Jesús kisindaya jngo chjo̱ta̱ xi kixìtꞌa jngo ntsja
3
Ngìjngokꞌà jaꞌasꞌen Jesús ya̱ ndꞌia jña maxkia̱ xo̱n‑le̱ Niná;
kꞌoa̱ ya̱ tíjna jngo chjo̱ta̱ xi kixìtꞌa jngo ntsja.
2 Kꞌoa̱ jè chjo̱ta̱ jo nda tjiósíkoìnda̱ Jesús tsà si̱indayà chjo̱ta̱ xo̱kji kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío,
jmé‑ni nga koa̱n koa̱angi‑síni.
3 Kꞌia̱ Jesús kitsò‑le̱ jè chjo̱ta̱ xi kixìtꞌa jngo ntsja:
—Tìso̱tjai̱n kꞌoa̱ ti̱se̱njnai i̱ ngabasen.
4 Kꞌia̱ Jesús kitsò‑le̱ jè chjo̱ta̱ xi tjiókòtsen‑le̱:
—A tiꞌndè kꞌia̱ nga nda sꞌia̱an kꞌia̱ nga ni̱chrjin xotò,
ni̱chrjin nga ꞌyaxkoán Niná xi chjo̱ta̱ judío ꞌmì‑ná,
axo̱ jè nga chꞌao sꞌia̱an;
a jè nga chꞌa̱sjentjaì jngoà chjo̱ta̱, axo̱ to̱sa̱a nda nga si̱kꞌeèn.
To̱nga jè chjo̱ta̱ to̱ jyó tsakatiò.
5 Kꞌia̱ Jesús kao̱ kjoa̱jti kiskòtsen‑le̱ xi ya̱ tjióndai‑le̱,
kꞌoa̱ koanba‑le̱ nga tàja ni̱ma̱‑le̱,
kꞌoa̱ kitsò‑le̱ jè chjo̱ta̱ xi kixìtꞌa jngo ntsja:
—Tjain ndsai̱.
Kꞌoa̱ jè tsakjén ntsja,
kꞌoa̱ koan‑ndaya ntsja.
6 Kꞌia̱ nga je kitjo chjo̱ta̱ fariseo,
tsakatiòjtín kao̱ jtín xi ya̱ tsjoánganꞌión‑le̱ ntje̱ xi tje̱n‑ni Herodes,
kꞌoa̱ tsakjaóya‑ni jmé xi koa̱n sꞌi̱in nga si̱ikꞌen Jesús.
Nkjìn chjo̱ta̱ jaꞌai ya̱ ndai ndáchikon
7 To̱nga Jesús tsakasènxìn kꞌoa̱ ki ya̱ ndai ndáchikon kao̱ chjo̱ta̱ xi ya̱ kòtꞌayàtꞌa‑le̱,
kꞌoa̱ nꞌión nkjìn chjo̱ta̱ kitje̱n‑ngi‑le̱ xi ya̱ ꞌnde Galilea tsꞌe̱.
Kꞌoa̱ jè chjo̱ta̱ xi ya̱ ꞌnde Judea tsꞌe̱,
8 kao̱ chjo̱ta̱ xi Jerusalén tsꞌe̱,
kao̱ xi ya̱ Idumea tsꞌe̱,
kao̱ xi ya̱ tsꞌe̱ xingoa‑le̱ xo̱ngá nandá Jordán,
kao̱ xi ya̱ tsꞌe̱ jngotjondai Tiro kao̱ Sidón,
kꞌia̱ nga kinchrꞌoé ngayije kjoa̱xkón xi tísꞌín Jesús, nꞌión nkjìn chjo̱ta̱ xi ya̱ jaꞌaikòn‑nile̱.
9 Kꞌoa̱ kitsò‑le̱ chjo̱ta̱ xi ya̱ kòtꞌayàtꞌa‑le̱ nga kàtabájnanda ntsjaì‑le̱ jè chitso, xi to̱ tꞌatsꞌe̱ chjo̱ta̱‑nkjìn jmé‑ni nga tsì koa̱njtín‑nè‑nile̱,
10 nga̱ nkjìn chjo̱ta̱ kisindaya;
kꞌoa̱ jokjoan xi nꞌión chꞌin tjín‑le̱ ya̱ kitsaonè‑le̱ Jesús nga me‑le̱ kisikao̱.
11 Kꞌoa̱ jè sén ni̱chrjin xi tsì nda xi tjiójin‑le̱ chjo̱ta̱,
kꞌia̱ nga be Jesús tsaongi ndso̱ko̱,
kꞌoa̱ nꞌión bꞌéjta,
tsò: «Ji‑ní jè ꞌNdí‑le̱ Niná».
12 To̱nga Jesús nꞌión kinchja̱tikao̱ nga tsìꞌya chjo̱ta̱ xi kàtatsòya‑le̱ ꞌya‑ni jè.
Kꞌia̱ nga Jesús kiskoéjin chjo̱ta̱ xi tejaò
13 Nga koanskan‑ni Jesús kimi ya̱ sòn nindo,
kꞌoa̱ kinchja̱‑le̱ chjo̱ta̱ xi jè koanme‑le̱; kꞌoa̱ ya̱ jaꞌaikòn‑le̱ chjo̱ta̱ xo̱kjoan.
14 Kꞌoa̱ tejaò chjo̱ta̱ kiskoéjin jmé‑ni nga ya̱ koa̱tiòkao̱‑síni,
kꞌoa̱ jmé‑ni nga si̱ikasén‑ni nga koai̱nchja̱ya én‑le̱ Niná,
15 kꞌoa̱ nga kàtasꞌe‑le̱ kjoa̱téxoma nga si̱indaya xi chꞌin tjín‑le̱ kao̱ nga kꞌoa̱sjejin sén ni̱chrjin xi tsꞌe̱ nai̱i xi tjiójin‑le̱ chjo̱ta̱:
16 Jè Simón,
xi Pedro kitsò kao̱‑nile̱;
17 Kao̱ Jacobo ti‑le̱ Zebedeo,
kao̱ Juan ndsꞌe̱ Jacobo xi Boanerges kitsò‑le̱,
én xi xti‑le̱ chꞌao̱n tsò‑ni;
18 Andrés,
Felipe,
Bartolomé,
Mateo,
Tomás,
Jacobo ti‑le̱ Alfeo,
Tadeo,
Simón jngo chjo̱ta̱ xi ya̱ tsakꞌèjnajin jtín kjoa̱si xi tike chjo̱ta̱xá títjòn‑le̱ Roma,
19 Kꞌoa̱ kao̱ Judas Iscariote xi kitsjoatꞌa Jesús.
Jè xi nchja̱ꞌaon‑le̱ je Sén Ni̱chrjin Tsje
Kꞌoa̱ kꞌia̱ jaꞌasꞌen jngo ndꞌia,
Jesús kao̱ chjo̱ta̱‑le̱ xi tejaò.
20 Kꞌoa̱ koanxkó ngìjngokꞌà chjo̱ta̱‑nkjìn,
kꞌoa̱ Jesús kao̱ chjo̱ta̱ xi ya̱ kòtꞌayàtꞌa‑le̱ saꞌnda lìkoi ti̱ koan‑a nile̱ nga tsakjèn ni̱nga to̱ nio̱xtìla̱.
21 Kꞌia̱ nga kinchrꞌoé xínkjín Jesús,
jaꞌainchrꞌoè nga jtsoa̱ nga me‑le̱ nga koaikao̱‑ni ndꞌia‑le̱;
nga̱ tjiótsò nga tsì ti̱ nda tjín‑ni kon.
22 To̱nga jè chjo̱ta̱ xi kji kjoa̱téxoma‑le̱ Niná xi kiski Moisés xi ya̱ jaꞌai‑ni Jerusalén kꞌoa̱kitsò nga jè Beelzebú xi ngajko̱‑le̱ sén ni̱chrjin xi tsꞌe̱ nai̱i tíjnajin‑le̱,
kꞌoa̱ nga tsꞌe̱ nganꞌión mꞌaosjejin‑ni jè sén ni̱chrjin xi tsꞌe̱ nai̱i.
23 Kꞌoa̱ kꞌia̱ nga Jesús je kinchja̱‑le̱ chjo̱ta̱ xo̱kjoan,
kitsòya‑le̱ choa̱ xi mangósòn‑kao̱ jngo kjoa̱,
kitsò‑le̱: «Jósꞌìn ti̱jè nai̱i kꞌoa̱sjejin‑ni yao‑le̱ ya̱ jin kjoa̱bijnachon‑le̱ chjo̱ta̱.
24 Tsà jngo xi batéxoma xi ti̱jè si̱ijaòya‑ni na̱xi̱nandá‑le̱,
lìkoi tse koa̱n‑le̱.
25 Tsà jè chjo̱ta̱ xi to̱jngo ndꞌia tjió,
xi ti̱jè si̱ijaòya‑ni yao‑le̱,
lìkoi tse koai̱chrjin‑le̱.
26 Kꞌoa̱ tsà jè nai̱i ti̱jè si̱itoán‑kao̱‑ni yao‑le̱,
kꞌoa̱ tsà jaòya koa̱n,
lìkoi tse koa̱n‑le̱,
to̱ jeè kàfetꞌa ni̱chrjin‑le̱.
27 »Ni̱jngo‑jìn xi koa̱n‑le̱ kjoa̱ꞌasꞌen ndꞌia‑le̱ jngo chjo̱ta̱ xi tjín‑le̱ nganꞌión kꞌoa̱ nga si̱iché‑le̱ jmè tsojmì xi tjín‑le̱,
tsà tsì tsà títjòn kꞌoe̱etꞌanꞌión,
kꞌoa̱ kꞌia̱ koai̱kao̱ jmè tsojmì xi tjín ya̱ ndꞌia‑le̱.
28 »Xi kjoa̱kìxi̱i xi xin‑no nga jcha̱tꞌa‑le̱ ngayije jé‑le̱ chjo̱ta̱,
kao̱ to̱jotjín jko̱ya én xi si̱ichjén chjo̱ta̱ nga koi̱nchja̱ꞌaon‑le̱ Niná;
29 to̱nga to̱ꞌya‑ni xi jè Sén Ni̱chrjin Tsje nchja̱ꞌaon‑le̱,
ni̱ nchroá‑jìnlà ni̱chrjin nga jcha̱tꞌa‑le̱,
to̱saà kjoa̱ñꞌain sꞌe̱‑le̱ ngantsjaì».
30 Koiì kꞌoa̱kitsò‑nile̱ nga jè chjo̱ta̱ xi kji kjoa̱téxoma‑le̱ Niná xi kiski Moisés kitsò:
«Sén ni̱chrjin xi tsì nda tíjnajin‑le̱».
Jè na̱‑le̱ kao̱ ndsꞌe̱ Jesús jaꞌainchrꞌoè nga me‑le̱ nga koai̱kao̱
31 Kꞌia̱ nga koanskan‑ni jaꞌai ndsꞌe̱ kao̱ na̱‑le̱ Jesús,
kꞌoa̱ ya̱ nditsin tsakatiò,
kꞌoa̱ kisikasén én‑le̱ nga katjanchroákon‑le̱.
32 Kꞌoa̱ jè chjo̱ta̱‑nkjìn xi tjió ya̱ jngotjondai‑le̱ Jesús,
kitsò‑le̱:
—Jè na̱‑li̱ kao̱ ndsꞌai tjió nditsián,
kꞌoa̱ tjióbásjai‑lì.
33 Kꞌia̱ Jesús kinchja̱,
kitsò‑le̱:
—ꞌYá‑ni xi na̱‑na̱ ma,
kꞌoa̱ ꞌyá‑ni xi ndsꞌe ma.
34 Kꞌoa̱ kiskòtsen‑le̱ chjo̱ta̱ xi ya̱ tjió jngotjondai‑le̱,
kitsò‑le̱: