2 —Ma ma̱a‑na jè chjo̱ta̱,

nga̱ jeè jàn ni̱chrjin nga i̱ tjiókao̱‑na, kꞌoa̱ jèe tsìn‑le̱ jme xi koa̱kje̱n;

3 kꞌoa̱ tsà to̱ sikasén‑nchjan ndꞌia‑le̱,

ya̱a koa̱n inda ya̱ yandia̱a,

nga̱ tjín kꞌa xi kjin jaꞌai‑ni.

4 Jè chjo̱ta̱ xi ya̱ kòtꞌayàtꞌa‑le̱ kitsò‑le̱:

—Jñá koan‑ngíjchꞌaì‑ji̱n i̱ ꞌnde tꞌaxìn‑tꞌa nio̱xtìla̱ xi koa̱n koa̱nski‑ni ngatsꞌi chjo̱ta̱ xo̱chon.

5 Jesús kiskònangi‑le̱ kitsò‑le̱:

—Jótjín nio̱xtìla̱ tjió‑no.

Jè kitsò:

—Ñato ma‑ni.

6 Kꞌia̱ tsakꞌénè‑le̱ chjo̱ta̱‑nkjìn nga kàtabatiòtꞌa nangi;

kꞌoa̱ kiskoé jè nio̱xtìla̱ xi ñato,

kꞌia̱nga je kitsjoa kjoa̱nda,

kisixkoa̱,

kitsjoa‑le̱ chjo̱ta̱ xi ya̱ kòtꞌayàtꞌa‑le̱ jmé‑ni nga kàtasíkꞌabí‑nile̱ chjo̱ta̱‑nkjìn;

kꞌoa̱ kꞌoa̱a kisꞌin.

7 Kꞌoa̱ati̱ tjió choa‑le̱ jti̱ xkoa̱;

Jesús kisichikon‑tꞌain,

kꞌoa̱ tsakꞌénè‑le̱ chjo̱ta̱ xi ya̱ kòtꞌayàtꞌa‑le̱ nga kꞌoa̱ti̱ kàtasíkꞌabí.

8 Tsakjèn,

kꞌoa̱ koanski;

kꞌoa̱ tsakꞌéxkó xkoa̱ xi kinjèn‑ngi,

ngì ñatoò ni̱si̱nyá koan.

9 Kꞌoa̱ ngatsꞌi xi tsakjèn ño jmi‑la̱ ma‑ni;

xi je koan Jesús kisìxan‑tꞌa ngatsꞌi chjo̱ta̱.

10 Kꞌoa̱ jaꞌasꞌen ya̱ chitso kao̱ chjo̱ta̱ xi ya̱ kòtꞌayàtꞌa‑le̱,

jaꞌai ya̱ ꞌnde Dalmanuta.

11 Kꞌia̱ jaꞌai chjo̱ta̱ fariseo,

kꞌoa̱ tsakꞌétsꞌia̱kao̱ nga tsakjaótꞌa kao̱ Jesús nga kisijé‑le̱ choa̱ xi tsꞌe̱ ngꞌajmi,

jmé‑ni nga kiskòtꞌayàkao̱‑ni.

12 Kꞌoa̱ Jesús jaꞌátse‑le̱ ya̱ jin ni̱ma̱‑le̱,

kitsò:

—Án‑ni nga choa̱ síjé‑ni jè chjo̱ta̱ xi tjín ndꞌai̱.

Xi kjoa̱kìxi̱i xi xin‑no nga lìkoi kꞌoai̱‑le̱ choa̱ xi síjé.

13 Kꞌoa̱ kisikatió chjo̱ta̱ xo̱kjoan,

jaꞌasꞌen ngìjngokꞌà ya̱ chitso,

kꞌoa̱ ki ya̱ ndai xingoa‑le̱ ndáchikon.

14 Kꞌoa̱ jè chjo̱ta̱ xi ya̱ kòtꞌayàtꞌa‑le̱ Jesús kichajin‑le̱ tsakꞌa nio̱xtìla̱,

kꞌoa̱ to̱ jngoò ma‑ni nio̱xtìla̱ xi yꞌa.

15 Kꞌoa̱ Jesús tsakꞌénè‑le̱,

kitsò‑le̱:

—Chótsaon,

ti̱koìnda̱‑lao̱o yao‑no jè na̱ꞌyo̱san‑le̱ chjo̱ta̱ fariseo,

kao̱ na̱ꞌyo̱san‑le̱ Herodes Antipas.

