Jmé xi síjndí jè chjo̱ta̱
15
Kꞌia̱ kichòkon kꞌà‑le̱ Jesús jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo xi ya̱ Jerusalén jaꞌai‑ni,
kitsò:
2 —Án‑ni nga jè chjo̱ta̱ xi ya̱ kòtꞌayàtꞌa‑lì faꞌatontjaì‑nile̱ josꞌìn be‑ni chjo̱ta̱ jchínga‑ná,
nga tsì banéjon ntsja kꞌia̱ nga kjèn.
3 Kꞌia̱ kinchja̱ Jesús,
kitsò‑le̱:
—Kꞌoa̱ án‑ni nga kꞌoa̱ti̱ bitjatòntjaì‑nilao̱o jòn jè kjoa̱téxoma xi bꞌénè Niná,
kꞌia̱ nga nìkitjosòn josꞌìn be‑ni chjo̱ta̱ jchínga‑no.
4 Nga̱ Niná tsakꞌénè nga kitsò:
“Jcha̱xkoín nꞌai‑li̱ kao̱ na̱‑li̱”;a
kꞌoa̱:
“Jè xi koi̱nchja̱ꞌaon‑le̱ nꞌai‑le̱ axo̱ na̱‑le̱,
lìkoi kàtachatꞌa‑le̱ to̱saà kàtanìkꞌen”.b
5 To̱nga jòn bixón:
“To̱ꞌya‑ni xi koi̱tso̱‑le̱ nꞌai‑le̱ axo̱ na̱‑le̱:
‹Niná tsjoatꞌà‑le̱ ngayije kao̱ jme xi koa̱n koàse̱n‑kao̱‑lè,›
6 lìkoi ti̱ tjínè‑nile̱ nga bexkón nꞌai‑le̱ axo̱ na̱‑le̱”.
Kꞌoa̱asꞌìn tìbitjatòntjaì‑lao̱o jè kjoa̱téxoma xi bꞌénè Niná xi to̱ tꞌatsꞌe̱ nga koi ꞌyaxkón josꞌìn be‑ni chjo̱ta̱ jchínga‑no.
7 Chjo̱ta̱ jaò‑nkjaín xo̱kjoaon,
ndaà kinchja̱ xi tꞌatsao̱on Isaías,
jè chjo̱ta̱ xi kinchja̱ya ngajao‑le̱ Niná,
kꞌia̱ nga kitsò:
8 “Jè chjo̱ta̱ xo̱kjoan to̱ tsꞌoa xo̱ tsò nga bexkón‑na;
To̱nga jè ni̱ma̱‑le̱ kjiìn‑ni tjió‑le̱ xi kao̱ an.
9 Kꞌoa̱ to̱ xitsjoa‑ni nga an bexkón‑na,
Nga̱ jo kjoa̱chòtꞌayà xi tsꞌa̱n sꞌìn bakóya kjoa̱téxoma xi chjo̱ta̱ bꞌénè”.c
10 Kꞌia̱ Jesús kinchja̱maxkó‑le̱ chjo̱ta̱‑nkjìn,
kitsò‑le̱:
—Ti̱nchaño,
kꞌoa̱ kàtamacho̱ya‑no:
11 Alì tsà koi‑jìn xi faꞌasꞌen tsꞌoa chjo̱ta̱ xi síjndí;
to̱saà koi xi ya̱ bitjo‑ni tsꞌoa chjo̱ta̱ xi síjndí.
12 Kꞌia̱ tsakinchabꞌàkjátꞌa‑le̱ chjo̱ta̱ xi ya̱ kòtꞌayàtꞌa‑le̱,
kitsò‑le̱:
—A kàꞌya‑nì nga kàmajti‑le̱ jè chjo̱ta̱ fariseo kꞌia̱ nga kànchrꞌoé jo kàsi.
13 To̱nga Jesús kitsò:
—Ngayije tsojmìntjè xi tsì tsà jè Nꞌai‑na̱ xi tíjna ngꞌajmi tsakꞌéntjè,
tjónèya‑ní.
14 Alì jè‑jìn chjo̱ta̱ xo̱kjoan nìsin‑lao̱o;
nga̱ xka̱a kjoan,
kꞌoa̱ jè bándia̱a‑le̱ chjo̱ta̱ xi xka̱ kjoan;
kꞌoa̱ tsà jè chjo̱ta̱ xi xka̱ koandia̱a‑le̱ jè chjo̱ta̱ xi xka̱ kji,
ngajaò,
ya̱a to̱jngo jtsao̱sꞌen ya̱ nga̱jao̱.
