—¡ꞌYaxkón‑laìji̱n,

Chjo̱ta̱xá Ngajko̱‑le̱ chjo̱ta̱ judío!

Kꞌoa̱ tjiósíjtsin‑à kao̱‑ni.

4 Kꞌia̱ Pilato ti̱ kitjo ngìndia ngá‑ni,

kꞌoa̱ kitsò‑le̱ chjo̱ta̱ xi kichòkao̱:

—Chótsen‑lao̱o,

tìsikꞌéjna basen‑no i̱ nditsin,

jmé‑ni nga kàtamacho̱ya‑no nga ni̱jme‑jìn jé masjai‑na xi tꞌatsꞌe̱.

5 Kꞌoa̱ tsakichonsje Jesús,

tjiá jko̱ jè yá naꞌyá xi kisꞌetji kꞌoa̱ yꞌakjá jè najño xi nì kichjàn kji xi síchjèn chjo̱ta̱xá.

Kꞌoa̱ Pilato kitsò‑le̱ chjo̱ta̱:

—¡Koe̱e‑ni i̱ tíjna jè chjo̱ta̱ xo̱kji!

6 Kꞌia̱ nga jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi síkoìnda̱ yo̱ngo̱,

tsabe Jesús,

nkjìn kꞌa kiskindꞌiáxá kitsò:

—¡Krò tjatꞌai!,

¡krò tjatꞌai!

Pilato kitsò‑le̱:

—Jòn tangíkao̱o,

kꞌoa̱ jòn tjatꞌao krò;

nga̱ an ni̱jme‑jìn jé masjai‑na tꞌatsꞌe̱.

7 Jè chjo̱ta̱ judío kitsò‑le̱:

—Ji̱n jngoò kjoa̱téxoma tjín‑naji̱n,

kꞌoa̱ xi kao̱ kjoa̱téxoma‑na̱ji̱n tjínè‑le̱ nga koi̱yá,

nga̱ ꞌNdí‑le̱ Niná tsò‑le̱ yao‑le̱.

8 Kꞌia̱ nga Pilato kinchrꞌoé jè én xo̱ tsò,

ngìsa̱a nꞌión kitsokjòn.

9 Kꞌia̱ Pilato ngìndia jaꞌasꞌen‑kao̱ Jesús ya̱ nditsin ndꞌia‑le̱,

kꞌoa̱ kitsò‑le̱ Jesús:

—Jñá‑ni tsi̱.

To̱nga Jesús lìkoi kinchja̱.

10 Kꞌia̱ Pilato kitsò‑le̱:

—A tsí nòkjoa̱kao̱‑naí.

A tsí ꞌyai nga tjín‑na nganꞌión nga koatꞌa‑lè krò,

kꞌoa̱ nga kꞌoa̱ti̱ tjín‑na nganꞌión nga sikꞌéjnandaí‑lè.

11 Jesús kitsò:

—Ni̱jngo‑jìn nganꞌión tjín‑lì xi kao̱ an,

tsà tsì Niná kitsjoa‑lì;

koiì kjoa̱ nga jè chjo̱ta̱ xi kàfaꞌaikao̱tꞌa‑na ngixkoin,

ngìsa̱a tse jé tíbajngi.

12 Kꞌia̱a tsakꞌétsꞌia̱kao̱ Pilato nga tsakásjai jósꞌìn si̱ikꞌéjnandaí Jesús;

to̱nga jè chjo̱ta̱ judío nꞌión tsakꞌéjta,

kitsò:

—Tsà jè chjo̱ta̱ xo̱kji si̱kꞌéjnandaí,

lìtsà mìyo̱‑le̱ César mai,

xi chjo̱ta̱xá títjòn‑le̱ Roma;

nga̱ to̱ꞌya‑ni xi chjo̱ta̱xá ngajko̱ tsò‑le̱ yao‑le̱ jé César bꞌèjnachjoá‑le̱.

13 Kꞌia̱ nga Pilato kinchrꞌoé jè én xo̱ tsò,

kikao̱ Jesús ya̱ nditsin,

kꞌoa̱ ya̱ tsakꞌèjnasòn yáxìle̱ jña síjtsòꞌa chjo̱ta̱,

ya̱ ꞌnde jña Sòn Chrjaó La̱jao̱ ꞌmì,

kꞌoa̱ Gabata ꞌmì nga én hebreo.

