Jmé xi síjndí jè chjo̱ta̱
7
Koanxkótꞌa‑le̱ Jesús jè chjo̱ta̱ fariseo,
kao̱ kꞌa chjo̱ta̱ xi kji kjoa̱téxoma‑le̱ Niná xi kiski Moisés, xi ya̱ jaꞌai‑ni ya̱ Jerusalén;
2 kꞌia̱ nga tsabe jè chjo̱ta̱ xo̱kjoan nga tjín kꞌa chjo̱ta̱ xi ya̱ kòtꞌayàtꞌa‑le̱ Jesús nga tjiókjèn nio̱xtìla̱ nga to̱ kjoajndí ntsja,
nga tsì títjòn tsakanéjon, chꞌao sꞌìn tsakjaóya‑ni.
3 Nga̱ jè chjo̱ta̱ fariseo kao̱ ngatsꞌi xikꞌa chjo̱ta̱ judío kꞌoa̱asꞌìn síkitjosòn jè kjoa̱faꞌaìtsjen xi chjo̱ta̱ jchínga‑le̱ tsakakóya‑le̱,
tsà tsì nkjìn kꞌa banéjon ntsja josꞌìn be‑ni lìkoi ma kjèn.
4 Kꞌia̱ nga je faꞌai‑ni ndi̱tsi̱n,
tsà tsì koa̱nèjon ntsja,
lìkoi kjèn.
Kꞌoa̱ nkjìn‑sa kjoa̱faꞌaitsjen xi kja̱ꞌaí xi síkitjosòn,
joni kꞌia̱ nga banéya cho̱tsín xi ma ꞌyòya,
kao̱ nisa,
kao̱ tsojmì ki̱cha̱ xi síchjèn, kꞌoa̱ kao̱ nga banéjon na̱chan‑le̱.
5 Kꞌia̱ jè chjo̱ta̱ fariseo kao̱ chjo̱ta̱ xi kji kjoa̱téxoma‑le̱ Niná xi kiski Moisés kiskònangi‑le̱ Jesús kitsò‑le̱:
—Án‑ni nga jè chjo̱ta̱ xi ji kòtꞌayàtꞌa‑lì lìkoi síkitjosòn‑ni josꞌìn be‑ni jè chjo̱ta̱ jchínga‑ná,
nga̱ to̱ kjèn jndí nio̱xtìla̱ nga tsì banéjon ntsja.
6 Kꞌia̱ kinchja̱ Jesús,
kitsò‑le̱:
—Chjo̱ta̱ jaò‑nkjaín,
ndaà kinchja̱ya jè Isaías xi tꞌatsao̱on,
josꞌìn tjítꞌa xo̱n‑le̱ Niná:
“Jè chjo̱ta̱ na̱xi̱nandá xo̱kjoan to̱ tsꞌoa xo̱ tsò nga bexkón‑na,
To̱nga jè ni̱ma̱‑le̱ nkjiìn‑ni tjió‑le̱ xi kao̱ an.
7 Kꞌoa̱ ni̱jme‑jìn chjí‑le̱ nga an bexkón‑na,
Nga̱ jo kjoa̱chòtꞌayà xi tsꞌa̱n sꞌìn bakóya kjoa̱téxoma xi chjo̱ta̱ bꞌénè”.a
8 Nga̱ jòn,
kinjion‑tokòn‑nió jè kjoa̱téxoma xi bꞌénè Niná,
kꞌoa̱ koiì nꞌión mangín‑tꞌa‑lao̱o josꞌìn be‑ni jè chjo̱ta̱:
nga banèyao jè nisa kao̱ cho̱tsín xi ma ꞌyòya;
kꞌoa̱ nkjìn‑sa kjoa̱ xi mangósòn‑kao̱ kjoa̱ jè xi kꞌoa̱nꞌiaòn.
9 Kꞌoa̱ Jesús kitsò sa‑le̱:
—Lìkoi nìchjí‑lao̱o kjoa̱téxoma xi bꞌénè Niná, nga̱ koiì nìkitjosòn josꞌìn ꞌya‑nio.
10 Nga̱ Moisés kitsò:
“Jcha̱xkoín nꞌai‑li̱ kao̱ na̱‑li̱”;b
kꞌoa̱: “Jè xi koi̱nchja̱ꞌaon‑le̱ nꞌai‑le̱ axo̱ na̱‑le̱, lìkꞌia kàtachatꞌa‑le̱ to̱saà kàtanìkꞌen”.c
11 To̱nga jòn bixón:
“To̱ꞌya‑ni xi koi̱tso̱‑le̱ nꞌai‑le̱ axo̱ na̱‑le̱:
‹Lìkoi ti̱ koa̱n koase̱n‑kao̱‑nilè nga̱ ngayije xi tjín‑na Corbán‑ní (én xi tsò‑nile̱,
jeè Niná kitsjoatꞌa‑le̱ ngayije)›,”
12 kꞌoa̱ lìkoi bꞌaìꞌnde‑lao̱o nga jme‑sa xi sꞌín xi tꞌatsꞌe̱ nꞌai‑le̱ axo̱ xi tꞌatsꞌe̱ na̱‑le̱,
13 kꞌoa̱asꞌìn lìkoi nìchjí‑lao̱o én‑le̱ Niná xi to̱ tꞌatsꞌe̱ kjoa̱faꞌaitsjen xi bixónyao josꞌìn ꞌya‑nio.
Kꞌoa̱ nꞌión nkjìn sa kjoa̱ xi nꞌiaòn joni tsà koi jè.
14 Kꞌoa̱ Jesús kinchja̱maxkó‑le̱ ngatsꞌi chjo̱ta̱‑nkjìn,
nga kàtabincha bꞌàkjátꞌa‑le̱,
kitsò‑le̱:
—Nda ti̱nóꞌyà‑naó ngatsꞌio, kꞌoa̱ kàtamacho̱ya‑no jme xi xín‑no:
15 Ni̱jmejìn‑là xi tjín xi ma faꞌasꞌenjin yao‑le̱ chjo̱ta̱ xi ma síjndí,
to̱nga jme xi bitjojin‑ni ya ni̱ma̱‑le̱,
koiì xi síjndí.
16 Jè xi tjín chrjoa̱‑ño xi nchrꞌoé‑ni,
nda kàtabasén‑ño.
17 Kꞌia̱ nga Jesús tsakasènxìn‑le̱ chjo̱ta̱‑nkjìn,
jaꞌasꞌen jngo ndꞌia,
kꞌoa̱ jè chjo̱ta̱ xi ya̱ kòtꞌayàtꞌa‑le̱ kiskònangi‑le̱ tꞌatsꞌe̱ jè choa̱ xi mangósòn‑kao̱ jngo kjoa̱.
18 Jesús kitsò‑le̱:
—A kꞌoa̱ati̱ tsì macho̱ya‑no tsànda jòn.
A tsí macho̱ya‑no nga ngayije xi kjèn chjo̱ta̱, lìkoi koa̱n si̱ijndí,
19 nga̱ tsì tsà ya̱‑jìn jin ni̱ma̱‑le̱ faꞌasꞌenjin,
to̱ ya̱a tsꞌoa̱,
kꞌoa̱ xi je ma fìkꞌèjna‑ni.
Koiì xi kitsò‑nile̱ Jesús nga je kisitsje ngayije tsojmì xi ma chine.
20 To̱nga kitsò‑sa nga jè kjoa̱faꞌaitsjen xi bitjojin‑ni ni̱ma̱‑le̱ chjo̱ta̱,
koiì xi síjndí.
21 Nga̱ ya̱a jin ni̱ma̱‑le̱ chjo̱ta̱ nchroá‑ni jè kjoa̱faꞌaitsjen xi chꞌao tjió,
kjoa̱chajngi,
kao̱ nga to̱ngì‑ni fayokao̱ xínkjín chjo̱ta̱ nga kje bixan‑jìn, kao̱ nga chjo̱ta̱ síkꞌen,
22 kjoa̱ché,
nga nꞌión tsjoake tao̱n,
kjoa̱tsꞌe̱n,
kjoa̱chꞌàna̱cha̱,
nga nꞌión jndí tjió kjoa̱faꞌaitsjen‑le̱,
kjoa̱xìn‑tokòn,
én ꞌaon,
kjoa̱ngꞌatokòn, kao̱ kjoa̱chi̱ni.
23 Ngayije kjoa̱tsꞌe̱n jè ya̱a jin ni̱ma̱‑le̱ chjo̱ta̱ nchroájin‑ni,
kꞌoa̱ koiì jè xi síjndí.
Jè kjoa̱makjaín‑le̱ jè chjo̱on xi Fenicia tsꞌe̱ xi ꞌnde Siria nchja̱‑ni
24 Kꞌia̱ Jesús ki ya̱ ꞌnde xi nchja̱‑ni Tiro kao̱ Sidón;
kꞌoa̱ jaꞌasꞌen jngo ndꞌia,
koan‑kai‑le̱ nga ꞌya xi skoe̱;
to̱nga lìkoi koan tsakꞌèjnaꞌma.
