Jesús kisichatꞌa‑le̱ jé‑le̱ chjo̱ta̱ xi kjiyá yao‑le̱
9
Kꞌoa̱ kꞌia̱ jaꞌasꞌen Jesús ya̱ chitso kao̱ chjo̱ta̱ xi ya̱ kòtꞌayàtꞌa‑le̱,
jaꞌato ya̱ xingoa‑nile̱ ndáchikon kꞌoa̱ jaꞌai ya̱ na̱xi̱nandá‑nꞌión Capernaum,
jña tsakꞌèjna‑ni.
2 Kꞌoa̱ koan nga ya̱ kichòchanìtꞌa jngo‑le̱ chjo̱ta̱ xi to̱ kjiyá yao‑le̱,
xi na̱chanyá kijnasòn;
kꞌia̱ nga tsabe Jesús kjoa̱makjaín‑le̱ chjo̱ta̱ xi kjiyá yao‑le̱ kao̱ tsꞌe̱ chjo̱ta̱ xi yꞌangꞌangi,
kitsò‑le̱ chjo̱ta̱ xi kjiyá yao‑le̱:
—Ji ꞌndí mìyo̱,
nꞌión tꞌiai̱n tokoìn;
jeè kàsichàtꞌa‑lè jé‑li̱.
3 Kꞌoa̱ to̱ i̱i koan jè chjo̱ta̱ xi kji kjoa̱téxoma‑le̱ Niná xi kiski Moisés kitsò kꞌa ya̱ jin kjoa̱faꞌaitsjen‑le̱:
«Niná tínchja̱ꞌaon‑le̱ chjo̱ta̱ xo̱kji».
4 Kꞌoa̱ Jesús tsabe jè kjoa̱faꞌaitsjen‑le̱ chjo̱ta̱ xi kji kjoa̱téxoma‑le̱ Niná xi kiski Moisés,
kitsò:
—Án‑ni nga chꞌao sꞌìn nìkjaꞌaitsjen‑nio ya̱ jin ni̱ma̱‑no.
5 Nga̱ jñá‑nile̱ xi ngìsa̱ choa ñꞌain tjín,
a koiì nga koixoán:
“Jeè kàchatꞌa‑lì jé‑li̱,”
axo̱ koiì nga koixoán:
“Ti̱sótjai̱n kꞌoa̱ ti̱tómjain”.
6 To̱nga jmé‑ni nga kàtaꞌya‑nio nga jè ꞌNdí‑le̱ Chjo̱ta̱ tjín‑le̱ nganꞌión i̱ soꞌnde nga síchatꞌa jé‑le̱ chjo̱ta̱.
Kꞌia̱ Jesús kitsò‑le̱ jè chjo̱ta̱ xi kjiyá yao‑le̱:
—Ti̱sótjai̱n,
chjoaí na̱chanyá‑li̱,
kꞌoa̱ tꞌin‑ni ndꞌia‑li̱.
7 Kꞌia̱ tsakisótje̱n jè chjo̱ta̱ xi kjiyá yao‑le̱ kꞌoa̱ ki‑ni ndꞌia‑le̱.
8 Kꞌoa̱ kꞌia̱ nga tsabe chjo̱ta̱‑nkjìn nga tsakisótje̱n chjo̱ta̱ xi kjiya yao‑le̱,
to̱kꞌoa̱a koan‑le̱ kꞌoa̱ tsakꞌasjejeya Niná,
nga kꞌoa̱ síkji nganꞌión kitsjoa‑le̱ chjo̱ta̱.
Kꞌia̱ nga Jesús kinchja̱‑le̱ Mateo
9 Kꞌia̱ nga Jesús tífì‑ni ya̱,
tsabe jngo chjo̱ta̱ xi Mateo ꞌmì,
xi tíjnatꞌa yámìxa̱ nga tísíkꞌéchjí tao̱n xi machjí‑le̱ chjo̱ta̱xá títjòn‑le̱ Roma,
kꞌoa̱ Jesús kitsò‑le̱:
«Nchroátje̱n‑ngi‑naí».