15 Kꞌia̱ kinchja̱ Pedro,
kitsò‑le̱ Jesús:
—Tꞌìnya‑naíji̱n jótsò‑nile̱ jè choa̱ xo̱kji xi mangósòn‑kao̱ jngo kjoa̱.
16 Jesús kitsò‑le̱:
—Saꞌnda jòn,
a kꞌoa̱ati̱ kje macho̱yajìn‑no.
17 A tsí macho̱ya‑no nga ngayije xi ndso̱ꞌbà faꞌasꞌen,
ya̱a ya ndsꞌoaà fichó,
kꞌoa̱ xi je ma mangín‑kijna.
18 To̱nga jè én xi bitjo‑ni tsꞌoa chjo̱ta̱,
ya̱a jin ni̱ma̱‑le̱ bitjo‑ni;
kꞌoa̱ koiì jè xi síjndí jè chjo̱ta̱.
19 Nga̱ ya̱a jin ni̱ma̱‑le̱ chjo̱ta̱ bitjojin‑ni jè kjoa̱faꞌaitsjen xi chꞌao tsò:
Nga síkꞌen,
nga síchajngi,
nga to̱ngì‑ni fayokao̱ xínkjín nga kje bixan‑jìn,
nga síché,
nga én xi tsì kꞌoa̱tjín bánè xi kja̱ꞌaí,
kꞌoa̱ kao̱ nga nchja̱ꞌaon.
20 Koiì kjoa̱ xo̱kjoan xi síjndí jè chjo̱ta̱;
to̱nga kꞌia̱ nga tsì banèjoàn ndsa̱a nga bichaà lìkoi tsà síjndí chjo̱ta̱.
Jè kjoa̱makjaín‑le̱ jè chjo̱on xi ntje̱‑le̱ Canaán tje̱n‑ni
21 Kꞌia̱ nga Jesús kitjo‑ni ya̱,
ki ya̱ ꞌnde jña nchja̱‑ni na̱xi̱nandá‑nꞌión Tiro kao̱ na̱xi̱nandá‑nꞌión Sidón.
22 Kꞌoa̱ to̱ i̱i koan jngo chjo̱on xi ntje̱‑le̱ Canaán tje̱n‑ni,
kitjo‑ni ya̱ ꞌnde xo̱kji,
nꞌión kiskiꞌndiáxá kitsò:
—¡Nai,
xi ntje̱‑le̱ David tje̱n‑ni,
jcha̱ma̱tokòn‑naí!
Jè ꞌndí tsòti‑na̱,
nꞌión tse kjoa̱ñꞌain tísíkjaꞌá jngo sén ni̱chrjin xi tsꞌe̱ nai̱i.
23 To̱nga Jesús ni̱jngo‑jìn én tsakjákao̱.
Kꞌia̱ jè chjo̱ta̱ xi ya̱ kòtꞌayàtꞌa‑le̱ tsakinchabꞌàkjátꞌa‑le̱,
tsakꞌétsꞌoa‑le̱ kitsò‑le̱:
—Ti̱sin‑lai̱ jè chjo̱on xo̱kji jmé‑ni nga kàtafì‑ni,
nga̱ ñá tíkjiꞌndiáxátje̱n‑ngi‑ná.
24 Kinchja̱ Jesús,
kitsò:
—To̱ ya̱a kinìkasén‑na jña tjió jè chjo̱ta̱ xi ntje̱‑le̱ Israel xi kicha joni tsà barrè.
25 Kꞌia̱ jaꞌai jè chjo̱on kꞌoa̱ tsakajnajten‑tꞌa nangi ngi ndso̱ko̱ Jesús,
kitsò:
—¡Nai,
ti̱se̱n‑kao̱‑naí!
26 Kinchja̱ Jesús kitsò:
—Lìkoi nda tjín nga koi chjoé nio̱xtìla̱‑le̱ xti,
kꞌoa̱ nga jè niáa xko̱ si̱kꞌatsao‑le̱e.
27 Kꞌoa̱ jè chjo̱on kitsò:
—Jaon Nai;
to̱nga jè niáa xko̱ xá to̱ tjoeè‑nile̱ ni̱nga to̱jè xkoa̱ xi tsaongi ya̱ yámìxa̱‑le̱ nai‑le̱.
28 Kꞌia̱ kinchja̱ Jesús,
kitsò:
—Ji ꞌndí chjo̱on,
nꞌión tse jè kjoa̱makjaín‑li̱;
kꞌoa̱ kàtama josꞌìn nga ji me‑lì.
Kꞌoa̱ jè tsòti‑le̱ ti̱ꞌa kꞌia̱a koan‑ndaya‑ni.
Nkjìn chjo̱ta̱ xi chꞌin tjín‑le̱ kisindaya Jesús
29 Kitjo‑ni ya̱ Jesús,
kꞌoa̱ jaꞌai ya̱ ndai ndáchikon Galilea;
kꞌoa̱ xi je koan kimi ya̱ nindo kꞌoa̱ tsakꞌèjna.
30 Kꞌoa̱ nꞌión nkjìn chjo̱ta̱ kichòkon‑le̱ xi kichòkao̱‑le̱ chjo̱ta̱ xi chji̱ꞌngé,
xi xka̱,
xi tsì ma‑le̱ nchja̱,
xi yo̱ma̱ kjoan ntsja,
kꞌoa̱ nꞌión nkjìn sa xi chꞌin tjín‑le̱;
kꞌoa̱ ya̱ kisikatiótꞌachrian ngi ndso̱ko̱ Jesús,
kꞌoa̱ jè kisindaya,
31 kꞌoa̱ ñaki to̱kꞌoa̱a koan‑le̱ jè chjo̱ta̱‑nkjìn,
nga tsabe nga koan kinchja̱ jè chjo̱ta̱ xi tsì ma‑le̱ nchja̱;
jè xi yo̱ma̱ kjoan ntsja koan‑ndaya,
kꞌoa̱ jè xi chji̱ꞌngé koaàn tsakꞌèma,
kꞌoa̱ jè xi xka̱ koan‑tseèn‑le̱;
kꞌoa̱ tsakꞌasjejeya Niná‑le̱ chjo̱ta̱ Israel.
Jesús ño jmi chjo̱ta̱ kisikjèn
32 Kꞌoa̱ Jesús kinchja̱‑le̱ chjo̱ta̱ xi ya̱ kòtꞌayàtꞌa‑le̱,
kitsò:
—Ma ma̱a‑na jè chjo̱ta̱,
nga̱ jeè jàn ni̱chrjin tjín‑ni nga i̱ tjiókao̱‑na,
kꞌoa̱ tsìn‑le̱ jme xi tjiókjèn;
kꞌoa̱ kai‑na nga to̱ sikasén‑nchjan,
tsà mai ya̱a koa̱n‑inda ya̱ yandia̱a.
33 Kꞌia̱ jè chjo̱ta̱ xi ya̱ kòtꞌayàtꞌa‑le̱ kitsò‑le̱:
—Jñá koan‑ngínchꞌaì‑ji̱n nio̱xtìla̱ xi kꞌoa̱síkji i̱ ꞌnde tꞌaxìn‑tꞌa,
xi koa̱n koa̱nski‑ni jè chjo̱ta̱‑nkjìn xo̱ síchon.
34 Jesús kitsò‑le̱:
—Jótjín ma nio̱xtìla̱ xi tjió‑no.
Kꞌoa̱ jè chjo̱ta̱ xi ya̱ kòtꞌayàtꞌa‑le̱ kitsò:
—Ñatoò ma‑ni,
kꞌoa̱ to̱ choa̱a ma‑ni jti̱ xkoa̱.
35 Kꞌoa̱ Jesús tsakꞌénè‑le̱ chjo̱ta̱‑nkjìn nga kàtabatiòtꞌa nangi.
36 Kꞌoa̱ Jesús kiskoé jè nio̱xtìla̱ xi ñato kao̱ jti̱,
kꞌoa̱ kitsjoa‑le̱ kjoa̱nda Niná,
kisixkoa̱ kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱,
kꞌoa̱ jè kisikꞌabí‑le̱ chjo̱ta̱‑nkjìn.
37 Kꞌoa̱ tsakjèn ngatsꞌi chjo̱ta̱,
kꞌoa̱ koanski;
kꞌoa̱ jè chjo̱ta̱ xi kòtꞌayàtꞌa‑le̱ Jesús tsakꞌéxkó jè xkoa̱ xi kinjèn‑ngi,
ñato ni̱si̱nyá kitse koan.
38 Kꞌoa̱ jè chjo̱ta̱ xi tsakjèn ño jmi ma‑ni,
kꞌoa̱ lìkoi koanxki̱kao̱ yánchjín kao̱ jè xti ꞌndí.
39 Kꞌia̱ nga Jesús je kisixan‑tꞌa jè chjo̱ta̱,
jaꞌasꞌen ya̱ chitso,
kꞌoa̱ jaꞌai ya̱ ꞌnde xi nchja̱‑ni na̱xi̱nandá‑nꞌión Magdala.