25 Nga̱ jngo chjo̱on,
xi tíjna jngo‑le̱ ꞌndí tsòti xi jngo sén ni̱chrjin xi tsì nda tíjnajin‑le̱,
ti̱ꞌa kꞌia̱‑ni nga kinchrꞌoé tꞌatsꞌe̱ Jesús,
jaꞌaikòn‑le̱ kꞌoa̱ tsakajnajten‑tꞌa nangi ya̱ ndso̱ko̱ Jesús.
26 Jè chjo̱on xìn ꞌnde‑le̱,
ya̱a Fenicia tsꞌe̱ ꞌnde xi Siria nchja̱‑ni, kꞌoa̱ tsakꞌétsꞌoa‑le̱ Jesús, nga katamꞌaonsjejìn‑le̱ jè sén ni̱chrjin xi tsꞌe̱ nai̱i xi ya̱ tíjnajin‑le̱ jè ꞌndí tsòti‑le̱.
27 To̱nga Jesús kitsò‑le̱:
—Tꞌai̱ꞌndai nga títjòn kàtamaski jè xti,
nga̱ lìkoi nda tjín nga chjoé nio̱xtìla̱‑le̱ xti kꞌoa̱ jè niáa xko̱ si̱kꞌatsao‑le̱e.
28 Jè chjo̱on kitsò:
—Jaon Nai;
to̱nga jè niáa xko̱ xá to̱ tjoé‑nile̱ ni̱nga to̱jè xkoa̱ xi tsaongi‑le̱ ya̱ yámìxa̱ jè xti.
29 Kꞌia̱ Jesús kitsò‑le̱:
—To̱ tꞌatsꞌe̱e jotsò én xi kanòkjoai̱,
tꞌin‑ni;
jè sén ni̱chrjin xi tsꞌe̱ nai̱i jeè kàbitjojin‑nile̱ ꞌndí tsòti‑li̱.
30 Kꞌoa̱ kꞌia̱ nga jè chjo̱on jaꞌai‑ni ya̱ ndꞌia‑le̱,
tsabe nga jè ꞌndí tsòti‑le̱ jeè kitjojin‑le̱ jè sén ni̱chrjin xi tsꞌe̱ nai̱i,
kꞌoa̱ kijnasòn na̱chan‑le̱.
Jesús kisindaya̱ jngo chjo̱ta̱ xi jtaya kꞌoa̱ xi tsakján‑a
31 Kꞌia̱ nga Jesús kitjo ngìndia‑ni ya̱ ꞌnde Tiro,
kinchroa ya̱ na̱xi̱nandá Sidón jaꞌatojin ya̱ ndáchikon Galilea nga jaꞌai ya̱ ꞌnde Decápolis.
32 Kꞌoa̱ jaꞌaichanìtꞌa jngo‑le̱ chjo̱ta̱ xi jtaya kꞌoa̱ xi tsakján‑a,
kꞌoa̱ jè chjo̱ta̱ tsakꞌétsꞌoa‑le̱ Jesús nga katabánè‑le̱ ntsja nga si̱indaya.
33 Kꞌoa̱ Jesús tsakꞌasjetꞌaxìn ya̱ jin‑le̱ chjo̱ta̱,
kiskanìsꞌen na̱jmá‑ntsja ya̱ chrjoa̱ño,
kꞌoa̱ tsakꞌéchrá,
kisikao̱ ni̱je̱n;
34 kꞌoa̱ kiskòtsen ngꞌajmi,
jaꞌátse‑le̱,
kꞌoa̱ kitsò‑le̱:
«Efata» (én xi tsò‑ni: «Kàtatjoꞌaí‑jìn»).
35 Kꞌoa̱ ti̱ꞌa kitjoꞌaí‑ni chrjoa̱ñon,
kꞌoa̱ kjoan kitjojndáya naxá ni̱je̱n kꞌoa̱ nda kinchja̱.
36 Kꞌoa̱ Jesús tsakꞌénè‑le̱ ngatsꞌi chjo̱ta̱ nga ni̱ꞌyà‑jìn xi kàtatsòya‑le̱,
to̱nga kꞌia̱ nga ngìsa̱ nꞌión tsakꞌénè‑le̱,
to̱ ngìsa̱a nꞌión kiskanìsòn én.
37 Kꞌoa̱ ñaki to̱kꞌoa̱a koan‑le̱ chjo̱ta̱,
tsakꞌèmatsò:
«Nꞌión nda sꞌín ngayije;
maà‑le̱ síkinchrꞌoé‑ni jè xi jtaya,
kꞌoa̱ xi tsì ma‑le̱ nchja̱, maà‑le̱ síkinchja̱‑ni».