Kꞌoa̱ tsakasèn‑ndo,
kꞌoa̱ kitje̱n‑ngi‑le̱ Jesús.
10 Kꞌoa̱koan kꞌia̱ nga Jesús tíjnatꞌa ya̱ yámìxa̱ ya̱ ndꞌia‑le̱ Mateo,
kꞌoa̱ nꞌión nkjìn chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ chjo̱ta̱jé xi jaꞌai,
ya̱ tsakatiòtꞌakao̱ yámìxa̱ Jesús kao̱ chjo̱ta̱ xi ya̱ kòtꞌayàtꞌa‑le̱.
11 Kꞌia̱ nga tsabe kjoa̱ jè chjo̱ta̱ fariseo,
kitsò‑le̱ chjo̱ta̱ xi ya̱ kòtꞌayàtꞌa‑le̱ Jesús:
—Án‑ni nga jè xi bakóya‑no ya̱ kjèn‑kao̱‑ni jè chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kꞌoa̱ kao̱ chjo̱ta̱jé.
12 Kꞌia̱ nga kinchrꞌoé Jesús én xo̱ tsò,
kitsò‑le̱:
—Jè chjo̱ta̱ xi tsìn‑le̱ chꞌin lìtsà chji̱ne̱xki‑jìn machjén‑le̱,
to̱ jé xi chꞌin tjín‑le̱ xi chji̱ne̱xki machjén‑le̱.
13 Tangión‑ni kꞌoa̱ chótꞌayaò jmè xi tsòya‑ni én xi tsò:
“Kjoa̱ma̱tokòn xi me‑na,
lìtsà koi‑jìn nga cho̱ si̱kꞌen‑naó xi kꞌoai̱tꞌa‑naó”.a
Nga̱ an,
lìtsà chjo̱ta̱ kìxi̱‑jìn xi jàꞌai̱ nchjà‑le̱,
to̱sa̱a jè chjo̱ta̱jé jmé‑ni nga kàtasíkꞌantjaìya‑ni kjoa̱faꞌaitsjen‑le̱.
Kjoa̱bijnanchjan xi tꞌatsꞌe̱ Niná
14 Kꞌia̱ jaꞌaikòn‑le̱ Jesús jè chjo̱ta̱ xi ya̱ kòtꞌayàtꞌa‑le̱ Juan,
kꞌoa̱ kitsò‑le̱:
—Ji̱n‑ji̱n kao̱ chjo̱ta̱ fariseo nꞌión nkjìn kꞌa biyonchjain‑ji̱n xi tꞌatsꞌe̱ Niná,
kꞌoa̱ án‑ni nga jè chjo̱ta̱ xi ji kòtꞌayàtꞌa‑lì lìkoi batiònchjan‑ni xi tꞌatsꞌe̱ Niná.
15 Jesús kitsò‑le̱:
—A koa̱an nga kjoa̱ba sꞌe̱‑le̱ chjo̱ta̱ xi ya̱ tjió jña tjín xi tíbixan kꞌia̱ nga sꞌa̱ ya̱ tíjnakao̱ jè xꞌi̱n xi tíbixan.
To̱nga kjoa̱ꞌaí ni̱chrjin nga tjóꞌa‑le̱ jè xꞌi̱n xi tíbixan,
kꞌoa̱ kꞌia̱a koa̱tiònchjan xi tꞌatsꞌe̱ Niná.
16 »Ni̱ꞌya‑jìn xi najño chjo̱tse̱ bꞌéjchro‑ni jè najño jchá;
nga̱ jè najño chjo̱tse̱ kjoai̱ꞌaíxkó kꞌoa̱ koa̱sènjnda jè najño jchá,
kꞌoa̱ jè najño jchá ngìsa̱a ti̱ tse xíjndà ngá‑ni.
17 Kꞌoa̱ jè ndá totseè xi sꞌa̱ chjo̱tse̱ lìkoi ma ya̱ sꞌeya chrjoa̱ jchá‑le̱ cho̱;
nga̱ jè chrjoa̱ jchá xíjndà,
kꞌoa̱ jè ndá totseè xíjten,
kꞌoa̱ jè chrjoa̱ to̱ koi̱tsón‑ni;
to̱nga jè ndá totseè chjo̱tse̱ chrjoa̱ chjo̱tse̱e sꞌeya,
kꞌoa̱ jè ndá totseè kao̱ jè chrjoa̱ nꞌión tse ma‑le̱.
Tsòti xi jaꞌáya‑le̱ kao̱ chjo̱on xi kisìkao̱ najño‑le̱ Jesús
18 Kꞌia̱ nga Jesús tínchja̱ én jè,
to̱ i̱i koan jngo chjo̱ta̱ títjòn‑le̱ chjo̱ta̱ judío jaꞌai kꞌoa̱ tsakajnajten‑tꞌa nangi ya̱ ngi ndso̱ko̱ Jesús,
kitsò‑le̱:
—Jè ꞌndí tsòti‑na̱ sꞌa̱ kjoàn je kꞌen;
to̱nga nchroaí,
kꞌoa̱ tjanè‑lai̱ ndsai̱,
kꞌoa̱ kꞌoéjnakon‑ní.
19 Kꞌoa̱ tsitjo ndꞌia Jesús,
kao̱ chjo̱ta̱ xi ya̱ kòtꞌayàtꞌa‑le̱ kꞌoa̱ kikao̱ chjo̱ta̱ títjòn.
20‑21 Kꞌoa̱ to̱ i̱i koan jngo chjo̱on xi tímꞌen,
xi je tejaò nó nga njín tíxìjten‑le̱,
xi kitsò kjoa̱faꞌaitsjen‑le̱:
«Ni̱nga to̱koi najño xi tíjnajté sikoa̱,
koìtjo̱ntjaì‑nià».
Kꞌoa̱ jaꞌai kasèn‑tꞌa chrian‑le̱ ya̱ jto̱n yátsꞌi̱n kꞌoa̱ kisikao̱ ya̱ tjòn najño‑le̱ Jesús.
22 To̱nga Jesús,
kisikꞌófaya kꞌoa̱ kiskòtsen‑le̱,
kitsò:
—ꞌNdí chjo̱on,
nꞌión tꞌiai̱n tokoìn,
jé kjoa̱makjaín‑li̱ kàbꞌasjentjaì‑lì.
Kꞌoa̱ jè chjo̱on ti̱ꞌa kꞌia̱a kitjontjaì‑ni.
23 Kꞌia̱ nga jaꞌasꞌen Jesús ya̱ ndꞌia‑le̱ chjo̱ta̱ títjòn‑le̱ chjo̱ta̱ judío,
tsabe chjo̱ta̱ xi tjiósíkjane‑tꞌain kꞌen,
kꞌoa̱ chjo̱ta̱ xi nꞌión tjióbꞌéjta,
24 kitsò‑le̱:
—Ti̱nchaxiòn,
nga̱ jè tsòti lìtsà kijnakꞌen‑jìn to̱ tíkijnafè‑ní.
Kꞌoa̱ ngatsꞌi chjo̱ta̱ to̱ tsakijnòkeè Jesús.
25 To̱nga kꞌia̱ nga je tsakichonsje jè chjo̱ta̱ ya̱ nditsin,
jaꞌasꞌen Jesús kꞌoa̱ kiskoé ntsja tsòti,
kꞌoa̱ jè tsòti tsakisótje̱n‑ni.
26 Kꞌoa̱ tsangabasòn én ngakijndà ꞌnde tꞌatsꞌe̱ jè kjoa̱ xi kisꞌin Jesús.
Jaò chjo̱ta̱ xi xka̱ kjoan kisindaya Jesús
27 Kꞌia̱ nga je kitjo‑ni ya̱ Jesús,
jaò chjo̱ta̱ xi xka̱ kjoan kitje̱n‑ngi‑le̱,
xi kiskiꞌndiáxá kꞌoa̱ i̱ kitsò:
—¡Jcha̱ma̱tokòn‑naíji̱n ji xi ntje̱‑le̱ David tje̱n‑ni!
28 Kꞌia̱ nga jaꞌasꞌen Jesús ya̱ ndꞌia,
jaꞌaikòn‑le̱ jè chjo̱ta̱ xi xka̱ kjoan;
kꞌoa̱ Jesús kitsò‑le̱:
—A makjaín‑no nga koa̱n‑na nga kꞌoa̱sꞌian jè‑bi̱.
Jè chjo̱ta̱ xka̱ kitsò:
—Jaon Nai,
makjaín‑naji̱n.
29 Kꞌia̱ Jesús kisikao̱ xko̱n chjo̱ta̱ xka̱,
kitsò‑le̱:
—Josꞌìn nga makjaín‑no kꞌoa̱sꞌìn kàtamatꞌaon.
30 Kꞌoa̱ jè xko̱n chjo̱ta̱ xo̱kjoan koan‑nda kꞌoa̱ koan‑tsen‑le̱.
Kꞌoa̱ Jesús nꞌión tsakꞌénè‑le̱,
kitsò‑le̱:
—A ꞌya‑niò jme‑ni,
ni̱ꞌya‑jìn xi kàtasꞌejin‑le̱.
31 To̱nga kꞌia̱ nga kitjo,
ti̱ꞌa kiskanìsòn‑ni én ngakijndà ꞌnde xi tꞌatsꞌe̱ Jesús.
Jesús kisindaya jngo chjo̱ta̱ xi to̱ tíjna cha̱sín
32 Kꞌia̱ nga tjióbitjo‑ni jè chjo̱ta̱ xi koan‑nda xko̱n,
kjoan jaꞌai chanìtꞌa‑le̱ Jesús jngo chjo̱ta̱ xi tsì ma nchja̱,
nga sén ni̱chrjin xi tsꞌe̱ nai̱i tíjnajin‑le̱.
33 Kꞌia̱ Jesús tsakꞌaonsjejin jè sén ni̱chrjin xi tsꞌe̱ nai̱i,
kꞌoa̱ jè chjo̱ta̱ xi to̱ tíjna cha̱sín koaàn kinchja̱‑ni;
kꞌoa̱ ngatsꞌi chjo̱ta̱ to̱kꞌoa̱a koan‑le̱,
kꞌoa̱ kitsò:
—Ni̱sakꞌiajìn‑là ꞌya‑le̱ i̱ nangi Israel jè kjoa̱ xi kꞌoa̱ma.
34 To̱nga jè chjo̱ta̱ fariseo kitsò:
—Kao̱o nganꞌión‑le̱ ngajko̱‑le̱ sén ni̱chrjin xi tsꞌe̱ nai̱i mꞌaosjejin‑ni jè sén ni̱chrjin xi tsꞌe̱ nai̱i.
Nꞌión nkjìn tsojmì kjimajchá ya̱ jin tsojmìntjè
35 Tsakꞌamjen Jesús ngakijndà na̱xi̱nandá‑nꞌión kao̱ ya̱ na̱xi̱nandá‑ꞌndí,
bakóya jña‑ni tjió ndꞌia jña maxkia̱ xo̱n‑le̱ Niná,
kꞌoa̱ nchja̱ya jè én nda xi tꞌatsꞌe̱ jña batéxoma xi tíjna ngꞌajmi,
kꞌoa̱ síndaya ngatsꞌi chjo̱ta̱ xi chꞌin tjín‑le̱,
kꞌoa̱ faꞌáxìn‑le̱ ngayije kjoa̱ñꞌain xi tjiófaꞌá.
36 Kꞌoa̱ kꞌia̱ nga tsabe chjo̱ta̱‑nkjìn,
koanma̱ke;
nga kjoa̱ñꞌain tjiófaꞌá,
kꞌoa̱ to̱ tjióma tsaobaà,
joni tsà barrè xi tsìn‑le̱ xi koꞌnda.b
37 Kꞌia̱ kitsò‑le̱ jè chjo̱ta̱ xi ya̱ kòtꞌayàtꞌa‑le̱: