3 »Kꞌoa̱ án‑ni nga jè tjé xi tíjnangi xko̱n ndsꞌai chòtsen‑sínilai̱,

kꞌoa̱ to̱sa̱a lìkoi chòtsen‑lai̱ jè yá ki̱cho̱ xi kijnangi xkoin.

4 Axo̱ koa̱n‑nꞌión tokoìn nga kꞌoín‑lai̱ jè ndsꞌai:

“Tꞌai̱ꞌnde‑lànaí nga kꞌoa̱sjèngia jè tjé xi tíjnangi xkoin,”

kꞌoa̱ koe̱e‑ni,

to̱saà yá ki̱cho̱ xi kijnangi xkoin.

5 ¡Chjo̱ta̱ jaò‑nkjaín xo̱ tisoi!

títjòn chꞌa̱sjengi jè yá ki̱cho̱ xi kijnangi xkoin,

kꞌoa̱ kꞌia̱a nda koa̱n‑tsen‑lì nga chꞌa̱sjengi jè tjé xi tíjnangi xko̱n ndsꞌai.

6 »Alì jè‑jìn niáa bꞌaì‑lao̱o jme xi tsꞌe̱ Niná,

jmé‑ni nga tsì si̱ikꞌófayatꞌa‑nino kꞌoa̱ ski̱ne̱‑no,

kꞌoa̱ ni̱ jè‑jìn chi̱nga̱ nìkꞌatsao‑lao̱o jè lao̱ fate xi na̱ská na̱kjoan,

nga tsà mai ya̱a koi̱nchanè.

7 »Ti̱jaó,

kꞌoa̱ kꞌoai̱i‑no;

ti̱jnchísjao,

kꞌoa̱ koa̱nsjai‑no;

ti̱kjanetꞌao xo̱ntjoa̱ kꞌoa̱ tjóꞌaí‑no.

8 Nga̱ to̱ꞌya‑ni xi síjé,

bꞌaí‑le̱;

kꞌoa̱ jè xi básjai,

masjaiì‑le̱;

kꞌoa̱ jè xi síkjanetꞌa xo̱ntjoa̱ tjóꞌaí‑le̱.

9 »ꞌYá‑ni jòn,

tsà xi nio̱xtìla̱ si̱ijé‑le̱ ꞌndí‑le̱,

a jngo la̱jao̱ tsjoá‑le̱.

10 Kꞌoa̱ tsà jngo jti̱ si̱ijé‑le̱,

a jngoò ye̱ tsjoá‑le̱.

11 Nga̱ tsà jòn xi chjo̱ta̱ chꞌaokjoan‑jiòn,

ma‑no bꞌaì‑lao̱o tsojmì xi nda jè xti‑no,

jè Nꞌai‑no xi tíjna ya̱ ngꞌajmi,

a tsí ngìsa̱ tse kjoa̱nda tjín‑le̱,

nga tsjoá‑le̱ tsojmì xi nda ꞌya xi si̱ijé‑le̱.

12 »Koiì nga,

ngayije kjoa̱nda xi me‑no nga si̱ikao̱‑no chjo̱ta̱,

kꞌoa̱ati̱ sꞌìn ti̱kao̱o tsànda‑jòn;

nga̱ koiì jè xi bakóya kjoa̱téxoma‑le̱ Niná xi kiski Moisés kꞌoa̱ kao̱ xi kiski ngatsꞌi chjo̱ta̱ xi kinchja̱ya ngajao‑le̱ Niná.

13 »Ya̱ xo̱ntjoa̱ xi nchrꞌoèya kji ti̱tjásꞌe̱n‑nio;

nga̱ teyà jè xo̱ntjoa̱ kꞌoa̱ teyà jè ndia̱a xi ya̱ jin lꞌí xi tsìkꞌia bitsꞌao fichó‑kao̱ chjo̱ta̱,

kꞌoa̱ nꞌión nkjìn ma xi ya̱ faꞌasꞌen;

14 nga̱ nchrꞌoèyaà kji jè xo̱ntjoa̱,

kꞌoa̱ nchrꞌoèyaà kji jè ndia̱a xi kjoa̱bijnachon fichó,

kꞌoa̱ to̱ choaà ma‑ni xi masjai‑le̱.

15 »Ti̱koìnda̱‑lao̱o yao‑no jè chjo̱ta̱ bꞌana̱cha̱ xi tsò‑le̱ yao‑le̱ nga Niná nchja̱ya ngajao‑le̱,

xi jo barrè kjoan kꞌia̱ nga faꞌaikòn‑no,

to̱nga ya̱ jin ni̱ma̱‑le̱ tse̱en xi nꞌión toán‑ní.

