Jesús tjín‑le̱ nganꞌión nga kꞌoa̱tsò jme xi tiꞌndè nga ni̱chrjin nìkjáya
6
Kꞌoa̱koan kꞌia̱ nga jngo ni̱chrjin xotò,
ni̱chrjin nga bexkón Niná chjo̱ta̱ judío,
nga Jesús jaꞌa ya̱ jña nga kjintjè trigo,
jè chjo̱ta̱ xi ya̱ kòtꞌayàtꞌa‑le̱ tsakate natín‑le̱ trigo,a
kitsjon‑jbèya‑ni kao̱ ntsja kꞌoa̱ kiskine.
2 Kꞌoa̱ tjín kꞌa chjo̱ta̱ fariseo xi kitsò‑le̱:
—Án‑ni nga kꞌoa̱nꞌiàn‑nio kjoa̱ xi tsì tjoꞌnde nga kꞌoa̱sꞌiaàn kꞌia̱ nga ni̱chrjin xotò,
ni̱chrjin nga ꞌyaxkoín‑ji̱n Niná ji̱n‑ji̱n chjo̱ta̱ judío.
3 Kinchja̱ Jesús kitsò‑le̱:
—A ni̱ sa koi‑jìn bꞌèxkia̱o,
jmè xi kisꞌin David kꞌia̱ nga koanbao‑le̱,
kꞌoa̱ kao̱ chjo̱ta̱ xi ya̱ ñatje̱n tjió;
4 jósꞌìn jaꞌasꞌen ya̱ ndꞌia‑le̱ Niná,
kꞌoa̱ kiskoé nio̱xtìla̱ xi bꞌaìtꞌa‑le̱ Niná,
jè xi tsìꞌya xi tiꞌndè‑le̱ nga koa̱kje̱n,
to̱jè na̱ꞌmi,b
to̱nga jè David tsakjèn,
kꞌoa̱ kitsjoa‑le̱ jè chjo̱ta̱ xi ya̱ tjiókao̱.c
5 Kꞌoa̱ kitsò sa‑le̱:
—Jè ꞌNdí‑le̱ Chjo̱ta̱,
jè Nai‑le̱ ma saꞌnda jè ni̱chrjin xotò,
ni̱chrjin nga bexkón Niná chjo̱ta̱ judío.
Jesús kisindaya jngo chjo̱ta̱ xi kixìtꞌa jngo ntsja
6 Kꞌoa̱ti̱ koan kꞌia̱ nga ngìjngo ni̱chrjin xotò,
ni̱chrjin nga bexkón Niná chjo̱ta̱ judío,
nga Jesús jaꞌasꞌen ya̱ ndꞌia jña maxkia̱ xo̱n‑le̱ Niná kꞌoa̱ tsakakóya;
kꞌoa̱ ya̱ tíjna jngo chjo̱ta̱ xi kixìtꞌa ntsja ngakìxi̱.
7 Kꞌoa̱ tjió kꞌa chjo̱ta̱ xi kji kjoa̱téxoma‑le̱ Niná xi kiski Moisés kao̱ kꞌa chjo̱ta̱ fariseo,
xi jo nda tjiósíkoìnda̱ Jesús jmé‑ni nga skoe̱‑síni tsà si̱indaya kꞌia̱ nga ni̱chrjin nìkjáya,
jmé‑ni nga so̱kò‑nile̱ josꞌìn koa̱n‑ni koa̱angi.
8 To̱nga Jesús beè jo tjió kjoa̱faꞌaitsjen‑le̱ chjo̱ta̱ xo̱kjoan;
kꞌoa̱ kitsò‑le̱ jè chjo̱ta̱ xi kixìtꞌa ntsja:
—Ti̱sótjai̱n,
kꞌoa̱ ti̱se̱njnai ngabasen.
—Jngoò kjoa̱ skònangi‑no:
A tiꞌndè kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío,
nga nda sꞌia̱an,
axo̱ jé nga chꞌao sꞌia̱an,
nga chꞌa̱sjentjeè kjoa̱bijnachon‑le̱ chjo̱ta̱,
axo̱ jé nga sa to̱ chja̱ꞌàxìn‑le̱e kjoa̱bijnachon‑le̱.
10 Kꞌoa̱ kiskòtsen‑le̱ ngatsꞌi nga jngotjondai,
kitsò‑le̱ jè chjo̱ta̱ xi kixìtꞌa ntsja:
—Tjain ndsai̱.
Kꞌoa̱ jè kꞌoa̱kisꞌin,
kꞌoa̱ koan‑nda‑ni ntsja.
11 Kꞌoa̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo nꞌión koan‑jti‑le̱,
kꞌoa̱ tsakjaóya‑ni jmè xi si̱ikao̱ Jesús.
Kꞌia̱ nga Jesús kiskoéjin chjo̱ta̱ xi tejaò
12 Kꞌia̱ nga koi ni̱chrjin Jesús ki ya̱ nindo nga kikjákao̱ Niná,
kꞌoa̱ tsꞌajndà‑le̱ ni̱tje̱n nga tsakjákao̱ Niná.
13 Kꞌoa̱ kꞌia̱ nga je koan-isen,
kinchja̱‑le̱ chjo̱ta̱ xi ya̱ kòtꞌayàtꞌa‑le̱,
kꞌoa̱ tejaò chjo̱ta̱ xo̱kjoan xi xá kiskoéjin‑ni,
xi kꞌoa̱ti̱ chjo̱ta̱ xi xá kinìkasén‑ni kitsò‑le̱:
14 Jè Simón xi Pedro kitsò kao̱‑nile̱,
Andrés xi ndsꞌe̱ ma Pedro,
Jacobo kao̱ Juan,
Felipe kao̱ Bartolomé,
15 Mateo,
Tomás,
Jacobo ti‑le̱ Alfeo,
Simón xi ya̱ tsakꞌèjnajin‑le̱ jtín kjoa̱si xi Zelote tsakꞌìn,
16 Judas ndsꞌe̱ Jacobo,
Kꞌoa̱ Judas Iscariote jè xi yátsꞌi̱n kitsjoa‑le̱ Jesús nga koanskan‑ni.
Jesús kisindaya chjo̱ta̱‑nkjìn
17 Kꞌoa̱ kinchroajen Jesús kao̱ chjo̱ta̱‑le̱ xi tejaò xi xá kiskoéjin‑ni,
kꞌoa̱ ya̱ tsakꞌèjna jngo ꞌnde jña sòn chon,
kꞌoa̱ ya̱ tjiókoya‑le̱ chjo̱ta̱‑nkjìn xikꞌa xi kꞌoa̱ti̱ ya̱ kòtꞌayàtꞌa‑le̱,
kꞌoa̱ kao̱ chjo̱ta̱ xi nꞌión nkjìn ma xi ya̱ ꞌnde Judea tsꞌe̱,
xi ya̱ Jerusalén tsꞌe̱,
kꞌoa̱ xi ya̱ ndai ndáchikon xi ꞌnde Tiro kao̱ ꞌnde Sidón nchja̱‑ni,
xi jaꞌaikincháñon‑le̱ Jesús,
kꞌoa̱ jmé‑ni si̱indayà‑ni tꞌatsꞌe̱ chꞌin xi tjín‑le̱;
18 kꞌoa̱ti̱ jè chjo̱ta̱ xi sén ni̱chrjin xi tsì nda tjiójin‑le̱,
Jesús kisindaya.
19 Kꞌoa̱ ngatsꞌi chjo̱ta̱‑nkjìn tsakásjai‑le̱ josꞌìn nga koa̱n si̱ikao̱,
nga̱ nganꞌión bitjojin yao‑le̱ Jesús kꞌoa̱ síndaya ngatsꞌi.
Jè kjoa̱nda kao̱ kjoa̱ñꞌain
20 Kꞌoa̱ Jesús kiskòtsen‑à chjo̱ta̱ xi ya̱ kòtꞌayàtꞌa‑le̱,
kitsò‑le̱:
«Jó to̱nda‑no ya̱ ngixko̱n Niná jòn xi yo̱ma̱‑jiòn,
Nga̱ tsao̱on‑niò ya̱ jña batéxoma Niná.
21 Jó to̱nda‑no jòn ya̱ ngixko̱n Niná xi bao‑no ndꞌai̱,
Nga̱ jòn xi koa̱nskio.
Jó to̱nda‑no ya̱ ngixko̱n Niná jòn xi ndꞌai̱ chjíꞌndiaó,
nga̱ koi̱jnó‑nio.
22 »Jó to̱nda‑no jòn ya̱ ngixko̱n Niná kꞌia̱ nga jè chjo̱ta̱ koa̱n‑chꞌaoke‑no,
kꞌoa̱ nga kꞌoa̱sjekajin‑no ya̱ na̱xi̱nandá‑no,
kꞌoa̱ nga koi̱nchja̱ꞌaon‑no,
kꞌoa̱ kꞌoa̱sjengi‑no joni tsà chjo̱ta̱ xi chꞌao tjín kjoa̱ xi tjiósꞌín,
xi to̱ tꞌatsꞌe̱ ꞌNdí‑le̱ Chjo̱ta̱.
23 Tsjoa kàtasꞌe‑no kꞌia̱ nga koi ni̱chrjin kꞌoa̱ ti̱tsjoao,
nga̱ koe̱e‑ni jè kjoa̱tjaò xi kꞌoai̱‑no ngìsa̱a tse ya̱ ngꞌajmi;
nga̱ jè chjo̱ta̱ jchínga‑le̱ chjo̱ta̱ xo̱ síkao̱‑no kꞌoa̱ati̱ kisikao̱ jè chjo̱ta̱ xi kinchja̱ya ngajao‑le̱ Niná.d
24 »To̱nga,
ma̱xó‑nilao̱o yao‑no jòn xi chjo̱ta̱ nchi̱naó,
Nga̱ jeè tjín‑no xi maje‑ni tokòn.
25 Ma̱xó‑nilao̱o yao‑no jòn xi skio ndꞌai̱,
Nga̱ koa̱nbao‑no.
Ma̱xó‑nilao̱o yao‑no jòn xi ndꞌai̱ bijnò,
Nga̱ koa̱ꞌaon‑no kꞌoa̱ chjíꞌndiá‑nió.
26 Ma̱xó‑nilao̱o yao‑no jòn,
kꞌia̱ nga ngatsꞌi chjo̱ta̱ nda sꞌìn si̱ikꞌaxki̱‑no,
Nga̱ jè chjo̱ta̱ jchínga‑no kꞌoa̱asꞌìn nda kisikꞌaxki̱ jè chjo̱ta̱ bꞌana̱cha̱ xi Niná kinchja̱ya ngajao‑le̱ ki̱tsò‑le̱ yao‑le̱.
Josꞌìn tjínè‑ná koa̱n-tsjoachaà jè xi chꞌao sꞌìn fìkao̱‑ná
(Mt. 5:38-48; 7:12)
27 »To̱nga jòn xi nòꞌyaò,
kꞌoa̱axin‑no:
Kàtamatsjoachao jè xi chꞌao sꞌìn fìkao̱‑no,
nda ti̱kao̱o jè xi chꞌaoke‑no;
28 kjoa̱nda ti̱jétꞌaon jè xi nchja̱ꞌaon‑no,
kꞌoa̱ ti̱nókjoa̱ntjaò ya̱ ngixko̱n Niná jè xi chꞌao tsò én bánè‑nò.
29 ꞌYa xi tꞌañoi si̱ijtsin‑tꞌa,
ti̱kꞌófa‑lai̱ xi ngì ngoa;
kꞌoa̱ jè xi kjoa̱aꞌa‑lì chi̱ngantsja̱‑li̱,
alì mai‑jìn ꞌmì‑lai̱,
kꞌoa̱ti̱ tꞌai̱‑lai̱ saꞌnda chi̱nga xi kichꞌàkjángi.
30 Kꞌoa̱ to̱ꞌya‑ni xi jme xi si̱ijé‑lì,
tꞌaì‑lai̱;
kꞌoa̱ ꞌya‑ni xi skoé jme xi tsi̱,
alì ti̱ nìjé‑jìn‑nilai̱ nga kàtatsjoá ngajao‑nilì.
31 Kꞌoa̱ josꞌìn nga me‑no nga si̱ikao̱‑no jòn jè chjo̱ta̱,
jòn kꞌoa̱ti̱ sꞌìn ti̱kao̱o tsànda jè.
32 »Nga̱ tsà to̱jè tsjoachao jè xi tsjoake‑no,
jmé‑ni xi ngìsa̱ nda tinꞌiaòn.
Nga̱ jè chjo̱ta̱jé kꞌoa̱ati̱ tsjoake ꞌya‑ni xi tsjoake nga jè.
33 Kꞌoa̱ tsà to̱jè nda si̱kao̱o jè xi nda síkao̱‑no,
jmé‑ni xi ngìsa̱ nda tinꞌiaòn.
Nga̱ chjo̱ta̱jé kꞌoa̱ati̱ sꞌín.
34 Kꞌoa̱ tsà to̱jè nìkìnya‑lao̱o ꞌya‑ni xi ꞌyao nga tsjoá ngajao‑nino,
jmé‑ni xi ngìsa̱ nda tinꞌiaòn.
Nga̱ jè chjo̱ta̱jé kꞌoa̱ati̱ síkìnya‑le̱ chjo̱ta̱jé xínkjín,
jmé‑ni nga ngìjngokꞌà kꞌoai̱‑nìle̱ xi kisikìnya.
35 Kàtamatsjoachao tsòkꞌoa̱ jè chjo̱ta̱ xi chꞌao sꞌìn fìkao̱‑no,
kꞌoa̱ nda ti̱kao̱o,
kꞌoa̱ ti̱kìnya‑lao̱o,
kꞌoa̱ ni̱jme‑jìn xi ti̱ choyà ngajao‑nilao̱o xi ni̱kìnyao;
kꞌoa̱ jè kjoa̱tjaò‑no tseè koa̱n,
kꞌoa̱ xti‑le̱ Niná xi nꞌión ngꞌa tíjna koa̱n‑jiòn;
nga̱ Niná tseè kjoa̱nda tjín‑le̱ kao̱ jè chjo̱ta̱ xi tsꞌe̱n kao̱ xi tsì ma‑le̱ tsjoá kjoa̱nda.
36 To̱sa kàtasꞌe‑no kjoa̱ma̱tokòn josꞌìn nga jè Nꞌai‑no tjín‑le̱ kjoa̱ma̱tokòn.
Alì ꞌya‑jìn xi kjoa̱ñꞌai nìjé‑naò
37 »Alì ꞌya‑jìn xi kjoa̱ñꞌai nìjé‑naò,
kꞌoa̱ lìꞌya xi kjoa̱ñꞌain si̱ijénè‑no̱o;
alì ꞌya‑jìn xi kjoa̱ñꞌain bꞌaì‑lao̱o,
kꞌoa̱ lìꞌya xi kjoa̱ñꞌain tsjoá‑no;
ti̱chatꞌao,
kꞌoa̱ kꞌoa̱ati̱ jcha̱tꞌa‑no.
38 Tꞌaò,
kꞌoa̱ kꞌoai̱i‑no;
jokji tje̱n choa̱‑le̱,
xi ñaki xinchá nꞌión,
xi sꞌe̱ kitse kitse kꞌoa̱ xi ñaki xíjtentjaì;
nga̱ jè choa̱ xi bꞌècho̱ya‑nio,
ti̱koiì sꞌe̱cho̱ya‑nino».
39 Kꞌoa̱ Jesús tsakakóya‑le̱ jngo choa̱ xi mangósòn‑kao̱ jngo kjoa̱,
kitsò‑le̱:
«A koa̱an‑le̱ jngo chjo̱ta̱ xi xka̱ koandia̱a‑le̱ jè xi kꞌoa̱ti̱ xka̱ kji.
A tsí tsà ya̱ jtsao̱ya ngajaò ya̱ nga̱jao̱.
40 Jè xi kòtꞌayà alì ngìsa̱‑jìn títjòn tíjna‑le̱ jè xi bakóya‑le̱;
to̱nga to̱ꞌya‑ni jè xi nda koi̱tjo kꞌoa̱ati̱ kji koa̱n‑le̱ jokji ma‑le̱ jè xi bakóya‑le̱.
41 »Án‑ni nga jè tjé xi tíjnangi xko̱n ndsꞌai chòtsen‑sínilai̱,
kꞌoa̱ to̱sa̱a lìkoi chòtsen‑lai̱ jè yá ki̱cho̱ xi kijnangi xkoin.
42 Axo̱ jósꞌín nga koa̱n kꞌoín‑lai̱ jè ndsꞌai:
“Ndsꞌe,
tꞌai̱ꞌnde‑lànaí nga kꞌoasjèngia jè tjé xi tíjnangi xkoin,”
kꞌoa̱ lìkoi chòtsen‑lai̱ jè yá ki̱cho̱ xi kijnangi xkoin.
Chjo̱ta̱ jaò‑kjaín,
títjòn chꞌa̱sjengi jè yá ki̱cho̱ xi kijnangi xkoin,
kꞌoa̱ kꞌia̱ nda koa̱n‑tsen‑nilì nga chꞌa̱sjengi jè tjé xi tíjnangi xko̱n ndsꞌai.
Yá xi nda to ba‑le̱
43 »Lìtsà yá nda‑jìn jè xi tsì nda to ba‑le̱,
ni̱ yá xi tsì nda‑jìn xi nda to ba‑le̱.
44 Nga̱,
nga jngó jngó yá,
koiì ꞌya‑nile̱ jókjoan to xi ba‑le̱;
nga̱ jè yá naꞌyá lìkoi tsà to higo ba‑le̱,
kꞌoa̱ jè yá naꞌní lìkoi tsà totseè ba‑le̱.
45 Jngo xi chjo̱ta̱ nda,
ya̱a jin ni̱ma̱‑le̱ bꞌasje‑ni kjoa̱nda xi tjiótjaó‑le̱,
kꞌoa̱ jngo xi chjo̱ta̱ chꞌaokjoan,
ya̱a jin ni̱ma̱‑le̱ bꞌasje‑ni kjoa̱ xi chꞌao tjín xi tjiótjaó‑le̱;
nga̱ jè kjoa̱ xi nꞌión tjín ya̱ jin ni̱ma̱‑le̱ chjo̱ta̱ koiì xi bitjo‑ni tsꞌoa.
Tꞌatsꞌe̱ jaò chrjaó ja̱ma̱
46 »Án‑ni,
nga Nai,
Nai ꞌmì‑ninaó kꞌoa̱ lìkoi nìkitjosòn jme xi an xin‑no.
47 To̱ꞌya‑ni xi nchroátꞌa‑na,
kꞌoa̱ nchrꞌoé én‑na̱ kꞌoa̱ síkitjosòn,
kꞌoa̱axín‑no ꞌya‑ni xi mangósòn‑kao̱.
48 Ya̱a mangósòn jngo chjo̱ta̱ xi tsakꞌénda ndꞌia‑le̱,
xi nꞌión na̱nga̱ tsakaꞌngi kꞌoa̱ ya̱ sòn na̱xi̱ tsakꞌénda chrjaó ja̱ma̱‑le̱;
kꞌia̱ nga nꞌión tsꞌakꞌa jtsí,
jè xo̱ngá nandá kao̱o nganꞌión‑le̱ tsakꞌétꞌa‑le̱ ndꞌia,
to̱nga lìkoi koan‑tìnya‑le̱ nga̱ ya̱a na̱xi̱ tjíndasòn‑le̱.
49 To̱nga jè xi nchrꞌoé én‑na̱ kꞌoa̱ lìkoi síkitjosòn,
ya̱a mangósòn‑kao̱ jè chjo̱ta̱ xi to̱ sòn nangi tsakꞌénda ndꞌia‑le̱,
kꞌoa̱ tsìn‑le̱ chrjaó ja̱ma̱;
jè xo̱ngá nandá nꞌión jaꞌaikꞌétꞌa‑le̱ kꞌoa̱ ti̱ꞌa chixòya‑ni jè ndꞌia,
kꞌoa̱ nꞌión tse kjoa̱xkón jaꞌainè‑le̱ ndꞌia xo̱kji».