Jesús tsakakóya xi tꞌatsꞌe̱ nga binchakoa̱a chjo̱ta̱ xi yo̱ma̱ sꞌìn tjió
6
»Ti̱koìndao̱o yao‑no nga tsì ya̱ ngixko̱n chjo̱ta̱ kꞌoa̱sꞌia̱on jè kjoa̱kìxi̱‑no nga to̱jo koa̱n‑ni nga skoe̱‑no;
nga tsà kꞌoa̱sꞌìn sꞌia̱on lìkoi tsjoá‑no chjí‑no jè Nꞌai‑no xi tíjna ya̱ ngꞌajmi.
2 »Kꞌia̱ nga koi̱se̱n‑koai̱ jè chjo̱ta̱ xi yo̱ma̱ sꞌìn tjió,
alì chjo̱ta̱‑jìn ꞌmìya‑lai̱,
josꞌín jè chjo̱ta̱ jaò‑nkjaín ya̱ ndꞌia jña maxkia̱ xo̱n‑le̱ Niná kao̱ ya̱ yandia̱a,
jmé‑ni nga nda kàtasíkꞌaxki̱‑ni chjo̱ta̱;
ñaki kìxi̱i xi xin‑no,
to̱ jeè tíbꞌaì‑le̱ chjí‑le̱.
3 To̱nga ji kꞌia̱ nga kꞌoai̱‑lai̱ kjoa̱tjaò jè chjo̱ta̱ xi yo̱ma̱ sꞌìn tjió,
saꞌnda lì jè‑jìn ndsai̱ ngaskón kàtasꞌejin‑le̱ jme xi tísꞌín ndsai̱ ngakìxi̱,
4 jmé‑ni nga to̱ ꞌma koi̱se̱n‑kao̱‑ni;
kꞌoa̱ jè Nꞌai‑li̱ xi be kjoa̱ xi ꞌma tjín,
jé tsjoá sòn‑tsen‑lì chjí‑li̱.
Jesús tsakakóya jósꞌìn koi̱nókjoa̱koa̱ Niná
5 »Kꞌoa̱ kꞌia̱ nga nòkjoa̱koai̱ Niná,
alì kꞌoa̱‑jìn makjoan‑jìn jokjoan chjo̱ta̱ jaò‑nkjaín;
nga̱ jè tsjoakeè nga binchando‑ni nga fákao̱ Niná ya̱ ndꞌia jña maxkia̱ xo̱n‑le̱ Niná,
kꞌoa̱ ya̱ jin ndi̱tsi̱n,
jmé‑ni nga kàtabe‑ni chjo̱ta̱;
ñaki kìxi̱i xi xin‑no,
to̱ jeè tíbꞌaì‑le̱ chjí‑le̱.
6 To̱nga ji,
kꞌia̱ nga nòkjoa̱koai̱ Niná,
ti̱tjásꞌai̱n ya̱ jña nìkjáyai ya̱ ya ndꞌia‑li̱,
kꞌoa̱ tꞌèchjoaì jè xo̱ntjoa̱,
kꞌoa̱ ya̱ ti̱nókjoa̱koai̱ jè Nꞌai‑li̱ xi ꞌma tíjna;
kꞌoa̱ jè Nꞌai‑li̱ xi be kjoa̱ xi ꞌma tjín,
jé tsjoá‑lì chjí‑li̱ ya̱ ngixko̱n chjo̱ta̱.
7 »Kꞌoa̱ kꞌia̱ nga nòkjoa̱kao̱o Niná,
alì ti̱koi ti̱ma‑jìn én chjoéya‑nio xi tsìjme chjí‑le̱,
josꞌín jè chjo̱ta̱ xi tsì tsà judío‑jìn,
xi kꞌoa̱sꞌìn síkꞌaitsjen nga koi koi̱nchrꞌoé‑nile̱ Niná nga nꞌión nkjìn én nchja̱.
8 Alì ya̱‑jìn nìngósòn‑kao̱o yao‑no jokjoan jè;
nga̱ jè Nꞌai‑no beè jme xi machjén‑no ti̱ꞌa‑ni nga kje nìjé‑jìn‑lao̱o.
9 Jòn‑ni,
i̱i sꞌìn koi̱nókjoa̱kao̱o Niná:
»“Nꞌai‑na̱ji̱n xi ya̱ ngꞌajmi tijnai,
Ji xi nꞌión kàtaꞌyaxkón‑lì.
10 Nchroá ka̱tèxoma‑naíji̱n.
Kꞌoa̱kàtama josꞌìn nga ji me‑lì,
Jo kjima ya̱ ngꞌajmi kꞌoa̱ti̱ kàtama i̱ soꞌnde.
11 Tꞌai̱‑naíji̱n ndꞌai̱ jme xi koi̱chi‑ji̱n,
Xi ni̱chrjin nga nchaon machjén‑naji̱n.
12 Kꞌoa̱ ti̱chatꞌa‑naíji̱n ngayije xi kitje̱n‑naji̱n,
Josꞌìn nga ji̱n nìchatꞌa‑lai̱ji̱n jè chjo̱ta̱ xi kitje̱n‑le̱ tsai̱n‑ji̱n.
13 Kꞌoa̱,
alì bꞌaìꞌnde‑jìn nga jè kjoa̱ xi kòtꞌayakao̱‑naji̱n si̱ikinjen‑naji̱n,
To̱saà chꞌa̱sjentjaì‑naíji̱n tꞌatsꞌe̱ kjoa̱ xi tsꞌe̱ nai̱i;
Nga̱ jiì batèxomai,
kꞌoa̱ tsi̱‑ní jè nganꞌión,
kꞌoa̱ kao̱ kjoa̱jeya,a
Saꞌnda ngasꞌa̱ kꞌoa̱ to̱kꞌia saꞌnda‑ni.
Kꞌoa̱kàtama”.
14 »Nga̱ tsà si̱chatꞌa‑lao̱o jè chjo̱ta̱ kjoa̱ xi síkao̱‑no nga síkìꞌaon‑no,
kꞌoa̱ati̱ jè Nꞌai‑no xi tíjna ya̱ ngꞌajmi si̱ichatꞌa‑no;
15 to̱nga tsà tsì si̱chatꞌa‑lao̱o jè kjoa̱ xi síkao̱‑no chjo̱ta̱ nga síkìꞌaon‑no,
kꞌoa̱ati̱ jè Nꞌai‑no lìkoi si̱ichatꞌa‑no jme xi chꞌao nꞌiaòn.
Jesús tsakakóya jósꞌìn koi̱jnanchjaàn xi tꞌatsꞌe̱ Niná
16 »Kꞌia̱ nga biyonchjaon xi tꞌatsꞌe̱ Niná,
alì tsen‑jìn soyo,
joni tsà jè chjo̱ta̱ jaò‑nkjaín;
nga̱ jè síkáyo ba baà nkjaín jmé‑ni nga kàtabe‑ni chjo̱ta̱ nga tjiónchjan;
ñaki kìxi̱i xi xin‑no,
to̱ jeè tíbꞌaì‑le̱ chjí‑le̱.
17 To̱nga ji,
kꞌia̱ nga bijnanchjain tꞌatsꞌe̱ Niná tsjoá nda ta̱sèn‑ai ntsja̱jkoi kꞌoa̱ tsjoá chónkjai̱n,
18 jmé‑ni nga tsì chjo̱ta̱ koa̱kò‑nilai̱ nga tìjnanchjain tꞌatsꞌe̱ Niná,
to̱saà jé Nꞌai‑li̱ xi ꞌma tíjna kàtabe‑lì;
kꞌoa̱ jè Nꞌai‑li̱ xi be xi ꞌma tjín,
jé tsjoá‑lì chjí‑li̱ ya̱ ngixko̱n chjo̱ta̱.
To̱saà ya̱ ngꞌajmi ti̱nchatjaò kjoa̱nchi̱ná‑no
19 »Alì kjoa̱nchi̱ná‑jìn binchatjaò i̱ soꞌnde,
jña nga jè cho̱ kixo kao̱ jè ntsjaó síkitsón,
kꞌoa̱ jña chjo̱ta̱ ché faꞌasꞌen ndꞌia kꞌoa̱ síché;
20 to̱saà ya̱ ngꞌajmi ti̱nchatjaò kjoa̱nchi̱ná‑no,
ya̱ jña tsì cho̱ kixo kꞌoa̱ ni̱ ntsjaó‑jìn síkitsón,
kꞌoa̱ ya̱ jña tsì chjo̱ta̱ ché faꞌasꞌen ndꞌia kꞌoa̱ síché.
21 Nga̱ ya̱ jña tíjna jè kjoa̱nchi̱ná‑no,
kꞌoa̱ati̱ ya̱ kꞌoéjna jè ni̱ma̱‑no.
Jè lꞌí xi sí-isen‑le̱ yao‑ná
22 »Jè lꞌí xi sí-isen‑le̱ yao‑ná jé xkoaàn;
kꞌoa̱a ma‑ni,
tsà jè xkoin tsjoake kjoa̱ xi nda tjín,
ngayije yao‑li̱ isen‑le̱;
23 to̱nga tsà jè xkoin tsjoake kjoa̱ xi chꞌao tjín,
ngayije yao‑li̱ kjoa̱njiòn tíjnajin.
Kꞌoa̱a ma‑ni,
tsà jè lꞌí xi tíjnajin‑lì kjoa̱njiòn‑ni,
nꞌión tse kjoa̱njiòn tìjnajin.
Niná kꞌoa̱ jè kjoa̱nchi̱ná
24 »Ni̱jngo‑jìn xi koa̱n jaò nai si̱ixá‑le̱;
nga̱ jngo koa̱n‑chꞌaoke kꞌoa̱ xi ngìjngo koa̱n‑tsjoake,
axo̱ jngo xi nda koai̱kao̱ kꞌoa̱ xi ngìjngo kꞌoa̱sjengi.
Lìkoi koa̱n si̱xá‑lao̱o Niná kꞌoa̱ kao̱ jè kjoa̱nchi̱ná.
Jè kjoa̱nìkjájon kao̱ jè kjoa̱ xi nꞌión mame‑ná
25 »Koiì nga kꞌoa̱xin‑nino jòn:
Alì nìkjájon‑jiòn tꞌatsꞌe̱ kjoa̱bijnachon‑no,
jmé xi koi̱cho axo̱ jmé xi sꞌio̱o;
ni̱ tꞌatsꞌe̱‑jìn yao‑no,
jmè xi chꞌa̱kjaó.
A tsí ngìsa̱ chjí‑le̱ jè kjoa̱bijnachon‑no ti̱kꞌoa̱‑ni jme xi ma chine,
kꞌoa̱ a tsí ngìsa̱ chjí‑le̱ jè yao‑no ti̱kꞌoa̱‑ni jè najño xi ma chꞌàkjá.
26 Chótsen‑lao̱o jè ni̱se xi bꞌèmatje̱n,
xi ni̱ bꞌéntjè,
ni̱ bꞌéxkó‑jìn,
kꞌoa̱ ni̱ ya̱‑jìn ningꞌa binchátjaò;
kꞌoa̱ jé Nꞌai‑no xi tíjna ya̱ ngꞌajmi síkjèn.
Kꞌoa̱ jòn,
a tsí ngìsa̱ sa chjí‑lao̱o ti̱kꞌoa̱‑ni jè ni̱se.
27 Kꞌoa̱ ꞌyá‑ni jòn xi koa̱n‑no si̱ngꞌa‑sa jngo xkóndsa̱o yao‑no ni̱nga jo nꞌión tse si̱kjájon‑lao̱o yao‑no.
28 »Kꞌoa̱ xi tꞌatsꞌe̱ najño,
án‑ni nga nìkjájon‑nio.
Chótsen‑lao̱o jè naxójñá,
josꞌìn mantjè:
lìkoi síxá,
ni̱ bàꞌa‑jìnb;
29 to̱nga kꞌoa̱axin‑no,
nga ni̱ jè‑jìn Salomón kao̱ ngayije kjoa̱nchi̱ná‑le̱c lìkꞌia tsakꞌakjá najño xi kꞌoa̱kjoan joni tsà jè naxó.
30 Kꞌoa̱ tsà Niná kꞌoa̱sꞌìn síkjoan jè naxó jñá xi kjintjè ndꞌai̱ ya̱ jin nangi,
kꞌoa̱ nchaon sꞌe̱tsaojin lꞌí,
a tsí ngìsa̱ tse xi sꞌiìn Niná xi tꞌatsao̱on,
jòn chjo̱ta̱ xi choa makjaín‑no.
31 Alì nìkjájonjìn‑lao̱o‑ni yao‑no,
alì bixón‑jiòn:
“Jmé xi koi̱chaà,”
axo̱ “Jmé xi sꞌioa̱a,”
axo̱ “Jmé xi chꞌa̱kjá”.
32 Nga̱ jé chjo̱ta̱ xi tsì tsà judío‑jìn,
koiì nꞌión básjai ngayije tsojmì xo̱kjoan;
to̱nga jè Nꞌai‑no xi tíjna ya̱ ngꞌajmi beè nga machjén‑no ngayije tsojmì xo̱kjoan.
33 To̱saà koi títjòn ti̱jnchísjao jña batéxoma Niná kꞌoa̱ tꞌènè‑lao̱o yao‑no nga ti̱kitjosòn kjoa̱kìxi̱‑le̱,
kꞌoa̱ ngayije tsojmì xo̱kjoan kꞌoai̱sòn‑no.
34 Kꞌoa̱ koiì nga lìkoi‑jìn nìkjájon‑nilao̱o yao‑no tꞌatsꞌe̱ jme xi koa̱n nchaon,
nga̱ nchaon kja̱ꞌaí kjoa̱níkjájon ti̱ kjoa̱ꞌaí ngá‑ni.
To̱ koa̱an‑ni jè kjoa̱ñꞌain xi faꞌai nga jngó jngó ni̱chrjin.