱‑le̱ Niná,

kꞌoa̱ to̱ jàn ni̱chrjin kꞌoenda ngìndia‑nia”.

62 Kꞌia̱ tsakasèn‑ndo jè na̱ꞌmi títjòn,

kitsò‑le̱ Jesús:

—A tsí koi̱nókjoantjaì yao‑li̱.

Jmé én xo̱ tsò bánè‑lì chjo̱ta̱ xo̱kjoan.

63 To̱nga Jesús to̱ jyó tsakꞌèjna.

Kꞌia̱ jè na̱ꞌmi títjòn kitsò‑le̱:

—Bꞌenè‑lè tꞌatsꞌe̱ Niná xi tíjnakon,

nga Kꞌoa̱tꞌìn‑naíji̱n tsà ji‑ní Jè Xi Niná Kisikasén,

xi ꞌNdí‑le̱ Niná.

64 Jesús kitsò‑le̱:

—Jiì xo̱ kàsi;

kꞌoa̱ati̱ xin‑no,

nga bꞌétsꞌia̱‑ni ndꞌai̱ jchao̱o jè ꞌNdí‑le̱ Chjo̱ta̱ nga ya̱ kꞌoéjna ya̱ ngakìxi̱‑le̱ Niná xi tse nganꞌión tjín‑le̱,

kꞌoa̱ nga ya̱ kjoa̱ꞌaíjin yojbi ya̱ ngꞌajmi.^g

65 Kꞌia̱ jè na̱ꞌmi títjòn tsakasén‑jndajon najño‑le̱,

kitsò:

—¡Niná kànchja̱ꞌaon‑le̱!

Jmé sa én‑le̱ chjo̱ta̱ xi machjén‑ná.

Koe̱e‑ni,

jòn‑soaà kanòꞌyaò nga Niná kànchja̱ꞌaon‑le̱.

66 Jó bixón.

Kꞌoa̱ kinchja̱ jè chjo̱ta̱,

kitsò:

—¡Bakìn‑le̱ nga kàtanìkꞌen!^h

67 Kꞌoa̱ tsakꞌéchrá‑a,

kꞌoa̱ tsakꞌé‑le̱,

kꞌoa̱ tjín kꞌa xi kisijtsin‑à,ⁱ

68 kꞌoa̱ kitsò‑le̱:

—Tsà kjoa̱kìxi̱i nga Niná nòkjoa̱ya ngajao‑lai̱,

kꞌoa̱‑là tꞌìn‑naíji̱n Ji Xi Niná Kisikasén‑lì,

ꞌyá xi kàbꞌé‑lì.

69 Pedro tíjna ya̱ nditsin;

kꞌoa̱ kichòkon jngo‑le̱ chjo̱on cho̱ꞌnda,

xi kitsò‑le̱:

—Ji kꞌoa̱ati̱ ya̱ tsakitòmjen‑koai̱ Jesús,

xi Galilea tsꞌe̱.

70 To̱nga Pedro kꞌoa̱kitsò ya̱ ngixko̱n ngatsꞌi chjo̱ta̱ nga tsì bexkon Jesús,

kitsò:

—Lìkoi be jmè xo̱ si‑lai̱.

71 Kꞌia̱ kikasèn ya̱ jchro xo̱ntjoa̱,

jngo chjo̱on cho̱ꞌnda xi kja̱ꞌaí tsabe nga ya̱ tíjna Pedro kꞌoa̱ kitsò‑le̱ xi ya̱ tjió:

—Jè chjo̱ta̱ xo̱kji kꞌoa̱ati̱ ya̱ tsakꞌamjen‑kao̱ Jesús xi Nazaret tsꞌe̱.

72 To̱nga jè ngìjngokꞌà tsakꞌéjnaꞌmatꞌain yao‑le̱ kꞌoa̱ Niná tsakasèn‑nꞌión‑ni nga kitsjoa én‑le̱,

kitsò:

—Ni̱ tsè‑jìn‑là ꞌbexkoan jè chjo̱ta̱ xo̱kji.

73 Xi koan jngotjò‑ni tsakinchabꞌàkjátꞌa‑le̱ chjo̱ta̱ xi ya̱ tjió,

kitsò‑le̱ Pedro:

—Xi ñaki kìxi̱ kꞌoa̱ati̱ chjo̱ta̱‑le̱ mai tsàndaji,

nga saꞌnda josꞌìn nòkjoai̱ koiì xi bakó ꞌya‑ni ji.

74 Kꞌia̱ Pedro tsakꞌétsꞌia̱kao̱ nga kisijé‑nè kjoa̱ñꞌain chjo̱ta̱ xo̱kji ngixko̱n Niná,

kꞌoa̱ Niná tsakasèn‑nꞌión‑ni nga kitsjoa én‑le̱,

kitsò:

—Ni̱ tsè‑jìn‑là ꞌbexkoan jè chjo̱ta̱ xo̱kji.

Kꞌoa̱ ti̱ꞌa kꞌia̱a kiskiꞌndiá‑ni jè cháxichá.

75 Kꞌia̱ Pedro jaꞌaitsjen‑le̱ én‑le̱ Jesús kꞌia̱ nga kitsò‑le̱:

“To̱ngì‑ni nga skíꞌndiá jè cháxichá,

jàn‑kꞌa kꞌoa̱sí nga tsì ꞌyaxkon‑naí”.

Kꞌoa̱ nkjiìn ki,

ñaki kao̱ kjoa̱ba kiskiꞌndiá.