16 Kꞌoa̱ jè chjo̱ta̱ xi kòtꞌayàtꞌa‑le̱ tsakjaóya‑ni nga kitsò‑le̱ xínkjín:

—Koiì nga tsì kàchꞌà nio̱xtìla̱ nga kꞌoa̱ títsò‑niná.

17 Kꞌoa̱ Jesús koanjin‑le̱,

kitsò‑le̱:

—Jmé xi tichobàya‑nio,

a koiì nga tsìn‑no nio̱xtìla̱.

A tsí majin‑no,

kꞌoa̱ a tsí macho̱ya‑no. A to̱ jo xíjiìn tjió ni̱ma̱‑no.

18 Nda tsà tjín xkon,

a tsí matsen‑no,

kꞌoa̱ nda tsà tjín chrjoa̱ño,^a

a tsí nòꞌyaò.

Kꞌoa̱ a tsí faꞌaitsjen‑no.

19 Kꞌia̱ nga an kisixkoa̱‑le̱ nio̱xtìla̱ xi aòn jè chjo̱ta̱ xi aòn jmi ma‑ni,

jótjín ni̱si̱nyá tsojmì chrꞌoá tsakꞌèxkó.

Kꞌoa̱ jè chjo̱ta̱ xi ya̱ kòtꞌayàtꞌa‑le̱ kitsò:

—Tejaò ni̱si̱nyá.

20 Kꞌia̱ Jesús kiskònangi sa‑le̱,

kitsò‑le̱:

—Kꞌoa̱ kꞌia̱ nga ñato nio̱xtìla̱,

kꞌoa̱ ño jmi chjo̱ta̱,

jótjín ni̱si̱nyá tsojmì chrꞌoá tsakꞌèxkó.

Kꞌoa̱ jè kitsò‑le̱:

21 Kꞌia̱ Jesús kitsò‑le̱:

—Án‑ni nga to̱jo kje macho̱yajìn‑nìno.

22 Xi ti̱kꞌia̱‑ni Jesús jaꞌai ya̱ na̱xi̱nandá‑nꞌión Betsaida;

kꞌoa̱ jè chjo̱ta̱ jaꞌaikao̱tꞌa‑le̱ jngo chjo̱ta̱ xi xka̱,

kꞌoa̱ jè chjo̱ta̱ tsakꞌétsꞌoa‑le̱ nga kàtasíkao̱.

23 Kꞌia̱ Jesús kiskoé ntsja jè chjo̱ta̱ xi xka̱,

tsakꞌasjejin ya̱ na̱xi̱nandá‑ꞌndí;

tsakꞌéchrángi xko̱n,

tsakánè‑le̱ ntsja,

kꞌoa̱ kiskònangi‑le̱ tsà je matsen choa‑le̱.

24 Jè kiskòtsen,

kitsò:

—Tìꞌbe‑nià jè chjo̱ta̱ jo yá kjoan,

to̱nga tìꞌbe‑nià nga tjióma.

25 Jesús ngìjngokꞌà tsakánè‑le̱ ntsja ya xko̱n,

kꞌoa̱ tsakꞌénè‑le̱ nga kàtakòtsen;

kꞌoa̱ koan‑ndaya‑ni,

kꞌoa̱ kjiìn koatsen‑le̱, kꞌoa̱ nda tsabe ngatsꞌi chjo̱ta̱.

26 Kꞌoa̱ Jesús kisikasén ndꞌia‑le̱,

kitsò‑le̱:

—Alì ya̱ jìn na̱xi̱nandá‑ꞌndí bitjasꞌe̱njin,

kꞌoa̱ alì ꞌya‑jìn xi ꞌmìya‑lai̱ ya̱ jin na̱xi̱nandá-ꞌndí.

27 Kitjo Jesús kao̱ chjo̱ta̱ xi ya̱ kòtꞌayàtꞌa‑le̱,

ki ngakijndà na̱xi̱nandá-ꞌndí xi nchja̱‑ni Cesarea xi tsꞌe̱ Filipo.

Kꞌoa̱ ya̱ yandia̱a kiskònangi‑le̱ chjo̱ta̱ xi ya̱ kòtꞌayàtꞌa‑le̱,

kitsò‑le̱:

—Jótsò chjo̱ta̱,

ꞌyá‑nia an.

28 Chjo̱ta̱ xi ya̱ kòtꞌayàtꞌa‑le̱ kitsò:

—Tjín xi tsò nga ji xoí Juan xi Kanísꞌen‑ngindá;

kꞌoa̱ tjín kꞌa xi tsò nga ji xoí Elías;

kꞌoa̱ tjín kꞌa sa xi tsò nga ji xoí jngo chjo̱ta̱ xi nchja̱ya ngajao‑le̱ Niná.

29 Kꞌia̱ Jesús kitsò‑le̱:

—Kꞌoa̱ jòn,

jó bixón,

ꞌyá‑nia an.

Pedro kinchja̱,

kitsò‑le̱:

30 To̱nga Jesús tsakꞌénè‑le̱ nga tsìꞌya xi kàtatsòya‑le̱ xi tꞌatsꞌe̱ kjoa̱ jè-bi̱.

31 Kꞌia̱ tsakꞌétsꞌia̱kao̱ nga tsakakóya‑le̱ nga kitsò‑le̱:

—Jè ꞌNdí‑le̱ Chjo̱ta̱ machjén nga tse kjoa̱ñꞌain kjoa̱ꞌà,

kꞌoa̱ nga kꞌoa̱sjengi chjo̱ta̱ jchínga,

kao̱ ngatsꞌi na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,

nga si̱kꞌen, kꞌoa̱ nga kjoa̱ꞌáya‑ni‑le̱ nga jè koa̱njàn‑ni ni̱chrjin.

32 Kꞌoa̱ ñaki ndaà kitsòya kìxi̱‑le̱.

Kꞌia̱ Pedro kikao̱tꞌaxìn,

tsakꞌétsꞌia̱kao̱ nga kinchja̱tikao̱ Jesús.

33 To̱nga Jesús kisikꞌófaya,

kiskòtsen‑le̱ chjo̱ta̱ xi ya̱ kòtꞌayàtꞌa‑le̱,

kinchja̱tikao̱ Pedro,

kitsò‑le̱:

—Ti̱se̱nxìn‑naí nai̱i,

nga̱ tsì koi kjoa̱ xi tsꞌe̱ Niná ꞌmitje̱n‑ngi‑lai̱, to̱saà to̱ kjoa̱faꞌaitsjen‑le̱ chjo̱ta̱ ꞌmitje̱n‑ngi‑lai̱.

34 Kꞌoa̱ kinchja̱‑le̱ chjo̱ta̱‑nkjìn kao̱ chjo̱ta̱ xi ya̱ kòtꞌayàtꞌa‑le̱,

kitsò‑le̱:

—Tsà ꞌya‑ni xi me‑le̱ nga an koi̱nchroatje̱n‑ngina,

alì ti̱jè‑jìn batéxoma‑nile̱ yao‑le̱,

kꞌoa̱ kàtabꞌé‑kon ni̱nga krò kàtanìkꞌen‑tꞌa kꞌoa̱ katanchroátje̱n‑ngi‑na.

35 Nga̱ to̱ꞌya‑ni xi me‑le̱ kꞌoa̱sjentjaì kjoa̱bijnachon‑le̱,

to̱saà si̱icha kjoa̱bijnachon‑le̱;

kꞌoa̱ to̱ꞌya‑ni xi si̱icha kjoa̱bijnachon‑le̱ xi to̱ tꞌatsꞌa̱n,

kꞌoa̱ xi to̱ tꞌatsꞌe̱ nga jè én nda nchja̱ya,

kꞌoa̱sjentjaí kjoa̱bijnachon‑le̱.

36 Nga̱ jmé xi sꞌi̱in‑ni chjo̱ta̱ ni̱nga koi̱nje̱n‑le̱ ngayije jmè xi tjín i̱ soꞌnde,

kꞌoa̱ tsà si̱icha‑ni kjoa̱bijnachon‑le̱.

37 Axo̱ jmé xi koa̱n kꞌoe̱echjíntjaì‑ni kjoa̱bijnachon‑le̱ chjo̱ta̱.

38 Nga̱ jè xi koa̱nsoa‑le̱ tꞌatsꞌa̱n kao̱ tꞌatsꞌe̱ én‑na̱ ya̱ jin‑le̱ chjo̱ta̱ xi chꞌao tjió kjoa̱ xi sꞌín kao̱ chjo̱ta̱jé xi tjín ndꞌai̱,

jè ꞌNdí‑le̱ Chjo̱ta̱ kꞌoa̱ati̱ koa̱nsoake,

kꞌia̱ nga kjoa̱ꞌaí ngìndia‑ni kao̱ kjoa̱jeya‑le̱ Nꞌai‑le̱ kao̱ cho̱ꞌnda ngꞌajmi xi tsꞌe̱ Niná.