Jesús ñato chjo̱ta̱ xi ya̱ kòtꞌayàtꞌa‑le̱ tsakakó‑le̱ yao‑le̱
21
Xi je koan kjoa̱ jè,
Jesús ngìjngokꞌà tsakakó‑le̱ yao‑le̱ ya̱ ndai ndáchikon xi Tiberias nchja̱‑ni jè chjo̱ta̱ xi ya̱ kòtꞌayàtꞌa‑le̱;
kꞌoa̱ i̱i koan kꞌia̱ nga tsakakó‑le̱ yao‑le̱:
2 Ya̱ ñatje̱n tjió Simón Pedro,
kao̱ Tomás xi Dídimo ꞌmì‑le̱,
kao̱ Natanael jè xi ya̱ tsꞌe̱ na̱xi̱nandá Caná xi nchja̱‑ni ꞌnde Galilea,
kao̱ xti‑le̱ Zebedeo,
kꞌoa̱ kao̱ xi ngìjaò sa chjo̱ta̱ xi ya̱ kòtꞌayàtꞌa‑le̱ Jesús.
3 Simón Pedro kitsò‑le̱:
—Jti̱i tìfitsoa‑jiàn.
Jè xikꞌa kitsò‑le̱:
—Kꞌoa̱ati̱ timangín‑kao̱‑laìji̱n.
Ki,
kꞌoa̱ jaꞌasꞌen jngo chitso;
kꞌoa̱ kꞌia̱ nga koi ni̱tje̱n ni̱jme‑jìn jti̱ kitsoa.
4 Kꞌia̱ nga je kjima‑isen,
Jesús kichò kasènjna ya̱ ndai ndáchikon;
to̱nga jè chjo̱ta̱ xi ya̱ kòtꞌayàtꞌa‑le̱ lìkoi be tsà jè‑ni Jesús.
5 Kꞌia̱ kitsò‑le̱:
—ꞌNdí xti,
a kàsokó choa‑no jti̱.
Jè chjo̱ta̱ xi ya̱ kòtꞌayàtꞌa‑le̱ kitsò‑le̱:
—Mai,
ni̱jme‑jìn xi kàsokó‑naji̱n.
6 Jesús kitsò‑le̱:
—Ti̱kꞌatje̱n‑ngindaó jè na̱ꞌya ya̱ ngakìxi̱‑le̱ chitso,
kꞌoa̱ so̱kò‑no jti̱.
Kꞌia̱ jè chjo̱ta̱ xi ya̱ kòtꞌayàtꞌa‑le̱ kisikꞌatje̱n‑ngindá na̱ꞌya,
kꞌoa̱ saꞌnda to̱ꞌya koan kitjoꞌndó‑nile̱ na̱ꞌya nga̱ nꞌión nkjìn ma jti̱ xi kixincha na̱ꞌya.
7 Kꞌia̱ jè chjo̱ta̱ xi ya̱ kòtꞌayàtꞌa‑le̱ Jesús xi nꞌión tsjoake,
kitsò‑le̱ Pedro:
—¡Jé Nai‑ná Jesús xo̱kji!
Kꞌia̱ nga kinchrꞌoé Simón Pedro nga jè Nai‑ná,
tsakꞌakjá najño sòngꞌa‑le̱ (nga̱ bꞌasjeè kꞌia̱ nga tsoa jti̱),
kꞌoa̱ kiskìngi chitso,
kisken‑ndá nga kinchrꞌoè Jesús.
8 Kꞌoa̱ jè chjo̱ta̱ xikꞌa xi ya̱ kòtꞌayàtꞌa‑le̱ Jesús jaꞌaikao̱ chitso,
tsakꞌéꞌndójbe na̱ꞌya nga̱ nꞌión nkjìn jti̱ ncha,
nga̱ jeè chrian kijna nangi,
jngo ciento̱‑la̱ metro kjin kijna.
9 Kꞌia̱ nga je kitjojen‑ni chitso,
tsabe nio̱xtìla̱ kꞌoa̱ ya̱ jin xólꞌí jngo jti̱ kjichján.
10 Jesús kitsò‑le̱:
—Nchroákao̱o jti̱ xi sꞌa̱ kàndoao.
11 Kꞌia̱ Simón Pedro kikin chitso,
tsakꞌasjengindá na̱ꞌya,
kijnakitse jti̱ xi nꞌión yꞌai kjoan,
jngo ciento̱ kao̱ ñachàte‑jàn ma‑ni;
to̱nga nda tsà nkjìn ma‑ni jti̱,
lìkoi kixijndà na̱ꞌya.
12 Jesús kitsò‑le̱:
—Nchroaó,
kꞌoa̱ ti̱cho.
Kꞌoa̱ ni̱jngo‑jìn chjo̱ta̱ xi ya̱ kòtꞌayàtꞌa‑le̱ xi koan‑nꞌión kon nga kiskònangi‑le̱:
«ꞌYá‑ni ji».
Nga̱ beè nga jè Nai‑ná.
13 Kꞌia̱ Jesús tsakasèn‑chrian sa kꞌoa̱ kiskoé jè nio̱xtìla̱ kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱ kꞌoa̱ti̱ kitsjoa‑le̱ jti̱.
14 Ya̱a je jàn‑ni kꞌa nga Jesús tsakakó‑le̱ yao‑le̱ jè chjo̱ta̱ xi ya̱ kòtꞌayàtꞌa‑le̱,
kꞌia̱ nga je jaꞌáyajin‑nile̱ kꞌen.
Chóꞌndai barrè‑na̱
15 Kꞌia̱ nga je koan tsakjèn,
Jesús kitsò‑le̱ Simón Pedro:
—Simón,
ꞌndí‑le̱ Jonás,
a ngìsa̱a tsjoacha‑naí ji ti̱kꞌoa̱‑ni ngatsꞌi chjo̱ta̱ xo̱kjoan.
Pedro kitsò:
—Jaon,
Nai;
jiì ꞌyai nga mìyo̱ chobá.
Jesús kitsò‑le̱:
—Chóꞌndai barrè ꞌndí‑na̱.
16 Jesús ngìndia kiskònangi‑le̱ xi ma‑ni jaòkꞌa:
—Simón,
ꞌndí‑le̱ Jonás,
a tsjoacha‑naí.
Pedro kitsò‑le̱:
—Jaon,
Nai,
jiì ꞌyai nga mìyo̱ chobá.
Jesús kitsò‑le̱:
—Chóꞌndai barrè‑na̱.
17 Kꞌia̱ kitsò‑le̱ xi ma‑ni jàn‑kꞌa:
—Simón,
ꞌndí‑le̱ Jonás,
a tsjoacha‑naí nga mìyo̱ chobá.
Kꞌia̱ koanba‑le̱ Pedro nga kitsòngá‑nile̱ xi ma‑ni jàn‑kꞌà:
«A tsjoacha‑naí nga mìyo̱ chobá».
Kꞌoa̱ Pedro kitsò‑le̱:
—Nai,
jiì ꞌyai ngayije,
ji ꞌya‑ní nga mìyo̱ chobá.
Jesús kitsò‑le̱:
—Chóꞌndai barrè‑na̱.
18 Ñaki kìxi̱i,
xi xin‑lè:
Kꞌia̱ nga sꞌa̱ xti‑jìn,
to̱ jiì kichꞌàkjaí najño‑li̱,
kꞌoa̱ kꞌin‑nì jña‑ni nga koanme‑lì;
to̱nga kꞌia̱ nga je koa̱njchaí,
to̱ kjoéngꞌa‑ní ndsai̱,
kꞌoa̱ kja̱ꞌaí xi si̱ikꞌakjá‑lì najño‑li̱,
kꞌoa̱ ya̱a koai̱kao̱‑lì jña‑ni nga tsì ji me‑lì.
19 Koiì kꞌoa̱kitsò‑ni,
nga kitsòya jósꞌìn koi̱yá nga kꞌoa̱sjejeya Niná.
Kꞌia̱nga je kꞌoa̱ kitsò,
kitsò‑sale̱:
—Nchroátje̱n‑ngi‑naí.
Jè chjo̱ta̱ xi ya̱ kòtꞌayàtꞌa‑le̱ Jesús xi nꞌión tsjoake
20 Kisikꞌófaya Pedro,
tsabe nga kꞌoa̱ti̱ ya̱ tje̱n‑ngi jè chjo̱ta̱ xi nꞌión tsjoake Jesús xi ya̱ kòtꞌayàtꞌa‑le̱,
jè xi tsakꞌèjnatꞌa‑le̱ Jesús kꞌia̱ nga tsakjèn nga njiòn,
xi kꞌoa̱ kitsò‑le̱ nga kꞌia̱:
«Nai,
ꞌyá‑ni xi tsjoátꞌa‑lì».
21 Kꞌia̱ nga Pedro tsabe,
kitsò‑le̱ Jesús:
—Nai,
kꞌoa̱ jè chjo̱ta̱ xo̱kji,
jókoa̱n‑ni.
22 Jesús kitsò‑le̱:
—Tsà me‑na nga kàtabꞌèjna jo saꞌnda nga kjoàꞌai̱ ngìndia‑nia,
jmé xi ji bꞌakao̱‑lì.
Ji nchroátje̱n‑ngi‑naí.
23 Nga kꞌia̱ jè én xo̱ tsò tsangaba ya̱ jin‑le̱ ndsꞌeè nga jè chjo̱ta̱ xo̱kji xi ya̱ kòtꞌayàtꞌa‑le̱ Jesús lìkoi koi̱yá.
To̱nga Jesús lìtsà koi‑jìn xi kitsò‑le̱ nga tsì koi̱yá,
to̱kꞌoa̱a kitsò:
«Tsà me‑na nga kàtabꞌèjna jo saꞌnda nga kjoàꞌai̱ ngìndia‑nia,
jmé xi ji bꞌakao̱‑lì».
24 Jè chjo̱ta̱ xo̱kji xi nꞌión tsjoake Jesús,
xi ya̱ kòtayàtꞌa‑le̱,
jè‑ní xi tsjoá én xi tꞌatsꞌe̱ ngayije kjoa̱ xi koan,
kꞌoa̱ jé kiski kjoa̱ jè,
kꞌoa̱ ꞌya‑niá nga jè én xi kitsjoa ñaki kìxi̱‑ní.
25 Kꞌoa̱ nꞌión nkjìn sa kjoa̱ tjín xi kisꞌin Jesús,
tsà jngó jngó chjítꞌa xo̱n,
kꞌoa̱axian an,
nga ni̱ i̱ jìn soꞌnde jchóya ngayije xo̱n xi chjítꞌa tꞌatsꞌe̱.
Kꞌoa̱kàtama.