16 Kao̱o kjoa̱ xi sꞌín jcha̱‑nio ꞌyá‑ni.

A koa̱an nga jngo yá naꞌyá totseè koa̱‑le̱,

axo̱ koa̱an nga jngo yá naꞌní,

to higo koa̱‑le̱.

17 Kꞌoa̱ti̱ sꞌìn,

ngayije yá nda ndaà to ba‑le̱,

to̱nga jngo yá xi tsì nda chꞌao kjoan to ba‑le̱.

18 Lìkoi koa̱n‑le̱ yá xi nda nga chꞌao kjoan to koa̱‑le̱,

ni̱ jè‑jìn yá xi tsì nda koa̱n‑le̱ nga nda to koa̱‑le̱.

19 Ngayije yá xi tsì nda to ba‑le̱,

jtísòn‑ní kꞌoa̱ ya̱a lꞌí sꞌetsaojin.

20 Kꞌoa̱a ma‑ni nga koiì jme xi sꞌín jngo chjo̱ta̱ jcha̱‑nio ꞌyá chjo̱ta̱‑ni jè.

21 »Lìtsà ngatsꞌi jìn xi “Nai,

Nai” tsò‑na kjoa̱ꞌasꞌen ya̱ jña batéxoma jè xi tíjna ya̱ ngꞌajmi,

to̱jè‑ní ꞌya xi kꞌoa̱sꞌín josꞌìn nga me‑le̱ jè Nꞌai‑na̱ xi tíjna ya̱ ngꞌajmi.

22 Nꞌión nkjìn chjo̱ta̱ xi koi̱tso̱‑na,

kꞌia̱ nga koi ni̱chrjin:

“Nai,

a tsí tꞌatsi̱ kinòkjoa̱yai‑ji̱n,

kꞌoa̱ kao̱o nganꞌión‑le̱ jaꞌaín‑li̱ tsakichonsjejin‑niji̱n jè sén ni̱chrjin xi tsꞌe̱ nai̱i,

kꞌoa̱ tꞌatsi̱‑ní nga nꞌión nkjìn kjoa̱xkón kinꞌiàn‑ji̱n”.

23 Kꞌoa̱ kꞌia̱ kꞌoa̱xín‑le̱:

“Ni̱kꞌia‑jìn tsabexkon‑no;

ti̱nchaxìn‑naó,

chjo̱ta̱ xi koi kjoa̱ xi chꞌaotjín kꞌoa̱nꞌiaò”.

24 »Koiì kjoa̱ nga to̱ꞌya‑ni xi nchrꞌoé‑na én xi tìnchjà,

kꞌoa̱ síkitjosòn,

ya̱a singósòn‑koa̱ jngo chjo̱ta̱ xi tjín‑le̱ kjoa̱‑isen‑tokòn,

xi ya̱ sòn na̱xi̱ tsakꞌéndasòn ndꞌia‑le̱.

25 Nꞌión tsꞌa jtsí,

kꞌoa̱ koan‑nꞌión xo̱ngá nandá xi tsakꞌétꞌa‑le̱ ndꞌia,

kꞌoa̱ jaꞌa ntjao̱-nꞌión xi kisitìnya‑le̱;

kꞌoa̱ lìkoi chixòya ndꞌia,

koiì nga ya̱ kisꞌendasòn ya̱ na̱xi̱.

26 To̱nga to̱ꞌya‑ni xi nchrꞌoé én xi tìnchjà kꞌoa̱ tsì síkitjosòn,

ya̱a singósòn‑koa̱ jngo chjo̱ta̱ chi̱nì,

xi ya̱ jin tsomì tsakꞌénda ndꞌia‑le̱;

27 kꞌoa̱ tsakꞌa jtsí,

kꞌoa̱ koan‑nꞌión xo̱ngá nandá xi tsakꞌétꞌa‑le̱ ndꞌia,

kꞌoa̱ jaꞌa ntjao̱‑nꞌión xi kisitìnya‑le̱,

kꞌoa̱ nꞌión tsakꞌétꞌa‑le̱;

kꞌoa̱ chixòya ndꞌia,

kꞌoa̱ nꞌión tse kjoa̱xkón jaꞌainè‑le̱».

28 Kꞌia̱ nga je kinchja̱ Jesús ngayije én jè‑bi̱,

to̱kꞌoa̱a koan‑le̱ ngatsꞌi chjo̱ta̱ xi tꞌatsꞌe̱ josꞌìn nga bakóya;

29 nga̱ kao̱o kjoa̱téxoma bakóya‑le̱,

lìtsà to̱ kꞌoa̱jìn‑sꞌìn josꞌìn bakóya chjo̱ta̱ xi kji kjoa̱téxoma‑le̱ Niná xi kiski Moisés.