Jesús kisindaya jngo chjo̱ta̱ xi kjiyá yao‑le̱
2
Kꞌia̱ nga je jaꞌato kꞌa ni̱chrjin,
Jesús kichò ngìjngokꞌà ya̱ na̱xi̱nandá‑nꞌión Capernaum;
kꞌoa̱ kisꞌejin‑le̱ chjo̱ta̱ nga ya̱ tíjna ya̱ jngo ndꞌia.
2 Kꞌoa̱ jngotjò koanña‑ni chjo̱ta̱,
saꞌnda lìkoi ti̱ koan kijchòsꞌen‑ni ya̱ jchro xo̱ntjoa̱;
kꞌoa̱ Jesús ya̱ kinchja̱yajin‑le̱ én nda jè chjo̱ta̱.
3 Kꞌia̱ kꞌa chjo̱ta̱ jaꞌaikao̱ jngo chjo̱ta̱ xi kjiyá yao‑le̱,
xi ño chjo̱ta̱ yꞌangꞌangi.
4 Kꞌoa̱ nga lìkoi koan jaꞌasꞌen‑kon‑le̱ nga kꞌoa̱sìchon chjo̱ta̱‑nkjìn,
kiskoꞌaìkjá ya̱ sòngꞌa‑le̱ ndꞌia ya̱ kìxi̱‑le̱ jña tíjna Jesús,
kꞌoa̱ ya̱ kiskanìjen‑nèni na̱chanyá xi kijnasòn jè chjo̱ta̱ xi kjiyá.
5 Kꞌia̱ nga tsabe Jesús jè kjoa̱makjaín‑le̱ chjo̱ta̱ xi kjiyá yao‑le̱ kao̱ tsꞌe̱ chjo̱ta̱ xi yꞌangꞌangi,
kitsò‑le̱:
—ꞌNdí mìyo̱,
jeè kàsichàtꞌa‑lè jé‑li̱.
6 Ya̱ tjió kꞌa chjo̱ta̱ xi kji kjoa̱téxoma‑le̱ Niná xi kiski Moisés, xi chꞌao sꞌìn tjiósíkꞌaitsjen nga tjiótsò:
7 «Án‑ni nga kꞌoa̱sꞌìn nchja̱‑ni chjo̱ta̱ xo̱kji,
Niná nchja̱ꞌaon‑le̱ nga kꞌoa̱tsò.
ꞌYá‑ni xi ma‑le̱ síchatꞌa jé,
a tsí tsà to̱jngo jè Niná».
8 Tsabe ndi̱to̱n Jesús nga chꞌaosꞌìn tjiósíkꞌaitsjen,
kitsò‑le̱:
—Án‑ni nga kꞌoa̱sꞌìn nìkjaꞌaitsjen‑nio.
9 Jmé‑ni xi ngìsa̱ choa ñꞌain tjín,
a koiì nga kꞌoín‑le̱e jè xi kjiyá:
“Jeè kàchatꞌa‑lì jé‑li̱,”
axo̱ kꞌia̱a nga kꞌoín‑le̱e:
“Tìso̱tjai̱n chjoaí na̱chanyá‑li̱,
kꞌoa̱ ti̱tómjain”.
10 To̱nga jmé‑ni nga kàtaꞌya‑nio,
nga jè ꞌNdí‑le̱ Chjo̱ta̱, tjín‑le̱ nganꞌión i̱ soꞌnde nga síchatꞌa jé‑le̱ chjo̱ta̱.
Kꞌia̱ kitsò‑le̱ jè chjo̱ta̱ xi kjiyá:
11 —Kꞌoa̱axin‑lè ji:
Tìso̱tjai̱n,
chjoaí na̱chanyá‑li̱,
kꞌoa̱ tꞌin ndꞌia‑li̱.
12 Kꞌia̱ jè chjo̱ta̱ xo̱kji kjitꞌa nangi tsakisótje̱n kꞌoa̱ kiskoé na̱chanyá‑le̱,
kitjo ya̱ ngixko̱n ngatsꞌi chjo̱ta̱,
kꞌoa̱ to̱ koanxkón‑le̱ ngatsꞌi,
kꞌoa̱ tsakꞌasjejeya Niná,
kitsò:
—Ni̱sajngokꞌàjìn‑là tsaꞌyaà jè kjoa̱ xi i̱ ma.
Kꞌia̱ nga Jesús kinchja̱‑le̱ Leví
13 Xi je koan ki ngìjngokꞌà ya̱ ndai ndáchikon xi ya̱ ꞌnde Galilea nchja̱‑ni;
kꞌoa̱ ngatsꞌi chjo̱ta̱ jaꞌaikòn‑le̱ Jesús,
kꞌoa̱ ya̱a tsakakóya‑le̱.
14 Kꞌoa̱ kꞌia̱ nga tífaꞌa Jesús,
tsabe ti‑le̱ Alfeo xi Leví ꞌmì,
tíjna nga tísíkꞌéchjí tao̱n xi tsꞌe̱ chjo̱ta̱xá títjòn‑le̱ Roma,
kꞌoa̱ i̱ kitsò‑le̱:
—Nchroátje̱n‑ngi‑naí.
Kꞌoa̱ Leví tsakasèn‑ndo kꞌoa̱ kitje̱n‑ngi‑le̱ Jesús.
15 Kꞌoa̱koan kꞌia̱ nga Jesús tíjnatꞌa yámìxa̱ ya̱ ndꞌia‑le̱ Leví,
nꞌión nkjìn chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ chjo̱ta̱jé tjiótꞌakao̱ ya̱ tꞌa yámìxa̱,
kao̱ chjo̱ta̱ xi ya̱ kòtꞌayàtꞌa‑le̱ Jesús;
nga̱ nꞌión nkjìn chjo̱ta̱ xo̱kjoan xi tjiómatje̱n‑ngi‑le̱ Jesús.
16 Kꞌoa̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo,
tjióbe nga Jesús ya̱ tíkjèn‑kao̱ chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ chjo̱ta̱jé,
kitsò‑le̱ chjo̱ta̱ xi ya̱ kòtꞌayàtꞌa‑le̱ Jesús:
—Jmé xo̱ sꞌín‑le̱ jè xi bakóya‑no, nga ya̱ kjèn kꞌoa̱ ꞌbikao̱ chjo̱ta̱ xi tao̱n síkꞌéchjí kꞌoa̱ kao̱ chjo̱ta̱jé.
17 Kꞌia̱ nga kinchrꞌoé Jesús,
kitsò‑le̱:
—Jè chjo̱ta̱ xi tsìn‑le̱ chꞌin,
alì chji̱ne̱xki‑jìn machjén‑le̱,
to̱saà jè xi chꞌin tjín‑le̱ xi chji̱ne̱xki machjén‑le̱.
Alì chjo̱ta̱ kìxi̱‑jìn xi jàꞌai̱ nchjà‑le̱,
to̱saà jè chjo̱ta̱jé.
Kjoa̱chjònangi xi tꞌatsꞌe̱ kjoa̱bijnanchjan
18 Kꞌoa̱ jè chjo̱ta̱ xi ya̱ kòtꞌayàtꞌa‑le̱ Juan kao̱ chjo̱ta̱ xi ya̱ kòtꞌayàtꞌa‑le̱ chjo̱ta̱ fariseo batiònchjan xi tꞌatsꞌe̱ Niná;
kꞌoa̱ jaꞌai kꞌa chjo̱ta̱ xi kitsò‑le̱ Jesús:
—Án‑ni nga jè chjo̱ta̱ xi ya̱ kòtꞌayàtꞌa‑le̱ Juan kao̱ chjo̱ta̱ xi ya̱ kòtꞌayàtꞌa‑le̱ chjo̱ta̱ fariseo batjiònchjan‑ni tꞌatsꞌe̱ Niná,
kꞌoa̱ jè chjo̱ta̱ xi ji kotꞌayàtꞌa‑lì, án‑ni nga tsì batiònchjan‑ni tꞌatsꞌe̱ Niná.
19 Jesús kitsò‑le̱:
—A koa̱an nga koa̱tiònchjan xi tꞌatsꞌe̱ Niná jè mìyo̱‑le̱ xi bixan,
kꞌia̱ nga ya̱ sꞌa̱ tíjnakao̱ jè xꞌi̱n xi tíbixan.
Lìkoi koa̱n koa̱tiònchjan xi tꞌatsꞌe̱ Niná, nga ya̱ sꞌa̱ tíjnakao̱ xi bixan.
20 To̱nga kjoa̱ꞌaí ni̱chrjin kꞌia̱ nga tjóꞌa‑le̱ jè xꞌi̱n xi tíbixan,
kꞌoa̱ kꞌia̱a nga koa̱n koa̱tiònchjan xi tꞌatsꞌe̱ Niná.
21 Ni̱ꞌya‑jìn xi najño chjo̱tse̱ síchjén kꞌia̱ nga bꞌéjchro jè najño jchá;
nga̱ jè najño chjo̱tse̱ kꞌoejnda najño jchá,
kꞌoa̱ jè najño jchá ngìsa̱a tse ti̱ xíjndà ngá‑ni.
22 Kꞌoa̱ ni̱ꞌya‑jìn xi chrjoa̱ jchá bꞌéya ndá totseè xi sꞌa̱ chjo̱tse̱;
nga̱ jè ndá totseè nga je majchá bꞌéjnda jè chrjoa̱,
kꞌoa̱ jè ndá totseè xi je jchá xìjten,
kꞌoa̱ jè chrjoa̱ to̱ koi̱tsón;
to̱nga jè ndá totseè chjo̱tse̱ chrjoa̱ chjo̱tse̱e tjínè‑le̱ sꞌe̱ya.
Jè chjo̱ta̱‑le̱ Jesús tsakate natín‑le̱ trigo kꞌia̱ nga xotò
23 Kꞌia̱ nga jngo ni̱chrjin xotò,
ni̱chrjin nga bexkón Niná chjo̱ta̱ judío,
Jesús jaꞌa ya̱ jña kjintjè trigo, kꞌoa̱ jè chjo̱ta̱ xi ya̱ kòtꞌayàtꞌa‑le̱ kꞌia̱ nga tjiófaꞌa tsakꞌétsꞌia̱kao̱ nga tsakate natín‑le̱ trigo.a
24 Kꞌia̱ jè chjo̱ta̱ fariseo kitsò‑le̱:
—Chótsen‑laì,
án‑ni nga kꞌoa̱tjiósꞌín‑ni jè chjo̱ta̱ xi kòtꞌayàtꞌa‑lì jè kjoa̱ xi tsì ma kꞌoa̱nꞌiàn kꞌia̱ nga xotò, ni̱chrjin nga ꞌyaxkoán Niná xi chjo̱ta̱ judío ꞌmì‑ná.
25 To̱nga Jesús kitsò‑le̱:
—A ni̱kꞌia‑jìn tsakꞌèxkia̱o jme xi kisꞌin David kꞌia̱ nga tsen koan‑le̱ nga koanbao‑le̱ kao̱ chjo̱ta̱ xi ya tjiókao̱;
26 jó kisꞌin kꞌia̱ nga jaꞌasꞌen ya̱ ndꞌia‑le̱ Niná,
kꞌia̱ nga jè Abiatar na̱ꞌmi títjòn tíjna,
kꞌoa̱ tsakjèn jè nio̱xtìla̱ xi bꞌaìtꞌa‑le̱ Niná,
xi tsì ma kjèn xi to̱xkia̱ chjo̱ta̱ nga to̱jè na̱ꞌmi xi ma kjèn,b kꞌoa̱ saꞌnda kitsjoà‑le̱ jè chjo̱ta̱ xi ya̱ tjiókao̱.c
27 Kꞌoa̱ti̱ kitsò‑le̱: