3 »Tangión;

koe̱e‑ni,

an tìsikasén‑no joni tsà barrè ꞌndí ya̱ jin‑le̱ tse̱en.

4 Alì chrjoa̱ tao̱n‑jìn,

lì xijtsa‑jìn,

ni̱ jténꞌó‑jìn chꞌaò;

kꞌoa̱ alì ꞌya‑jìn xi nìtìꞌndao ya̱ yandia̱a.

5 To̱jña‑nile̱ ndꞌia xi koi̱tjásꞌao̱on,

títjòn i̱ tꞌìn‑lao̱o:

“Kjoa̱nchꞌán kàtasꞌe i̱ ndꞌia xo̱kji”.

6 Kꞌoa̱ tsà ya̱ tíjna jngo chjo̱ta̱ xi nchꞌán tísíjchá yao‑le̱,

ya̱a kꞌoéjnakao̱ kjoa̱nchꞌán‑no;

kꞌoa̱ tsà mai,

jè kjoa̱nchꞌán‑no ya̱a kꞌoéjnakao̱‑no.

7 Kꞌoa̱ ya̱ ti̱yo ndꞌia xo̱kji,

ti̱cho kꞌoa̱ tꞌio̱o jme xi kꞌoai̱‑no;

nga̱ jè cho̱ꞌnda xi síxá bakìn‑le̱ nga bꞌaì‑le̱ chjí‑le̱.

Alì xki̱ ndꞌia‑jìn mangión.

8 »To̱jña‑nile̱ na̱xi̱nandá‑nꞌión xi koi̱tjásꞌao̱on,

kꞌoa̱ xi skoétjaò‑no,

chi̱nao̱o to̱jme‑ni xi kꞌoai̱‑no;

9 kꞌoa̱ ti̱ndayao jè xi chꞌin tjín‑le̱ xi ya̱ tjió,

kꞌoa̱tꞌìn‑lao̱o:

“Jeè tíjnatꞌachrian‑no ni̱chrjin nga Niná koa̱tèxoma‑no”.

10 To̱nga to̱jña‑nile̱ na̱xi̱nandá‑nꞌión xi koi̱tjásꞌao̱on,

kꞌoa̱ tsà tsì skoétjaò‑no,

kꞌia̱ nga je tibìtjo̱‑nio ya̱ jin na̱xi̱nandá‑nꞌión,

ya̱ ndia̱a‑le̱ i̱ tixón:

11 “Saꞌnda jè chaoꞌnde‑le̱ na̱xi̱nandá‑nꞌión‑no xi kàbajon ndso̱koi‑ji̱n i̱i bꞌètsaojnejòn‑laìji̱n.

To̱nga koi jè xi kàtasꞌejin‑no,

jeè tíjnatꞌachrian‑no ni̱chrjin nga Niná koa̱tèxoma‑no”.

12 Kꞌoa̱ kꞌoa̱axin‑no,

kꞌia̱ nga koi̱chò ni̱chrjin nga Niná si̱ijtsòꞌa chjo̱ta̱,

ngìsa̱a choa kjoa̱ñꞌain kꞌoai̱‑le̱ na̱xi̱nandá‑nꞌión Sodoma^a ti̱kꞌoa̱‑ni na̱xi̱nandá‑nꞌión xo̱kji.

13 »Ma̱xó‑nilao̱o yao‑no,

jòn chjo̱ta̱ xi na̱xi̱nandá‑nꞌión Corazín tsao̱on.

Ma̱xó‑nilao̱o yao‑no,

jòn chjo̱ta̱ xi na̱xi̱nandá‑nꞌión Betsaida tsao̱on,

nga̱ tsà ya̱‑làni ꞌnde Tiro kao̱ ya̱ ꞌnde Sidón^b nga kꞌoa̱koan jè kjoa̱xkón xi kjima i̱ tsao̱on,

jeè‑la̱ kjoatse tsakꞌakjá najño naxá kꞌoa̱ tsakꞌéjtenjòn‑la̱ chao‑lꞌí yao‑le̱,

nga kisikꞌantjaìya kjoa̱faꞌaitsjen‑le̱.

14 Koiì kjoa̱,

kꞌia̱ nga Niná si̱ijtsòꞌa ngatsꞌi chjo̱ta̱,

ngìsa̱a choa kjoa̱ñꞌain kꞌoai̱‑le̱ chjo̱ta̱ xi ya̱ tsꞌe̱ Tiro kao̱ Sidón,

ti̱kꞌoa̱‑ni jòn.

15 Kꞌoa̱ jòn chjo̱ta̱ na̱xi̱nandá‑nꞌión Capernaum,

xi saꞌnda ngꞌajmi ján kinìkingꞌa‑no,

ya̱a saꞌnda ꞌnde kjoa̱ñꞌain koi̱choje̱n‑ngi‑no.^c

16 »Jè xi jòn bincháñon‑no,

aàn xi bincháñon‑na;

kꞌoa̱ jè xi jòn bꞌasjengi‑no,

aàn xi bꞌasjengi‑na;

kꞌoa̱ jè xi an bꞌasjengi‑na,

jé xi kisikasén‑na bꞌasjengi».

17 Kꞌia̱ nga jaꞌai‑ni jè xi jàn‑kan kao̱ te,

nꞌión tsjoa tjió‑le̱,

kitsò:

—Nai,

xi kao̱ nganꞌión‑le̱ jaꞌaín‑li̱,

saꞌnda je sén ni̱chrjin xi tsꞌe̱ nai̱i síkitjosòn‑naji̱n.

18 Kꞌoa̱ Jesús kitsò‑le̱:

—An,

tsabe‑niá jè nai̱i nga kiskajen‑ngi‑ni ya̱ ngꞌajmi joni jngo lꞌí chꞌao̱n.

19 Kꞌoa̱ ndꞌai̱,

an tsjoa‑no nganꞌión nga koi̱ncha‑naò ye̱ kao̱ cho̱ naꞌyá,

kꞌoa̱ nga si̱kixòyao ngayije xá‑le̱ nai̱i,

kꞌoa̱ nìjme xi si̱ikìꞌaon‑no.

20 To̱nga alì koi‑jìn matsjoa‑nino nga jè sén ni̱chrjin xi tsꞌe̱ nai̱i síkitjosòn‑no,

to̱saà koi xi kàtamatsjoa‑nino nga jè jaꞌaín‑no je ya̱ tjítꞌa xo̱n ya̱ ngꞌajmi.

21 Nga ti̱koi‑ni choa̱,

jè Sén Ni̱chrjin Tsje nꞌión tse kjoa̱tsjoa kitsjoa‑le̱ Jesús,

kꞌia̱ kitsò Jesús:

«Bꞌasjèjeya‑lè an,

Nꞌai,

Nai‑le̱ ngꞌajmi kao̱ soꞌnde,

nga̱ tsakꞌèꞌma‑lai̱ ngayije kjoa̱ xo̱kjoan chjo̱ta̱ xi tjín‑le̱ kjoa̱nkjìn‑tokòn kao̱ chjo̱ta̱ xi macho̱ya‑le̱,

kꞌoa̱ jè xi to̱xkia̱ chjo̱ta̱ tsakakò‑lai̱.

Jaon Nꞌai,

nga̱ kꞌoa̱asꞌìn nda kisꞌe‑lì.

22 »Ngayije jme xi tjín jé Nꞌai‑na̱ kisintsja‑na;

kꞌoa̱ lìꞌya‑jìn xi be ꞌyá‑ni jè ꞌNdí,

to̱ jé Nꞌai;

kꞌoa̱ lìꞌya‑jìn xi be ꞌyá‑ni jè Nꞌai,

to̱ jé ꞌNdí,

kꞌoa̱ati̱ koa̱n‑cho̱ya‑le̱ ꞌyá‑ni jè Nꞌai,

ꞌya‑ni xi jè ꞌNdí skoéjin nga koa̱n‑cho̱ya‑le̱».

23 Kꞌia̱ Jesús kisikꞌófayatꞌa‑le̱ chjo̱ta̱ xi ya̱ kòtꞌayàtꞌa‑le̱ nga tsakjákao̱tꞌaxìn,

kitsò‑le̱:

«Jó to̱nda‑le̱ ya̱ ngixko̱n Niná jè xi tjióbe jme xi tiꞌyao jòn;

24 nga̱ kꞌoa̱a xin‑no nga nkjìn chjo̱ta̱ xi kinchja̱ya ngajao‑le̱ Niná kꞌoa̱ nkjìn chjo̱ta̱xá ngajko̱ xi koanme‑le̱ nga tsabe jme xi tiꞌyao jòn,

kꞌoa̱ lìkoi tsabe;

kꞌoa̱ nga koi̱nchrꞌoé jme xi tinoꞌyaò jòn,

kꞌoa̱ lìkoi kinchrꞌoé».

25 Kꞌoa̱ to̱ i̱i koan tsakasèn‑ndo jngo chjo̱ta̱ xi síkꞌatoya jme xi tsòya kjoa̱téxoma‑le̱ Niná xi kiski Moisés,

kiskòtꞌayàkao̱ Jesús nga kitsò‑le̱:

—Ji xi bakòyai,

jmé xi machjén nga sꞌian nga koa̱n sꞌe̱‑na kjoa̱bijnachon xi tsìkꞌia fetꞌa.

26 Jesús kitsò‑le̱:

—Jmé xi tjítꞌa ya̱ xo̱n kjoa̱téxoma‑le̱ Niná xi kiski Moisés.

Jótsò jña bꞌèxkiai̱.

27 Kꞌia̱ jè chjo̱ta̱ xo̱kji,

kinchja̱ kitsò:

—“Kàtamatsjoachai jè Nai‑li̱ Niná‑li̱ kao̱ ngayije ni̱ma̱‑li̱,

kao̱ ngayije kjoa̱bijnachon‑li̱,

kao̱ ngayije nganꞌión‑li̱,

kꞌoa̱ kao̱ ngayije kjoa̱faꞌaitsjen‑li̱”;^d

kꞌoa̱:

“Kàtamatsjoachai chjo̱ta̱ xìngi̱ josꞌìn tsjoachai yao‑li̱”.^e

28 Kꞌia̱ Jesús kitsò‑le̱:

—Ndaà sꞌìn kànòkjoai̱;

kꞌoa̱tꞌiai̱n koi jè,

kꞌoa̱ sꞌe̱e‑lì kjoa̱bijnachon.

29 To̱nga jè koanmeè‑le̱ nga tsakꞌasje kìxi̱ yao‑le̱,

kitsò‑le̱ Jesús:

—Kꞌoa̱ ꞌyá‑ni chjo̱ta̱ xìngia̱a xi koa̱n-tsjoake̱.

30 Kꞌia̱ kinchja̱ Jesús kitsò:

—Jngo chjo̱ta̱ tínchroájen‑ni ya̱ Jerusalén kꞌia̱ nga tífì ya̱ na̱xi̱nandá‑nꞌión Jericó,

kꞌoa̱ chjo̱ta̱ ché kitsoa,

kꞌoa̱ tsakjáꞌa‑le̱ ngayije jme xi yꞌa;

kꞌoa̱ kisikìꞌaon,

saꞌnda meè kisikꞌen,

kꞌoa̱ kitoka jè ché.

31 Nanda‑jàn kꞌia̱ jaꞌajen jngo na̱ꞌmi ya̱ ndia̱a xo̱kji,

kꞌia̱ nga tsabe to̱saà to̱ kindia̱a.

32 Kꞌoa̱ti̱ jaꞌa jngo chjo̱ta̱ xi ntje̱‑le̱ Leví tje̱n‑ni xi ya̱ síxá ya̱ yo̱ngo̱,

kꞌia̱ nga kichòchrian ya̱ jña kijnatsꞌatje̱n xi kinìkìꞌaon,

kꞌia̱ nga tsabe,

to̱saà to̱ kindia̱a.

