4 Juan kiskanìsꞌen‑ngindá chjo̱ta̱ ya̱ ꞌnde tꞌaxìn‑tꞌa,

kꞌoa̱ kinchja̱ya tꞌatsꞌe̱ kjoa̱chanìsꞌen‑ngindá.

Jè chjo̱ta̱ kisikitjosòn nga tsakakó nga je kisikꞌantjaíya kjoa̱faꞌaitsjen‑le̱, kꞌia̱ nga kinìchatꞌa‑le̱ jé‑le̱.

5 Kꞌoa̱ kitjonchrꞌoè ngatsꞌi chjo̱ta̱ na̱xi̱nandá xi ya̱ tsꞌe̱ ꞌnde Judea,

kao̱ ngatsꞌi chjo̱ta̱ xi ya̱ tsꞌe̱ na̱xi̱nandá Jerusalén;

kꞌoa̱ ngatsꞌi chjo̱ta̱ xi kitsòya jé‑le̱,

Juan kiskanìsꞌen‑ngindá ya̱ xo̱ngá nandá Jordán.

6 Kꞌoa̱ Juan yꞌakjá najño xi ntsja̱‑le̱ cho̱ camello koan‑nda‑ni,

kꞌoa̱ jngo chrjoa̱xín tjíkjá kjándiá‑le̱;^c

kꞌoa̱ cho̱ba̱ kiski‑ne kao̱ ntsjén‑le̱ cho̱ ntsjén xi tjín ya̱ ngijñá.

7 Kꞌoa̱ i̱ kitsò nga kinchja̱ya:

«Sꞌa̱a nchroá jngo xi ngìsa̱ tse nganꞌión tjín‑le̱ ti̱kꞌoa̱‑ni an,

kꞌoa̱ saꞌnda lìkoi bakìn‑na nga an skojndá jténꞌó‑le̱.

8 An xi kjoa̱kìxi̱ to̱ nandá kiskanìsꞌèn‑ngindá‑no;

to̱nga jè kao̱o Sén Ni̱chrjin Tsje kꞌoe̱ejtsanèni‑no».

9 Kꞌoa̱koan nga koi ni̱chrjin,

Jesús jaꞌai‑ni ya̱ na̱xi̱nandá‑nꞌión Nazaret xi ya̱ ꞌnde Galilea nchja̱‑ni, kꞌoa̱ jè Juan kiskanìsꞌen‑ngindá Jesús ya̱ xo̱ngá nandá Jordán.

10 Kꞌoa̱ nga je koan,

kꞌia̱ nga Jesús tibitjojin‑ni nandá,

tsabe nga kitjoꞌaì ngꞌajmi kꞌoa̱ jè Sén Ni̱chrjin Tsje jo ni̱se chroa kji nga jaꞌaijen‑nè‑le̱.

11 Kꞌoa̱ jngo jta̱ kinòꞌyà‑le̱ xi ya̱ ngꞌajmi kinchroa‑ni,

xi kitsò:

«Ji‑ní ꞌNdí‑na̱,

nꞌión tsjoake̱‑lè; jo nda sꞌe koan xi tꞌatsi̱».

12 Kꞌoa̱ xi je koan, jè Sén Ni̱chrjin Tsje kikao̱ Jesús ya̱ ꞌnde tꞌaxìn‑tꞌa.

13 Kꞌoa̱ ñachàn ni̱chrjin tsakꞌèjna ya̱ ꞌnde tꞌaxìn‑tꞌa,

kꞌoa̱ jè nai̱i ya̱ kiskòtꞌayàkao̱,

kꞌoa̱ ya̱ tsakꞌèjnajin‑le̱ cho̱ tsꞌe̱n;

kꞌoa̱ jè cho̱ꞌnda ngꞌajmi jaꞌai sísin‑le̱.

14 Kꞌia̱ nga je kichanì ndo̱yá Juan,

Jesús jaꞌai ya̱ ꞌnde Galilea nga kinchja̱ya jè én nda xi tꞌatsꞌe̱ jña batéxoma Niná,

15 kitsò:

«Jè ni̱chrjin jeè kitjosòn,

kꞌoa̱ jeè nchroá machrian ni̱chrjin nga kjoa̱ꞌaí kàtéxoma Niná;^d

ti̱kꞌantjaìyao kjoa̱faꞌaitsjen‑no,

kꞌoa̱ kàtamakjaín‑no én nda».

16 Kꞌia̱ nga Jesús tsòꞌba ya̱ ndai ndáchikon xi ꞌnde Galilea nchja̱‑ni,

tsabe Simón kao̱ Andrés jè ndsꞌe̱,

nga tjiósíkꞌatje̱njin na̱ꞌya‑le̱ ya̱ ndáchikon;

nga̱ jti̱i ma‑le̱ tsoa.

17 Kꞌoa̱ Jesús kitsò‑le̱:

—Nchroá tje̱n‑ngi‑naó,

kꞌoa̱ an kꞌoa̱sian nga koa̱n‑no kꞌoéxkó chjo̱ta̱ xi tsꞌa̱n koa̱n, jo nìkao̱ jti̱ nga ndoa.

18 Kꞌoa̱ Simón kao̱ Andrés kjitꞌa nangi kisikatió na̱ꞌya‑le̱ kꞌoa̱ kitje̱n‑ngi‑le̱ Jesús.

19 Kꞌia̱ nga tjiófì,

Jesús tsabe Jacobo kao̱ Juan xi ndsꞌe̱ faó,

xi xti‑le̱ Zebedeo,

xi kꞌoa̱ti̱ ya̱ tjióyà chitso nga tjióbꞌéjchro na̱ꞌya‑le̱;

20 Kꞌoa̱ kjoan kinchja̱‑le̱ ngajaò jmé‑ni nga kàtafìtje̱n‑ngini‑le̱;

kꞌoa̱ kisikatió Zebedeo nꞌai‑le̱ kao̱ cho̱ꞌnda‑le̱ ya̱ ya chitso kꞌoa̱ kitje̱n‑ngi‑le̱ Jesús ngajaò.

21 Kꞌoa̱ kichò Jesús ya̱ na̱xi̱nandá‑nꞌión Capernaum;

kꞌoa̱ xki̱ xotò,

ni̱chrjin nga bexkón Niná chjo̱ta̱ judío,

faꞌasꞌen ya̱ ndꞌia jña maxkia̱ xo̱n‑le̱ Niná kꞌoa̱ bakóya.

22 Kꞌoa̱ to̱ maxkón‑le̱ ngatsꞌi chjo̱ta̱ xi tꞌatsꞌe̱ josꞌìn bakóya;

nga̱ kao̱o kjoa̱téxoma bakóya‑nile̱ lìtsà to̱ kꞌoa̱‑jìn sꞌìn joni jè chjo̱ta̱ xi kji kjoa̱téxoma‑le̱ Niná xi kiski Moisés.

23 Kꞌoa̱ to̱ i̱i koan,

nꞌión kiskiꞌndiáxá jngo chjo̱ta̱ xi sén ni̱chrjin xi tsì nda tíjnajin‑le̱, xi ya̱ tíjna ya̱ ndꞌia jña maxkia̱ xo̱n‑le̱ Niná,

24 kitsò:

—Jmé xi tjín‑lì xi tꞌatsai̱n‑ji̱n,

ji Jesús xi Nazaret tsi̱;

a kàfàꞌai̱ nìkjesòn‑naíji̱n,

an ꞌbeè‑lè ꞌya‑ni ji,

ji‑ní xi Nꞌión Xkón Tijnai xi tsꞌe̱ Niná.

25 To̱nga Jesús kinchja̱tikao̱,

kitsò‑le̱:

—Jyò ti̱jnai,

kꞌoa̱ tìtjo̱jin‑lai̱ chjo̱ta̱ xo̱kji.

26 Kꞌoa̱ jè sén ni̱chrjin xi tsì nda kao̱ kjoa̱tsꞌe̱n tsakꞌétsaojne jè chjo̱ta̱ xo̱kji kꞌoa̱ kiskiꞌndiáxá,

kꞌoa̱ kꞌia̱ jè sén ni̱chrjin kitjojin‑le̱ jè chjo̱ta̱.

27 Kꞌoa̱ ngatsꞌi chjo̱ta̱ to̱ koanxkón‑le̱,

kꞌoa̱ saꞌnda tsakjaótiya‑ni,

kitsò:

«Jmé kjoa̱‑ni jè‑bi̱.

Jmé kjoa̱chòtꞌayà chjo̱tse̱‑ni jè,

nga kao̱o kjoa̱téxoma bꞌénè‑le̱ saꞌnda jè sén ni̱chrjin xi tsì nda kꞌoa̱ síkitjosòn‑le̱».

28 Kꞌoa̱ jngotjò kisòn‑ni én xi tꞌatsꞌe̱ Jesús ya̱ jngotjondai‑le̱ ꞌnde Galilea.

29 Kꞌia̱ nga Jesús kitjo‑ni ya̱ ndꞌia jña maxkia̱ xo̱n‑le̱ Niná,

tje̱n‑kao̱ Andrés,

Jacobo kao̱ Juan, jaꞌai ya̱ ndꞌia‑le̱ Simón

30 Kꞌoa̱ jè na̱chá‑le̱ Simón tíkijna nga chꞌin‑ndꞌai̱ kjima‑le̱;

kꞌoa̱ kjoan tsakꞌìnya‑le̱ Jesús nga chꞌin tjín‑le̱.

31 Kꞌoa̱ kꞌia̱ Jesús tsakasèn‑tꞌachrian‑le̱,

kiskoé ntsja kꞌoa̱ kisikisótje̱n;

kꞌoa̱ ti̱ꞌa kitjoxìn‑nile̱ chꞌin‑ndꞌai̱.

Kꞌia̱ jè chjo̱on kisisin‑le̱ ngatsꞌi.

32 Kꞌia̱ nga je kiskantjaì jè tsꞌoí nga je koan‑njiòn,

jè chjo̱ta̱ jaꞌaikao̱‑le̱ Jesús ngatsꞌi xi chꞌin tjín‑le̱,

kao̱ chjo̱ta̱ xi sén ni̱chrjin xi tsꞌe̱ nai̱i tjiójin‑le̱;

33 kꞌoa̱ chjo̱ta̱ xi ya̱ tsꞌe̱ na̱xi̱nandá‑nꞌión ñaki jngokꞌà koanxkó ngatsꞌi ya̱ jchro xo̱ntjoa̱.

34 Kꞌoa̱ nꞌión nkjìn chjo̱ta̱ xi nkjìn jko̱ya chꞌin tjín‑le̱ kisindaya,

kꞌoa̱ nꞌión nkjìn sén ni̱chrjin xi tsꞌe̱ nai̱i tsakꞌaonsjejin;

to̱nga Jesús lìkoi kitsjoaꞌndè‑le̱ nga kinchja̱ jè sén ni̱chrjin xi tsꞌe̱ nai̱i,

nga̱ beè ꞌya‑ni jè.

35 Nꞌión ta̱njiòn tsakisótje̱n Jesús,

sꞌa̱a njiònya sa nga ki ya̱ ꞌnde tꞌaxìn‑tꞌa,

kꞌoa̱ ya̱ fákao̱ Niná.

36 Kꞌia̱ Simón kao̱ xi ya̱ ñatje̱n tjió tsakásjai Jesús;

37 kꞌia̱ nga koansjai‑le̱ jña tíjna,

kitsò‑le̱:

—Ngatsꞌi chjo̱ta̱ tjióbásjai‑lì.

38 Kꞌia̱ Jesús kitsò‑le̱:

—Tjián ya̱ na̱xi̱nandá jña nga chrian‑tꞌa,

jmé‑ni nga kꞌoa̱ti̱ koinchjàya‑nia ya̱;

nga̱ koiì xá jàꞌai̱‑nia.

39 Kꞌoa̱ kinchja̱ya ngakijndà ya̱ jña‑ni nga tjió ndꞌia jña maxkia̱ xo̱n‑le̱ Niná,

ngakijndà ꞌnde Galilea,

kꞌoa̱ tsakꞌaonsjejìn sén ni̱chrjin xi tsꞌe̱ nai̱i.

40 Jngo chjo̱ta̱ xi jtsé biꞌndojon kji,

jaꞌaikòn‑le̱ Jesús,

tsakꞌétsꞌoa‑le̱;

kꞌoa̱ tsakasènxkónchꞌin ya̱ ngi ndso̱ko̱,

kitsò‑le̱:

—Tsà me‑lì tꞌiai̱n kjoa̱nda, ti̱ndaya‑naí.

41 Kꞌoa̱ Jesús koanma̱ke,

tsakjén ntsja kꞌoa̱ kisikao̱,

kitsò‑le̱:

—Jaon,

meè‑na katamandayaì.

42 Kꞌia̱ nga je kinchja̱ Jesús,

ti̱ꞌa kitjoxìni‑le̱ jtsé biꞌndojon,

kꞌoa̱ koan‑ndaya.

43 Kꞌia̱ nga to̱ je tífì‑ni nꞌión tsakꞌétꞌain‑le̱,

44 kꞌoa̱ kitsò‑le̱:

—Alì ꞌya‑jìn xi ꞌmìya‑lai̱,

to̱sa tꞌin,

ta̱kò‑lai̱ yao‑li̱ na̱ꞌmi,

kꞌoa̱ tꞌaìtꞌa‑jìn jme xi bꞌénè jè kjoa̱téxoma‑le̱ Niná xi kiski Moisés xi tꞌatsꞌe̱ nga je kàmatsje‑jìn,

jmé‑ni nga kàtabe‑ni ngatsꞌi na̱ꞌmi nga je kàmatsjai.

45 To̱nga kꞌia̱ nga tífì,

jè chjo̱ta̱ xi koan-tsjejòn ti̱ꞌa kꞌia̱a tsakꞌétsꞌia̱kao̱‑ni nga i̱ nga ján kitsòya kꞌoa̱ kiskanìsòn én tꞌatsꞌe̱ jme xi koan‑tꞌain,

kꞌoa̱ Jesús ni̱jngo‑jìn na̱xi̱nandá ti̱ koan to̱xkia̱ jaꞌasꞌen‑ni,

kꞌoa̱ to̱ ya̱a ꞌnde tꞌaxìn‑tꞌa tsakꞌèjna;

kꞌoa̱ ya̱a faꞌaikòn‑le̱ ngatsꞌi chjo̱ta̱ xi nchroá‑ni ngakijndà ꞌnde.