14 Nga kꞌia̱,

koiì ni̱chrjin nga batiònda chjo̱ta̱ judío tꞌatsꞌe̱ sꞌoí nga tsì tsꞌakao̱‑le̱ kjoa̱biya,

kꞌoa̱ je‑la̱ nchisen.

Kꞌia̱ Pilato kitsò‑le̱ jè chjo̱ta̱ judío:

—¡Koe̱e‑ni i̱i tíjna jè Chjo̱ta̱xá Ngajko̱‑no!

15 To̱nga jè chjo̱ta̱ judío nꞌión kiskindꞌiáxá kitsò:

—¡Ti̱chonsjai kꞌoa̱ krò ti̱kꞌen‑tꞌai!

Pilato kitsò‑le̱:

—A krò sikꞌèn‑tꞌà jè Chjo̱ta̱xá Ngajko̱‑no.

Jè na̱ꞌmi xi tjió títjòn‑le̱ na̱ꞌmi kitsò:

—Tsìn‑naji̱n chjo̱ta̱xá ngajko̱ xi kja̱ꞌaí,

to̱jngoò jè César,

xi chjo̱ta̱xá títjòn‑le̱ Roma.

16 Kꞌoa̱a koan‑ni nga Pilato ya̱ kisintsja chjo̱ta̱ kjoa̱jchán Jesús,

jmé‑ni nga kàtasꞌetꞌa‑ni krò.

Kꞌia̱ jè chjo̱ta̱ kjoa̱jchán kitsoa,

kꞌoa̱ kikao̱.

17 Kꞌoa̱ Jesús kjintjaìchrja krò‑le̱,

kikao̱ chjo̱ta̱ kjoa̱jchán ya̱ ꞌnde jña Jko̱ Kꞌen ꞌmì,

kꞌoa̱ Gólgota ꞌmì nga én hebreo;

18 kꞌoa̱ ya̱ kisꞌetꞌa krò Jesús kao̱ ngìjaò sa chjo̱ta̱ xi krò kisꞌetꞌa,

jngó jngó nga jngó jngó ngoa‑le̱,

kꞌoa̱ ya̱ ngabasen‑le̱ kinìkasén‑jna krò xi kjitꞌa Jesús.

19 Kꞌoa̱ti̱ kiski Pilato jngo én xi kisꞌetꞌa ya̱ krò xi tsò:

«JESÚS XI NAZARET TSꞌE̱,

JÈ CHJO̱TA̱XÁ NGAJKO̱‑LE̱ CHJO̱TA̱ JUDÍO»

20 Kꞌoa̱ nkjìn chjo̱ta̱ judío tsakꞌéxkia̱ jè én xo̱ tsò;

nga̱ ya̱ ꞌnde jña kisꞌetꞌa krò Jesús ti̱ya̱a chrian‑ni̱le̱ na̱xi̱nandá‑nꞌión Jerusalén,

kꞌoa̱ én jè tjítꞌaà nga én hebreo,

én griego kꞌoa̱ én latín.

21 Jè na̱ꞌmi xi tjió títjòn‑le̱ na̱ꞌmi‑le̱ chjo̱ta̱ judío kitsò‑le̱ Pilato:

—Alì kꞌoa̱a bꞌè‑jìn nga jè xi chjo̱ta̱xá ngajko̱‑le̱ chjo̱ta̱ judío,

to̱sa̱a i̱ tꞌai:

“Jè xi kitsò:

An‑nià jè Chjo̱ta̱xá Ngajko̱‑le̱ chjo̱ta̱ judío”.

22 Pilato kitsò:

—Josꞌìn kàkjia,

to̱ jeè kꞌoa̱sꞌìn kàkjia.

23 Kꞌia̱ nga jè chjo̱ta̱ kjoa̱jchán je tsakátꞌa krò Jesús,

kiskoé najño‑le̱,

kꞌoa̱ ño‑ya kisꞌin,

jngó jngó kiskoé nga jngó jngó.

