Jokjoan chjo̱ta̱ xi so̱kò‑le̱ kjoa̱nda ya̱ ngixko̱n xi tíjna ngꞌajmi
5
Kꞌia̱ nga Jesús tsabe chjo̱ta̱‑nkjìn,
kimi ya̱ nindo;
kꞌoa̱ kꞌia̱ nga je tsakꞌèjna jaꞌaikòn‑le̱ chjo̱ta̱ xi ya̱ kòtꞌayàtꞌa‑le̱.
2 Kꞌoa̱ tsakꞌétsꞌia̱kao̱ nga tsakakóya‑le̱,
kitsò:
3 «Jó to̱nda‑le̱ ya̱ ngixko̱n xi tíjna ngꞌajmi jokjoan xi macho̱ya‑le̱ sén ni̱chrjin‑le̱ nga machjén‑le̱ Niná,
Nga̱ tsꞌe̱e ya̱ jña batéxoma xi tíjna ngꞌajmi.
4 Jó to̱nda‑le̱ ya̱ ngixko̱n xi tíjna ngꞌajmi jokjoan xi kjiꞌndiá,a
Nga̱ jè xi kꞌoai̱‑le̱ kjoa̱nìje‑tokòn.
5 Jó to̱nda‑le̱ ya̱ ngixko̱n xi tíjna ngꞌajmi jokjoan xi ndꞌé tjió ni̱ma̱‑le̱,b
Nga̱ jé xi kꞌoai̱ kjoa̱tjaò‑le̱ soꞌnde.
6 Jó to̱nda‑le̱ ya̱ ngixko̱n xi tíjna ngꞌajmi jokjoan xi bao‑le̱ kꞌoa̱ xi fatì‑le̱c tꞌatsꞌe̱ kjoa̱kìxi̱,
Nga̱ jè xi kꞌoai̱‑le̱ xi koa̱nski‑ni.
7 Jó to̱nda‑le̱ ya̱ ngixko̱n xi tíjna ngꞌajmi jokjoan xi tjín‑le̱ kjoa̱ma̱tokòn,
Nga̱ jè xi koa̱nma̱cha.
8 Jó to̱nda‑le̱ ya̱ ngixko̱n xi tíjna ngꞌajmi jokjoan xi tsje tjió ni̱ma̱‑le̱,d
Nga̱ jè xi skoe̱ Niná.
9 Jó to̱nda‑le̱ ya̱ ngixko̱n xi tíjna ngꞌajmi jokjoan xi bꞌéntjè kjoa̱nchꞌán,
Nga̱ jè xi kꞌoa̱kꞌoín‑le̱ nga ꞌndí‑le̱ Niná ma.
10 Jó to̱nda‑le̱ ya̱ ngixko̱n xi tíjna ngꞌajmi jokjoan xi fìtje̱n‑ngicha‑le̱ xi to̱ tꞌatsꞌe̱ kjoa̱kìxi̱,
Nga̱ tsꞌe̱e ya̱ jña batéxoma xi tíjna ya̱ ngꞌajmi.
11 »Jó to̱nda‑no jòn ya̱ ngixko̱n xi tíjna ngꞌajmi,
kꞌia̱ nga to̱ tꞌatsꞌa̱n nga chjo̱ta̱ koi̱nchja̱ꞌaon‑no kꞌoa̱ nga koai̱tje̱n‑ngike‑no,
kꞌoa̱ nga koi̱nchja̱ ngayije én xi chꞌao tsò xi koa̱anè‑no,
xi to̱ én ndiso.
12 Nꞌión tsjoa kàtasꞌe‑no kꞌoa̱ ti̱tsjoao,
nga̱ ngìsa̱a tse tjín‑ni jè kjoa̱tjaò‑no xi kꞌoai̱‑no ya̱ ngꞌajmi;
nga̱ kꞌoa̱ati̱ sꞌìn tsangìtje̱n‑ngicha‑le̱ ngatsꞌi chjo̱ta̱ xi títjòn tsakatiò‑no xi kinchja̱ya ngajao‑le̱ Niná.e
Jòn‑nió jè na̱xa̱‑le̱ soꞌnde
13 »Jòn‑nió jè na̱xa̱‑le̱ soꞌnde;
to̱nga tsà jè na̱xa̱ cha̱jta,
jókoa̱n koa̱n‑jnchra ngìjngokꞌà‑ni.
Ni̱jojìn sꞌìn ti̱ koa̱n‑chjén‑ni,
to̱saà ya̱ nditsin sꞌe̱jten kꞌoa̱ ya̱a koi̱nchanè chjo̱ta̱.
Jòn‑nió jè lꞌí‑le̱ soꞌnde
14 »Jòn‑nió jè lꞌí‑le̱ soꞌnde;
jngo na̱xi̱nandá‑nꞌión xi ya̱ tíjna sòn nindo lìkoi ma bꞌèjnaꞌma.
15 Kꞌoa̱ti̱ sꞌìn‑ni,
kꞌia̱ nga sꞌetꞌa‑í jngo lꞌí,
alì tsà kàxa̱‑jìn nìkꞌéjnaꞌmangi,
to̱saà sꞌejnasòn‑ngꞌa,
kꞌoa̱ sí-iseèn‑le̱ ngatsꞌi xi tjióꞌyà ndꞌia.
16 Kꞌoa̱sꞌìn kàtasí-isen ya̱ ngixko̱n chjo̱ta̱ jè lꞌí‑no,
jmé‑ni nga skoe̱‑ni nga nda tinꞌiaòn,
kꞌoa̱ kàtabꞌasjejeya jè Nꞌai‑no xi tíjna ya̱ ngꞌajmi.
Jesús jaꞌai síkitjosòn jè kjoa̱téxoma‑le̱ Niná
17 »Alì nìkjaꞌaitsjen‑jiòn nga koi xá jàꞌai̱‑nia nga sichàngia kjoa̱téxoma‑le̱ Niná xi kiski Moisés axo̱ koi én‑le̱ Niná xi kiski ngatsꞌi chjo̱ta̱ xi kinchja̱ya ngajao‑le̱;
lìtsà koi xá jàꞌai̱‑nia nga sichàngia,
to̱saà an jàꞌai̱ sikitjosoàn.
18 Nga̱ ñaki kìxi̱i xi xin‑no,
nga jo saꞌnda nga kjoa̱ꞌato ngꞌajmi kao̱ soꞌnde,
ni̱jngo jko̱yajìn‑là jcha̱jin jme xi títsò jè kjoa̱téxoma‑le̱ Niná,
jo saꞌnda nga koi̱tjosòn ngayije.
19 Kꞌoa̱ to̱ꞌya‑ni xi kjoa̱ꞌatontjaì jngo‑le̱ kjoa̱téxoma xo̱kjoan xi bꞌénè Niná,
ni̱nga xi to̱ choa tjín‑ni jme xi bꞌénè,
kꞌoa̱ kꞌoa̱sꞌìn koa̱kòya‑le̱ chjo̱ta̱,
jé xi nꞌión sa nangi si̱kꞌéjna ya̱ jña batéxoma xi tíjna ngꞌajmi;
to̱nga to̱ꞌya‑ni xi si̱ikitjosòn kꞌoa̱ koa̱kòya‑le̱ chjo̱ta̱,
jé xi ngꞌa si̱kꞌéjna ya̱ jña batéxoma xi tíjna ngꞌajmi.
20 Nga̱ kꞌoa̱axin‑no tsà tsì ngìsa̱ tse kjoa̱kìxi̱ sꞌe̱‑no jòn ti̱kꞌoa̱‑ni chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo,
lìkoi koa̱n koi̱tjásꞌao̱on ya̱ jña batéxoma xi tíjna ngꞌajmi.
