3 Kꞌia̱ Judas,

jè xi kitsjoatꞌa Jesús,

kꞌia̱ nga tsabe nga si̱ikꞌen Jesús,

tseèn koan‑le̱ nga chꞌao kisꞌin,

kikao̱‑nile̱ tao̱n chroa xi kan‑tè jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga,

4 kitsò‑le̱:

—Kabajngijé‑nià an nga katsjoatꞌa‑no jngo chjo̱ta̱ xi tsìjme jé tjín‑le̱.

To̱nga jè na̱ꞌmi títjòn kao̱ chjo̱ta̱ jchínga kitsò‑le̱:

—Lìjme xi ji̱n ꞌyai‑ji̱n.

¡Ya̱a kjinè‑lì!

5 Kꞌia̱ Judas tsakꞌétsao tao̱n chroa ya̱ nditsin‑le̱ yo̱ngo̱,

kitjo,

kꞌoa̱ ki,

kꞌoa̱ kisìxìjndo yao‑le̱.

6 Jè na̱ꞌmi xi tjió títjòn‑le̱ na̱ꞌmi kꞌia̱ nga kiskoé tao̱n chroa,

kitsò:

«Lìkoi tiꞌndè nga ya̱ koa̱tiòjin‑le̱e tao̱n xi Niná bꞌaìtꞌa‑le̱e xi tjióyà ya̱ kàxa̱,

nga̱ xi to̱ tꞌatsꞌe̱ tao̱n jè,

njín xíjten».

7 Kꞌoa̱ kꞌia̱ nga je tsakjaóya‑ni josꞌìn si̱ichjén jè tao̱n,

kꞌia̱ tsakatse nangi xi tsꞌe̱ chjo̱ta̱ xi ti̱i sínda,

jmé‑ni nga ya̱ sꞌe̱ñe‑ni jè chjo̱ta̱ xi xìn ꞌnde‑le̱.

8 Kꞌoa̱ koiì nga ya̱ ꞌnde xo̱kji,

ꞌNde‑le̱ Njín ꞌmì‑ni saꞌnda ndꞌai̱.

9 Kꞌoa̱sꞌìn kitjosòn jme xi kitsò Jeremías chjo̱ta̱ xi kinchja̱ya ngajao‑le̱ Niná,

kꞌia̱ nga kitsò:

11 Jesús ya̱ sènjna‑ni ngixko̱n Pilato jè chjo̱ta̱xá xi tíbatéxoma ya̱ ꞌnde Judea,

kꞌoa̱ jè kisijtsòꞌa Jesús,

kitsò:

—A ji‑ní jè Chjo̱ta̱xá ngajko̱‑le̱ chjo̱ta̱ judío.

Kꞌoa̱ Jesús kitsò‑le̱:

—Kꞌoa̱a tjín jo tisi.

12 Kꞌoa̱ kꞌia̱ nga ngatsꞌi na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga tjiótsjoánè én,

ni̱jngo‑jìn én kinchja̱ Jesús.

13 Kꞌia̱ Pilato kitsò‑le̱:

—A tsí nòꞌyai jotjín kjoa̱ xi tjióbánè‑lì chjo̱ta̱ xo̱kjoan.

14 To̱nga Jesús ni̱jngo‑jìn én kinchja̱;

kꞌoa̱ jè Pilato ñaki to̱kꞌoa̱a koan‑le̱.

15 Kꞌoa̱ kꞌia̱ ni̱chrjin nga sꞌe̱jna sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,

kꞌoa̱asꞌìn be‑ni jè chjo̱ta̱xá xi tíbatéxoma ya̱ ꞌnde Judea nga síkꞌéjnandaí‑le̱ chjo̱ta̱ judío,

jngo chjo̱ta̱ xi ndo̱yá tíjnaꞌya,

jokji xi jè chjo̱ta̱ síjé.

16 Kꞌoa̱ kꞌia̱ nga koi ni̱chrjin jngo chjo̱ta̱ xi nꞌión bꞌaxki̱,

xi Barrabás ꞌmì xi ndo̱yá tíjnaꞌya.

17 Kꞌia̱ nga tjióxkó chjo̱ta̱ xo̱kjoan,

Pilato kitsò‑le̱:

—ꞌYá‑ni xi me‑no nga sikꞌéjnandaí‑no:

A jé Barrabás,

axo̱ jé Jesús Jè Xi Niná Kisikasén ꞌmì.

18 Nga̱ beè Pilato nga to̱ kao̱ kjoa̱xìn‑tokòn‑le̱ nga ya̱ kisintsjatꞌa‑ni Jesús.

19 Kꞌia̱ nga Pilato tíjnanè yáxìle̱ xi tsꞌe̱ kjoa̱téxoma,

jña nga síjtsòꞌa chjo̱ta̱,

jè chjo̱on‑le̱ kisikasén én‑le̱,

kitsò‑le̱:

«Alì jme‑jìn xi ji sojin tꞌatsꞌe̱ chjo̱ta̱ kìxi̱ xo̱kji;

nga̱ na̱ti jngotje̱n nꞌión tse kjoa̱ñꞌain kàfaꞌa ya̱ ya nijñá‑na̱ xi tꞌatsꞌe̱».

20 To̱nga jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga tsakinchásjè‑le̱ chjo̱ta̱‑nkjìn nga kꞌoa̱sꞌìn kàtasíjé nga jè Barrabás kàtabꞌejnandaí,

kꞌoa̱ nga jè Jesús kàtanìkꞌen.

21 Kꞌia̱ kinchja̱ Pilato,

kitsò:

—ꞌYá‑ni ngajaò xi me‑no nga sikꞌéjnandaí‑no.

Kꞌoa̱ jè chjo̱ta̱‑nkjìn kitsò:

—Jé Barrabás ti̱kꞌéjnandaì‑naíji̱n.

22 Pilato kitsò‑le̱:

—Kꞌoa̱ jmé xi sikoa̱ Jesús,

Jè Xi Niná Kisikasén ꞌmì.

Kꞌoa̱ kꞌia̱ tsakꞌétsꞌia̱kao̱ nga i̱ kitsò chjo̱ta̱‑nkjìn:

—Krò kàtanìkꞌen‑tꞌa.

23 Kꞌoa̱ jè Pilato kitsò‑le̱:

—Jmé kjoa̱ xi chꞌao tjín xi kisꞌin-ni.

To̱nga jè chjo̱ta̱‑nkjìn to̱ ngìsa̱a nꞌión tsakꞌéjta nga kitsò:

—Krò kàtanìkꞌen‑tꞌa.

24 Kꞌia̱ nga tsabe Pilato nga ni̱jme‑jìn xi koan kisꞌin,

nga to̱sa tse,

to̱sa tse kjima kjoa̱si,

kꞌia̱ kiskoé nandá kꞌoa̱ tsakanéjon ntsja^b ya̱ ngixko̱n chjo̱ta̱‑nkjìn,

kitsò:

—Ni̱jme‑jìn xi an kjinè‑na tꞌatsꞌe̱ njín‑le̱ jè chjo̱ta̱ kìxi̱ xo̱kji;

jòn kjinè‑no.

25 Kꞌoa̱ kinchja̱ chjo̱ta̱‑nkjìn,

kitsò:

—Jè njín‑le̱ ji̱n kàtasꞌenè‑naji̱n kao̱ xti‑na̱ji̱n.

26 Kꞌia̱ Pilato kisikꞌéjnandaí‑le̱ Barrabás,

kꞌoa̱ kꞌia̱ nga jè chjo̱ta̱ kjoa̱jchán je tsaká‑le̱ chrjoa̱xín Jesús,

Pilato kitsjoatꞌa jmé‑ni nga krò kàtanìkꞌen‑tꞌani.

27 Kꞌia̱ jè chjo̱ta̱ kjoa̱jchán‑le̱ Pilato kikao̱ Jesús ya̱ nditsin ndꞌia‑le̱ Pilato,

kꞌoa̱ koanxkóndai‑le̱ ngatsꞌi chjo̱ta̱ kjoa̱jchán;

28 kꞌoa̱ kisikájtì,

kisikꞌakjá jngo najño nì kichjànxi síchjèn chjo̱ta̱xá ngajko̱,

29 jngo yá naꞌyá tsakꞌétji‑le̱ kꞌoa̱ tsakꞌéya jko̱,

kꞌoa̱ jngo yána̱xo̱ kisikáyantjsa ya̱ ntsja ngakìxi̱;

kꞌoa̱ tsakinchaxkónchꞌin ngixko̱n Jesús,

tjióbijnòke kao̱‑ni,

tjiótsò:

«ꞌYaxkón‑laìji̱n,

Chjo̱ta̱xá Ngajko̱‑le̱ chjo̱ta̱ judío»

30 Kꞌoa̱ tsakꞌéchrájon,

kꞌoa̱ nkjìn kꞌa tsakántjaì jko̱ yána̱xo̱.

31 Kꞌia̱ nga je tsakijnòke,

tsakꞌasje‑le̱ jè najño nì kichjàn xi síchjèn chjo̱ta̱xá ngajko̱,

kꞌoa̱ kisikꞌakjá najño xi tsꞌe̱,

kꞌoa̱ kikao̱ nga kikátꞌa krò.

32 Kꞌia̱ nga jè chjo̱ta̱ kjoa̱jchán tjióbitjokao̱ Jesús,

kisatejin jngo chjo̱ta̱ xi na̱xi̱nandá‑nꞌión Cirene tsꞌe̱,

xi Simón ꞌmì,

kꞌoa̱ chjo̱ta̱ xo̱kji kjoa̱nꞌión kisꞌenè‑le̱ nga kàtabꞌa krò‑le̱ Jesús.

33 Kꞌoa̱ kꞌia̱ nga kichò jngo ꞌnde jña Gólgota ꞌmì,

(én xi tsò‑ni:

«ꞌNde ninda jko̱ kꞌen»),

34 tsakꞌaì‑le̱ Jesús nandá totseè xi xá satiósan‑ni xi xki tjítsꞌójin‑le̱;

to̱nga kꞌia̱ nga je kiskòtꞌa,

lìkoi tsakꞌi.

35 Kꞌia̱ nga je tsakátꞌa krò,

jè chjo̱ta̱ kjoa̱jchán kisixkoa̱ya‑le̱ xínkjín najño‑le̱ Jesús,

nga kisiskákao̱ na̱cha̱,^c

jmé‑ni nga kitjosòn‑ni jè xi kitsò chjo̱ta̱ xi kinchja̱ya ngajao‑le̱ Niná nga kitsò:

«Kisikꞌabí‑le̱ xínkjín najño‑na̱,

kꞌoa̱ kisiskákao̱ na̱cha̱ najño‑na̱».

36 Kꞌoa̱ tsakatiò‑ni nga kisikoìnda̱.

37 Kꞌoa̱ ya̱ tꞌain jko̱ Jesús tsakꞌétꞌa én xi kꞌoa̱tsò jme kjoa̱‑ni nga kjoa̱ñꞌain tífaꞌá‑ni:

«JÉ XO̱KJI JESÚS,

JÈ CHJO̱TA̱XÁ NGAJKO̱‑LE̱ CHJO̱TA̱ JUDÍOS».

38 Kꞌia̱ jaò chjo̱ta̱ tsꞌe̱n xi kꞌoa̱ti̱ krò kisꞌetꞌa,

jngo ya̱ ngakìxi̱‑le̱ Jesús,

kꞌoa̱ jngo ya̱ ngaskón‑le̱.

39 Kꞌoa̱ jè chjo̱ta̱ xi ya̱ tjiófaꞌa kisikꞌatji jko̱ nga tjiónchja̱ꞌaon‑le̱ Jesús,^d

40 kꞌoa̱ kitsò‑le̱:

—Ji xi kisi nga si̱kixòyai yo̱ngo̱,

kꞌoa̱ nga jàn ni̱chrjin kꞌoénda ngìndia‑ni,

chꞌa̱sjentjaì yao‑li̱;

tsà ji‑ní ꞌNdí‑le̱ Niná,

títjo̱jen‑tꞌai krò.

41 Kꞌoa̱ati̱ tjiósꞌín ngatsꞌi na̱ꞌmi xi tjió títjòn‑le̱ na̱ꞌmi,

kao̱ ngatsꞌi chjo̱ta̱ xi kji kjoa̱téxoma‑le̱ Niná xi kiski Moisés,

kao̱ chjo̱ta̱ fariseo,

kao̱ chjo̱ta̱ jchínga,

tjióbijnòke,

tjiótsò:

42 —Tsakꞌasjentjaí xi kja̱ꞌaí,

to̱nga lìkoi ma‑le̱ bꞌasjentjaì yao‑le̱;

tsà jé xi Chjo̱ta̱xá Ngajko̱‑le̱ chjo̱ta̱ Israel,

kàtabitjojen‑tꞌa krò ndꞌai̱,

kꞌoa̱ kꞌia̱a koa̱n‑kjaín‑ná xi tꞌatsꞌe̱.

43 Kisinꞌión‑tꞌaà Niná;

kàtabꞌasjentjaì ndꞌai̱ tsà kjoa̱kìxi̱ nga tsjoake;^e

nga̱ jé xi “ꞌNdí‑le̱ Niná” kitsò‑le̱ yao‑le̱.

44 Saꞌnda jè chjo̱ta̱ xi nꞌión tsꞌe̱n xi kꞌoa̱ti̱ kisꞌetꞌa krò,

tjiónchja̱ꞌaon‑le̱ Jesús.

45 Kꞌoa̱ nga je kichòka nchisen,

kisꞌenjiòn ngayije soꞌnde,

saꞌnda nga choa̱ jàn nga koanxòn.

46 Kꞌia̱ nga je me choa̱ jàn nga koanxòn,

nꞌión kiskiꞌndiáxá Jesús,

kitsò:

Én xi tsò‑nile̱:

«Niná‑na̱,

Niná‑na̱,

án‑ni nga kànjion‑tokòn‑ninaí».^f

47 Jè chjo̱ta̱ xi ya̱ tjió tjín kꞌa xi kitsò,

kꞌia̱ nga kinchrꞌoé‑le̱:

—Jé Elías tínchja̱‑le̱ xo̱kji.

48 Kꞌoa̱ jngo chjo̱ta̱ xi ya̱ tjió kjoan kitòka,

kiskoé jngo najño,

kisikaꞌnchi̱-ni ndá totseè xi xá satió san‑ni,

kꞌoa̱ kisikꞌótjijko̱ jngo yána̱xo̱ kꞌoa̱ tsakꞌétꞌa‑le̱ tsꞌoa Jesús.^g

49 To̱nga jè chjo̱ta̱ xikꞌa kitsò:

—Alì kꞌoa̱‑jìn nìkoai̱,

chótsen‑làleè tsà kjoa̱ꞌaí kꞌasjentjaí jè Elías.

50 To̱nga Jesús ngìjngokꞌà nꞌión kiskiꞌndiáxá,

kꞌoa̱ kisintsja Niná sén ni̱chrjin‑le̱.

51 Kꞌoa̱ koe̱e‑ni,

jè najño xi tje̱n‑chjoà ya̱ ya yo̱ngo̱,

kixijndájen tꞌain‑ni saꞌnda nangi‑ni nga jaòya koan;

kꞌoa̱ chaón jaꞌa,

kꞌoa̱ jè na̱xi̱ koanjaòya;

52 kꞌoa̱ nkjìn ngijao jña kjioya kꞌen kitjoꞌaì,

kꞌoa̱ nkjìn chjo̱ta̱ xi Niná kiskoétꞌaxìn xi je kꞌen,

jaꞌáya‑nile̱;

53 kꞌia̱ nga je jaꞌáya‑nile̱ Jesús,

jè chjo̱ta̱ xi jaꞌáya‑nile̱ kitjo‑ni ya̱ ngijao jña sꞌeyoyà kꞌen,

jaꞌasꞌen ya̱ na̱xi̱nandá‑nꞌión Jerusalén xi tsꞌe̱ Niná kꞌoa̱ nkjìn chjo̱ta̱ xi tsabe.

54 Kꞌoa̱ jè chjo̱ta̱ kjoa̱jchán ngajko̱ kao̱ xi ya̱ tjiókao̱ nga tjiósíkoìnda̱ Jesús,

kꞌia̱ nga tsabe nga chaón‑nꞌión jaꞌa kꞌoa̱ kao̱ ngayije jme xi koan,

nꞌión kitsokjòn,

kꞌoa̱ kitsò:

—Ñaki kìxi̱ nga ꞌndí‑le̱ Niná chjo̱ta̱ xo̱kji.

55 Nkjìn yánchjín xi ya̱ tjió xi kjin tjiókòtsen‑ni,

xi kinchroatje̱n‑ngi‑nile̱ Jesús nga kisisin‑le̱ saꞌnda nga kinchroa‑ni ya̱ ꞌnde Galilea,

56 ya̱ tje̱njin jè María xi Magdala tsꞌe̱,

María jè na̱‑le̱ Jacobo kao̱ José,

kao̱ jè na̱‑le̱ xti‑le̱ Zebedeo.

57 Kꞌia̱ nga je koanjiòn,

jaꞌai jngo chjo̱ta̱ nchi̱ná xi José ꞌmì,

xi ya̱ na̱xi̱nandá‑nꞌión Arimatea tsꞌe̱,

xi kꞌoa̱ti̱ kiskòtꞌayà xi tꞌatsꞌe̱ Jesús.

58 Jè chjo̱ta̱ xo̱kji kikòn‑le̱ Pilato,

kꞌoa̱ kisijé‑le̱ yao‑le̱ Jesús.

Kꞌia̱ Pilato tsakꞌénè nga kàtabꞌaì‑le̱ yao‑le̱ Jesús.

59 Kꞌoa̱ José tsakꞌaje̱n‑tꞌa krò yao‑le̱ Jesús,

kꞌoa̱ jngo najño‑te xi tsje tsakájtéjon,

60 kꞌoa̱ ya̱ kisikájnaya jngo ngijao chjo̱tse̱,

jña sꞌeyoyà kꞌen,

ngijao‑be̱ tsꞌe̱ José,

xá kiskoꞌaitꞌa‑ni na̱xi̱;

kꞌia̱ nga je tsakasènjna jchro ya̱ xo̱ntjoa̱‑le̱ ngijao jngo la̱jao̱ xi nꞌión ꞌmbá kji,

ki.

61 Kꞌoa̱ jè María xi Magdala tsꞌe̱ kao̱ jè María xi ngìjngo,

ya̱a tjió chrian jña tíjna ngijao.

62 Kꞌia̱ nga koan‑nchaon‑ni,

nga ni̱chrjin nìkjáya,

tsakatiòjtín jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo ya̱ ngixko̱n Pilato,

63 kꞌoa̱ kitsò‑le̱:

—Nai,

tífaꞌaitsjen‑naji̱n nga jè chjo̱ta̱ bꞌana̱cha̱ xo̱kji,

i̱i kitsò kꞌia̱ nga sꞌa̱ tíjnakon‑sa:

“Xi koa̱n jàn‑ni ni̱chrjin kjoa̱ꞌáya‑nina”.

64 Tꞌè‑naì-ni,

nga nda kàtamakoìnda̱ jè ngijao jña kàsꞌejnaya yao‑le̱ saꞌnda nga koa̱n jàn‑ni ni̱chrjin,

tsà mai kꞌia̱ nga njiòn kjoa̱ꞌaí chjo̱ta̱ xi ya̱ kiskòtꞌayàtꞌa‑le̱ nga kjoa̱ꞌaíkꞌáché yao‑le̱,

kꞌoa̱ koi̱tso̱‑le̱ chjo̱ta̱:

“Jeè kàfaꞌáyàjin‑nile̱ kꞌen”.

Kꞌoa̱ jè kjoa̱ xo̱kji ngìsa̱ ti̱ tse koa̱n ngá‑ni ti̱kꞌoa̱‑ni nga títjòn.

65 Kꞌoa̱ Pilato kitsò‑le̱:

—Ya̱ tjió ya̱ chjo̱ta̱ kjoa̱jchán xi síkoìnda̱;

tangión kao̱o jè,

kꞌoa̱ nꞌión nda ti̱koìndao̱o josꞌìn nga jòn ꞌyao.

66 Kꞌia̱ ki jè chjo̱ta̱ xo̱kjoan,

kꞌoa̱ tsakꞌénè nga nꞌión nda kàtamakoìnda̱ ngijao,

kꞌoa̱ tsakꞌéchoa̱ jè la̱jao̱ xi kisꞌechjoachrjo‑ni ngijao jmé‑ni nga tsìꞌya xi koa̱n skóꞌaì‑ni,

kꞌoa̱ ya̱ kisikatióꞌndà chjo̱ta̱ kjoa̱jchán xi kisikoìnda̱.