Kꞌoa̱ti̱ kiskoé jè najño jnchro‑le̱,

xi tsì kitjoya,

to̱ kjijngoò ngayije.

24 Kꞌia̱ kitsò‑le̱ xínkjín:

—Lìkoi tsà si̱xkoa̱yaà jè najño jnchro‑le̱,

to̱saà to̱ si̱skákao̱ na̱cha̱a,

jmé‑ni nga jcha̱‑niá ꞌyá‑ni xi tsꞌe̱ koa̱n.

Koiì kꞌoa̱koan‑ni jmé‑ni nga kꞌoa̱sꞌìn koi̱tjosòn‑ni josꞌìn tjítꞌa Xo̱n Én‑le̱ Niná,

xi tsò:

25 Ya̱ tjiótꞌa chrian krò‑le̱ Jesús jè na̱‑le̱ kao̱ ndichja na̱‑le̱,

María jè chjo̱on‑le̱ Cleofas,

kao̱ María xi Magdala tsꞌe̱.

26 Kꞌia̱ nga Jesús tsabe na̱‑le̱,

kꞌoa̱ nga ya̱ sénjna jngo chjo̱ta̱ xi ya̱ kòtꞌayàtꞌa‑le̱,

jè xi nꞌión tsjoake,

kitsò‑le̱ na̱‑le̱:

—Chjo̱on,

tíjna ya̱ jè ti‑li̱.

27 Kꞌia̱ kitsò‑le̱ jè chjo̱ta̱ xi ya̱ kòtꞌayàtꞌa‑le̱,

jè xi nꞌión tsjoake:

—Ya̱ tíjna ya̱ jè na̱‑li̱.

Ti̱koi‑ni ni̱chrjin jè chjo̱ta̱ xi ya̱ kòtꞌayàtꞌa‑le̱,

xi nꞌión tsjoake,

kiskoétjaò na̱‑le̱ Jesús ya̱ ndꞌia‑le̱.

28 Xi je koan kjoa̱ jè,

Jesús tsabe nga je koanjngo yije‑le̱ xá xi kinìkasén‑ni,

jmé‑ni nga koi̱tjosòn‑síni jotsò Xo̱n Én‑le̱ Niná,

kitsò:^b

—Fatì‑na.

29 Kꞌoa̱ ya̱ tíjna jngo ti̱i xi tjiákitse ndá totseè xi xá satiósan‑ni;

kꞌia̱ jè chjo̱ta̱ kjoa̱jchán jngo najño kisikàꞌnchi̱‑ni,

tsakꞌéjko jngo yá hisopo,

kꞌoa̱ tsakjén‑tꞌa chrian‑le̱ tsꞌoa Jesús.

30 Kꞌia̱ nga Jesús tsakꞌi ndá totseè san,

kitsò:

—Jeè koanjngo yije‑na xá xi kinìkasén‑nina.

Kꞌia̱ nga je tsakjén‑jten jko̱ Jesús kꞌia̱ kisintsja Niná sén ni̱chrjin‑le̱.

31 Kꞌia̱ nga koi ni̱chrjin,

kꞌia̱a batiònda chjo̱ta̱ judío tꞌatsꞌe̱ sꞌoí nga tsì tsꞌakao̱‑le̱ kjoa̱biya,

koiì kjoa̱ nga jè chjo̱ta̱ jchínga‑le̱ chjo̱ta̱ judío nꞌión kisijé‑le̱ Pilato nga kàtakjotꞌaó jè ngaso‑le̱ chjo̱ta̱ xi kjiotꞌa krò,

kꞌoa̱ nga kàtabꞌáxìn yao‑le̱,

jmé‑ni nga tsì to̱ ya̱ sꞌe̱yotꞌa‑ni krò yao‑le̱ kꞌia̱ nga ni̱chrjin xotò,

ni̱chrjin nga bexkón Niná chjo̱ta̱ judío (nga̱ koiì ni̱chrjin xotò xo̱kji nga ngìsa̱ nꞌión bexkón chjo̱ta̱ judío).

32 Jaꞌai‑ni chjo̱ta̱ kjoa̱jchán,

kꞌoa̱ kiskotꞌaó ngaso‑le̱ jè xi títjòn,

kꞌoa̱ti̱ kisikao̱ jè xi ngìjngo xi ñatje̱n kisꞌetꞌa krò.

33 To̱nga kꞌia̱ nga jaꞌaikatꞌa‑le̱ Jesús,

kꞌia̱ nga tsabe nga je kijnakꞌen,

lìkoi kiskotꞌaó ngaso‑le̱.

34 To̱nga jngo chjo̱ta̱ kjoa̱jchán xi jngo ki̱cha̱ yaoxkòn xi yá tíjnajko kiskanìsꞌenjin ninda ni̱si̱n‑le̱ Jesús,

kꞌoa̱ ndi̱to̱n kitjo njín kao̱ nandá.

35 Kꞌoa̱ jè xi tsabe tsjoá én‑le̱,

kꞌoa̱ jè én‑le̱ ñaki kìxi̱i;

kꞌoa̱ jè,

beè nga ñaki kìxi̱ jè én xi nchja̱,

jmé‑ni nga jòn kꞌoa̱ti̱ kàtamakjaín‑nino.

36 Nga̱ jè kjoa̱ jè kꞌoa̱akoan,

jmé‑ni nga kꞌoa̱sꞌìn koi̱tjosòn‑ni josꞌìn tjítꞌa Xo̱n Én‑le̱ Niná,

xi tsò:

«Ni̱jngo‑jìn ninda‑le̱ chjótꞌaó».^c

37 Jña xìn,

kꞌoa̱ati̱ sꞌìn tjítꞌa Xo̱n Én‑le̱ Niná:

«Skótseèn‑le̱ chjo̱ta̱ jè xi ki̱cha̱ kichanìsꞌenjin ya̱ ninda ni̱si̱n‑le̱».^d

38 Kꞌia̱ nga je jaꞌato ngayije kjoa̱ jè,

jè José xi ya̱ na̱xi̱nandá‑nꞌión Arimatea tsꞌe̱,

xi kꞌoa̱ti̱ kiskòtꞌayà tꞌatsꞌe̱ Jesús,

to̱nga lìkoi tsakakó yao‑le̱,

nga̱ jé chjo̱ta̱ jchínga‑le̱ chjo̱ta̱ judío kitsokjòn‑le̱,

tsakꞌétsꞌoa‑le̱ Pilato nga kàtatsjoáꞌnde‑le̱ nga koai̱kao̱ yao‑le̱ Jesús;

kꞌoa̱ Pilato kitsjoaꞌndè‑le̱.

Kꞌia̱ José jaꞌaikꞌaje̱n‑tꞌa krò yao‑le̱ Jesús kꞌoa̱ kikao̱.

39 Kꞌoa̱ati̱ kichò Nicodemo,

jè xi koan‑njiòn kichòkon ñandia‑le̱ Jesús,

kan‑tè‑la̱ kilo ma‑ni sìti̱‑xi xi kichòkao̱ xi tjítsꞌójin‑le̱ ntsji̱n‑yá,

xi nda nje̱n kao̱ áloe.

40 José kao̱ Nicodemo kiskoé yao‑le̱ Jesús,

kꞌoa̱ sìti̱‑xi kitsjòjon kꞌoa̱ tsakájtéjon najño,

josꞌìn be‑ni chjo̱ta̱ judío nga báyoyà kꞌen‑le̱ ya̱ ngijao jña sꞌeyoyà kꞌen.

41 Kꞌoa̱ ya̱ ꞌnde jña kisꞌetꞌa krò Jesús,

tíjna jngo ꞌnde jña kji yántjè,

kꞌoa̱ ya̱ jin yántjè tíjna jngo ngijao chjo̱tse̱ jña sꞌeyoyà kꞌen,

jña ni̱saꞌya‑jìn xi sꞌejnaya.

42 Koiì nga ya̱ kisikájnaya‑ni yao‑le̱ Jesús,

kꞌia̱ nga koi tjióbatiònda‑le̱ sꞌoí nga tsì tsꞌakao̱‑le̱ kjoa̱biya chjo̱ta̱ judío kꞌoa̱ nga ya̱ tíjnachrian ngijao jè.