33 To̱nga jngo chjo̱ta̱ xi ya̱ ꞌnde Samaria tsꞌe̱,

xi ya̱ tífaꞌa,

kꞌia̱ nga jaꞌaitꞌachrian‑le̱,

tsabe jè xi kinìkìꞌaon kꞌoa̱ koanma̱ke;

34 kꞌoa̱ tsakasèn‑tꞌachrian‑le̱,

tsakájtéjon ngayije jña kinìkìꞌaon,

kitsjòjon sìti̱ kao̱ ndá totseè jchá;

kꞌoa̱ ya̱ cho̱ chꞌá‑le̱ kisikájnasòn,

kikao̱ ya̱ ndꞌia jña ma síkjáya chjo̱ta̱,

kꞌoa̱ kisikoìnda̱.

35 Kꞌia̱ nga je tífì nga koan‑nchaon‑ni,

kꞌoa̱tjín tao̱n tsꞌasje jotjín machjí‑le̱ cho̱ꞌnda nga jaò ni̱chrjin,

kꞌoa̱ kitsjoa‑le̱ jè xi síkoìnda̱ ndꞌia jña síkjáya chjo̱ta̱,

kꞌoa̱ kitsò‑le̱:

“Ti̱koìnda̱‑lànaí chjo̱ta̱ xo̱kji;

kꞌoa̱ ngayije jokji si̱kjeya‑sai,

aàn kꞌoechjí‑nilè kꞌia̱ nga kjoáꞌai̱‑nia”.

36 Kꞌoa̱ jósi nda̱ ji ndꞌai̱,

kꞌia̱ nga kijnatsꞌatje̱n chjo̱ta̱ xi kinìkìꞌaon,

jókji nga jàn chjo̱ta̱ xo̱kjoan xi chjo̱ta̱ xínkjín koan jè xi kinìkiꞌaon.

37 Kꞌia̱ kitsò jè chjo̱ta̱ xi síkꞌatoya jmè xi tsòya‑ni kjoa̱téxoma‑le̱ Niná xi kiski Moisés:

—Jè‑jìn xi koanma̱ke.

Kꞌia̱ Jesús kitsò‑le̱:

—Tꞌin,

kꞌoa̱ti̱ tꞌiai̱n tsàndaji.

38 Kꞌoa̱koan kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ tje̱nyandia̱a,

jaꞌasꞌen jngo na̱xi̱nandá‑ꞌndí;

kꞌia̱ jngo chjo̱on xi Marta ꞌmì kiskoétjaò ngatsꞌi ya̱ ndꞌia‑le̱.

39 Kꞌoa̱ Marta tíjna jngo‑le̱ ndichja xi María ꞌmì,

xi tsakꞌèjnangi ndso̱ko̱ Jesús,

nga tsakasén‑ño én‑le̱.

40 To̱nga Marta to̱koiì nꞌión koan‑kjájon‑le̱ nga tse xá tísꞌín ya̱ ya ndꞌia,

kꞌia̱ jaꞌainchrꞌoè Jesús,

kitsò‑le̱:

—Nai,

a tsí makjájon‑lì nga to̱ an kàsíkꞌéjna‑na xá jè chjo̱on tìchja.

Kꞌoa̱tꞌìn‑lai̱ni nga kàtabasèn‑kao̱‑na.

41 Kꞌia̱ kinchja̱ Jesús,

kitsò‑le̱:

—Marta,

Marta,

nꞌión kjimasijtà‑jìn xi to̱ tꞌatsꞌe̱ nga nꞌión nkjìn kjoa̱ tinìkjájon‑lai̱ yao‑li̱.

42 To̱nga to̱ jngoò kjoa̱ xi nꞌión machjén;

kꞌoa̱ María koiì kàkjoéjin xi ngìsa̱ nda tjín,

jè xi tsìkꞌia tjóxìn‑le̱.