Jesús tsakakóya xi tꞌatsꞌe̱ kjoa̱jti
21 »Tsakꞌìnyaà‑no nga i̱ tsakꞌìn‑le̱ jè chjo̱ta̱ jchínga‑no:
“Alì nìkꞌen‑jìn,”f
kꞌoa̱ “to̱ꞌya‑ni xi si̱ikꞌen,
kjoa̱ñꞌain tíjnanè‑le̱”.
22 To̱nga an xiìn‑no,
to̱ꞌya‑ni xi koa̱njti‑le̱ kao̱ ndsꞌe̱,
kjoa̱ñꞌain tíjnanè‑le̱;
kꞌoa̱ to̱ꞌya‑ni xi koi̱tso̱‑le̱ ndsꞌe̱:
“Chjo̱ta̱ chi̱nì,”
jè jtín xi kjinèntsja kjoa̱téxoma‑le̱ chjo̱ta̱ judío tsjoá‑le̱ kjoa̱ñꞌain;
kꞌoa̱ to̱ꞌya‑ni xi koi̱tso̱‑le̱ ndsꞌe̱:
“Lìjme chjí‑lì ji,”
ya̱a jin lꞌí xi ni̱kꞌia‑jìn bitsꞌao kꞌoai̱‑le̱ kjoa̱ñꞌain.
23 »Koiì kjoa̱,
tsà kjoa̱tjaò‑li̱ kjoàꞌai̱koai̱ ya̱ chrjaó jña tìsòn kjoa̱tjaò xi bꞌaìtꞌa‑le̱ Niná,
kꞌoa̱ tsà ya̱ kjoa̱ꞌaítsjen‑lì nga kjoa̱ tjín‑le̱ ndsꞌai xi kao̱ ji,
24 ti̱kꞌéjnai jè kjoa̱tjaò‑li̱ ya̱ chrjaó jña tìsòn kjoa̱tjaò xi bꞌaìtꞌa-le̱ Niná,
kꞌoa̱ tꞌin chón‑lai̱ ndsꞌai,
kꞌoa̱ títjòn cho̱bànda‑nio kao̱ jè,
kꞌoa̱ kꞌia̱ nchroaí kꞌoa̱ tꞌaì jè kjoa̱tjaò‑li̱.
25 »Ndi̱to̱n cho̱bànda‑ni kao̱ xi chꞌao sꞌìn fìkao̱‑lì,
ti̱ꞌa‑ni nga sꞌa̱ ndia̱a tje̱nyao,
tsà mai jè xi chꞌao sꞌìn fìkao̱‑lì ya̱a si̱intsjatꞌa‑lì chjo̱ta̱xá xi bꞌéndajin kjoa̱,
kꞌoa̱ jé chjo̱ta̱xá xi bꞌéndajin kjoa̱ ya̱a si̱intsjatꞌa‑lì chjo̱ta̱ xi síkatió ndo̱yá chjo̱ta̱,
kꞌoa̱ jè ya̱ si̱ikꞌéjna‑lì ya̱ ndo̱yá.
26 Ñaki kìxi̱i xi xin‑lè,
nga lìkoi ti̱ koa̱n koìtjo̱‑ni ya̱,
jo saꞌnda nga kꞌoéchjí,
nga si̱kjai ngayije tao̱n‑li̱.
Jesús tsakakóya xi tꞌatsꞌe̱ kjoa̱chajngi
27 »Tsakꞌìnyaà‑no nga i̱ tsakꞌìn‑le̱ jè chjo̱ta̱ jchínga‑no:
“Alì nìchajngi‑jìn”.g
28 To̱nga an kꞌoa̱axin‑no,
to̱ꞌya‑ni xi jngo chjo̱on kòtsen‑le̱ nga me‑le̱ kjoájnakao̱,
jeè kàsíchajngikao̱ ya̱ jin ni̱ma̱‑le̱.
29 Koiì kjoa̱ tsà jè xkoin ngakìxi̱ síkajngijé‑lì,
to̱sa chꞌa̱sjai,
kꞌoa̱ kjin ti̱kꞌatjai̱n;
to̱ ngìsa̱a nda‑nilì tsà chrꞌoá‑tꞌa sꞌe̱ yao‑li̱,
ti̱kꞌoa̱‑ni tsà ngayije yao‑li̱ si̱kꞌatje̱njin ya̱ jin lꞌí xi tsìkꞌia bitsꞌao.
30 Kꞌoa̱ tsà jè ndsai̱ ngakìxi̱ síkajngijé‑lì,
to̱sa ti̱chátꞌai,
kꞌoa̱ kjin ti̱kꞌatjai̱n;
to̱ ngìsa̱a nda nga to̱ chrꞌoá‑tꞌa sꞌe̱ yao‑li̱,
ti̱kꞌoa̱‑ni nga ngayije yao‑li̱ si̱kꞌatje̱njin ya̱ jin lꞌí xi tsìkꞌia bitsꞌao.
Jesús tsakakóya xi tꞌatsꞌe̱ jngo chjo̱ta̱ xi tsjion chjo̱on‑le̱
31 »Kꞌoa̱ati̱ tsakꞌìnya‑no nga i̱ tsakꞌìn‑le̱ jè chjo̱ta̱ jchínga‑no:
“To̱ꞌya‑ni xi tsjión chjo̱on‑le̱,
kàtatsjoá‑le̱ jngo xo̱n xi kꞌoa̱tsò nga je kàtsjion”.h
32 To̱nga an kꞌoa̱axin‑no,
nga jè chjo̱ta̱ xi tsjión chjo̱on‑le̱,
tsà tsì koi nga kjoa̱chajngi kisꞌin chjo̱on‑le̱,
to̱sa̱a jè tíkaníjin kjoa̱chajngi chjo̱on‑le̱;
kꞌoa̱ jè chjo̱ta̱ xi koi̱xan‑kao̱ jè chjo̱on xi kinjion,
kꞌoa̱ati̱ tísíchajngi.
Jesús tsakakóya xi tꞌatsꞌe̱ nga én‑ná bꞌaì‑jiàn
33 »Kꞌoa̱ati̱ tsakꞌìnyasa‑no nga i̱ tsakꞌìn‑le̱ jè chjo̱ta̱ jchínga‑no:
“Alì jaꞌaín‑le̱ Niná nìchjaín nga bꞌaì én‑lì,
xi tsì‑ni si̱kitjosoìn,”i
to̱sa̱a “ti̱kitjosoìn jme én xi kàbꞌaì nga kànìchjaìn jaꞌaín‑le̱ Niná”.j
34 To̱nga an kꞌoa̱axin‑no:
Alì jme‑jìn xi binchanꞌión‑nio kꞌia̱ nga bꞌaò én‑no;
ni̱ jè‑jìn ngꞌajmi,
nga̱ ya̱a tíjna Niná nga tíbatéxoma;k
35 ni̱ soꞌnde‑jìn,
nga̱ i̱i nchasòn‑le̱ ndso̱ko̱ Niná;
ni̱ Jerusalén‑jìn,l
nga̱ ya̱a na̱xi̱nandá‑nꞌión‑le̱ Chjo̱ta̱xá Ngajko̱ xi nꞌión ngꞌa tíjna.m
36 Ni̱ jkoì jìn‑là bisèn‑nꞌión‑ni,
nga̱ lìkoi koa̱n‑lì nga chroa axo̱ jmà si̱kà jngoi ntsja̱jkoi.
37 To̱nga kꞌia̱ nga nòkjoaò:
“Jaon” tixón tsà jaon;
kꞌoa̱ “Mai” tixón tsà mai;
nga̱ jè én xi kjisòn,
tꞌatsꞌe̱e nai̱i nchroá‑ni.
Tsjoacha kàtamaò jè xi tsì nda fìkao̱‑no.
38 »Tsakꞌìnyaà‑no nga i̱ tsakꞌìn‑le̱ jè chjo̱ta̱ jchínga‑no:
“Tsàꞌya xi jngo xkoin kꞌoa̱sje,
kꞌoa̱ti̱ chꞌa̱sje ngajao jngo‑ni tsꞌe̱,
kꞌoa̱ tsà ꞌya xi jngo niꞌñoi kꞌoa̱je̱n,
kꞌoa̱ti̱ chꞌa̱je̱n ngajao jngo‑ni tsꞌe̱”.n
39 To̱nga an kꞌoa̱axin‑no:
Alì nìtajakao̱‑jiòn jè chjo̱ta̱ xi tsꞌe̱n;
to̱ꞌya xi tꞌañoin ngakìxi̱ si̱ijtsin‑tꞌa,
ti̱kꞌófa‑lai̱ xi ngìngoa nga kàtasíjtsin‑tꞌa.
40 Kꞌoa̱ tsà ꞌya xi me‑le̱ nga kjoájétꞌain‑lì nga kjoaàꞌa‑lì chi̱nga‑li̱,
kꞌoa̱ti̱ tꞌaì‑lai̱ najño xi tìjnajtaí;
41 kꞌoa̱ to̱ꞌya‑ni xi chꞌá si̱ikꞌami kjoa̱nꞌión‑lì,
jokji kjin me‑le̱ nga kꞌoìn‑kao̱‑lai̱,
jaòya kꞌoa̱kji kjin tꞌin‑kao̱‑lai̱.
42 Jè xi tjín xi si̱ijé‑lì,
tꞌaì‑lai̱;
kꞌoa̱ tsà ꞌya xi tjín xi skoínyatꞌa‑lì,
alì mai‑jìn ꞌmì‑lai̱.
43 »Tsakꞌìnyaà‑no nga i̱ tsakꞌìn‑le̱ jè chjo̱ta̱ jchínga‑no:
“Kàtamatsjoachai chjo̱ta̱ xìngi̱,”o
kꞌoa̱ “kàtamachꞌaochai jè chjo̱ta̱ xi tsì nda fìkao̱‑lì”.
44 To̱nga an kꞌoa̱a xin‑no:
Kàtamatsjoachao jè xi tsì nda fìkao̱‑no,
ti̱chikon‑tꞌaon jè xi nchja̱ꞌaon‑no,
nda ti̱kao̱o jè xi chꞌaoke‑no,
tꞌètsꞌoantjaò jè xi chꞌao tsò‑no kao̱ jè xi fìtje̱n‑ngike‑no;
45 jmé‑ni nga xti‑le̱ koa̱n‑nio jè Nꞌai‑no xi tíjna ya̱ ngꞌajmi,
xi sísjè‑le̱ ndoá jè chjo̱ta̱ xi chꞌaokjoan kao̱ chjo̱ta̱ xi nda,
kꞌoa̱ti̱ síkꞌa‑le̱ jtsí chjo̱ta̱ xi kìxi̱ kao̱ xi tsì kìxi̱.
46 Nga̱ tsà to̱jè tsjoachao jè chjo̱ta̱ xi tsjoake‑no,
jmé xi koi̱nje̱n‑no,
a tsí kꞌoa̱ti̱ ma‑le̱ kꞌoa̱sꞌín jè chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma.
47 Kꞌoa̱ tsà to̱jè nìtìꞌndao xi ndsꞌao chobaò,
jmé‑ni xi kjaꞌaí tinꞌiaòn xi nda tjín.
A tsí tsà kꞌoa̱ti̱ sꞌín jè chjo̱ta̱ xi tsì tsà judío‑jìn.
48 Kꞌoa̱sꞌìn ni̱jme‑jìn xi chꞌaotjín kàtasꞌe̱‑no,
josꞌìn nga jè Nꞌai‑no xi tíjna ngꞌajmi,
ni̱jme‑jìn xi chꞌaotjín tjín‑le̱. p